ILizwi LikaThixo Lihlala Ngonaphakade
“Ke lona ilizwi likaThixo wethu liya kuma ngonaphakade.”—ISAYA 40:8.
1. (a) Yintoni apha ethethwa libinzana elithi “ilizwi likaThixo wethu”? (b) Ahluke njani amadinga abantu kwilizwi likaThixo?
ABANTU banotyekelo lokukholosa ngezithembiso ezenziwa ngamadoda namabhinqa akwizikhundla eziphezulu. Kodwa kungakhathaliseki ukuba zibonakala zinqweneleka kangakanani na ezo zinto bazithembisayo kubantu abalangazelela impucuko ebomini babo, zinjengeentyatyambo ezibunayo xa zithelekiswa nelizwi likaThixo wethu. (INdumiso 146:3, 4) Kwiminyaka engaphezu kwama-2700 eyadlulayo, uYehova uThixo waphefumlela umprofeti uIsaya ukuba abhale esithi: “Yonke inyama ibutyani, bonke ubuhle bayo bunjengentyatyambo yasendle. . . . Buyoma utyani, iyabuna intyatyambo; ke lona ilizwi likaThixo wethu liya kuma ngonaphakade.” (Isaya 40:6, 8) Liyintoni eli “lizwi” lihlala lihleli? Lilizwi likaThixo elichaza iinjongo zakhe. Namhlanje elo “lizwi” silifumana libhalwe eBhayibhileni.—1 Petros 1:24, 25.
2. UYehova walizalisekisa phantsi kwaziphi izimo zengqondo nezenzo zabantu ilizwi lakhe ngokuphathelele uSirayeli noYuda wamandulo?
2 Abantu ababephila ngemihla kaSirayeli wamandulo babubona ubunyaniso bamazwi awabhalwa nguIsaya. Esebenzisa abaprofeti bakhe, uYehova waxela kwangaphambili ukuba ngenxa yokungathembeki kuye okwakwesamele, kwakuya kuqala kuthinjwe ubukumkani bezizwe ezilishumi zakwaSirayeli kuze kulandele ubukumkani bezizwe ezimbini zakwaYuda. (Yeremiya 20:4; Amosi 5:2, 27) Nangona babebatshutshisa, bade bababulala abaprofeti bakaYehova, batshisa imisongo eyayiqulethe isigidimi sesilumkiso sikaThixo, baza bacela uncedo lomkhosi eYiputa ukuze bathintele inzaliseko yaso, ilizwi likaYehova alizange liwe phantsi. (Yeremiya 36:1, 2, 21-24; 37:5-10; Luka 13:34) Ngaphezu koko, isithembiso sikaThixo sokubuyisela intsalela eguqukileyo yamaYuda kwilizwe layo saba nenzaliseko ebalaseleyo.—Isaya, isahluko 35.
3. (a) Ngawaphi amadinga awabhalwa nguIsaya abaluleke ngokukhethekileyo kuthi? (b) Kutheni uqinisekile ukuba ezi zinto ziza kuzaliseka ngokwenene?
3 Esebenzisa uIsaya, kwakhona uYehova waxela kwangaphambili ngolawulo lobulungisa eluntwini olwaluya kuza ngoMesiya, ngokuhlangula uluntu esonweni nasekufeni, nangokuguqula umhlaba ube yiparadesi. (Isaya 9:6, 7; 11:1-9; 25:6-8; 35:5-7; 65:17-25) Ngaba nezi ziprofeto ziza kuzaliseka? Ayithandabuzeki nakancinane loo nto! ‘UThixo akanakuxoka.’ Wenza ukuba ilizwi lakhe elisisiprofeto libhalwe ukuze kungenelwe thina, yaye uye waqiniseka ukuba liyalondolozwa.—Tito 1:2; Roma 15:4.
4. Nangona imibhalo-ngqangi yantlandlolo yeBhayibhile ingazange ilondolozwe, sinokutsho njani ukuba ilizwi likaThixo “liyaphila”?
4 UYehova akazange ayilondoloze imibhalo-ngqangi yantlandlolo ekwakubhalwe kuyo ezo ziprofeto ngababhali bakhe bamandulo. Kodwa “ilizwi” lakhe, injongo yakhe evakalisiweyo, iye yangqineka ililizwi eliphilileyo. Loo njongo iyaqhubeka isiya phambili kungekho bani unokuyithintela, ibe njengoko isenjenjalo, iingcamango ezinzulu neentshukumisa zabantu abachukunyiswa yiyo ziyabonakala. (Hebhere 4:12) Ngaphezu koko, ingxelo yembali ibonisa ukuba ukulondolozwa nokuguqulelwa kweZibhalo eziphefumlelweyo kuye kwenziwa ngoncedo lukaThixo.
