Imibuzo Evela Kubafundi
“IMboniselo” kaNovemba 1, 1995, yatsalela ingqalelo kumazwi kaYesu akuMateyu 24:34 athetha “ngesi sizukulwana.” Ngaba loo ngxubusho ibangela ithandabuzeke into yokuba uBukumkani bukaThixo bamiselwa emazulwini ngowe-1914?
Laa ngxubusho yeMboniselo ayizange itshintshe nento le kwimfundiso yethu esisiseko mayela nowe-1914. UYesu wanikela umqondiso owawuya kuphawula ubukho bakhe eseBukumkanini. Sinobungqina obuninzi bokuba loo mqondiso wazaliseka ngowe-1914. Ibe sonke singabalisa kude kutshone ilanga ngeemfazwe iindlala, oobhubhani, iinyikima, nangobunye ubungqina obubonisa ukuba uYesu ebelawula njengoKumkani woBukumkani bukaThixo ukususela ngowe-1914. Oku kubonisa ukuba ukususela ngoko besiphila esiphelweni sale nkqubo yezinto.
Ngoko ke, yintoni eyayicaciswa yile Mboniselo? Kaloku, yayicacisa indlela uYesu awalisebenzisa ngayo igama elithi “isizukulwana” kuMateyu 24:34. Le ndinyana ifundeka ngolu hlobo: “Enyanisweni ndithi kuni esi sizukulwana asisayi kuze nangayiphi na indlela sidlule de zonke ezi zinto zenzeke.” Wayethetha ukuthini uYesu ngegama elithi “isizukulwana,” ngomhla wakhe nakulo wethu?
Izibhalo ezininzi zibonisa ukuba uYesu akazange asebenzise igama elithi “isizukulwana” ebhekisela kwiqela elithile elincinane okanye elikhethekileyo, njengeenkokeli zamaYuda okanye abafundi bakhe abanyanisekileyo. Kunoko, wasebenzisa igama elithi “isizukulwana” egxeka izihlwele zamaYuda ezazimchasile. Noko ke, okuvuyisayo kukuba, abantu banokwenza oko umpostile uPetros wakukhuthazayo ngomhla wePentekoste, esithi guqukani nize ‘nisindiswe kwesi sizukulwana sigoso.’—IZenzo 2:40.
Kuloo ngxelo, ngokucacileyo uPetros wayengabhekiseli kubantu ababephila kwixesha elithile, wayengazami nokudibanisa igama elithi “isizukulwana” nawo nawuphi na umhla. Wayengathi abantu bafanele basindiswe kwisizukulwana esazalwa ngonyaka omnye noYesu okanye esazalwa ngowama-29 C.E. UPetros wayethetha ngamaYuda angakholwayo elo xesha—mhlawumbi amanye ayeselula, amanye sele ekhulile—awayeyazi imfundiso kaYesu, eyibonile imimangaliso yakhe okanye evile ngayo, nangazange amamkele njengoMesiya.
Licacile elokuba leyo yindlela uPetros awayekuqonda ngayo ukusebenzisa kukaYesu igama elithi “isizukulwana” xa yena kunye nabanye abapostile babekwiNtaba yemiNquma kunye noYesu. Ngokutsho kwamazwi esiprofeto sikaYesu, amaYuda elo xesha—ngokusisiseko, isizukulwana sikaYesu—ayeza kubona okanye eve ngeemfazwe, iinyikima, iindlala nobunye ubungqina obabuya kubonisa ukuba isiphelo senkqubo yamaYuda sasisondele. Enyanisweni, eso sizukulwana asizange sidlule ngaphambi kokuba isiphelo sifike ngowama-70 C.E.—Mateyu 24:3-14, 34.
Kumele kuvunywe ukuba la mazwi kaYesu besingasoloko siwaqonda ngolo hlobo. Abantu abangafezekanga banotyekelo lokufuna ukwazi ngokuthe ngqo ixesha esiya kufika ngalo isiphelo. Khumbula ukuba nabapostile babefuna ixesha elithe ngqo, xa babuza besithi: “Nkosi, ububuyisela ngeli xesha na ubukumkani kuSirayeli?”—IZenzo 1:6.
Beneenjongo ezifanayo ezinyanisekileyo, abakhonzi bakaThixo banamhlanje baye ngokusuka koko kwathethwa nguYesu “ngesizukulwana” bazama ukufumanisa ixesha elichanileyo elinokubalwa ukususela ngowe-1914. Ngokomzekelo, enye indlela yokuqiqa yeyokuba isizukulwana sinokuba yiminyaka engama-70 okanye engama-80 ubude, yaye senziwa ngabantu abakhule ngokwaneleyo ukuba bangayiqonda intsingiselo yemfazwe yehlabathi yokuqala nezinye izinto ezenzekayo; ngalo ndlela sinako ukubala size sibone indlela esikufuphi ngayo isiphelo.
Noko ke, kungakhathaliseki ukuba intle kangakanani na le ndlela yokucinga, ngaba ibivisisana nesiluleko sikaYesu asinikele ngokubhekele phaya? UYesu wathi: “Ngokuphathelele loo mhla nelo lixa akukho bani waziyo, azazi neengelosi zamazulu engazi noNyana, kodwa nguBawo kuphela. . . . Ngoko ke, hlalani nilindile, ngenxa yokuba aniwazi umhla eza ngawo iNkosi yenu.”—Mateyu 24:36-42.
Ngoko ke le nkcazelo siyifumene kutshanje kule Mboniselo ‘engesi sizukulwana’ ayiyitshintshanga kwaphela indlela esikwazi ngayo oko kwenzeka ngowe-1914. Kodwa isicacisela ngokuthe gca indlela uYesu awalisebenzisa ngayo igama elithi “isizukulwana,” isinceda sibone ukuba ukusebenzisa kwakhe eli gama akusiniki sizathu sakube sibala—sibala ukususela kowe-1914—ukuze sibone indlela esikufuphi ngayo kwisiphelo.