Imibuzo Evela Kubafundi

Saba nemincili xa sasifunda ngomzekeliso kaYesu wezimvu neebhokhwe. Ngenxa yale ndlela intsha esiwuqonda ngayo echazwe kwi-“Mboniselo” kaOktobha 15, 1995, ngaba sisenokutsho ukuba amaNgqina kaYehova namhlanje anesabelo kumsebenzi wokwahlula?

Ewe. Ngesizathu esiqondakalayo, abaninzi baye bazibuza oku ngenxa yokuba uMateyu 25:31, 32 uthi: “Xa uNyana womntu efika ekuzuko lwakhe, nazo zonke iingelosi zikunye naye, uya kwandula ke ahlale phantsi kwitrone yakhe ezukileyo. Kwaye zonke iintlanga ziya kuhlanganiselwa phambi kwakhe, yaye uya kwahlula abantu omnye komnye, kanye njengokuba umalusi esahlula izimvu ezibhokhweni.” IMboniselo kaOktobha 15, 1995, yabonisa isizathu sokuba ezi ndinyana zisebenze emva kokuba imbandezelo enkulu iqalisile. UYesu uza kufika ekuzuko lwakhe neengelosi zakhe aze ahlale kwisihlalo sakhe sokugweba. Emva koko, uza kwahlula abantu. Ngayiphi ingqiqo? Uza kwenza izigqibo ezisekelwe koko abantu bakwenzileyo nabangakwenzanga ngaphambi kwelo xesha.

Oku sinokukufanisa nenkqubo yokumangalelana ekhokelela kwityala elixoxwa enkundleni. Ubungqina buya busanda ngaphambi kokuba inkundla iwise isigwebo. Ubungqina bokuba abantu abaphilayo ngoku baza kuba zizimvu okanye iibhokhwe bebusanda kangangexesha elide. Ibe busanda nangoku. Kodwa xa uYesu ehlala etroneni yakhe, ityala liza kuzinziswa. Uza kuba ekulungele ukuwisa isigwebo. Abantu baza kwahlulelwa ukuba banqunyulwe okanye bafumane ubomi obungunaphakade.

Noko ke, isibakala sokuba ukwahlulelwa kwabantu ebomini okanye ekufeni okukhankanywe kuMateyu 25:32 kuseyinto yexesha elizayo asithethi kuthi akwahlulwa ngaphambi kwelo xesha. IBhayibhile, kuMateyu isahluko 13, ikhankanya omnye wemisebenzi yokwahlula owenziwa kusengaphambili. Okubangel’ umdla kukuba, incwadi ethi Ukumanyana Ekunquleni Okuphela KoThixo Oyinyaniso, iphepha 179-80, lo mbandela iwuxubusha phantsi komxholo othi “Ukwahlulwa Kwabantu”.a Le ncwadi ithi: “Zikwakho nezinye iziganeko ezibalulekileyo uYesu awazinxulumanisa ngokubalaseleyo nokupheliswa kwale nkqubo yezinto. Ezinye zezi ziganeko kukwahlulwa ‘koonyana bobukumkani’ besahlulwa ‘koonyana bongendawo.’ UYesu wathetha ngoku kumzekeliso wakhe ongentsimi enengqolowa eyaphinda yafakwa umdiza lutshaba.”

Le ncwadi yayibhekisa kumzekeliso kaYesu awawuchaza kuMateyu 13:24-30 waza wawucacisa kwindinyana 36-43. Phawula ukuba kwindinyana 38 imbewu entle yengqolowa imela oonyana boBukumkani, kodwa ukhula lumela oonyana bongendawo. Indinyana 39 neyama-40 ibonisa ukuba ‘ekuqoshelisweni kwenkqubo yezinto’—ixesha esiphila kulo ngoku—ukhula luyaqokelelwa. Lubekelwa bucala luze ekugqibeleni lutshiswe, lutshatyalaliswe.

Lo mzekeliso uthetha ngamaKristu athanjisiweyo (abizwa ngokuba ngabazalwana bakaYesu kumzekeliso wezimvu neebhokhwe). Sekunjalo, kucaca mhlophe ukuba umsebenzi obalulekileyo wokwahlula uyenziwa ebudeni bexesha lethu, abathanjiswa besahlulwa kwabo bazibiza ngokuba bangamaKristu kodwa abazingqina ‘bengoonyana balowo ungendawo.’

UYesu wachaza eminye imizekelo yokwahlulwa kwabantu. Khumbula ukuba wathetha oku ngendlela ebanzi ekhokelela entshabalalweni: “Baninzi abo bangena ngayo.” (Mateyu 7:13) Lawo yayingengomagqabaza nje achaza oko kuya kuba ngumphumo ekugqibeleni. Ngamagqabaza awayephathelele iziganeko eziqhubekayo, kanye njengokuba kunjalo ngabo bambalwa abafumana indlela emxinwa ekhokelela ebomini. Khumbula kwakhona ukuba, xa wayethuma abapostile bakhe, uYesu wathi babeza kufumana abanye ababeya kufaneleka. Abanye babengayi kufaneleka, ibe abapostile kwakuya kufuneka bavuthulule uthuli ezinyaweni zabo “ukuze kube bubungqina nxamnye” nabo bantu. (Luka 9:5) Ngaba izinto ezinjalo azenzeki namhlanje njengoko amaKristu eqhubeka nobulungiseleli bawo basesidlangalaleni? Abanye basabela kakuhle, ngoxa abanye besichasa isigidimi sikaThixo esisidluliselayo.

Amanqaku eMboniselo awayexubusha ngezimvu neebhokhwe athi: “Nangona umgwebo ochazwe kulo mzekeliso usondele, kwanangoku kukho into ebalulekileyo eyenzekayo. Thina maKristu sibandakanyeke kumsebenzi osindisa ubomi wokuvakalisa isigidimi esibangela ukwahlukana phakathi kwabantu. (Mateyu 10:32-39).” Kwezi ndinyana zikaMateyu isahluko 10, sifunda ukuba uYesu wathi ukumlandela kwakuya kudala iiyantlukwano—ubawo nxamnye nonyana, intombi nxamnye nonina.

Ekugqibeleni, abazalwana abathanjisiweyo bakaKristu baye bakhokela kumsebenzi wokushumayela isigidimi soBukumkani ehlabathini lonke. Njengoko abantu besiva yaye besabela ngomdla okanye bechasa, bayazahlula. Thina bantu asinako, yaye asifanele sithi, ‘Lo mntu yimvu; lo yibhokhwe,’ ngokwengqiqo edluliselwa nguMateyu isahluko 25. Noko ke, ukudlulisela kwethu iindaba ezilungileyo ebantwini kubavulela ithuba lokubonakalisa icala abema ngakulo—oko bakuko nendlela abasabela ngayo kubazalwana bakaYesu. Ngenxa yoko, njengobungqina obandayo benkundla yamatyala, umahluko phakathi kwabo baxhasa abazalwana bakaYesu nabo bangavumiyo ukubaxhasa uya ubonakala. (Malaki 3:18) Njengoko IMboniselo yabonisayo, kungekudala uYesu uza kuhlala etroneni aze awise isigwebo, baze ekugqibeleni abantu bagwetywe njengabafanele ubomi okanye ukunqunyulwa.

[Imibhalo esemazantsi]