Indlela Yokuhlala Unovuyo Kwinkonzo Yexesha Elizeleyo
UKUZALISEKA kweziprofeto zeBhayibhile kubonisa ngokucacileyo ukuba siphila kwimihla yokugqibela yale nkqubo ingamhloneliyo uThixo. Ekubeni bekwazi oku, abakhonzi bakaYehova uThixo bachitha ixesha elininzi ngokusengqiqweni kangangoko benako besasaza iindaba ezilungileyo zoBukumkani bakhe. Angaphezu kwama-600 000 amaNgqina kaYehova aye ahlengahlengisa ubomi bawo ukuze abe nenxaxheba kwinkonzo yexesha elizeleyo. Amanye awo angabavakalisi boBukumkani bexesha elizeleyo ababizwa ngokuba ngoovulindlela. Amanye angabasebenzi bokuzithandela baseBheteli kwikomkhulu leWatch Tower Society okanye kwiiofisi zamasebe alo. Ukanti amanye angabavangeli basemazweni nabaveleli abahambahambayo.
IBhayibhile ibonisa ukuba ngemihla yokugqibela, kwakuya kubakho “amaxesha amanqam ekunzima ukuqhubana nawo.” (2 Timoti 3:1-5) Kule ndinyana yeBhayibhile isiGrike sisebenzisa ibinzana elisenokuguqulelwa ngokuthi “amaxesha amiselweyo awoyikekayo.” Ngenxa yoko, namhlanje akakho umntu onokulindela ukuphila ubomi obungenazinkathazo. Kwabanye abalungiseleli abangamaKristu, iingxaki zibonakala zinkulu gqitha kangangokuba bade bazibuze, ‘Ngaba ndinokuqhubeka nenkonzo yexesha elizeleyo, okanye ndimele ndiyiyeke?’
Ziziphi iimeko ezisenokubangela ubani aphinde acingisise nzulu ngemeko yakhe njengovulindlela, umsebenzi wokuzithandela waseBheteli, umveleli ohambahambayo okanye umvangeli wasemazweni? Kusenokuba yingxaki enzulu yempilo. Mhlawumbi kukho isalamane esalupheleyo okanye esigulayo esifuna ukunyanyekelwa ngokuzingisileyo. Kusenokuba isibini esitshatileyo siba nabantwana. Nabani na oyeka inkonzo yexesha elizeleyo ngenxa yezo zizathu nangenxa yeembopheleleko ezingokweZibhalo akuyomfuneko ukuba azive eneentloni ngokwenza uhlengahlengiso olunjalo.
Noko ke, kuthekani ukuba ubani uceba ukuyeka inkonzo yexesha elizeleyo ngenxa yokuba engafumani nto ivuyisayo kuyo? Mhlawumbi uvulindlela ubona ngathi akukho ntsabelo ingako kubulungiseleli bakhe aze azibuze, ‘Kutheni ndimele ndiqhubeke nobomi bam bokuzincama xa bembalwa kangaka abantu abaphulaphulayo?’ Mhlawumbi lowo usebenza eBheteli akonwabanga esabelweni sakhe. Okanye kusenokwenzeka ukuba impilo enkenenkene, ngoxa ingayithinteli inkonzo yobuvulindlela, ekugqibeleni iyaluphelisa ulonwabo lukabani. Abantu abanjalo banokuhlala njani bevuya? Makhe siqwalasele oko kuthethwa ngabanye abalungiseleli abanamava.
Ukuhlangabezana Nokudana
UAnny, ongowaseSwitzerland, waya kwiSikolo SeBhayibhile SeWatchtower SaseGiliyadi ngowe-1950. Wayekhangele phambili kwisabelo sakhe sobuvangeli basemazweni kumazwe aphesheya kweelwandle. Xa waphinda wabelwa kumsebenzi waseBheteli eYurophu, uAnny wadana. Noko ke, wasamkela isabelo sakhe kwiSebe Lokuguqulela ibe nangoku usenza loo msebenzi. Waloyisa njani udano awayenalo? UAnny uyachaza: “Wawumninzi umsebenzi owawumele wenziwe ibe kusenjalo nangoku. Iimvakalelo nokhetho lwam alubalulekanga njengalo msebenzi.”
Ukuba sidanile ngenxa yesabelo sethu, mhlawumbi sinokuhlakulela isimo sengqondo esifana nesika-Anny. Ukhetho lwethu lobuqu alubalulekanga kakhulu. Eyona nto ibalulekileyo kukuba zonke iimbopheleleko ezahlukeneyo ezinxulumene nokusasazwa kwesigidimi soBukumkani ziphunyezwe kakuhle. IMizekeliso 14:23 isixelela ukuba “ekubulalekeni konke kubakho ungeniselo.” Kungakhathaliseki ukuba sisiphi isabelo esisinikiweyo, ukusenza ngokuthembeka kufak’ isandla ekuphunyezweni komsebenzi woBukumkani. Kwaye lunokuba luninzi ulwaneliseko—ewe, uvuyo—kulo msebenzi kaThixo.—Thelekisa eyoku-1 kwabaseKorinte 12:18, 27, 28.