Xa Lijamelene Nemigudu Yokulitshabalalisa
5. (a) Nguwuphi umgudu owenziwa ngukumkani waseSiriya wokutshabalalisa iZibhalo zesiHebhere eziphefumlelweyo? (b) Kutheni engazange aphumelele?
5 Kangangezihlandlo eziliqela, abalawuli baye bazama ukuzitshabalalisa iincwadi eziphefumlelweyo. Ngowe-168 B.C.E., uKumkani waseSiriya uAntiochus Epiphanes (oboniswe kwiphepha 10) wakha isibingelelo sikaZeyus etempileni eyayinikelwe kuYehova. Kwakhona wafuna ‘iincwadi zoMthetho,’ wazitshisa, waza wavakalisa ukuba nabani na owayeneZibhalo wayeza kubulawa. Lingakhathaliseki inani lemibhalo awayitshisayo eYerusalem nakwelakwaYuda, akazange akwazi ukuzitshabalalisa ngokupheleleyo iZibhalo. Ngelo xesha amathanga awayehlala amaYuda ayesasazeke emazweni amaninzi, ibe indlu nganye yesikhungu yayinengqokelela yayo yemisongo.—Thelekisa IZenzo 13:14, 15.
6. (a) Nguwuphi umgudu omkhulu owenziwayo ukuze kutshatyalaliswe iZibhalo ezazisetyenziswa ngamaKristu okuqala? (b) Waba yintoni umphumo?
6 Ngowe-303 C.E., uMlawuli ongumRoma uDiocletian ngokufanayo wayalela ukuba iindawo zokuhlanganisana zamaKristu zidilizwe yaye ‘neZibhalo zawo zitshiswe ngomlilo.’ Oko kutshatyalaliswa kwazo kwaqhubeka kangangeshumi leminyaka. Nangona loo ntshutshiso yayikrakra, uDiocletian akazange aphumelele ekubupheliseni ubuKristu, noThixo engazange abavumele abameli baloo mlawuli ukuba bayitshabalalise yonke nayiphi na inxalenye yemibhalo yeLizwi Lakhe eliphefumlelweyo. Kodwa ngentsabelo yabo ekusasazweni nasekushunyayelweni kweLizwi likaThixo, aba bachasi bakubonakalisa oko kwakusezintliziyweni zabo. Bazibonakalisa bengamadoda amfanyekiswe nguSathana nawenza ukuthanda kwakhe.—Yohane 8:44; 1 Yohane 3:10-12.
7. (a) Yiyiphi imigudu eyenziwayo ukuze kuthintelwe ukusasazwa kolwazi lweBhayibhile entshona Yurophu? (b) Yintoni eyaphunyezwa kukuguqulelwa nokusasazwa kweBhayibhile?
7 Imigudu yokuthintela ukusasazwa kolwazi lweBhayibhile yeza nangezinye iindlela. Xa isiLatini sayekayo ukuba lulwimi olusetyenziswa imihla ngemihla, yayingengobalawuli abangabahedeni kodwa yayingabo babesithi bangamaKristu—uPopu Gregory VII (1073-85) noPopu Innocent III (1198-1216)—ababa nenzondelelo ekuchaseni ukuguqulelwa kweBhayibhile kwiilwimi ezazisetyenziswa ngabantu abaqhelekileyo. Lizama ukuphelisa ukucelw’ umngeni kwegunya lecawa, ngowe-1229, iBhunga lamaRoma Katolika laseToulouse, eFransi, layalela ukuba umrhamente wayengenakuba nazo iincwadi zeBhayibhile ngolwimi oluqhelekileyo. INkundla Yokuncina Amakholwa yasetyenziswa ukuba inyanzelise loo myalelo ngenkohlakalo. Kodwa, emva kweminyaka engama-400 yokuNcinwa Kwamakholwa, abathandi beLizwi likaThixo babeyiguqulele yonke iBhayibhile yaye besasaza iinguqulelo zayo ezishicilelweyo ngeelwimi ezimalunga nama-20, nangezinye iziyelelane ezongezelelekileyo, neenxalenye zayo ezinkulu ngezinye iilwimi ezili-16.
