Indlela Onokusiqeqesha Ngayo Isazela Sakho

“ISAZELA esicocekileyo silalisa kamnandi.” Le ntetho indala ibalaselisa inkalo ebalulekileyo: Ukuba siyazithobela izazela zethu, siba noxolo lwangaphakathi nemvisiswano.

Noko ke, asingabo bonke abakhetha ukwenjenjalo. UAdolf Hitler wavakalisa ukuba ukwiphulo lokukhulula abantu kwigongqongqo elithob’ isidima, okanye inkohliso, eyaziwa ngokuba sisazela. Ulawulo lwakhe olwalusoyikeka lwalubonisa ngendlela ehlasimlis’ umzimba indlela abanokukhohlakala ngayo abantu ukuba abasithobeli isazela sabo. Noko ke, oku kunjalo nangezaphuli-mthetho ezinogonyamelo zanamhlanje—ezo zidlwengula zize zibulale ngaphandle kokuzisola. Inani elandayo lezi zaphuli-mthetho lelabo baselula. Ngaloo ndlela incwadi ekuphononongwa kuyo lo mbandela inomxholwana othi Children Without a Conscience.

Ngoxa inkoliso yabantu ingasokuze icinge ngokubandakanyeka kulwaphulo-mthetho olunobundlobongela, abaninzi abanasazela ngokubandakanyeka ekuziphatheni okubi ngokwesini, ukuxoka okanye ukuqhatha. Ehlabathini lonke imilinganiselo yokuziphatha iyawohloka. Ebhekisela kuwexuko olukhulu oluvela kunqulo lokwenyaniso, umpostile uPawulos wabhala esithi bambi kumaKristu babeya koyiswa yimpembelelo yehlabathi yaye ngaloo ndlela ‘izazela zabo ziphawulwe ngokungathi kungentsimbi yokutshisela.’ (1 Timoti 4:2) Namhlanje isisongelo sokunganyaniseki siya sisanda ebudeni bale ‘mihla yokugqibela.’ (2 Timoti 3:1) Ngoko ke, amaKristu amele azame ngamandla ukuze akhusele izazela zawo. Sinokukwenza oku ngokusiqeqesha nangokusiphucula.

Ingqondo, Intliziyo Nesazela Sakho

Umpostile uPawulos wathi: “Ndinixelela inyaniso ndikuKristu; andixoki, ekubeni isazela sam singqinelana nam kumoya oyingcwele.” (Roma 9:1) Ngoko ke isazela sinokuba lingqina. Sinokuhlolisisa indlela yokuziphatha size siyamkele okanye siyigxeke. UMdali wethu ufake kuthi ubukhulu becala imvakalelo yokwahlukanisa okuhle kokubi. Sekunjalo, izazela zethu zinokuxonxwa zize ziqeqeshwe. Njani? Ngokungenisa ulwazi oluchanileyo olufumaneka kwiLizwi likaThixo. Umpostile uPawulos uthi: “Guqukani ngokutshintsha ingqondo yenu, ukuze nikungqine ngokwenu ukulunga nokwamkeleka nokugqibelela kokuthanda kukaThixo.” (Roma 12:2) Njengoko umilisela iingcinga zikaThixo nokuthanda kwakhe engqondweni yakho, isazela sakho siqalisa ukusebenza ngakumbi ngendlela engokobuthixo.

AmaNgqina kaYehova aye anceda izigidi emhlabeni wonke ukuze ‘zingenise ulwazi ngoYehova uThixo nangoYesu Kristu.’ (Yohane 17:3) Ngelungiselelo lawo lesifundo seBhayibhile sekhaya sesisa, afundisa abo bantliziyo zinyanisekileyo imilinganiselo kaYehova uThixo engokwesini, ngeziselo ezinxilisayo, ngomtshato, ngemicimbi yoshishino, nangeminye imibandela eliqela.a (IMizekeliso 11:1; Marko 10:6-12; 1 Korinte 6:9, 10; Efese 5:28-33) Ukungenisa olu “lwazi luchanileyo” linyathelo elibalulekileyo onokulithabatha ukuze uhlakulele isazela esingokobuthixo. (Filipi 1:9) Kambe ke, kwanasemva kokuba umKristu enolwazi oluhle ngeBhayibhile, umele aqhubeke esondla ingqondo yakhe ngeLizwi likaThixo rhoqo ukuba isazela sakhe siza kuhlala siphilile.—INdumiso 1:1-3.

