Qhubekani Nihamba NoThixo
“Hlalani nihamba ngomoya yaye anisayi kuphumeza mnqweno wanyama konke konke.”—GALATI 5:16.
1. (a) Kuphantsi kwaziphi iimeko awathi uEnoki wahamba noThixo, yaye oko wakwenza kangangexesha elingakanani? (b) UNowa wahamba noThixo kangangexesha elingakanani, ibe ziziphi iimbopheleleko ezinzima awayenazo?
IBHAYIBHILE isixelela ukuba uEnoki “wahamba noThixo.” Phezu kwazo nje iintetho ezitshabhisayo nehambo yokungahloneli Thixo yabantu ababemngqongile, wazingisa ekuhambeni noThixo de wamnabel’ uqaqaqa eneminyaka engama-365 ubudala. (Genesis 5:23, 24; Yude 14, 15) NoNowa “wahamba noThixo.” Wenjenjalo ngoxa ekhulisa usapho lwakhe, ejamelene nempembelelo yehlabathi eyayivela kwiingelosi ezazinemvukelo nenzala yazo eyayinogonyamelo, kwaye elandela zonke iinkcukacha ezaziphathelele ukwakhiwa komkhombe omkhulu owawungaphezu kwayo nayiphi na inqanawa eyayihamba elwandle ngemihla yamandulo. Waqhubeka ehamba noThixo emva koNogumbe, kwanaxa yaphinda yavuka phantsi imvukelo eyayinxamnye noYehova eBhabheli. Ngokwenene, uNowa waqhubeka ehamba noThixo de waya kulala kobandayo eneminyaka engama-950 ubudala.—Genesis 6:9; 9:29.
2. Yintoni ethethwa ‘kukuhamba noThixo’?
2 Xa isithi la madoda okholo “ahamba” noThixo, iBhayibhile isebenzisa eli binzana ngelifuziselayo. Ithetha ukuba uEnoki noNowa baziphatha ngendlela eyayibonisa ukuba nokholo olomeleleyo kuThixo. Benza oko uYehova wayebayalele kona baza bavisisanisa ubomi babo noko babekwazi ngaye kwiinkqubano zakhe nabantu. (Thelekisa eyesi-2 yeziKronike 7:17.) Abazange bavumelane nje kuphela noko uThixo wayekuthetha nawayekwenza kodwa bayenza yonke into awayeyifuna—kungekuphela nje inxalenye yayo kodwa yonke into bayenza ngomlinganiselo onokufikelelwa ngabantu abangafezekanga. Ngaloo ndlela, uNowa wenza kanye oko uThixo abemwisele umthetho ngako. (Genesis 6:22) UNowa akazange azibaxe izinto ngokwenza angakuthunywanga, engazange kananjalo arhuqe iinyawo kwezo wayezithunyiwe. Ekubeni wayenobuhlobo obusondeleyo noYehova, eziva ekhululekile ukuba athandaze kuThixo yaye eluxabisa ulwalathiso lwakhe, wayehamba noThixo. Ngaba wenjenjalo nawe?
Ikhondo Lobomi Elingaguquguqukiyo
3. Yintoni ebaluleke gqitha kubo bonke abakhonzi bakaThixo abazahluleleyo nababhaptiziweyo?
3 Kuyachukumisa ukubona abantu beqalisa ukuhamba noThixo. Njengoko behambela phambili ngokuvisisana nokuthanda kukaYehova, bayalungqina ukholo lwabo, ubani angenakumkholisa uThixo ngaphandle kwalo. (Hebhere 11:6) Hayi indlela esivuya ngayo ekubeni minyaka le, ngokomlinganiselo weminyaka emihlanu edlulileyo, bengaphezu kwama-330 000 abantu abazahlulela kuYehova baze bazinikele ukuba babhaptizwe emanzini! Kodwa ikwabalulekile kubo nakuthi sonke into yokuba sihlale sihamba noThixo.—Mateyu 24:13; ISityhilelo 2:10.
