Isazela Ngaba Siluxanduva Okanye Siluncedo?
‘ISAZELA sam siyandikhathaza!’ Ngamaxesha athile, sonke phantse sikhe sayiva intlungu yokukhathazwa sisazela. Iimvakalelo ezinjalo zisenokususela nje ekubeni uzive ungakhululekanga ukusa kwintlungu enzulu. Isazela esenzakeleyo sinokubangela udandatheko okanye ukuziva ungungantweni.
Ngoko, xa sijonga kule nkalo, ngaba isazela asiloxanduva? Bambi basenokuvakalelwa kukuba silulo. Izizukulwana zangaphambili ngokufuthi zazisigqala isazela njengophawu lwemvelo, into ozalwe unayo. Abaninzi bavakalelwa kukuba sasilukhokelo lokuziphatha esalufumana ngokuthe ngqo kuThixo. Ngaloo ndlela isazela siye sabizwa ngokuba “bubukho bukaThixo emntwini,” “indalo yethu yokwemvelo,” ‘kwanelizwi likaThixo.’
Noko ke, kwiminyaka yakutshanje, kuye kwaxhaphaka ukuba kuthiwe isazela siluphawu oluzuziweyo—sibangelwa ngabazali nebutho lasekuhlaleni. Ngokomzekelo, izazinzulu ngengqondo ziphikisa ngelithi umntwana ufunda ukukuphepha ukungabi nasimilo ngokuyintloko kuba esoyika ukohlwaywa, ekholelwa ukuba oko sikubiza ngokuba sisazela kunokuthiwa kukwamkela imilinganiselo yokuziphatha yabazali noko bakukholelwayo. Abanye bathi yindima ibutho labantu elinayo ekudluliseleni imilinganiselo yokuziphatha nemigaqo. Bambi bayigqala intlungu yesazela njengento nje engumlo phakathi koko sinqwenela ukukwenza noko ibutho labantu elicinezelayo elinqwenela ukuba sikwenze!
Phezu kwazo nje ezi ngcamango ngesazela, ngokufuthi abantu baye abavisisana nabazali, iintsapho nalo lonke ibutho labantu ngenxa yokuba isazela sabo sibaxelele ukuba mabenze oko. Abanye baye bakulungela ukuncama ubomi babo ngenxa yesazela! Yaye phezu kwawo nje umahluko okhoyo phakathi kwempucuko yehlabathi, izenzo ezinjengokubulala, ubusela, ukukrexeza, ukuxoka nombulo phantse zijongwa njengezingalunganga emhlabeni wonke. Ngaba oku akungqini ukuba isazela luphawu lokwemvelo, uzalwa naso?
Isazela—Imbono YeBhayibhile
Elona gunya liphakamileyo kulo mbandela nguYehova uThixo. Ngapha koko, ‘nguThixo owasenzayo, asisithi.’ (INdumiso 100:3) Uyiqonda ngokwenene indlela esenziwe ngayo. ILizwi likaThixo, iBhayibhile, licacisa lisithi umntu wenziwe “ngokomfanekiselo” kaThixo. (Genesis 1:26) Umntu wadalwa ekwazi okulungileyo nokungalunganga; ukususela kwasekuqaleni, isazela saba yinxalenye yendalo yomntu.—Thelekisa iGenesis 2:16, 17.
Umpostile uPawulos wakungqina oku kwileta yakhe eyayisiya eRoma, xa wabhala esithi: “Xa sukuba abantu beentlanga abangenawo umthetho [kaThixo] besenza ngemvelo izinto zomthetho, aba bantu, nangona bengenawo umthetho, bangumthetho kubo ngokwabo. Ngabo kanye ababonakalisa umbandela womthetho ubhalwe ezintliziyweni zabo, ngoxa isazela sabo singqinelana nabo yaye, phakathi kwiingcamango zabo, bayamangaleleka okanye bade bangxengxezeleke.” (Roma 2:14, 15) Phawula ukuba abo bangazange bakhuliswe phantsi koMthetho kaThixo owawunikwe amaYuda babesalandela eminye imigaqo yomthetho kaThixo, kungekhona ngenxa yokunyanzelwa luluntu, kodwa “ngenxa yemvelo”!
Ngoko ke, ekubeni isazela singeloxanduva, sisipho esingokobuthixo, siluncedo. Kuyavunywa ukuba, sinokubangela intlungu. Kodwa xa sinyamekelwe ngokwenene, sinokusivuza ngeemvakalelo zokwaneliseka ngokwenene noxolo lwangaphakathi. Sinokusikhokela, sisikhusele size sisikhuthaze. IThe Interpreter’s Bible ithi: “Ubani unokuzigcina ephilile ngokwasengqondweni nangokweemvakalelo kuphela xa ezama ukuvala umsantsa ophakathi koko akwenzayo noko avakalelwa kukuba umele akwenze.” Unokuwuvala njani loo msantsa? Ngaba kunokwenzeka ukuxonxa nokuqeqesha isazela sethu? Le mibuzo iza kuphendulwa kwinqaku elilandelayo.