8. Ebudeni benkulungwane ye-19, kwakusenzeka ntoni kumsebenzi wokuguqulela nokusasaza iBhayibhile eRashiya?
8 ICawa yamaRoma Katolika yayingeyodwa kwimizamo yayo yokwenza ukuba iBhayibhile ingafumaneki kubantu abaqhelekileyo. Ngasekuqaleni kwenkulungwane ye-19, uPavsky, unjingalwazi weSt. Petersburg Academy of Divinity, waguqulela incwadi yeVangeli kaMateyu ukusuka kwisiGrike eyisa kwisiRashiya. Nezinye iincwadi zeZibhalo zamaKristu zesiGrike zaguqulelwa kwisiRashiya, ibe uPavsky waba ngumhleli wazo. Ezi ncwadi zasasazwa kakhulu de, ngenxa yefuthe lecawa, ngowe-1826 umlawuli waphenjelelwa ukuba enze uMbutho WeBhayibhile WaseRashiya ube phantsi kolawulo “lweSinodi Engcwele” yeCawa yobuOthodoki yaseRashiya, eyathi ekugqibeleni yawuthintela umsebenzi wawo. Kamva, uPavsky waguqulela iZibhalo zesiHebhere ukusuka kwisiHebhere ezisa kwisiRashiya. Malunga nelo xesha, uMakarios, umvangeli weCawa yobuOthodoki, naye waguqulela iZibhalo zesiHebhere ukusuka kwisiHebhere ezisa kwisiRashiya. Bobabini bohlwaywa ngenxa yemigudu yabo, ibe iinguqulelo zabo zagcinwa kwiindawo zokugcina iincwadi ezibalulekileyo zecawa. Icawa yayizimisele ukugcina iBhayibhile ikulwimi lwesiSlavonic esidala, ngelo xesha olwalungafundwa okanye lungaziwa ngabantu abaqhelekileyo. Kuphela kuxa imigudu yabantu yokufumana ulwazi lweBhayibhile yayingasenakuthinteleka eyathi “iSinodi Engcwele,” ngowe-1856, yaqalisa eyayo inguqulelo, isebenzisa izalathiso eziqulunqwe ngenyameko ukuze kuqinisekwe ukuba amabinzana asetyenzisiweyo ayevisisana neembono zecawa. Ngaloo ndlela, ngokuphathelele ukusasazwa kweLizwi likaThixo, kwabonakala ukuba kwakukho umahluko phakathi kwembonakalo yangaphandle kunye nenjongo yeenkokeli zonqulo, njengoko oko kubonakaliswa ngamazwi nezenzo zazo.—2 Tesalonika 2:3, 4.
Ukukhusela ILizwi Ekonakaleni
9. Bambi kubaguquleli beBhayibhile balubonakalisa njani uthando lwabo ngeLizwi likaThixo?
9 Phakathi kwabo babeguqulela yaye bekhuphela iZibhalo kwakukho amadoda awayelithanda ngokwenene iLizwi likaThixo nawayesenza umgudu onyanisekileyo ukuze lifumaneke kumntu wonke. UWilliam Tyndale wabulawa (ngowe-1536) ngenxa yoko wakwenzayo ukuze iBhayibhile ifumaneke ngesiNgesi. UFrancisco de Enzinas wavalelwa entolongweni yiNkundla Yokuncina Amakholwa yamaKatolika (emva kowe-1544) ngenxa yokuguqulela nokupapasha iZibhalo zamaKristu zesiGrike ngesiSpanish. Ebeka ubomi bakhe engozini, uRobert Morrison (ukususela ngowe-1807 ukusa kowe-1818) waguqulela iBhayibhile eyisa kwisiTshayina.
10. Yiyiphi imizekelo ebonisa ukuba babekho abaguquleli ababeshukunyiswa zezinye iimpembelelo ngaphandle kokuthanda iLizwi likaThixo?
