Ukuphila Ngokuvisisana Nozahlulelo LobuKristu Ukhululekile

“Apho ukhoyo umoya kaYehova, kukho inkululeko.”—2 KORINTE 3:17.

1. Azahlulele kubani amaNgqina kaYehova, yaye kutheni esebenzisa imibutho engokwasemthethweni?

AMANGQINA KAYEHOVA akholelwa ukuba unqulo lwawo luya kuhlala lumi ngonaphakade. Ngoko azimisele ukukhonza uThixo “ngomoya nenyaniso” kude kuse emaphakadeni. (Yohane 4:23, 24) Njengabantu abanenkululeko yokuzikhethela, la maKristu aye azahlulela engagogotye nto kuYehova uThixo yaye azimisele ukuphila ngokuvisisana noko. Ukuze enze oko, ayama ngeLizwi likaThixo nangomoya wakhe oyingcwele. Njengoko ngentliziyo iphela ephila ngekhondo lawo lozahlulelo lobuKristu esebenzisa inkululeko ayifumene kuThixo, amaNgqina abonakalisa intlonelo efanelekileyo ngendima ephunyezwa ‘ngamagunya awongamileyo’ aseburhulumenteni aze azisebenzise kakuhle izinto kunye namalungiselelo asemthethweni. (Roma 13:1; Yakobi 1:25) Ngokomzekelo, amaNgqina asebenzisa iWatch Tower Society njengesixhobo esingokwasemthethweni—esinye kwezininzi ezikumazwe ahlukeneyo—ukuze akwazi ukuphumeza umsebenzi wawo wokunceda abanye abantu, ngokukodwa ngezinto zokomoya. Kodwa amaNgqina azahlulele kuThixo, kungekhona kuwo nawuphi na umbutho ongokwasemthethweni, kwaye uzahlulelo lwawo kuYehova luya kuhlala lumi ngonaphakade.

2. Kutheni iWatch Tower Society kunye neminye imibutho engokwasemthethweni ixatyiswa kakhulu kangaka ngamaNgqina kaYehova?

² Njengabakhonzi abazahlulele kuThixo, amaNgqina kaYehova anembopheleleko yokulandela imiyalelo kaYesu ‘yokwenza abafundi abantu beentlanga zonke, ebabhaptiza egameni loYise neloNyana nelomoya oyingcwele, ebafundisa.’ (Mateyu 28:19, 20) Lo msebenzi uya kuqhubeka kude kuse esiphelweni senkqubo yezinto, kuba uYesu wakwathi: “Ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga; kwandule ke kufike ukuphela.” (Mateyu 24:3, 14) Nyaka ngamnye, imizi-mveliso yokushicilela yeWatch Tower Society kunye namanye amaqumrhu asemthethweni alungiselela amaNgqina kaYehova izigidi zeeBhayibhile, iincwadi, iincwadana ezinemifanekiso kunye namaphephancwadi ukuze zisetyenziswe kumsebenzi wokushumayela ehlabathini lonke. Ngoko ke, ezi ntlangano zisemthethweni zibaluleke ngendlela engathethekiyo ekuncedeni abakhonzi bakaThixo baphile ngokuvisisana nozahlulelo lwabo kuye.