4. Nangona abonakalisa umlinganiselo othile wokholo, kutheni inkoliso yamaSirayeli awashiya iYiputa ingazange ingene kwiLizwe Ledinga?
4 Ngomhla kaMoses, kwakufuneka ukholo ukuze intsapho yomSirayeli ibhiyozele iPasika eYiputa yaye itshize igazi kwimigubasi nasemiqadini yendlu yayo. (Eksodus 12:1-28) Noko ke, ukholo lwamaninzi lwahexa xa ayebona umkhosi kaFaro usondela emva kwawo kuLwandle Olubomvu. (Eksodus 14:9-12) INdumiso 106:12 ibonisa ukuba xa ayesele edlule ngokukhuselekileyo kumhlaba owomileyo aza abona amanzi andlongondlongo etshabalalisa umkhosi waseYiputa, aphinda “akholwa ke ngamazwi [kaYehova].” Noko ke, kungekudala esentlango, amaSirayeli aqalisa ukukhalazela amanzi, ukutya nabantu ababekhokela. Ingxelo engentle yeentlola ezili-10 kwezili-12 ezazivela kwiLizwe Ledinga yawenza atyhwatyhwa. Ephantsi kwezo meko, njengoko INdumiso 106:24 isitsho, akazange ‘akholwe lilizwi [likaThixo].’ Ayefuna ukubuyela eYiputa. (Numeri 14:1-4) Naluphi ukholo awayenalo lwalubonakala xa ebona izenzo ezithile eziyimbonakaliso yamandla kaThixo. Akazange ahlale ehamba noThixo. Ngenxa yoko, loo maSirayeli akazange angene kwiLizwe Ledinga.—INdumiso 95:10, 11.
5. Eyesi-2 kwabaseKorinte 13:5 neMizekeliso 3:5, 6 zinxulumene njani nokuhamba noThixo?
5 IBhayibhile iyasibongoza: “Hlalani nizivavanya enoba niselukholweni kusini na, hlalani nizicikida oko nikuko nina ngokwenu.” (2 Korinte 13:5) Ukuba “selukholweni” kuthetha ukunamathela kwiinkolelo zamaKristu. Oku kubalulekile ukuze siphumelele ekuhambeni noThixo yonke imihla yobomi bethu. Ukuze sihambe noThixo, kwakhona simele sibonakalise uphawu lokholo, sikholose ngokupheleleyo ngoYehova. (IMizekeliso 3:5, 6) Mininzi imigibe nezibatha ezinokubambisa abo basilelayo ukwenjenjalo. Ziziphi ezinye zazo?
Wubalekeni Umgibe Wokuzithemba
6. Yintoni eyaziwa ngawo onke amaKristu ngokuphathelele ukuhenyuza nokukrexeza, ibe avakalelwa njani ngezi zono?
6 Wonke umntu oye wafundisisa iBhayibhile, wahlulela ubomi bakhe kuYehova, waza wabhaptizwa uyazi ukuba iLizwi likaThixo likukhaba ngaw’ omane ukuhenyuza nokukrexeza. (1 Tesalonika 4:1-3; Hebhere 13:4) Aba bantu bayavuma ukuba achanile la mazwi. Bazimisele ukuphila ngokuvisisana nawo. Ukanti, ukuziphatha okubi ngokwesini kusaqhubeka kungomnye weyona migibe ephumelelayo kaSathana. Ngoba?