Ukuvisisana Nabanye
Inkonzo yexesha elizeleyo ibandakanya ukusondelelana nazo zonke iindidi zabantu—kubulungiseleli basentsimini, eBheteli, kwikhaya labavangeli basemazweni, okanye xa uhamba utyelela amabandla njengomveleli ohambahambayo. Ngenxa yoko, ubukhulu becala ukuvuya kuxhomekeke kwimvisiswano nabanye. Noko ke, ‘amaxesha awoyikekayo’ awaxelwa kwangaphambili ale mihla yokugqibela aye alonakalisa ulwalamano lwabantu. Umlungiseleli unokukuphepha njani ukuphulukana novuyo, kwanokuba kukho umntu omcaphukisileyo? Mhlawumbi sinokufunda okuthile kuWilhelm.
UWilhelm waba lilungu lentsapho yaseBheteli eYurophu ngowe-1947. Emva koko, wachitha ixesha elithile kumsebenzi wobuvulindlela nakwinkonzo yokuba ngumveleli ohambahambayo. UWilhelm uyachaza: “Xa mna nenkosikazi yam sibona izinto esicinga ukuba azifanelekanga okanye ezisixhalabisayo, sixelela uYehova indlela esivakalelwa ngayo size siyekele kuye ukuba azicombulule.”—INdumiso 37:5.
Mhlawumbi ukhe wakhutyekiswa yihambo yomnye umKristu othethe nawe ngendlela engabonakalisi ntlonelo okanye ngokungakhathali. Khumbula ukuba sonke sikhutyekiswa kaninzi zizinto esizithethayo. (Yakobi 3:2) Ngoko kutheni ungasebenzisi loo meko ukuze usondele ‘kumphulaphuli wemithandazo’? (INdumiso 65:2) Thetha noYehova ngaloo mbandela, uze uwuyekele ezandleni zakhe. Ukuba uThixo ufuna ukuyiguqula loo meko, uya kwenjenjalo. Abo bahlala kwikhaya labavangeli basemazweni kusenokufuneka bakukhumbule oku ukuba kusenokukhula uxinezeleko olunjalo, ekubeni oko kuya kubanceda bahlale benovuyo enkonzweni kaYehova.
Xa Impilo Inkenenkene
Bambalwa abantu abahlala beyimiqabaqaba empilweni. Kwanabo kusenokuthiwa ngabantu abanempumelelo ebomini basenokuthwaxwa ludandatheko okanye sisifo esithile. Ukugula kubangela ukuba abanye bayiyeke inkonzo yexesha elizeleyo, kodwa emva koko benza umsebenzi omhle njengabavakalisi boBukumkani. Noko ke, abanye bayakwazi ukuqhubeka nenkonzo yexesha elizeleyo phezu kwayo nje impilo enkenenkene. Ngokomzekelo, khawuqwalasele uHartmut noGislind.
UHartmut noGislind basisibini esitshatileyo esichithe iminyaka engama-30 njengoovulindlela, abavangeli basemazweni nakumsebenzi wokuhambahamba. Bobabini baye bahlaselwa zizigulo ezinzulu eziye maxa wambi zabenza batyhafa ngokwasemzimbeni nangokweemvakalelo. Noko ke, baye benza umsebenzi omhle yaye bakwazi ukukhuthaza abanye ukuze bajamelane neemvavanyo ezifanayo. Liliphi icebiso abalinikelayo? “Khangela kwixesha elizayo kungekhona kwelidluleyo. Nayiphi na imeko okuyo yisebenzise kakuhle. Suku ngalunye lusenokuvelisa ithuba elinye kuphela lokudumisa uYehova. Lisebenzise elo thuba, yaye ulinandiphe.”
Khawuqwalasele imeko kaHannelore. Ebekhathazwa sisifo esibetha sibuyelela ebudeni beminyaka yakhe engama-30 enguvulindlela, umvangeli wasemazweni, ekumsebenzi wokuhambahamba nomyeni wakhe nakwinkonzo yaseBheteli. UHannelore uthi: “Ndicinga nzulu ngembambano eyaphakanyiswa nguSathana—yokuba abantu bamkhonza uYehova kuphela xa kulula gqitha ukuba benjenjalo. Ngokunyamezela izilingo, ndinokufak’ isandla ekungqineni uSathana engachananga.” Oku kunokuba yintshukumisa enamandla. Khumbula ukuba ukunyaniseka kwakho kuYehova xa ujamelene novavanyo kubalulekile kuye.—Yobhi 1:8-12; IMizekeliso 27:11.
