Kulumkele Ukuswela Ukholo
“Lumkani, bazalwana, ngokoyikela ukuba hleze kuvele nakuwuphi na wenu intliziyo engendawo eswele ukholo ngokuthi imke kuThixo ophilayo.”—HEBHERE 3:12.
1. Yiyiphi inyaniso eyothusayo eziswa engqalelweni yethu ngamazwi kaPawulos aya kumaKristu angamaHebhere?
HAYI indlela eyoyikeka ngayo le ngcamango—le yokuba kanti abantu abakhe baba nolwalamano lobuqu noYehova banokuba ‘nentliziyo engendawo’ baze ‘bemke kuThixo ophilayo’! Yaye esinjani sona isilumkiso! La mazwi kampostile uPawulos ayengabhekiswa kwabangakholwayo, kodwa ayebhekiswa kubantu ababebahlulele ubomi babo kuYehova ngesizinzi sokholo kwidini lentlawulelo likaYesu Kristu.
2. Yiyiphi imibuzo ekufuneka siyiqwalasele?
2 Kwakunokwenzeka njani ukuba umntu osikeleleke ngolo hlobo ngokomoya abe ‘nentliziyo engendawo eswele ukholo’? Eneneni, kwakunokwenzeka njani ukuba ubani owayesele elungcamlile uthando nobubele obungasifanelanga bukaThixo amshiye ngabom? Yaye ngaba oku kunokwenzeka nakubani na kuthi? Le mibuzo imtsho ubani akhe azikis’ ukucinga, yaye isenza sifune ukuqonda isizekabani sesi silumkiso.—1 Korinte 10:11.
Kwakutheni Ukuze Kudluliselwe Isiluleko Esinamandla Ngolo Hlobo?
3. Chaza iimeko ezazichaphazela amaKristu enkulungwane yokuqala awayehlala eYerusalem nakwimimandla eyingqongileyo.
3 Kubonakala ukuba uPawulos wayebhalela amaKristu angamaHebhere elakwaYuda ngowama-61 C.E. Umbhali-mbali othile waphawula ukuba eli yayilixesha “apho kwakungekho xolo nakukhuseleka kuye nawuphi na umntu othe qwa nonyanisekileyo, esixekweni saseYerusalem okanye naphi na kulo lonke elo phondo.” Ngelo xesha kwakungekho mthetho yaye ugonyamelo lusaphul’ izikeyi, nto leyo eyayibangelwa bubukho bomkhosi wengcinezelo wamaRoma, amadela-kufa amaYuda angamaZealot awayewathiy’ egazini amaRoma, kunye nokugqugqisa kwamatutu awayexhamla elo cham lamaxesha ezaqunge. Zonke ezi zinto zatsho kwanzima kumaKristu, awayezama ngamandla ukuba angarhintyeleki kule nquleqhu. (1 Timoti 2:1, 2) Eneneni, ngenxa yobundilele bawo, bambi babewagqala njengabantu abangenandawo ekuhlaleni, nabaqhwayi bodushe. Ngokufuthi amaKristu ayephathwa kakubi, ibe ayebandezelwa emzimbeni.—Hebhere 10:32-34.
4. Yiyiphi ingcinezelo yonqulo awayephantsi kwayo amaKristu angamaHebhere?
4 Kwakhona amaKristu angamaHebhere ayephantsi kwengcinezelo enkulu yonqulo. Inzondelelo yabafundi abathembekileyo bakaYesu kunye nokukhula ngokukhawuleza kwebandla lamaKristu okwabangelwa yiyo kwadala umona nengqumbo kumaYuda—ngokukodwa kwiinkokeli zawo zonqulo. Zazikhwela zizehlela zibaxhaphaza yaye zibatshutshisa abalandeli bakaYesu Kristu.a (IZenzo 6:8-14; 21:27-30; 23:12, 13; 24:1-9) Kwanokuba amanye amaKristu ayesinda kwintshutshiso engqalileyo, sekunjalo ayengcikivwa yaye egculelwa ngamaYuda. UbuKristu babucekiswa kuba bugqalwa njengonomgogwana wonqulo owayengenabo ubungangamsha obufana nobonqulo lwamaYuda, ongenatempile, ongenababingeleli, ongenamithendeleko, ongenamadini, njalo njalo. Kwanenkokeli yawo, uYesu, yabulawa njengomguvela wesihange. Ukuze amaKristu aqhelisele unqulo lwawo, kwakufuneka abe nokholo nenkalipho yaye anyamezele.
5. Kutheni kwakubalulekile ukuba amaKristu elakwaYuda ahlale ephaphile ngokomoya?
5 Ngaphezu kwako konke, amaKristu angamaHebhere elakwaYuda ayephila kwelona xesha lamanqam kwimbali yolo hlanga. Izinto ezininzi eyayithe iNkosi yawo, uYesu Kristu, zaziya kuphawula isiphelo senkqubo yamaYuda zazisele zenzekile. Isiphelo sasisemnyango. Ukuze asinde, amaKristu kwakuya kufuneka ahlale ephaphile ngokomoya yaye elungele “ukusabela ezintabeni.” (Mateyu 24:6, 15, 16) Ngaba ayeza kuba nokholo namandla okomoya awayefuneka ukuze athabathe inyathelo elikhawulezileyo, njengoko uYesu wayalelayo? Kubonakala ngathi kwakukho amathandabuzo athile.