3. AmaNgqina kaYehova ebedla ngokulisebenzisa ngayiphi ingqiqo ngaphambili ibinzana elithi “uMbutho”?

³ Omnye umntu usenokuma ngelithi indlela amaNgqina athetha ngayo ngeWatch Tower Society—okanye ngokuqhelekileyo “uMbutho”—ibonisa ukuba kuwo ingaphaya kwesixhobo esingokwasemthethweni. Ngaba akayigqali njengelona gunya ligqiba ngezinto zonqulo? Incwadi ethi AmaNgqina KaYehova—Abavakalisi BoBukumkani BukaThixo iwuchaza kakuhle lo mba xa isithi: “Xa IMboniselo [kaJuni 1, 1938, (yesiNgesi)] yayibhekisela ‘kuMbutho,’ oku kwakuthetha, kungekhona nje uthunywashe ongokwasemthethweni, kodwa iqela lamaKristu athanjisiweyo awayeyile loo ntlangano esemthethweni aza ayisebenzisa.”a Ngoko elo binzana lalimela “ikhoboka elithembekileyo neliyingqondi.” (Mateyu 24:45) Kungokwale ngqiqo ke le nto amaNgqina esoloko esebenzisa ibinzana elithi “uMbutho.” Kakade ke, umbutho osemthethweni ‘nekhoboka elithembekileyo eliyingqondi’ asingomabinzana abhekisela kwinto enye. Abalathisi beWatch Tower Society bayanyulwa, ukanti amaNgqina ayila “ikhoboka elithembekileyo” athanjiswa ngomoya oyingcwele kaYehova.

4. (a) AmaNgqina amaninzi athetha njani ukuze aphephe ukuqondwa ngendlela engachananga? (b) Kutheni sifanele silungelelane ngokuphathelele amabinzana esiwasebenzisayo?

⁴ Ukuze aphephe ukuqondwa ngendlela engachananga, amaNgqina kaYehova azama ukuyilumkela indlela athetha ngayo. Kunokuba athi, “uMbutho ufundisa ukuba,” amaNgqina amaninzi akhetha ukusebenzisa la mazwi, “iBhayibhile ithi” okanye, “ngokolwazi lwam iBhayibhile ifundisa oku.” Ngale ndlela abalaselisa isigqibo sobuqu esiye senziwa liNgqina ngalinye ekwamkeleni iimfundiso zeBhayibhile yaye akwaphepha ukuqondwa ngendlela ephosakeleyo yokuba ngandlel’ ithile amaNgqina alawulwa ngegqudu nguzwilakhe othile wehlelo lonqulo. Kakade ke, amacebiso angendlela yokusebenzisa amabinzana athile asinto sinokude sibambane ngayo. Ngapha koko, ekuphela kwendlela abaluleke ngayo amabinzana yeyokuba athintela ukungaqondani. Kufuneka ukulungelelana kobuKristu. IBhayibhile iyasibongoza ukuba ‘singalwi ngamazwi.’ (2 Timoti 2:14, 15) IZibhalo zikwathetha ngalo mgaqo: “Ngaphandle kokuba ngalulwimi lumbi nithetha intetho eqondakala ngokulula, kuya kwaziwa njani na oko kuthethwayo?”—1 Korinte 14:9.

Umoya KaThixo Uphungula Imfuneko Yemithetho

5. Imele iqondwe njani eyoku-1 kwabaseKorinte 10:23?

⁵ Umpostile uPawulos wathi: “Zonke izinto zisemthethweni; kodwa asizizo zonke izinto ezizezokulungelwa.” Walek’ umsundulo esithi: “Zonke izinto zisemthethweni; kodwa asizizo zonke izinto ezakhayo.” (1 Korinte 10:23) Kucacile ukuba uPawulos wayengathethi kuthi kulungile ukwenza izinto ezichaswa ngokuphandle liLizwi likaThixo. Xa kuthelekiswa nemithetho engama-600 eyayinikwe amaSirayeli amandulo, imbalwa imiyalelo edandalazisiweyo elawula ubomi bamaKristu. Ngoko, imibandela emininzi ishiyelwe isazela sikabani. Umntu ozahlulele kuYehova uxhamla inkululeko ebangelwa kukwalathiswa ngumoya kaThixo. Akuba eyenze eyakhe inyaniso, umKristu ulandela isazela esiqeqeshwe yiBhayibhile aze ayame ngolwalathiso lukaThixo alunikela ngomoya oyingcwele. Oku kunceda umKristu ozahluleleyo ukuba agqibe ngoko ‘kwakhayo’ noko ‘kukokokulungelwa’ kwakhe nokwabanye. Uyaqonda ukuba izigqibo azenzayo zichaphazela ulwalamano lwakhe noThixo, azahlulele kuye.