10 Noko ke, maxa wambi zazibakho nezinye izinto ngaphandle kokuthanda iLizwi likaThixo ezaziphembelela umsebenzi wabakhupheli nabaguquleli. Ngokomzekelo khawuqwalasele imizekelo emine: (1) AmaSamariya akha itempile kwiNtaba yeGerizim ukuze ikhuphisane netempile yaseYerusalem. Ukuze axhase loo nto, amaSamariya enza utshintsho oluthile kwiPentatiki yawo kwiEksodus 20:17. Kongezelelwa umthetho othile, ngokungathi uyinxalenye yeMithetho Elishumi, wokwakha isibingelelo selitye kwiNtaba yeGerizim nokunyusa amadini apho. (2) Umntu wokuqala ukuguqulela incwadi kaDaniyeli esenzela iSeptuagint yesiGrike akazange ayiguqulele ngendlela echanileyo. Wafakelela amazwi awayecinga ukuba ayeya kuchaza okanye acacise oko kwakubhalwe kumbhalo wesiHebhere. Wazikhupha iinkcukacha awayecinga ukuba zazingayi kwamkeleka kwabo babeza kuyifunda. Xa wayeguqulela isiprofeto esasithetha ngexesha lokuvela kukaMesiya, esifumaneka kuDaniyeli 9:24-27, wabhala ixesha elingachananga waza wongezelela, watshintsha yaye waguqu-guqula amagama, ekubonakala ukuba wayefuna ukuba eso siprofeto sixhase umzabalazo weeMaccabees. (3) Ngenkulungwane yesine yeXesha lethu Eliqhelekileyo, kwincwadi yesiLatini, ummeli kaBathathu Emnye onenzondelelo yempambano kubonakala ukuba wafakelela amagama athi “emazulwini, uYise, noLizwi, nomoya oyingcwele; abo bathathu banye” ngokungathi wayewacaphula kweyoku-1 kaYohane 5:7. Kamva le ndinyana yafakwa kumbhalo-ngqangi weBhayibhile yesiLatini. (4) ULouis XIII (1610-43), eFransi, wanika uJacques Corbin igunya lokuguqulela iBhayibhile eyisa kwisiFrentshi ukuze aphazamise imigudu yamaProtestanti. Enalo njongo, uCorbin wafakela amagama athile, aquka ibinzana elithi “idini elingcwele leMisa” kwiZenzo 13:2.
11. (a) ILizwi likaThixo lahlala njani likho phezu kwako nje ukunganyaniseki kwabanye abaguquleli? (b) Bungakanani ubungqina bemibhalo-ngqangi yamandulo obubonisa oko kwakuthethwa yiBhayibhile yokuqala? (Bona ibhokisi.)
11 UYehova akazange akuthintele oko kutshintshwa kweLizwi lakhe, kungazange kananjalo kuyiguqule injongo yakhe. Kwaba nawuphi umphumo? Ukufakelela imbekiselo yeNtaba yeGerizim akuzange kubangele unqulo lwamaSamariya lusetyenziswe nguThixo ekuziseni iintsikelelo kuluntu. Kunoko, kwabonisa ukuba, nangona unqulo lwamaSamariya lwalusithi lukholelwa kwiPentatiki, lwalungenakuthenjwa njengolufundisa inyaniso. (Yohane 4:20-24) Ukuphixaniswa kwamagama kwiSeptuagint akuzange kumthintele uMesiya ukuba afike ngexesha elalixelwe kwangaphambili ngomprofeti uDaniyeli. Ngaphezu koko, nangona iSeptuagint yayisetyenziswa ngenkulungwane yokuqala, kubonakala ukuba amaYuda ayeqhele ukuphulaphula iZibhalo zifundwa ngesiHebhere kwizindlu zawo zesikhungu. Ngenxa yoko, “abantu babenolindelo” njengoko lalisondela ixesha lokuzaliseka kwesiprofeto. (Luka 3:15) Amagama afakelweyo axhasa uBathathu Emnye kweyoku-1 kaYohane 5:7 kunye naxhasa imfundiso yedini leMisa kwiZenzo 13:2, awazange ayiguqule inyaniso. Kwaye ekuhambeni kwethuba obo buqhetseba babhencwa elubala. Uvimba omkhulu wemibhalo-ngqangi yeBhayibhile yolwimi lwantlandlolo isenza sikwazi ukuhlola ukuchana kwayo nayiphi na inguqulelo.
12. (a) Ziziphi iindawo ezineenguqu ezinkulu ezenziwa ngabanye abaguquleli beBhayibhile? (b) Ezi nguqu zaba nomphumo omkhulu kangakanani?