Xa uzama ukwenza isigqibo esilungeleleneyo ngokuphathelele impilo yakho, cinga ngeenkalo ezimbini zesiprofeto sikaYesu Kristu esasingokuqosheliswa kwenkqubo yezinto. UYesu waxela kwangaphambili ngeendyikitya zokufa kwiindawo ngeendawo. Kwakhona wathi: “Ezi ndaba zilungileyo zobukumkani ziya kushunyayelwa kuwo wonke umhlaba omiweyo.” (Mateyu 24:3, 14; Luka 21:11) UYesu wayesazi ukuba ngemihla yokugqibela, abalandeli bakhe babeza kutsala nzima ngenxa yokugula. Kodwa wayeqonda ukuba umsebenzi wokushumayela wawuya kwenziwa kungekuphela nje ngabantu abangabikwa hlaba kodwa nangabo banezigulo ezinzulu. Ukuba siyakwazi ukuqhubeka nenkonzo yexesha elizeleyo phezu kwako nje ukugula, uYehova akayi kululibala uthando esilubonakalisayo ngegama lakhe.—Hebhere 6:10.
Ukuhlala Uvuya Phezu Kwayo Nje Inkcaso Kawonkewonke
Isimo sethu sengqondo sinokuphenjelelwa yindlela abantu abasabela ngayo kumsebenzi wokushumayela ngoBukumkani. Omnye umlungiseleli onamava wathi: “Kwanoovulindlela bakufumanisa kunzima ukuqalisa incoko nabaninimzi. Sonke kufuneka sizabalaze ukuze sihlale sivuya.” Ewe, inkcaso kawonkewonke inokuluphelisa uvuyo lwethu kwinkonzo yasentsimini. Uvulindlela ohlangabezana nenkcaso rhoqo unokuhlala njani evuya? Abalungiseleli abanamava banikela eli cebiso lilandelayo eliye lavavanywa.
Inkcaso imela ucelomngeni, kodwa ayithethi kuthi woyisiwe. Ukungakhathali okwandileyo kwabantu, kukodwa nje, akufanele kube sisizathu sokuyeka inkonzo yexesha elizeleyo. Sinokuhlala sivuya phezu kwayo nje inkcaso ukuba sizibekela ixesha elaneleyo lokwenza ufundisiso lweZibhalo. ‘Zisixhobisela wonke umsebenzi olungileyo,’ ibe loo msebenzi uquka ukuthetha nabo bavingca iindlebe zabo kwiindaba ezilungileyo. (2 Timoti 3:16, 17) Nangona abantu babengafuni kumphulaphula, oko akuzange kumyekise umprofeti uYeremiya. (Yeremiya 7:27) Xa sifundisisa iBhayibhile sincedwa ziimpapasho zamaKristu, sinokungenelwa kakhulu ukuba siyaziphawula iingcamango ezomeleza ukholo lwethu nezisinceda sihlangabezane nenkcaso.
Ekubeni loo nkcaso ilucelomngeni, makhe sihlolisise isimo sethu sengqondo kwabo sishumayela kubo. Kutheni bechasa nje? Ngokomzekelo, esinye sezizathu zokuchasa kwabantu kwiindawo ezithile eYurophu kukuduma kakubi konqulo lobuxoki. Abantu abasenayo imvakalelo yokuba unqulo lunendawo ebomini babo, yaye abafuni kuba nanto yakwenza nalo. Kufuneka sibe bhetyebhetye, sithethe nabantu ngezinto ezibachaphazelayo, ezinjengokungafumani misebenzi, impilo, ulwaphulo-mthetho, ukunganyamezelani, imeko-bume nesisongelo semfazwe.
Kumazwi ethu okuqalisa incoko nomninimzi, sisenokukhankanya into ethile engundabamlonyeni ekuhlaleni. Wazama ukwenjenjalo uDietmar xa wayeshumayela kwidolophana awayengenankqubela ingako kuyo. Omnye umhlali walapho wakhankanya into yokuba kuloo dolophana kwakuhle intlekele ethile ngezolo. Kuyo yonke imizi awangena kuyo, uDietmar wabonakalisa uvelwano olunyanisekileyo ngaloo ntlekele. Wathi: “Abantu basuka baqalisa ukuthetha. Wonke umntu wayecinga ngale ntlekele. Ndancokola kamnandi nabantu abaninzi ngaloo mini kuba ndabonakalisa umdla ebomini babo.”