6. Kwiintlanganiso zamaKristu, sinokubonakalisa njani ukuba siyenze eyethu inyaniso?

⁶ INgqina libonisa ukuba liyenze eyalo inyaniso ngokugqabaza ezintlanganisweni zamaKristu. Ekuqaleni, lisenokucengceleza oko kubhalwe kwimpapasho efundwayo. Noko ke, ethubeni liya kukhula ukusa kwinqanaba lokuchaza iimfundiso zeBhayibhile ngawalo amazwi. Ngaloo ndlela linikela ubungqina bokuba amandla alo okucinga ayakhula, aliphindi oko sele kuthethwe ngabanye. Ukuvakalisa iingcamango ngamazwi alo nokuthetha amazwi enyaniso achanileyo ngokusuka entliziyweni kuya kulenza livuye yaye kubonise ukuba leyisekile engqondweni yalo.—INtshumayeli 12:10; thelekisa eyabaseRoma 14:5b.

7. Ziziphi izigqibo eziye zenziwa ngabakhonzi bakaYehova ngokukhululekileyo?

⁷ AmaNgqina kaYehova aqhutywa luthando ngoThixo nangabanye abantu. (Mateyu 22:36-40) Liyinyaniso elokuba iqhina lothando olufana nolukaKristu liwamanyanise kubuzalwana behlabathi lonke. (Kolose 3:14; 1 Petros 5:9) Kodwa njengabantu abanenkululeko yokuzikhethela, ngamnye kuwo uye wazenzela isigqibo sokuvakalisa iindaba ezilungileyo zoBukumkani bukaThixo, sokuhlala engundilele kwezobupolitika, sokuzikhwebula kwigazi, sokuphepha iintlobo ezithile zokuzonwabisa nesokuphila ngemilinganiselo yeBhayibhile. Akanyanzelwa ekwenzeni ezi zigqibo. Ezi zigqibo ziyinxalenye yendlela yokuphila abathi abo baza kuba ngamaNgqina bazikhethele ngokukhululekileyo ngaphambi kokuba bathabathe inyathelo lozahlulelo lobuKristu.

Ngaba Amele Aziphendulele KwiQumrhu Elilawulayo?

8. Nguwuphi umbuzo ofuna ukucaciswa?

⁸ IBhayibhile yenza kucace nakuthathatha ukuba amaKristu okwenyaniso akamkhonzi ngesinyanzelo uThixo. Ithi: “UYehova unguMoya; yaye apho ukhoyo umoya kaYehova, kukho inkululeko.” (2 Korinte 3:17) Kodwa esi sibakala singasivisisanisa njani nengcamango yokuba kubekho ‘ikhoboka elithembekileyo neliyingqondi’ kunye neQumrhu Elilawulayo lalo?—Mateyu 24:45-47.

9, 10. (a) Umgaqo wobuntloko usebenza njani kwibandla lamaKristu? (b) Yintoni ekwafuneka yenziwe ukuze kulandelwe umgaqo wobuntloko kwibandla lamaKristu lenkulungwane yokuqala?

⁹ Ukuze siphendule lo mbuzo, simele sikhumbule umgaqo weZibhalo wobuntloko. (1 Korinte 11:3) Kweyabase-Efese 5:21-24, uKristu uchazwa ‘njengentloko yebandla,’ njengalowo ‘limthobelayo.’ AmaNgqina kaYehova ayaqonda ukuba ikhoboka elithembekileyo neliyingqondi liyilwe ngabazalwana bokomoya bakaYesu. (Hebhere 2:10-13) Eli khoboka lithembekileyo limiselwe ukuze lilungiselele abantu bakaThixo ‘ukutya kokomoya ngexesha elifanelekileyo.’ Kweli xesha lesiphelo, uKristu uye wamisela eli khoboka ‘phezu kwempahla yakhe yonke.’ Ngoko isikhundla salo simele sihlonelwe nangubani na ozibiza ngokuthi ungumKristu.

