Ngaba Imisitho Yesivuno Iyamkholisa UThixo?

IZIQHAMO ezimnandi gqitha, imifuno emihle nezithungu zokudla okuziinkozo ezifunjwe zayintaba zitsho ngomfanekiso omhle. Ngexesha lokuvuna ezi zinto zihombisa izibingelelo namaqonga eecawa kulo lonke elaseNgilani. KwelaseYurophu, njengezinye iindawo, iqela lemisitho likuxelela ngesiqalo nesiphelo sexesha lokuvuna.

Abo bathi ukuze bafumane ukutya balime baba nombulelo ongazenzisiyo ngemveliso yomhlaba. Enyanisweni, uThixo wayalela uhlanga lwamandulo lwakwaSirayeli ukuba lubhiyozele imisitho emithathu minyaka le eyayinokuthanani nokuvuna. Ebutsheni bentwasahlobo, ebudeni boMthendeleko Wezonka Ezingenagwele, amaSirayeli ayenikela kuThixo ngezithungu zentlahlela yesivuno serhasi. KuMthendeleko Weeveki (okanye, iPentekoste) ekupheleni kwentwasahlobo, ayenikela ngezonka ezenziwe ngentlahlela yesivuno sengqolowa. Ekwindla iba lixesha loMthendeleko Wokuhlanganisela, wona ochaza ukuphela konyaka wokulima kwaSirayeli. (Eksodus 23:14-17) Le misitho ‘yayiziintlanganiso ezingcwele’ namaxesha ovuyo.—Levitikus 23:2; Duteronomi 16:16.

Ngoko ke, kuthekani ngemisitho yezi mini? Ngaba iyamkholisa uThixo?

Inxulunyaniswa Nobuhedeni

Ephazanyiswe yindlela esenziwa ngayo isithethe sokuvuna somgidi nokunxila okubakho xa kubhiyozwa, umfundisi waseTshetshi eCornwall, eNgilani, ngowe-1843 wagqiba kwelokuba abuyise isiko lokuvuna lamaxesha aphakathi. Wathabatha inxalenye yentlahlela yeenkozo ezazivuniwe waza wenza isonka somthendeleko ecaweni yakhe. Ukwenjenjalo, wayegcina umsitho oyiLammas—umbhiyozo “wobuKristu” bambi abathi waqalisa kunqulo lwamandulo lothixo wamaCeltic uLugh.a Ngaloo ndlela, umsitho wesivuno wamaTshetshi wanamhlanje unxulunyaniswa nobuhedeni.

Kuthekani ngeminye imibhiyozo eyenziwa ekupheleni kwamaxesha okuvuna? Ngokutsho kwe-Encyclopædia Britannica, amasiko amaninzi ekwenziwa kuwo le misitho asusela “kwinkolelo yokuba ukudla okuziinkozo kunomoya okanye kukho umama wokudla okuzinkozo.” Kweminye imimandla abalimi bakholelwa kwelokuba kukho umoya othile ohlala kwisithungu sokugqibela sokudla okuziinkozo okuza kuvunwa. Ukuze kugxothwe loo moya, bazibhulela phantsi ezo zikhwebu. Maxa wambi baphotha amanye amagqabi oko kuvuniweyo baze benze “unodoli wokudla okuziinkozo” baze bamgcinele ukufumana “ithamsanqa” de kuphinde kutyalwe kunyaka olandelayo. Emva koko baphinda batyale izikhwebu emhlabeni benethemba lokuba oku kuya kusikelela isityalo esilandelayo.

Ezinye iintsomi zinxulumanise ixesha lokuvuna nonqulo lothixo waseBhabhiloni uTamuzi, indoda yothixokazi wenzala uIshtar. Ukusikwa kwentloko yesikhwebu kwakufuzisela ukufa kukaTamuzi ngesiquphe. Ezinye iintsomi zide zinxulumanise ixesha lesivuno nokubingelela ngomntu—uqheliselo aluthiyileyo uYehova uThixo.—Levitikus 20:2; Yeremiya 7:30, 31.

Iyintoni Imbono KaThixo?