7. KuMathafa akwaMowabhi, amadoda angamaSirayeli abandakanyeka njani kwihambo awayesazi ukuba iphosakele?
7 Ekuqaleni, abo babandakanyeka kwihambo enjalo yokuziphatha okubi basenokuba abacebi ukwenjenjalo. Mhlawumbi oko kwakunjalo nakumaSirayeli kuMathafa akwaMowabhi. Kumadoda angamaSirayeli awayekruqulwe bubomi basentlango, amabhinqa angamaMowabhi nangamaMidiyan awawarhwebeshayo asenokuba ekuqaleni abonakala enobuhlobo yaye enomoya wokubuk’ iindwendwe. Kodwa yintoni eyenzekayo xa amaSirayeli asamkelayo isimemo sokuba nobudlelwane nabantu ababekhonza uBhahali kungekhona uYehova, abantu ababevumela iintombi zabo (kwanezeentsapho zabantu abaphambili) zibe neentlobano zesini namadoda ezazingatshatanga nawo? Xa amadoda awayevela kumnquba wamaSirayeli aqalisa ukujonga ulwalamano olunjalo njengolunqwenelekayo, ahendelwa ekubeni enze izinto awayesazi ukuba ziphosakele, ibe oko kwawaphulukanisa nobomi bawo.—Numeri 22:1; 25:1-15; 31:16; ISityhilelo 2:14.
8. Kule mihla, yintoni enokukhokelela umKristu ekuziphatheni okubi ngokwesini?
8 Yintoni enokwenza umntu awele kumgibe ofanayo namhlanje? Nangona esenokuba uyabazi ubunzulu bokuziphatha okubi ngokwesini, ukuba akayiqondi ingozi yokuzithemba, usenokuzivumela angene kwimeko esiya kuthi isihendo sokwenza okuphosakeleyo siyongamele ingqiqo yakhe.—IMizekeliso 7:6-9, 21, 22; 14:16.
9. Ziziphi izilumkiso ezingokweZibhalo ezinokusikhusela nxamnye nokuziphatha okubi?
9 Xa siyibeka ngokucacileyo, iLizwi likaThixo liyasilumkisa ukuba singaqhathwa kukucinga ukuba somelele gqitha kangangokuba unxulumano olubi alunakusonakalisa. Oku kuquka ukubukela iinkqubo zikamabonwakude ezibonisa ubomi babantu abaziphethe kakubi nokubuka amaphephancwadi avuselela iminqweno yokuziphatha okubi. (1 Korinte 10:11, 12; 15:33) Kwanokunxulumana namanye amakholwa phantsi kweemeko ezingentle kusenokukhokelela kwiingxaki ezinzulu. Umtsalane ophakathi kwabantu bezini ezahlukeneyo unamandla. Ngoko ke, inenkxalabo enothando, intlangano kaYehova iye yasilumkisa ngokuhlala sedwa yaye singabonwa mntu xa sikunye nomntu wesini esahlukileyo esingatshatanga naye okanye ongelilo ilungu lentsapho yethu. Ukuze sihlale sihamba noThixo, kufuneka siwubaleke umgibe wokuzithemba size sithobele isilumkiso asinika sona.—INdumiso 85:8.
Musa Ukuvumela Ukoyika Umntu Kukulawule
10. “Ukugubha ngumntu” kungumgibe njani?
10 Enye ingozi ichazwa yiMizekeliso 29:25, ethi: “Ukugubha ngumntu [kubeka umgibe, NW].” Ngokufuthi umgibe womzingeli uquka ulutya olubhijela luze luqinise intamo okanye iintambo ezirhintyela amanqina enyamakazi. (Yobhi 18:8-11) Ukugubha ngumntu ngokufanayo kunokuwaphelisa amandla omntu okuthetha ngokukhululekileyo nawokuziphatha ngendlela ekholisa uThixo. Umnqweno wokukholisa abanye uyinto eqhelekileyo, yaye ukungakhathaleli oko kucingwa ngabanye abantu akuyondlela yabuKristu. Kodwa kufuneka ulungelelwano. Xa ukuxhalabela indlela abanye abantu abanokusabela ngayo kubangela ukuba umntu enze oko uThixo akwalelayo okanye kumenza angakwenzi oko iLizwi likaThixo likuyalelayo, loo mntu urhintyelwe.
11. (a) Yintoni enokusikhusela ekuvumeleni ukoyika abantu kusilawule? (b) UYehova uye wabanceda njani abakhonzi bakhe abebetsala nzima ngenxa yokoyika abantu?