12 Eminye imigudu yokutshintsha iZibhalo yayibandakanya okungaphezulu kunokuguqula amagama kwiindinyana ezimbalwa. Oku kwakuquka ukuhlaselwa koThixo wokwenyaniso ngokwakhe. Uhlobo nomlinganiselo wezo zinto ziguquliweyo wawubonisa ngokucacileyo ukuba kwakukho impembelelo evela kumthombo onamandla angaphaya kwawakhe nawuphi na umntu okanye intlangano yabantu—ewe, impembelelo evela kutshaba olukhulu lukaYehova, uSathana uMtyholi. Bephantsi kwaloo mpembelelo, abaguquleli nabakhupheli—bambi benehlombe, abanye bemadolw’ anzima—baqalisa ukulisusa igama likaThixo, uYehova, kwiLizwi lakhe eliphefumlelweyo kwiindawo ezingamawaka elalivela kuzo. Ngaphambilana, ezinye zeenguqulelo ezaguqulelwa zisuka kwisiHebhere zisiwa kwisiGrike, isiLatini, isiJamani, isiNgesi, isiTaliyane nesiDatshi, zalikhupha ngokupheleleyo okanye zaligcina kwiindinyana ezimbalwa kuphela igama likaThixo. Kwakhona lakhutshwa nakwimibhalo yeZibhalo zamaKristu zesiGrike.
13. Kutheni umgudu owawesamele wokutshintsha iBhayibhile ungazange uphumele ekubeni igama likaThixo licime kwiinkumbulo zabantu?
13 Sekunjalo, elo gama lizukileyo alizange licime ngokupheleleyo kwiinkumbulo zabantu. Iinguqulelo zeZibhalo zesiHebhere zesiSpanish, isiPhuthukezi, isiJamani, isiNgesi, isiFrentshi nezinye ezininzi, zalisebenzisa ngokunyaniseka igama likaThixo. Ngenkulungwane ye-16, igama likaThixo kwakhona laqalisa ukuvela kwiinguqulelo ezahlukeneyo zesiHebhere zeZibhalo zamaKristu zesiGrike; ngenkulungwane ye-18, ngesiJamani; ngenkulungwane ye-19, ngesiCroat nangesiNgesi. Nangona abantu besenokuzama ukulifihla igama likaThixo, xa “imini kaYehova” ifika, njengoko uThixo esitsho, ziya kwandula ke ‘iintlanga zazi ukuba ndinguYehova.’ Loo njongo ivakalisiweyo kaThixo ayisayi kusilela.—2 Petros 3:10; Hezekile 38:23; Isaya 11:9; 55:11.
Isigidimi Sifikelela Emhlabeni Wonke
14. (a) Ngenkulungwane yama-20, iBhayibhile yayishicilelwe ngeelwimi zaseYurophu ezingaphi, ibe waba yintoni umphumo? (b) Ngasekupheleni kowe-1914, iBhayibhile yayifumaneka ngeelwimi zaseAfrika ezingaphi?
14 Ngasekuqaleni kwenkulungwane yama-20, iBhayibhile yayisele ishicilelwa ngeelwimi zaseYurophu ezingama-94. Yalumkisa abafundi beBhayibhile ababekuloo mmandla wehlabathi ngokuba kwakuza kubakho iziganeko ezaziya kugungqisa ihlabathi ngasekupheleni kwamaXesha eeNtlanga ngowe-1914, ibe ngokwenene zenzeka! (Luka 21:24) Ngaphambi kokuphela kwaloo nyaka ubalulekileyo wowe-1914, iBhayibhile, iyonke okanye ezinye zeencwadi zayo, yapapashwa ngeelwimi zaseAfrika ezingama-157, kusongezelelwa kwinguqulelo yesiNgesi, eyesiFrentshi neyesiPhuthukezi ezazisetyenziswa ngokubanzi. Ngaloo ndlela kwamiselwa isiseko sokufundisa iinyaniso zeBhayibhile ezazibakhulula ngokomoya abo bathobekileyo bezizwe neentlanga ezininzi ababehlala apho.
15. Njengoko kwakuqalisa imihla yokugqibela, iBhayibhile yayifumaneka ukusa kuwuphi umlinganiselo ngeelwimi zabantu abakumazwe aseMerika?
15 Njengoko ihlabathi lalingena kwimihla yokugqibela eyayixelwe kwangaphambili, iBhayibhile yayifumaneka ngokubanzi kumazwe aseMerika. Abantu ababefuduka eYurophu beza nayo ngazo zonke iilwimi zabo ezahlukeneyo. Kwaqalisa inkqubo ephangaleleyo yokufundisa iBhayibhile, kunikelwa iintetho zesidlangalala yaye kusasazwa kakhulu uncwadi lweBhayibhile olwalupapashwa ngaBafundi BeBhayibhile Bezizwe Ngezizwe, njengoko amaNgqina kaYehova ayesaziwa njalo ngoko. Ukongezelela koko, iBhayibhile yayisele ishicilelwa yimibutho yeBhayibhile ngezinye iilwimi ezingama-57 ukuze kwaneliswe iintswelo zabemi bomthonyama abakuMazwe aseNtshona.