¹⁰ Injongo yobuntloko kukugcina umanyano nokuqinisekisa ukuba ‘zonke izinto zenzeka ngokundilisekileyo nangokwelungiselelo.’ (1 Korinte 14:40) Ukuze kuphunyezwe oku ngenkulungwane yokuqala, kwanyulwa amaKristu athanjisiweyo amaninzi kwikhoboka elithembekileyo neliyingqondi ukuze amele lonke elo qela. Njengoko iziganeko ezalandelayo zabonisayo, uYehova wakholiswa waza walusikelela ulwalathiso olwanikelwa leli qumrhu lilawulayo lenkulungwane yokuqala. AmaKristu enkulungwane yokuqala alamkela ngovuyo elo lungiselelo. Ewe, alamkela ngezandl’ ezishushu nemilomo ingahlangani yimiphumo emihle elayibangelayo.—IZenzo 15:1-32.

11. IQumrhu Elilawulayo lale mihla lifanele lijongwe njani?

¹¹ Elo lungiselelo lisabaluleke nanamhl’ oku. Sithetha nje, iQumrhu Elilawulayo lamaNgqina kaYehova liyilwe ngamadoda alishumi angamaKristu athanjisiweyo, onke anamashumi eminyaka yamava engamaKristu. Anikela ulwalathiso lokomoya kumaNgqina kaYehova, njengequmrhu elilawulayo lenkulungwane yokuqala. (IZenzo 16:4) NjengamaKristu okuqala, amaNgqina ayakuvuyela ukukhangela kubazalwana abaqolileyo beQumrhu Elilawulayo ukuze afumane ulwalathiso olusekelwe eBhayibhileni nokhokelo kwimibandela ephathelele unqulo. Nangona amalungu eQumrhu Elilawulayo engamakhoboka kaYehova noKristu, njengamanye amaKristu, iBhayibhile isiyalela oku: “Bathobeleni abo bakhokelayo phakathi kwenu nize nibalulamele, kuba bahlala beyilindile imiphefumlo yenu njengabo baya kunikela ingxelo; ukuze bakwenze oku ngovuyo kungekhona ngokuncwina, kuba oku bekuya kwenza umonakalo kuni.”—Hebhere 13:17.

12. Ngubani afanele umKristu ngamnye aziphendulele kuye?

¹² Ngaba isikhundla sokuvelela iZibhalo ezisinika iQumrhu Elilawulayo sithetha ukuba iNgqina likaYehova ngalinye limele liziphendulele kulo ngemisebenzi yalo? Akunjalo ngokutsho kwamazwi kaPawulos kumaKristu aseRoma: “Kutheni umgweba nje umzalwana wakho? Okanye kutheni ukwamjongela phantsi nje umzalwana wakho? Kuba sonke siya kuma phambi kwesihlalo sokugweba sikaThixo . . . Ngamnye wethu uya kunikela ingxelo kuThixo.”—Roma 14:10-12.

13. Kutheni amaNgqina kaYehova enikela ingxelo ngomsebenzi wawo wokushumayela?

¹³ Noko ke, ngaba akuyonyaniso ukuba iNgqina ngalinye kulindeleke ukuba linikele ingxelo ngomsebenzi walo wokushumayela? Kunjalo, kodwa injongo yoko ichazwe kakuhle kwenye incwadi yamaNgqina, ethi: “Abalandeli bokuqala bakaYesu Kristu babenomdla kwiingxelo zenkqubela kumsebenzi wokushumayela. (Marko 6:30) Njengokuba umsebenzi wawuhambela phambili, kwaqulunqwa iingxelo ezinamanani neengxelo zamava abalaseleyo abo babenesabelo ekushumayeleni iindaba ezilungileyo. . . . (IZe. 2:5-11, 41, 47; 6:7; 1:15; 4:4) . . . Hayi indlela ekwakukhuthaza ngayo kwabo basebenzi bathembekileyo bangamaKristu ukuva iingxelo ngoko kwakufezwa! . . . Ngendlela efanayo, intlangano kaYehova yanamhlanje izabalazela ukugcina iingxelo ezichanileyo zomsebenzi owenziwayo ukuzalisekisa uMateyu 24:14.”