11 Ukuzikhusela kumgibe onjalo akuxhomekekanga kubuchule bemvelo bukabani, kodwa ‘kusekukholoseni ngoYehova.’ (IMizekeliso 29:25b) Xa ekholose ngoThixo, kwanomntu oneentloni unokuzingqina ekhaliphile yaye eqinile. Lo gama nje sisangqongwe ziingcinezelo zale nkqubo yezinto ingendawo, kuza kufuneka sizilumkele ekubanjisweni ngumgibe wokugubha ngabantu. Nangona umprofeti uEliya wayedume ngokukhonza ngenkalipho, xa uIzebhele wamsongela ngokumcim’ igama, wasaba esoyika. (1 Kumkani 19:2-18) Ephantsi kwengcinezelo, umpostile uPetros esoyika wakhanyela ukuba uyamazi uYesu Kristu, yaye kwiminyaka ethile kamva wavumela ukuba uloyiko lumenze enze ngendlela echaseneyo nokholo. (Marko 14:66-71; Galati 2:11, 12) Noko ke, uEliya noPetros balwamkela uncedo lokomoya yaye, benentembelo kuYehova, baqhubeka bekhonza uThixo ngendlela eyamkelekileyo.
12. Yiyiphi imizekelo yale mihla ebonisa indlela abathile abaye bancedwa ngayo ukuba baphephe ukuvumela uloyiko lubenze barhoxe ekumkholiseni uThixo?
12 Uninzi lwabakhonzi bakaYehova namhlanje luye lwafunda indlela yokoyisa umgibe woloyiko. Elinye iNgqina laseGuyana elikwishumi elivisayo lavuma lisithi: “Umlo wokuxhathisa ingcinezelo yoontanga unzima esikolweni.” Kodwa longezelela lisithi: “Lunjalo ke ukomelela nokholo lwam kuYehova.” Xa umfundisi-ntsapho walo wahlekisa ngonqulo lwalo phambi kweklasi, lathandaza ngokuzolileyo kuYehova. Kamva ngasese ngobuchule eli gqiyazana lanikela ubungqina kulo mfundisi-ntsapho. Ebudeni botyelelo lwakhe kwidolophu yakowabo eseBenin, omnye umfana owayefunda izinto ezifunwa nguYehova wazimisela ukulahla isithixo awayesenzelwe nguyise. Lo mfana wayesazi ukuba loo mfanekiso uqingqiweyo wawungaphili, ibe wayengawoyiki, kodwa wayesazi kananjalo ukuba oomnqay’ ulambile belali yakhe babenokufuna ukumbulala. Wathandaza kuYehova, waza ngongcwalazi wasithabatha eso sithixo wasisa ematyholweni waza wasilahla. (Thelekisa ABagwebi 6:27-31.) Xa ibhinqa elithile kwiDominican Republic laqalisa ukukhonza uYehova, umyeni walo wafuna ukuba likhethe phakathi kwakhe noYehova. Le ndoda yalisongela ngokuwuqhawula umtshato wabo. Ngaba uloyiko lwaluza kulenza lilahle ukholo lwalo? Laphendula: “Ukuba bendingathembekanga kumyeni wam, bendiya kuba neentloni, kodwa andinakuba nazintloni ngokukhonza uYehova uThixo!” Laqhubeka lihamba noThixo, yaye ethubeni umyeni walo walithelela ekwenzeni ukuthanda kukaYehova. Sikholose ngokupheleleyo ngoBawo wethu osezulwini, nathi sinokukuphepha ukuvumela ukugubha ngumntu kusenze sirhoxe ekwenzeni oko sikwaziyo ukuba kuya kumkholisa uYehova.