Iinkqubano zikaThixo noSirayeli wamandulo ngokucacileyo zityhila ukuba uYehova, uMdali nokwanguMthombo wobomi, wayefuna uzimiselo olupheleleyo lwabakhonzi bakhe. (INdumiso 36:9; Nahum 1:2) Ngomhla womprofeti uHezekile, uqheliselo lokukhalela uthixo uTamuzi ‘yayiyinto engamasikizi’ emehlweni kaYehova. Oku, kuquka namanye amasiko onqulo lobuxoki, kwabangela ukuba uThixo avale iindlebe zakhe kwimithandazo yabo banquli bobuxoki.—Hezekile 8:6, 13, 14, 18.

Thelekisa oku noko uYehova uThixo wakuyalela uSirayeli ukuba akuqwalasele ngokuphathelele isivuno. KuMthendeleko Wokuhlanganisela, amaSirayeli ayesiba nengqungquthela apho ebudeni bayo abadala nabancinane, abazizityebi nabangamahlwempu, babehlala kwindawo ababezakhile nababezihombise ngamagqabi amahle emithi abukeka kakuhle. Eli yayilixesha lokuvuya kubo, kodwa yayikwalixesha lokukhumbula ukuhlangulwa kookhokho babo nguThixo ngexesha leMfuduko eYiputa.—Levitikus 23:40-43.

Ebudeni bemisitho yamaSirayeli, kwakudluliselwa iminikelo kuYehova, onguye yedwa uThixo oyinyaniso. (Duteronomi 8:10-20) Ngokuphathelele ezo nkolelo zemimoya sele zikhankanyiwe, akukho ndawo iBhayibhile ethetha ngayo ngemveliso, enjengesithungu sengqolowa, njengenomphefumlo.b Ngaphezu koko iZibhalo ngokucacileyo zibonisa ukuba izithixo azinabomi, azikwazi ukuthetha, ukubona, ukuphulaphula, ukujoja, ukuva, okanye ukubenzela nantoni na abakhonzi bazo.—INdumiso 115:5-8; Roma 1:23-25.

Namhlanje amaKristu akakho phantsi koMthetho womnqophiso uThixo awawenzela uhlanga lukaSirayeli wamandulo. Eneneni, uThixo ‘wawususa endleleni ngokuwubethelela kwisibonda sentuthumbo sikaYesu.’ (Kolose 2:13, 14) Abakhonzi bakaYehova banamhlanje baphila ‘ngomthetho kaKristu’ yaye basabela ngokunexabiso kuko konke abakulungiselelwa nguThixo.—Galati 6:2.

Umpostile uPawulos wakuchaza ngokucacileyo ukuba imisitho yamaYuda ‘yayisisithunzi sezinto eziza kuza,’ wongezelela wathi, “kodwa eyokwenene nguKristu.” (Kolose 2:16, 17) Ngenxa yoko, amaKristu okwenyaniso amkela ingcamango yeZibhalo ethi: “Izinto iintlanga ezizibingelelayo zizibingelela kwiidemon, yaye kungekhona kuThixo . . . Aninakusela indebe kaYehova nendebe yeedemon.” (1 Korinte 10:20, 21) Ngaphezu kwako konke, amaKristu athobela umyalelo othi “niyeke ukuchukumisa into engahlambulukanga.” Ngaba imisitho yesivuno eyenziwa ngabamelwane bakho inxulumene nobuhedeni okanye nonqulo lobuxoki? Ukuba kunjalo, amaKristu okwenyaniso asenokukuphepha ukungamkholisi uYehova ngokukugatya ukubandakanyeka kulo naluphi na unqulo olungacocekanga.—2 Korinte 6:17.

Xa umntwana onoxabiso efumana isipho esivela kuyise, ubulela bani? Ngaba ubulela umntu angamaziyo okanye umzali wakhe? Ngomthandazo osuka entliziyweni yonke imihla abakhonzi bakaThixo babulela uYehova, uBawo wabo wasezulwini, ngokuba nesisa kwakhe.—2 Korinte 6:18; 1 Tesalonika 5:17, 18.

[Imibhalo esemazantsi]