16, 17. (a) IBhayibhile yayifumaneka ukusa kuwuphi umlinganiselo xa kwafika ixesha lokushumayela emhlabeni wonke? (b) IBhayibhile iye yazibonakalisa njani ukuba iyincwadi ekwaziyo ukuhlala ihleli nenempembelelo enkulu?
16 Xa kwafika ixesha lokushunyayelwa kweendaba ezilungileyo emhlabeni wonke ngaphambi kokuba “kufike ukuphela,” iBhayibhile yayingeyonto intsha eAsia nakwiziqithi zePasifiki. (Mateyu 24:14) Yayisele ipapashwa ngeelwimi ezingama-232 zaloo mmandla womhlaba. Ezinye yayiziiBhayibhile ezipheleleyo; uninzi iziinguqulelo zeZibhalo zamaKristu zesiGrike; ezinye zaziba yincwadi enye yeZibhalo Ezingcwele.
17 Kuyacaca ukuba iBhayibhile yayingagcinwanga njengencwadi yokuhombisa kwimyuziyam. Kuzo zonke iincwadi ezazikho, yayiyeyona ncwadi iguqulelwe ngeelwimi ezininzi neyayisasazwe kakhulu. Ngokuvisisana nobungqina bokuba ixhaswa nguThixo, oko kubhaliweyo kule ncwadi kwakuzaliseka. Iimfundiso zayo kunye nomoya owawuzixhasa zazinempembelelo ehlala ihleli kubomi babantu ababekumazwe amaninzi. (1 Petros 1:24, 25) Kodwa kwakusekho okuninzi okwakuseza kulandela—okuninzi gqitha.
Ngaba Usakhumbula?
◻ Liyintoni “ilizwi likaThixo wethu” elihlala lihleli ngonaphakade?
◻ Ngawaphi amalinge aye enziwa okutshabalalisa iBhayibhile, ibe uye waba yintoni umphumo?
◻ Ukunyanisa kweBhayibhile kuye kwakhuselwa njani?
◻ Ilizwi likaThixo elichaza injongo yakhe liye langqineka njani lililizwi eliphilileyo?
[Ibhokisi ekwiphepha 12]
Ngaba Ngokwenene Siyakwazi Oko Kwakuthethwa YiBhayibhile Yokuqala?
Imalunga nama-6000 imibhalo-ngqangi yesiHebhere ebhalwe ngesandla engqinelana noko kuqulethwe ziZibhalo zesiHebhere. Embalwa kule yabhalwa ngaphambi kwexesha lamaKristu. Ubuncinane yimibhalo-ngqangi eli-19 esekhoyo yeZibhalo zesiHebhere eyabhalwa ngaphambi kokuba kwenziwe umatshini wokuchwetheza. Ngaphezu koko, ukususela ngelo xesha, kuye kwakho iinguqulelo ezingama-28 zezinye iilwimi.
KwiZibhalo zamaKristu zesiGrike, kuye kwagcinwa imibhalo-ngqangi yesiGrike emalunga nama-5000. Omnye wayo ususela kwixesha elingaphambi kowe-125 C.E., kwiminyaka embalwa nje emva kokubhalwa kwayo okokuqala. Ibe amanye amacandelo ayo kucingelwa ukuba asusela kwixesha elingaphambilana kwelo. Kwiincwadi ezingama-22 kwezingama-27 eziphefumlelweyo, kukho imibhalo-ngqangi eli-10 ukusa kweli-19 ebhalwe yonke ngesandla. Elona nani lincinane lemibhalo-ngqangi ebhalwe ngesandla ngokupheleleyo kuzo zonke iincwadi ezikule nxalenye yeBhayibhile yemithathu—efumaneka kwincwadi yeSityhilelo. Omnye umbhalo-ngqangi weZibhalo zamaKristu zesiGrike ezipheleleyo ususela kwinkulungwane yesine yeXesha lethu Eliqhelekileyo.
Ayikho enye incwadi yamandulo eqinisekiswa bubungqina bamaxwebhu amandulo amaninzi ngolo hlobo.