Kuphephe Ukusibetha Ngoyaba Isiluleko
13. Nguwuphi umgibe esilunyukiswa ngawo kweyoku-1 kuTimoti 6:9?
13 Nangona eminye imigibe esetyenziswa ngabazingeli yenzelwe ukubambisa nayiphi na inyamakazi ezama ukudlula ndaweni ithile, eminye imigibe itsala iinyamakazi ngesithiyelo esinembonakalo ekhohlisayo enomtsalane. Bunjalo ubutyebi kubantu abaninzi. (Mateyu 13:22) Kweyoku-1 kuTimoti 6:8, 9, iBhayibhile isikhuthaza ukuba sanele sisixhaso nesambatho. Yandule ke ilumkise isithi: “Abo bazimisele ukuba zizityebi bawela ekuhendweni nakumgibe nakwiminqweno emininzi yokungabi nangqiqo neyenzakalisayo, ephosela abantu entshabalalweni nasekonakaleni.”
14. (a) Yintoni enokuthintela ubani ekunikeleni ingqalelo kwisiluleko sokwanela sisixhaso nesambatho? (b) Indlela ephosakeleyo obugqalwa ngayo ubutyebi inokumenza njani ubani asibethe ngoyaba isilumkiso esibhalwe kweyoku-1 kuTimoti 6:9? (c) Kungayiphi indlela onokuthi ‘umnqweno wamehlo’ ubamfamekise ngayo abanye kangangokuba bangawuboni umgibe abawubekelweyo?
14 Phezu kwaso nje esi silumkiso, abaninzi bayarhintyeleka ngenxa yokuba bengasisebenzisi kwiziqu zabo esi siluleko. Ngoba? Ngaba oko kubangelwa kukuba ikratshi libanyanzelela ekubeni banamathele kwindlela yokuphila efuna okungaphaya ‘kwesixhaso nesambatho’ iBhayibhile esibongoza ukuba sanele zizo? Ngaba mhlawumbi basibetha ngoyaba isilumkiso seBhayibhile ngenxa yokuba xa kuthethwa ngobutyebi becinga ngabantu abazizigwili? IBhayibhile ibeka ukuzimisela ukuba sisityebi nxamnye nokwaneliseka sisixhaso nesambatho. (Thelekisa eyamaHebhere 13:5.) Ngaba ‘umnqweno wamehlo’—umnqweno wokuba nezinto abazibonayo, de bancame usukelo lokomoya—ubenza bazibeke kwindawo yesibini izilangazelelo zonqulo lokwenyaniso? (1 Yohane 2:15-17; Hagayi 1:2-8) Hayi indlela abonwaba ngakumbi ngayo abo banikela ingqalelo yokwenene kwisiluleko seBhayibhile baze bahambe noThixo ngokuyibeka tanci ebomini babo inkonzo kaYehova!
Ukuhlangabezana Namaxhala Obomi Ngempumelelo
15. Ziziphi iimeko ezithi, ngesizathu esiqondakalayo, zibangele ixhala kuninzi lwabantu bakaYehova, yaye nguwuphi umgibe esimele siwulumkele xa siphantsi kweengcinezelo ezinjalo?
15 Into exhaphake nangaphezu kokuzimisela ukuba sisityebi kukuxhalabela ukufumana izinto eziyimfuneko ebomini. Uninzi lwabakhonzi bakaYehova luphila ngobugcwayibana obungephi bezinto. Lusebenza nzima kangangeeyure ezininzi ukuze lufumane impahla yokunxiba, indawo yokuhlala yentsapho, yaye ubuncinane intsapho ibe nokutya kokuyixhasa ngolo suku. Abanye batsala nzima ngenxa yeengxaki zempilo okanye ezokwaluphala kwabo okanye kwamalungu entsapho. Hayi indlela ekunokuba lula ngayo ukuvumela iimeko ezinjalo zizibekele bucala izilangazelelo zokomoya ebomini babo!—Mateyu 13:22.