14, 15. (a) Eyesi-2 kwabaseKorinte 1:24 isebenza njani kwiQumrhu Elilawulayo? (b) UmKristu ngamnye umele enze isigqibo sobuqu ngokusekelwe entwenini, yaye yintoni ayazi kakuhle?

¹⁴ IQumrhu Elilawulayo lilungiselelo lothando nomzekelo wokholo ofanele ukuxeliswa. (Filipi 3:17; Hebhere 13:7) Ngokunamathela nangokulandela uKristu njengomzekelo, liphinda amazwi kaPawulos athi: “Asikuko ukuba siziinkosi phezu kokholo lwenu, kodwa singabasebenzi abangamadlelane ukuze nibe novuyo, kuba nimi ngokholo lwenu.” (2 Korinte 1:24) Ngokuqwalasela utyekelo oluthile, iQumrhu Elilawulayo litsalel’ ingqalelo kwiingenelo zokuthobela isiluleko seBhayibhile, linikele amacebiso ngendlela yokusebenzisa imithetho nemigaqo yeBhayibhile, lilumkise ngeengozi ezifihlakeleyo lize linikele ukhuthazo oluyimfuneko ‘kubasebenzi abangamadlelane.’ Ngaloo ndlela liyabuphumeza ubugosa balo bobuKristu, libancede bahlale bevuya lize libakhe elukholweni ukuze bame ngokuthe nkqi.—1 Korinte 4:1, 2; Tito 1:7-9.

¹⁵ Xa iNgqina lisenza isigqibo esisekelwe kwisiluleko esinikelwe liQumrhu Elilawulayo, lisenza ngokuzithandela ngenxa yokuba iBhayibhile ileyisele kwelokuba isigqibo elisenzayo silikhondo elifanelekileyo. INgqina ngalinye liphenjelelwa liLizwi likaThixo ukuze lisebenzise isiluleko esingokweZibhalo esisengqiqweni esinikelwa liQumrhu Elilawulayo, lisazi kakuhle ukuba izigqibo elizenzayo ziya kuchaphazela ulwalamano lwalo lobuqu noThixo, elizahlulele kuye.—1 Tesalonika 2:13.

Abafundi Namajoni

16. Nangona izigqibo eziphathelele ihambo kabani zingumbandela wobuqu, kutheni abanye besuswa kubudlelane?

¹⁶ Kodwa ukuba izigqibo ngehambo kabani zingumbandela wobuqu, kutheni ke amanye amaNgqina kaYehova esuswa kubudlelane? Akukho mntu kukokwakhe ukugqiba kwelokuba umntu owenze isono esithile umele asuswe kubudlelane. Kunoko, ngokutsho kweZibhalo esi senzo siyimfuneko kuphela xa ilungu lebandla liqin’ enyaleni lisenza izono ezinzulu, ezinjengezo zidweliswe kwisahluko sesihlanu seyokuQala kwabaseKorinte. Ngaloo ndlela, ngoxa umKristu enokususwa kubudlelane ngenxa yokuqhelisela uhenyuzo, oku kwenzeka kuphela ukuba akalwamkeli uncedo lokomoya lwabalusi abanothando. AsingomaNgqina kaYehova odwa alandela olu qheliselo lobuKristu. IThe Encyclopedia of Religion ithi: “Naliphi na ibutho labantu linelungelo lokuzikhusela kumalungu alo anxaxhayo asenokuba sisihlava eluntwini. Ezinkonzweni eli lungelo ngokufuthi belixhaswa nayinkolelo yokuba ukohlwaywa [ukusikwa] kuyakuchaphazela ukuma kukabani ngaphambi kukaThixo.”

17, 18. Ukufaneleka kokususa kubudlelane kunokufaniswa nantoni?

