Amachule Omthambo Anyuka Iingxondorha Zeentaba
KANYE ngakunxweme olusentshona loLwandle Olufileyo kwakukho isixeko samandulo yaye sasingqonge intlango ebizwa ngokuba yiEngedi. Iingxingwa ezinamawa kulo mmandla nemiwonyo iba likhaya elihle leebhokhwe zeLizwe Ledinga ezihlala ezintabeni, ezifana nezi uzibona apha.
Esi sidalwa sinamanqina awomeleleyo siphakathi kwezinye izilwanyana ezimangalisayo. Makhe sityhile iiBhayibhile size sisiphonononge esi silwanyana sihle.
‘Iintaba Zona Ezo Ziphakamileyo Zezeebhokhwe Zasezintabeni’
Wavuma ingoma esitsho umdumisi. (INdumiso 104:18, thelekisa iNW.) Ezi bhokhwe zixhotyiswe kakuhle ukwenzela ukuhlala kwiindawo eziphakamileyo! Zigqotsa zenjenjeya kuloo maxethuka zingenaxhala lakuwa. Oku kubangelwa ngokuyinxenye yindlela ezakheke ngayo iimpuphu zazo. Le ndawo luthe qhiphu uphuphu kuyo iyanwebeka ngenxa yobunzima bebhokhwe leyo, into ke eyenza esi silwanyana sikwazi ukubambelela nkqi xa simile okanye xa sihambahamba kungqameko olumxinwa lweliwa.
Ezi bhokhwe zikwanobuchule obungathethekiyo bokucangcatha. Zinokwenza umtsi omde zize zithi gxada kungqameko oluncinane kakhulu ezingenakukwazi ukuma ngawo omane amanqina kulo. Isazi ngebhayoloji uDouglas Chadwick sakha sakh’ umkhanya sijonge ibhokhwe yasezintabeni elolunye uhlobo isebenzisa ubuchule bayo bokucangcatha ukuze ingazibhaqi ikungqameko olumxinwa kakhulu ukuze ingakwazi ukujika. Sithi xa sithetha: “Emva kokuba ithe krwaqu kungqameko olungezantsi kangangeenyawo ezingama-400 [iimitha ezili-120], le bhokhwe yatshela ngamanqina ayo angaphambili yaza ithe chu yanyusa la angasemva ngokungathi yenza uqulukubhode. Njengoko ndandibamb’ amazinyo, le bhokhwe yaqhubeka de amanqina angasemva ehla ukuze iphinde ijonge apho ibivela khona.” (National Geographic) Alimangalisi ke ngoko elokuba ezi bhokhwe ziye zabizwa ngokuba “ngamachule omthambo anyuka iingxondorha zeentaba”!
‘Uyalazi Na Ixesha Lokuzala Kweebhokhwe Zasezintabeni?’
Iibhokhwe zasezintabeni zizilwanyana eziyiminyewu kakhulu. Zikholwa kukuzenza amakheswa ebantwini. Eneneni, kunzima ukuba abantu basondele kuzo ukuze baziqwalasele zikwimo yazo yasendle. Ngaloo ndlela, uMnini ‘wamarhancwa asezintabeni aliwaka’ ngokufanelekileyo wayenokumbuza oku uYobhi: “Uyalazi na ixesha lokuzala kwamagogo asemaweni [“kweebhokhwe zasezintabeni,” NW]?”—INdumiso 50:10, NW; Yobhi 39:1.
Imazi yebhokhwe yasezintabeni ilixelelwa lithuku elinikwe nguThixo ixesha lokuzala. Iye ifune indawo ekhuselekileyo ize izale itakane elinye okanye amabini, ngokuqhelekileyo ekupheleni kukaMeyi okanye ngoJuni. Amatakane asandul’ ukuzalwa aye aqhathule kwiintsukwana nje ezimbalwa.
‘Imazi Yexhama Elithandekayo Neyebhokhwe Yasezintabeni Entle’
UKumkani uSolomon osisilumko wabongoza amadoda esithi: “Uvuye ngumfazi wobutsha bakho; makabe yimazi yexhama elithandekayo, neyegogo [“ibhokhwe yasezintabeni,” NW] elihle.” (IMizekeliso 5:18, 19) Oku kwakungathethelwa ukuwathob’ isidima amabhinqa. Kuyabonakala ukuba uSolomon wayebhekisela kubuhle, kumkhitha nezinye iimpawu ezibalaseleyo zezi zilwanyana.
Ibhokhwe yasezintabeni iphakathi ‘kwemiphefumlo ephilileyo’ enikela ubungqina obeyisayo bobulumko boMdali. (Genesis 1:24, 25) Ngaba akusivuyisi kusini na ukuba uThixo eye wasijikeleza ngezidalwa ezihle nezininzi kangaka?
[Umfanekiso okwiphepha 24]
Courtesy of Athens University