Kwakhona iBhayibhile inxulumanisa isazela nentliziyo yokomfuziselo, nto leyo ebandakanya iimvakalelo neentshukumisa zethu. (Roma 2:15) Ingqondo nentliziyo zimele zisebenze kunye ngemvisiswano ukuba isazela siza kusebenza ngokufanelekileyo. Oku kuthetha ukwenza okungakumbi kunokungenisa inkcazelo engqondweni yakho. Kwakhona umele uyixonxe intliziyo yakho—iintshukumisa zakho zangaphakathi, iminqweno nezilangazelelo zakho. Ngaloo ndlela incwadi yeMizekeliso isebenzisa amabinzana athi “uyithobele ukuqonda intliziyo yakho,” “uyinyathelise intliziyo yakho,” nelithi “yibhekise intliziyo yakho.” (IMizekeliso 2:2; 23:19; 27:23) Enye indlela onokukwenza ngayo oko kungokucamngca nokunikela ingqalelo engakumbi eZibhalweni. INdumiso 77:12 ithi: “Ndicamanga ngako konke ukusebenza kwakho, ndithelekelele ngezenzo zakho zonke ezincamisayo.” Ukucamngca kusinceda sikwazi ukufikelela iimvakalelo neentshukumisa zethu zangaphakathi.

Mhlawumbi masithi, unomkhwa ongacocekanga onjengokukhotyokiswa licuba. Njengenkoliso yabantu, akuthandabuzeki ukuba uyazi kakuhle ingozi elinayo empilweni. Ukanti, phezu kwako nje ukucengwa zizihlobo nayintsapho, uye wakufumanisa kunzima ukuliyeka. Ukucamngca ngesigidimi seBhayibhile kunokusomeleza njani isazela sakho kulo mbandela?

Ngokomzekelo, zama ukucamngca ngamazwi ompostile uPawulos afumaneka kweyesi-2 kwabaseKorinte 7:1 athi: “Ngoko ke, ekubeni sinazo ezi zithembiso, zintanda, masizihlambulule kuko konke ukudyobheka kwenyama nomoya, sigqibelelisa ubungcwele sisoyika uThixo.” Fumana intsingiselo yala mazwi. Zibuze, ‘Eneneni ziziphi “ezi zithembiso” abhekisela kuzo uPawulos?’ Ngokufunda umongo, uya kuphawula ukuba iindinyana ezingaphambili zithi: “‘“Phumani phakathi kwabo, nize nizahlule,” utsho uYehova, “kwaye niyeke ukuchukumisa into engahlambulukanga”’; ‘“yaye ndiza kunamkela.”’ ‘“Yaye ndiya kuba nguyihlo kuni, ibe niya kuba ngoonyana neentombi kum,” utsho uYehova uSomandla.’”—2 Korinte 6:17, 18.

Isibongozo sikaPawulos ‘sokuzihlambulula ekudyobhekeni’ ngoku sinamandla ngakumbi! Njengokhuthazo olunamandla lokwenza oko, uThixo usithembisa ‘ngokusamkela,’ oko kukuthi, asifake phantsi kwephiko lakhe. Usenokuzibuza, ‘Ngaba ndinokunandipha ubuhlobo obusondeleneyo naye—njengobo bonyana okanye intombi noyise?’ Ngaba ingcamango ‘yokwamkelwa’ okanye yokuthandwa nguThixo onothando ayivuyisi? Ukuba loo ngcamango ivakala ingaqhelekanga kuwe, qwalasela indlela oobawo ababonisa ngayo uthando nomsa ebantwaneni babo. Ngoku yiba nomfanekiso-ngqondweni wolo manyano lukho phakathi kwakho noYehova! Okukhona ucamngca ngalo, kokukhona uya kukhula ngakumbi umnqweno wolwalamano olunjalo.

Kodwa phawula: Ukusondelelana noThixo kunokwenzeka ukuba ‘uyayeka ukuchukumisa into engcolileyo.’ Zibuze: ‘Ngaba ukuzenza ikhoboka lecuba akukho phakathi kwezinto “ezingcolileyo” uThixo angazifuniyo? Ngaba ukulisebenzisa kuya kuba ‘kukudyobheka kwenyama,’ ndibe ndizichanaba kuzo zonke iingozi zempilo? Ekubeni uYehova enguThixo ococekileyo, okanye “ongcwele,” ngaba uya kukholiswa kukuzingcolisa kwam ngabom ngale ndlela?’ (1 Petros 1:15, 16) Phawula ukuba kwakhona uPawulos ulumkisa ‘ngokudyobheka komoya kabani,’ okanye utyekelo lwengqondo. Zibuze: ‘Ngaba oku kukhotyokiswa kuyayithimba ingqondo yam? Ngaba ndenza umzamo omkhulu gqitha ukwanelisa lo mnqweno wam, mhlawumbi ndide ndibeke impilo yam, intsapho yam, okanye kwanolwalamano lwam noThixo esichengeni? Ndikuvumele kangakanani ukukhotyokiswa kwam licuba ukuba konakalise ubomi bam?’ Ukujamelana nale mibuzo ikhathazayo kusenokukunika inkalipho yokuyeka!

