Bazali—Khuselani Abantwana Benu!

KWESINYE isikolo semfundo ephakamileyo saseNigeria, intombazana eyayidume ngokuziphatha okubi ngokwesini yayithanda ukufundisa abanye abafundi abangamantombazana ngemibandela yesini. Enye yezinto eyayizincomela ukuze ubani aqhomfe yibhiya ekuthiwa sistout exutywe nezinto ezininzi ezigalelwa ecubeni. Amabali ayo, eyayiwathabatha kwiincwadi ezibonisa amanyala, ayebangel’ umdla kuninzi lwabo yayifunda nabo. Bambi baqalisa ukuba neentlobano zesini, yaye omnye wabo wakhulelwa. Ukuze aqhomfe, wasela umxube westout nezinto ezigalelwa ecubeni. Kwiiyure ezingephi, waqalisa ukuhlanza igazi. Kwiintsuku ezimbalwa kamva, wafela esibhedlele.

Kwihlabathi lanamhlanje, ulutsha oluninzi aluyeki ukuthetha ngesini, nto leyo enemiphumo eyonakalisayo kwabo baphulaphule ngomdla. Abaselula bafanele balufune kubani ulwazi oluchanileyo oluya kubakhusela? Hayi indlela ekuba kuhle ngayo xa bekwazi ukukhangela kubazali babo abahlonela uThixo, abanembopheleleko yokubakhulisela “kwingqeqesho nasekweyiselweni kwengqondo kuYehova.”—Efese 6:4.

Izimo Zengqondo Zabantu BaseAfrika Ngemfundo Yesini

Ehlabathini lonke, uninzi lwabazali lukufumanisa kunzima ukuxubusha imibandela yesini nabantwana balo. Oko kunjalo ngokukodwa eAfrika. UDonald, ongubawo waseSierra Leone, wathi: “Ayenziwa loo nto. Akuyonxalenye yezithethe zaseAfrika ukwenjenjalo.” Elinye ibhinqa laseNigeria elibizwa ngokuba nguConfident livumelana naye lisithi: “Abazali bam bagqala isini njengento ongenakuthetha ngokukhululekileyo ngayo; ngokwesithethe singumbandela oyimfihlo.”

Kwezinye iindawo zaseAfrika, kugqalwa njengenyala kwaukukhankanya amagama aphathelele isini anjengelithi incanca, amadlozi okanye ukuya exesheni. Omnye umama ongumKristu wade wayithintela intombi yakhe ekusebenziseni igama elithi “isini,” nangona wayesithi le ntwazana yakhe yayinokulisebenzisa igama elithi “ukuhenyuza.” Ngokungafaniyo noko, iLizwi likaThixo iBhayibhile lithetha ngokuphandle ngesini nangamalungu esini. (Genesis 17:11; 18:11; 30:16, 17; Levitikus 15:2) Injongo yoku asikokothusa okanye ukuvuselel’ umdla kodwa kukukhusela nokufundisa abantu bakaThixo.—2 Timoti 3:16.

Ngaphandle kwesithethe sokufihla izinto, sikho esinye isizathu sokuba abazali babe mathidala ukwenza oku esichazwa ngomnye ubawo waseNigeria esithi: “Ukuba ndithetha ngesini nabantwana bam, loo nto inokubenza baziphathe kakubi ngokwesini.” Kodwa ngaba inkcazelo endilisekileyo, esekelwe eBhayibhileni ephathelele isini ikhuthaza abantwana ukuba batshe ziintambo baze bafune ukuba neentlobano zesini? Akunjalo konke konke. Eneneni, okukhona abaselula bengazi nto ngaso, kokukhona besesichengeni sokungena enkathazweni. IBhayibhile ithi: “Ubulumko [obusekelwe kulwazi oluchanileyo] bungumthunzi.”—INtshumayeli 7:12.

Kumzekeliso kaYesu, indoda eyingqondi, yakubona kusengaphambili ukuba kuza kubakho uqhwithela, yakha indlu yayo elulwalweni ngoxa esisiyatha yayakha entlabathini yaza yahlelwa yintlekele. (Mateyu 7:24-27) Ngokufanayo, abazali abangamaKristu abaqondayo, besazi ukuba abantwana babo baza kujamelana neengcinezelo ezifana noqhwithela zokuba bahambisane nemilinganiselo yehlabathi yokuziphatha vakalala ngokwesini, bayabomeleza abantwana babo ngolwazi oluchanileyo nangokuqonda okuya kubanceda bahlale beqinile.