16. UYehova usinceda njani sihlangabezane neengcinezelo zobomi?
16 Ngothando, uYehova usixelela ngesiqabu esiza kusifumana phantsi koBukumkani bukaMesiya. (INdumiso 72:1-4, 16; Isaya 25:7, 8) Kwakhona uyasinceda sihlangabezane neengcinezelo zobomi esijamelene nazo ngoku ngokusinika isiluleko esiphathelele indlela yokugcina izinto zokuqala zikwindawo yokuqala. (Mateyu 4:4; 6:25-34) Esebenzisa ingxelo yendlela awabanceda ngayo abakhonzi bakhe kumaxesha adluleyo, uYehova uyasiqinisekisa. (Yeremiya 37:21; Yakobi 5:11) Uyasomeleza ngokusazisa ukuba, phezu kwabo nabuphi na ubunzima obuza kuthi, uthando lwakhe ngabakhonzi bakhe abanyanisekileyo luhlala luhleli. (Roma 8:35-39) Kwabo bakholose ngoYehova, uvakalisa oku: “Andiyi kuze nangayiphi na indlela ndikushiye, ndingayi kuze nangayiphi na indlela ndikutyeshele.”—Hebhere 13:5.
17. Chaza imizekelo yendlela abathile abaye bakwazi ngayo ukuhlala behamba noThixo nangona bephantsi kobunzima obugqithiseleyo.
17 Esomelezwa kukwazi oko, amaKristu okwenyaniso ayaqhubeka ehamba noThixo kunokuba aphambukele kwiindlela zehlabathi. Kumazwe amaninzi ingcamango yehlabathi eqhelekileyo kubantu abangamahlwempu yeyokuba ukuthabatha into kumntu onezinto ezininzi ukuze wondle intsapho yakho akubobusela. Kodwa abo bahamba ngokholo bayayichasa loo mbono. Kubo ukukholisa uThixo kubaluleke ngaphezu kwayo yonke into yaye bakhangela kuye ukuba abavuze ngenxa yehambo yabo yokunyaniseka. (IMizekeliso 30:8, 9; 1 Korinte 10:13; Hebhere 13:18) Umhlolokazi othile waseIndiya wafumanisa ukuba ukukulungela kwakhe ukusebenza kunye nokuba nemveliso kwakumnceda ukuze aphile. Kunokuba nengqumbo ngenxa yemeko yakhe, waqonda ukuba, ukuba wayebeka uBukumkani bukaThixo nobulungisa bakhe kwindawo yokuqala ebomini bakhe, uYehova wayeza kuyisikelela imigudu yakhe yokufumana izinto azisweleyo yena nonyana wakhe. (Mateyu 6:33, 34) Amawaka amaninzi abantu emhlabeni wonke abonisa ukuba, phezu kwabo nabuphi na ubunzima ajamelana nabo, uYehova uligwiba nenqaba yawo. (INdumiso 91:2) Ngaba kunjalo nakuwe?
18. Siyintoni isikhokelo sokuphepha imigibe yehlabathi likaSathana?
18 Logama nje siphila kule nkqubo ikhoyo yezinto, iya kubakho imigibe esimele siyiphephe. (1 Yohane 5:19) IBhayibhile iyayichaza le migibe ize isibonise indlela esinokuyiphepha ngayo. Abo bamthanda ngokwenene uYehova nabakoyika ngokufanelekileyo ukumcaphukisa banokuhlangabezana ngempumelelo nemigibe enjalo. Ukuba ‘bahlala behamba ngomoya,’ abayi kunikezela kwiindlela zehlabathi. (Galati 5:16-25) Phambi kwabo bonke abo bakhela ubomi babo kwisiseko solwalamano lwabo noYehova, kubekwe ithemba elizukileyo lokuhamba noThixo, lokunandipha ubuhlobo obusondeleyo naye ngonaphakade.—INdumiso 25:14.
Athini Amagqabaza Akho?
◻ Ukuzithemba kunokuba ngumgibe ngayiphi indlela?
◻ Yintoni enokusikhusela ekulawulweni kukoyika abantu?
◻ Yintoni enokusenza singasisebenzisi isiluleko esiphathelele ingozi yokusukela ubutyebi?
◻ Yintoni enokusenza sikwazi ukuphepha ukubanjiswa ngumgibe wamaxhala obomi?
[Umfanekiso okwiphepha 16]
Abaninzi bahlala behamba noThixo ubomi babo bonke