Abavakalisi BoBukumkani Bayabalisa
Wafumana “Iperile Yexabiso Eliphakamileyo”
“UBUKUMKANI bamazulu bunjengomrhwebi ohambahambayo ofuna iiperile ezintle. Akuba efumene iperile enye yexabiso eliphakamileyo, wemka waza kwangoko wathengisa zonke izinto awayenazo waza wayithenga.” Ngala mazwi, uYesu wayebonisa ukuxabiseka okukhulu koBukumkani bukaThixo. (Mateyu 13:45, 46) Abo bakuqondayo ukuxabiseka koBukumkani ngokufuthi baye bancame okukhulu ngenxa yabo. Oku kuboniswa ngamava alandelayo akwiNqila yasePingtung, eTaiwan.
Ngowe-1991, uMnu. noNkskz. Lin baqalisa ukufundisisa iBhayibhile namaNgqina kaYehova. Xa umfundisi wasekuhlaleni wakufumanisayo oko, wazama ukubenza baye kweyakhe icawa. Ekubeni intsapho yakwaLin yayineshishini lokuthengisa igazi leehagu nelamadada kwimarike yasekuhlaleni, yagqiba kwelokuba ibuze uluvo lomfundisi ngoku. Waphendula wathi: “Yonke into ayenzileyo uThixo inokuba kukutya.” Kwelinye icala, amaNgqina ayikhuthaza ukuba iqwalasele oko kuthethwa liLizwi likaThixo ngoku. Yafunda ukuba uYehova uThixo uligqala igazi njengelingcwele, kuba “ubomi besidalwa ligazi.” (Levitikus 17:10, 11, The New English Bible) Ngoko amaKristu okwenyaniso amele “akhwebuke . . . egazini.” (IZenzo 15:20) Ngenxa yokuhlolisisa iZibhalo kulo mbandela, intsapho yakwaLin yagqiba kwelokuba iyeke ukuthengisa igazi, nangona yayilelona liyingenisela imali eninzi. Noko ke, kungekudala bajamelana nolunye uvavanyo olukhudlwana.
Ngaphambi kokufunda inyaniso, intsapho yakwaLin yayityale imithi yebetel nut eli-1300 kumhlaba wayo. Nangona kwakuya kuthabatha iminyaka emihlanu ukuba loo mithi ibe nengeniso, emva kokuba ilungile, intsapho yakwaLin yayinokulindela imali engama-R360 000 ngonyaka. Njengokuba ixesha lokuqala lokuvuna lalisondele, intsapho yakwaLin kwafuneka yenze isigqibo esibalulekileyo. Yayifunde kwisifundo sayo seBhayibhile ukuba amaKristu amele azihlambulule “kuko konke ukudyobheka kwenyama nomoya” ngokuphepha ukusebenzisa, okanye ukukhuthaza imikhwa engacocekanga enjengokutshaya icuba, ukusebenzisa kakubi iziyobisi, nokuhlafuna ibetel nut. (2 Korinte 7:1) Yayiza kwenza ntoni?
Ngenxa yokucinezelwa sisazela esikhathazekileyo, uMnu. Lin wagqiba kwelokuba ayeke ukufunda. Ebudeni beli xesha, uNkskz. Lin wathengisa iibetel nut ezazikwimithi yabo emidala waza wafumana inzuzo engaphezu kwama-R14 000. Oku yayikukungcamla nje oko kwakuza kulandela kungekudala ukuba babenokuyigcina imithi yabo. Noko ke, isazela sikaMnu. Lin saqhubeka simhlasela.
Wazamana nale mbambano de ngenye imini wacela amaNgqina asekuhlaleni ukuba amgawulele le mithi yakhe yebetel nut. AmaNgqina amxelela ukuba nguye owenze isigqibo; ngoko ke, kwakuya kufuneka ‘azithwalele umthwalo wakhe’ aze ayigawule ngokwakhe loo mithi. (Galati 6:4, 5) Amkhuthaza ukuba akhumbule isithembiso esikweyoku-1 kwabaseKorinte 10:13 esithi: “Akukho sihendo sinibambileyo ngaphandle koko kuqhelekileyo ebantwini. Kodwa uThixo uthembekile, yaye akayi kuniyekela nihendwe ngaphaya koko ninokukuthwala, kodwa kunye nesihendo eso uya kwenza kwanendlela yokuphuma ukuze nikwazi ukusinyamezela.” Kwakhona amaNgqina aqiqa naye ngelithi: “Ukuba sikugawulela le mithi, usenokuzisola uze usibeke ityala ngale lahleko.” Kamva kungadlulanga thuba lide, ngenye intsasa uNkskz. Lin wavuswa yingxolo yesarha. Umyeni wakhe nabantwana babegawula imithi yebetel nut!
UMnu. Lin wafumanisa ukuba uYehova unyanisekile kwisithembiso Sakhe. Wafumana umsebenzi owamshiya enesazela esikhululekileyo, owamenza wakwazi ukuba ngumdumisi kaYehova. Wabhaptizwa kwindibano yesiphaluka yamaNgqina kaYehova ngoAprili 1996.
Ewe, uMnu. Lin enyanisweni “wathengisa zonke izinto awayenazo” waza wathenga “iperile yexabiso eliphakamileyo.” Ngoku unelungelo elingenakuthelekiswa nanto lokuba nolwalamano olusenyongweni noYehova uThixo nokukhonza ngenxa yezilangazelelo zoBukumkani Bakhe.