Esinye isizathu sokuba abazali abaninzi bangathethi nabantwana babo ngesini sachazwa lelinye ibhinqa laseAfrika elathi: “Xa ndandiselula, abazali bam ababengamaNgqina abazange bathethe nam ngombandela wesini, ngoko ayizange ithi qatha engqondweni yam into yokuba ndithethe ngawo nabantwana bam.” Noko ke, iingcinezelo zinamandla ngakumbi kubantu abaselula banamhlanje kunokuba kwakunjalo kubantu abaselula kwiminyaka eli-10 okanye engama-20 edluleyo. Oku akumangalisi. ILizwi likaThixo laxela kwangaphambili ukuba “ngemihla yokugqibela . . . , abantu abangendawo namabhedengu baya kuhambela phambili ukususela kokubi ukusa kokubi ngakumbi, belahlekisa yaye belahlekiswa.”—2 Timoti 3:1, 13.

Enye into eyongezelela kule ngxaki sisibakala sokuba abantwana abaninzi kunzima okanye abakwazi ukuzityand’ igila kubazali babo. Ngokufuthi kuba nzima ukunxibelelana kumacala omabini kwanakwimibandela eqhelekileyo. Omnye oselula oneminyaka eli-19 wakhalaza esithi: “Andithethi nabazali bam ngezinto. Mna notata asincokoli. Akaphulaphuli.”

Kwakhona abaselula basenokoyika ukuba imibuzo yabo ngokuphathelele imibandela yesini iya kuba nemiphumo emibi. Enye intombazana eneminyaka eli-16 ubudala yathi: “Andithethi ngeengxaki zesini nabazali bam ngenxa yendlela abasabela ngayo kwizinto ezinjalo. Ngenye imini udade wethu omdala wakha wabuza uMama imibuzo ethile ngokuphathelele isini. Kunokuba amncede kwingxaki yakhe, uMama wasuka wamrhanela. UMama wayedla ngokundibiza aze andifak’ imibuzo ngodade wethu, maxa wambi ade athethe izinto ezithile ngokuziphatha kwakhe. Andifuni kuzibeka esichengeni sokungathandwa nguMama, ngoko andimxeleli ezam iingxaki.”

Kutheni Umele Ubafundise?

Ukufundisa abantwana bethu ngokwaneleyo ngemibandela yesini akuyonto elungileyo nje kuphela kodwa kukwayindlela yokubonakalisa ububele. Ukuba abazali ababafundisi abantwana babo ngesini, abanye abantu baza kubafundisa—ibe oko kudla ngokwenzeka ngokukhawuleza gqitha kunokuba abazali belindele yaye oko akuze kwenziwe ngokuvisisana nemigaqo yobuthixo. Enye intombazana eneminyaka eli-13 ubudala yahenyuza ngenxa yokuba yayixelelwe ngomnye eyayifunda naye ukuba, ukuba yayihlala inyulu, yayiza kuva iintlungu ezinganyamezelekiyo kwixesha elizayo. Yaxelelwa oku: “Baza kuwusika ngesikere umhlumba [hymen] wakho.” Xa kamva yabuzwa isizathu sokuba ingamxeleli unina ongumKristu ngale nto yayiyivile, le ntombazana yaphendula isithi imibandela enjalo ayithethwa nabantu abadala.

Enye intombazana yaseNigeria yakha yathi: “Abahlobo bam basesikolweni bazama ukundeyisela ekukholelweni ukuba bonke abantu abaphilileyo bamele babe neentlobano zesini. Bandixelela ukuba ukuba andibi nazintlobano zesini ngoku, xa ndineminyaka engama-21 ubudala, ndiza kuqalisa ukuba nesifo esiya kuba nemiphumo eyintlekele ebufazini bam. Bathi, ngenxa yoko, ukuze uphephe ingozi elisikizi ngolo hlobo, kuhle ukuba neentlobano zesini ngaphambi komtshato.”