Kufuneka sidlulisele isigidimi soBukumkani ebantwini naphi na apho sibafumana khona. Ubungqina obungacwangciswanga bunokuba nemiphumo, ibe sinokuziqeqeshela lo msebenzi ngokusebenzisa amacebiso avela kwiimpapasho ezisekelwe eBhayibhileni. Umphumo unokuba luvuyo xa sincokola kamnandi okanye sihambisa iphephancwadi IMboniselo noVukani! kumninimzi. Ukuba siye senza ibuyelo saza saqalisa ukuqhuba isifundo seBhayibhile nomntu onomdla, sisenokumbuza sithi: “Ngaba ukho omnye umntu omaziyo onokukuvuyela ukufundisisa iBhayibhile?” Oku kusenokukhokelela ekuqalisweni kwesinye isifundo seBhayibhile sekhaya. Enoba injani na imeko, masibe nesimo sengqondo esikhuthazayo, sayame ngoYehova ngomthandazo, singavumeli inkcaso isidimaze.
Ukhuthazo Oluvela Kwabanye
UJürgen noChristiane bebengoovulindlela yaye bekumsebenzi wokuhambahamba kangangeminyaka engaphezu kwama-30. Ngesinye isihlandlo bakha bafumana isabelo esasibandakanya ukushumayela kwindawo apho inkoliso yabantu ichasayo yaye ineenkani. Hayi indlela uJürgen nomkakhe ababelulangazelela ngayo ukhuthazo! Noko ke, ngasizathu sithile abanye ebandleni abazange basabele kwintswelo yabo.
Ngoko uJürgen wazi ngokusuka kumava ukuba “abanye oovulindlela batsala nzima. Bafuna ukhuthazo olungakumbi oluvela kubadala nakwabanye abavakalisi.” UThixo waxelela uMoses ukuba amkhuthaze yaye amomeleze uYoshuwa. (Duteronomi 3:26-28) Kwaye amaKristu amele abe yimithombo yokhuthazo omnye komnye. (Roma 1:11, 12) Abavakalisi boBukumkani banokubakhuthaza abo bakwinkonzo yexesha elizeleyo ngamazwi akhayo nangokubapheleka ngamaxesha athile kubulungiseleli.
Uvuyo LukaYehova—Inqaba Yethu
AmaKristu aye achitha ixesha elininzi lobomi bawo engoovulindlela okanye abavangeli basemazweni, ekhonza eBheteli, okanye etyelela amabandla kumsebenzi wokuhambahamba aye afumanisa ukuba inkoliso yeengxaki ayithabathi xesha lide, kodwa ezinye zihlala zihleli. Kwaneengxaki ezimbalwa ezibonakala zingenakuphela azifanele zisihluthe uvuyo lwethu. URamon, oye wakhonza kwisabelo esikwelinye ilizwe kangangeminyaka engama-45, ucebisa ukuba nanini na iingxaki zisenza sidangale, “sifanele sicinge ngeentsikelelo ezininzi esizifumanayo yaye sicinge nangamawaka abanye abantu abajamelene nobunzima obungakumbi.” Kakade ke, namanye amakholwa ayabandezeleka ehlabathini lonke, ibe uYehova usikhathalela ngokwenene sonke.—1 Petros 5:6-9.
Ngoko ke, ukuba iimeko zethu ziyasivumela ukuba sibe kwinkonzo yexesha elizeleyo size sihlale kuyo, masihlale sinovuyo ngokwayama ngoBawo wethu wasezulwini. Uyabomeleza abakhonzi bakhe, ibe sonke sifanele sikhumbule ukuba ‘uvuyo lukaYehova ligwiba lethu.’—Nehemiya 8:10.
[Umfanekiso okwiphepha 21]
“Iimvakalelo nokhetho lwam alubalulekanga njengalo msebenzi”
[Umfanekiso okwiphepha 22]
“Sixelela uYehova indlela esivakalelwa ngayo size siyekele izinto kuye”
[Umfanekiso okwiphepha 23]
“Nayiphi na imeko okuyo yisebenzise kakuhle. Suku ngalunye lusenokuvelisa ithuba elinye kuphela lokudumisa uYehova”
[Umfanekiso okwiphepha 23]
“Ngokunyamezela izilingo, ndinokufak’ isandla ekungqineni uSathana engachananga”
[Umfanekiso okwiphepha 24]
“Abanye oovulindlela batsala nzima. Bafuna ukhuthazo olungakumbi oluvela kubadala nakwabanye abavakalisi”
[Umfanekiso okwiphepha 24]
“Sifanele sicinge ngeentsikelelo ezininzi esizifumanayo”