¹⁷ AmaNgqina kaYehova angabafundi beBhayibhile. (Yoshuwa 1:8; INdumiso 1:2; IZenzo 17:11) Inkqubo yemfundo yeBhayibhile elungiselelwa liQumrhu Elilawulayo isenokufaniswa noludwe lwezifundo oluqulunqwa yibhodi yemfundo. Nangona le bhodi ingazibhalanga ngokwayo iincwadi eziza kufundiswa, yiyo equlunqa uludwe lwezifundo ezimele zifundwe, igqibe ngendlela yokufundisa ize inikele ulwalathiso oluyimfuneko. Ukuba nabani na akavumi ngokuphandle ukuphila ngokuvisisana neemfuneko zesikolo, uphehluzelisa abanye abafundi okanye uzisa ihlazo kweso sikolo, usenokugxothwa. Abasemagunyeni beso sikolo banelungelo lokwenza into eza kuba yingenelo kubo bonke abafundi.

¹⁸ Ngaphandle kokuba ngabafundi, amaNgqina kaYehova angamajoni kaYesu Kristu, ayalelwe ukuba ‘alwe umlo omhle wokholo.’ (1 Timoti 6:12; 2 Timoti 2:3) Ngesizathu esiqondakalayo, ihambo ethe gqolo engalifanelanga ijoni elingumKristu isenokulenza uThixo angakholiswa lilo. Njengomntu ojizekwe inkululeko yokuzikhethela, ijoni elingumKristu linokuzenzela izigqibo ngokokuthanda kwalo, kodwa limele liyive imiphumo yesigqibo salo. UPawulos waqiqa ngelithi: “Akukho mntu ukhonza njengejoni uzibandakanya kumashishini ezorhwebo obomi, ukuze azuze inkoliseko yalowo wambhalisa njengejoni. Ngaphezu koko, ukuba nabani na uyasukuzana kwanasemidlalweni, akathweswa sithsaba ngaphandle kokuba uye wasukuzana ngokwemimiselo.” (2 Timoti 2:4, 5) AmaKristu aqolileyo, kuquka lawo akwiQumrhu Elilawulayo, ahlala ekulungele ngokupheleleyo ukuthobela umyalelo weNkokeli yawo, uYesu Kristu, egcina ‘imimiselo’ ukuze azuze ubomi obungunaphakade.—Yohane 17:3; ISityhilelo 2:10.

19. Yintoni esinokuqiniseka ngayo sakuba sizihlolisise zonke izibakala eziphathelele uzahlulelo lobuKristu?

¹⁹ Ngaba ezi zibakala azikutsho ucacelwe ukuba amaNgqina kaYehova angabakhonzi bakaThixo, kungekhona amakhoboka abantu? NjengamaKristu azahluleleyo anandipha inkululeko awayinikwa nguKristu, evumela umoya kaThixo neLizwi lakhe zilawule ubomi bawo njengoko ekhonza ngaxhatha linye nabazalwana bawo kwibandla likaThixo. (INdumiso 133:1) Kwakhona ubungqina boku bumele bushenxise nawaphi na amathandabuzo angomthombo wamandla awo. Anokuthelela umdumisi ekuvumeni esithi: “NguYehova amandla am nengweletshetshe yam; yakholosa ngaye intliziyo yam, ndancedeka. Iyadlamka ke intliziyo yam, ndiyamdumisa ngengoma yam.”—INdumiso 28:7.

[Imibhalo esemazantsi]

Ubunokuphendula Uthini?

◻ IWatch Tower Society kunye neminye imibutho engokwasemthethweni efana nayo iwanceda njani amaNgqina kaYehova?

◻ AmaKristu angenelwa njani kwindima ephunyezwa liQumrhu Elilawulayo lamaNgqina kaYehova?

◻ Kutheni abantu bakaYehova benikela ingxelo ngomsebenzi wabo wokushumayela?

◻ Kuphantsi kwaziphi iimeko ekuye kufaneleke ukususwa kubudlelane komKristu ozahluleleyo?

[Umfanekiso okwiphepha 19]

Iqumrhu elilawulayo lenkulungwane yokuqala lalondoloza umanyano kwiimfundiso

[Umfanekiso okwiphepha 23]

Ehlabathini lonke, amaNgqina kaYehova anandipha inkululeko awayinikwa nguKristu