Kakade ke, usenokufuna uncedo nenkxaso evela kwabanye ukuze uloyise icuba. Ukanti, ukucamngca ngeBhayibhile kunokwenza lukhulu ekuqeqesheni nasekomelezeni isazela sakho ukuze ukwazi ukwahlukana noku kukhotyokiswa.

Xa Sisenza Isiphoso

Phezu kwawo nje umgudu esiwenzayo wokwenza okulungileyo, maxa wambi ukungafezeki kwethu kuye kusoyise size sone. Ngoko izazela zethu ziya kusikhathaza, kodwa sinokuhendeka size sizame ukuzityeshela. Okanye sisenokudimazeka kangangokuba sifune ukuyeka yonke imigudu yokukhonza uThixo. Noko ke, khumbula imeko kaKumkani uDavide. Emva kokukrexeza noBhatshebha, isazela sakhe samthuthumbisa. Echaza intuthumbo awaziva ekuyo wathi: “Imini nobusuku, besinzima phezu kwam isandla sakho. Baguquka ubumanzi bam, baba kukubalela kwasehlotyeni.” (INdumiso 32:4) Ngaba kwakubuhlungu? Ewe! Ukanti le ntlungu ingokobuthixo yashukumisela uDavide ekubeni aguquke aze axolelaniswe noThixo. (Thelekisa eyesi-2 kwabaseKorinte 7:10.) Isibongozo sikaDavide esibuhlungu sokuxolelwa sinikela ubungqina obaneleyo bokuguquka kwakhe ngokunyanisekileyo. Ngenxa yokuba wasiphulaphula isazela sakhe, uDavide wancedwa ukuze atshintshe waza ekugqibeleni wafumana uvuyo.—INdumiso 51.

Oko kusenokwenzeka nanamhlanje. Bambi baye ngaphambili bafundisisa iBhayibhile namaNgqina kaYehova kodwa bayeka xa befunde ukuba ubomi babo abuvisisani nemilinganiselo kaThixo ephakamileyo. Mhlawumbi bebehlalisana okanye bebengamakhoboka emikhwa engacocekanga. Isazela sabo siye sabakhathaza!

Ukuba ukwimeko enjalo, cinga ngamazwi ompostile uPetros ngomhla wePentekoste. Xa wabhenca izono zabantu bakwaYuda, ‘kwathi xhokro ezintliziyweni zabo.’ Kunokuba banikezele, bathobela isiluleko sikaPetros sokuba baguquke, yaye bazuza inkoliseko kaThixo. (IZenzo 2:37-41) Nawe unokwenza ngokufanayo! Kunokuyishiya inyaniso ngenxa yokukhathazwa sisazela, vumela isazela sakho sikushukumisele ekubeni ‘uguquke uze uphethuke.’ (IZenzo 3:19) Ngokuzimisela nomgudu, unokwenza iinguqulelo ezifunekayo ukuze uzuze inkoliseko kaThixo.

“Yibani Nesazela Esilungileyo”

Enoba usaqala ukufunda ngeendlela zikaYehova okanye uneminyaka eliqela yamava njengomKristu oqolileyo, isiluleko sikaPetros sifanelekile: “Yibani nesazela esilungileyo.” (1 Petros 3:16) Siluncedo, asiloxanduva. Siqeqeshe ngokondla ingqondo nentliziyo yakho ngobulumko obuqulethwe kwiLizwi likaThixo, iBhayibhile. Sithobele isazela sakho xa sikulumkisa. Nandipha uxolo lwengqondo onokulufumana ngokuthobela isazela sakho.

Kuyavunywa ukuba, ukusiqeqesha nokusixonxa isazela sakho akuyondlwan’ iyanetha. Noko ke, unokuthandaza kuYehova uThixo ukuze akuncede. Ngoncedo lwakhe, uya kukwazi ukukhonza uThixo ‘ngokuphuma kwisazela esilungileyo nangokuphuma kukholo olungenaluhanahaniso.’—1 Timoti 1:5.

[Imibhalo esemazantsi]

[Umfanekiso okwiphepha 6]

Ukufunda nokucamngca ngeLizwi likaThixo kusinceda sikwazi ukuqeqesha izazela zethu