Ekubeni yayinxibelelana kakuhle nabazali bayo, ngokukhawuleza le ntwazana yabona ukuba oko kwakwahlukile koko yayikufunde kowayo. “Njengesiqhelo, ndagoduka ndaza ndamxelela umama oko bandixelele kona esikolweni.” Unina wakwazi ukuyixhobisa nxamnye nale nkcazelo ibubuxoki.—Thelekisa IMizekeliso 14:15.

Ngokudlulisela ulwazi olufunekayo ukuze bancede abantwana bafumane ubulumko obungokobuthixo kwimibandela yesini, abazali bayabaxhobisa ukuze baqonde iimeko eziyingozi yaye bakwazi ukubabona abantu abafuna ukubaxhaphaza. Oku kunceda ekubakhuseleni kwizifo ezidluliselwa ngeentlobano zesini nasekumitheni okungafunwayo okubangela intliziyo ebuhlungu. Kuba negalelo ekubeni bazihlonele bahlonelwe nangabanye. Kubenza bangalahlekiswa yaye bangaxhalabi. Kwakha isimo sengqondo esihle nesakhayo ngokuphathelele iintlobano zesini ezifanelekileyo, nto leyo efak’ isandla kulonwabo ukuba kamva bayatshata. Kunokubanceda bahlale benokuma okuhle noThixo. Kwaye njengoko abantwana beyibona inkxalabo enothando ebonakaliswa kubo, oko kunokubashukumisela ekubeni babahlonele yaye babathande ngakumbi abazali babo.

Unxibelelwano Oluhle

Ukuze abazali benze isiluleko sifanelekele iintswelo zabantwana babo, kumele kubekho unxibelelwano oluvela macala. Xa abazali bengakwazi oko kusezingqondweni nasezintliziyweni zabantwana babo, kwanesiluleko esisengqiqweni sisenokungabi yingenelo kangako, kufana nogqirha ozama ukuncomela iyeza elithile engakhange asazi isigulo somguli. Ukuze banikele isiluleko esisebenzisekayo, abazali bamele bazazi iingcamango neemvakalelo zokwenene zabantwana babo. Kufuneka baqonde iingcinezelo neengxaki abajamelana nazo kunye nemibuzo ebaxakayo abantwana babo. Kubalulekile ukubaphulaphula ngenyameko abantwana, ‘ukukhawuleza ukuva, nokucotha ukuthetha.’—Yakobi 1:19; IMizekeliso 12:18; INtshumayeli 7:8.

Kufuneka ixesha, umonde nomgudu ukuze abazali bahlakulele yaye bagcine ulwalamano olusondeleyo nabantwana babo, ulwalamano olubangela abantwana bazive bekhululekile ukuzityand’ igila. Kodwa hayi indlela okuba kuhle ngayo oku xa sele kuphumelela! Omnye ubawo onabantwana abahlanu waseNtshona Afrika uthi: “Ndingubawo okwangumhlobo osenyongweni. Abantwana baxubusha ngokukhululekileyo nam ngayo yonke imibandela, kuquka nesini. Kwanamantombazana aye azityand’ igila kum. Siye sizinike ixesha lokuxubusha iingxaki zawo. Kwaye nawo aye abelane nam ngezinto eziwavuyisayo.”

UBola, enye yeentombi zakhe, uthi: “Andifihli nanye into kutata. UTata unolwazelelo yaye unovelwano. Akasiqweqwedisi okanye asiphathe gadalala, kwanaxa senze into ephosakeleyo. Kunokuba abhabhazele ngumsindo, uyawuphonononga loo mbandela aze asibonise oko sifanele sikwenze okanye oko besingafanele kukwenza. Ngokufuthi ubhekisela kwincwadi ethi Ubutsha kunye nethi Ulonwabo Lwentsapho.”a

Ukuba kunokwenzeka, kuhle ukuba abazali baqalise ukuthetha nabantwana babo ngesini besebancinane kakhulu. Oku kwakha isiseko seengxubusho eziza kuqhubeka ukutyhubela iminyaka yeshumi elivisayo edla ngokuba nzima. Xa ezi ngxubusho zingaqaliswa kuselithuba, maxa wambi kuba nzima ukuziqalisa ixesha selihambile, kodwa nako oko kunokwenziwa. Omnye umama onabantwana abahlanu wathi: “Ndazinyanzela ukuba ndithethe ngale nto de ekugqibeleni ndakwazi ukuthetha ngokukhululekileyo, kwaba njalo nasemntwaneni.” Ekubeni lo ingumba onobuzaza, ngokuqinisekileyo imigudu enjalo ifanelekile.

Bakhuselekile Yaye Bonwabile

Abantwana bayabaxabisa abazali ababaxhobisa ngothando ngolwazi oluya kubakhusela. Khawuve amagqabaza amanye amaNgqina kaYehova aseAfrika:

Eneminyaka engama-24 ubudala, uMojisola wathi: “Ndiya kusoloko ndimbulela umama. Wandifundisa endandifanele ndikwazi ngokuphathelele isini ngexesha elifanelekileyo. Nangona ndaziva ndineentloni xa wayezixubusha nam ezo zinto kudala, ngoku ndiyazibona izinto ezilungileyo umama andenzele zona.”

UIniobong walek’ umsundulo esithi: “Ndisoloko ndivuya xa ndikhangela emva ndize ndicinge ngoko uMama andenzele kona ngokundinika ingqeqesho eyaneleyo ngesini. Iye yaluncedo olubaluleke gqitha ekundikhokeleleni ebufazini. Ndizimisele ukwenza okufanayo kubantwana bam kwixesha elizayo.”

UKunle oneminyaka eli-19 ubudala wathi: “Abazali bam baye bandinceda ndamelana neengcinezelo zamabhinqa ehlabathi afuna ukuba neentlobano zesini naye nabani na. Ukuba babengandiqeqeshanga, ngendawela esonweni. Ndiya kusoloko ndikuxabisa oko bakwenzileyo.”

UChristiana wathi: “Ndizuza lukhulu xa ndikhe ndancokola nomama ngokuphathelele isini. Ndiye ndakhuseleka kwizifo ezibulalayo nasekumitheni okungafunwayo, kwaye ndiye ndakwazi ukumisela umzekelo omhle kwabanye abanakwethu noodade wethu abeza emva kwam. Kwakhona ndiye ndahlonelwa ngabantu, kwaye nalowo uza kuba ngumyeni wam uza kundihlonela. Okona kubaluleke nangakumbi kukuba, ndinolwalamano oluhle noYehova uThixo ngenxa yokugcina umthetho wakhe.”

UBola, okhankanywe ngaphambilana, wathi: “Kwakukho omnye umntwana eklasini yam owathi ubani unokuba neentlobano zesini ngaphandle kokuzibophelela ngomtshato. Zaziyindlela yokuzonwabisa kuye. Noko ke, wafumanisa ukuba aziyondlela yokuzonwabisa xa wakhulelwa waza akakwazi ukubhala iimviwo zokuphela konyaka kunye nathi. Ukuba bendingenaye utata olungileyo wokundikhokela, mhlawumbi ngendiye ndafana naye, ndafunda kabuhlungu.”

Enjani yona intsikelelo xa abazali abangamaKristu benceda abantwana babo ‘babe nobulumko obusa elusindisweni’ kweli hlabathi lithe phithi thwanga sisini! (2 Timoti 3:15) Imfundiso yabo esekelwe eBhayibhileni ifana nentsimbi yomqala exabisekileyo ehombisa ize yenze abantwana babe bahle emehlweni kaThixo. (IMizekeliso 1:8, 9) Abantwana baziva benqabisekile, kwaye abazali bafumana ulwaneliseko olunzulu. Omnye ubawo waseAfrika osoloko ezabalazela ukuwavula amajelo onxibelelwano nabantwana bakhe wathi: “Sinoxolo lwengqondo. Siqinisekile ukuba abantwana bethu bayakwazi oko kumkholisayo uYehova; abanakulahlekiswa ngabanye abantu. Siqinisekile ukuba abayi kwenza izinto eziya kuyenza buhlungu intsapho. Ndinombulelo kuYehova ngenxa yokuba abantwana bethu bekungqine kufanelekile ukuba sibathembe.”

[Imibhalo esemazantsi]

[Umfanekiso okwiphepha 10]

Ulutsha olungamaKristu olufumana inkcazelo esekelwe eBhayibhileni kubazali lunokuwakhaba ngaw’ omane amabali abubuvuvu abaliswa lolunye ulutsha