6. Yintoni awayeyifuna ngokungxamisekileyo amaKristu elakwaYuda?
6 Ebudeni beshumi lokugqibela leminyaka ngaphambi kokutshayelwa kwayo yonke inkqubo yezinto yamaYuda, kuyacaca ukuba amaKristu angamaHebhere ayephantsi kwengcinezelo enkulu evela ngaphakathi nangaphandle kwebandla. Ayefuna ukukhuthazwa. Kodwa ayekwafuna nesiluleko kunye nolwalathiso lokuwanceda abone ukuba ikhondo awayelikhethile lalilungile nokuba ukubandezeleka nokunyamezela kwawo kwakungelolize. Okuvuyisayo kukuba, uPawulos waba nemfobe waza wawanceda kobo bugxwayiba.
7. Kutheni sifanele sibe nomdla koko uPawulos wakubhalela amaKristu angamaHebhere?
7 Oko uPawulos wakubhalela amaKristu angamaHebhere kufanele kubangele umdla gqitha kuthi. Ngoba? Ngenxa yokuba siphila kwixesha elifana nelawo. Mihla le siyayiva ingcinezelo yehlabathi elilawulwa nguSathana. (1 Yohane 5:19) Iziprofeto zikaYesu nabapostile bakhe eziphathelele imihla yokugqibela ‘nokuqosheliswa kwenkqubo yezinto’ zizaliseka phambi kwethu. (Mateyu 24:3-14; 2 Timoti 3:1-5; 2 Petros 3:3, 4; ISityhilelo 6:1-8) Ngaphezu koko, kufuneka sihlale siphaphile ngokomoya ukuze ‘siphumelele ekubalekeni zonke ezi zinto zimiselwe ukubakho.’—Luka 21:36.
Omkhulu KunoMoses
8. Ngokuthetha amazwi abhalwe kumaHebhere 3:1, uPawulos wayebongoza ukuba enze ntoni amanye amaKristu?
8 Ekhankanya ingongoma ebalulekileyo, uPawulos wabhala: “Mqwalaseleni umpostile nombingeleli omkhulu lowo simvumayo—uYesu.” (Hebhere 3:1) ‘Ukuqwalasela’ kuthetha “ukujongisisa . . . , ukuqonda ngokuzeleyo, ukuqwalasela ngokusondeleyo.” (Vine’s Expository Dictionary of Old and New Testament Words) Ngaloo ndlela, uPawulos wayebongoza amanye amakholwa ukuba enze umgudu onyanisekileyo ukuze ayiqonde kakuhle indima kaYesu kukholo nakusindiso lwawo. Ukwenjenjalo kwakuya komeleza uzimiselo lwawo lokuma ngokuqinileyo elukholweni. Ngoko ke, yayiyintoni indima kaYesu, yaye kutheni sifanele ‘simqwalasele’?
9. Kwakutheni ukuze uPawulos abhekisele kuYesu ngokuthi “umpostile” nangokuthi “umbingeleli omkhulu”?
9 UPawulos wasebenzisa isibizo esithi “umpostile” nesithi “umbingeleli omkhulu” kuYesu. Igama elithi “umpostile” lithetha umthunywa yaye apha lichaza indlela uThixo anxibelelana ngayo noluntu. “Umbingeleli omkhulu” ngumntu ozakuzela abantu kuThixo. La malungiselelo mabini abalulekile kunqulo lokwenyaniso, ibe uYesu uwaphumeza omabini. Wathunywa ezulwini ukuba aze kufundisa uluntu inyaniso ngoThixo. (Yohane 1:18; 3:16; 14:6) UYesu ukwamiselwe njengoMbingeleli Omkhulu wokomfuziselo kwilungiselelo lokuxolelwa kwezono letempile yokomoya kaYehova. (Hebhere 4:14, 15; 1 Yohane 2:1, 2) Ukuba siziqonda ngokwenene iintsikelelo esinokuzifumana ngoYesu, siya kuba nenkalipho nozimiselo lokuma siqinile elukholweni.
10. (a) UPawulos wawanceda njani amaKristu angamaHebhere aqonda ukuba ubuKristu bongamile kunobuYuda? (b) Yiyiphi inyaniso eyaziwa nanguthathatha eyacatshulwa nguPawulos ukuze aphuhlise ingongoma yakhe?
10 Ukuze agxininise ukubaluleka kokholo lwamaKristu, uPawulos wafanisa uYesu noMoses, owayegqalwa ngamaYuda njengoyena mprofeti mkhulu kookhokho bawo. Ukuba nje amaKristu angamaHebhere ayenokusamkela ngentliziyo epheleleyo isibakala sokuba uYesu mkhulu kunoMoses, ayengayi kuba nasizathu sakuthandabuza ukuba ubuKristu bongamile kunonqulo lwamaYuda. UPawulos wachaza ukuba nangona uMoses wayebalwa phakathi kwababefanele ukuphathiswa “indlu” kaThixo—uhlanga, okanye ibandla lakwaSirayeli—wayengumlindi okanye umkhonzi othembekileyo nje kuphela. (Numeri 12:7) Kwelinye icala, uYesu wayenguNyana, umphathi wendlu. (1 Korinte 11:3; Hebhere 3:2, 3, 5) Ukuze aphuhlise ingongoma yakhe, uPawulos wacaphula esi sibakala saziwa nanguthathatha: “Kambe ke, yonke indlu yakhiwa nguthile, kodwa lowo wazakhayo zonke izinto nguThixo.” (Hebhere 3:4) Akukho mntu unokuyiphikisa into yokuba uThixo mkhulu kunaye wonk’ ubani, kuba unguMakhi, okanye uMdali, wazo zonke izinto. Ngoko ke, kusengqiqweni ukuba, ekubeni uYesu esebenza noThixo, umele abe mkhulu kunayo yonke enye indalo, kuquka noMoses.—IMizekeliso 8:30; Kolose 1:15-17.
11, 12. Yintoni uPawulos awabongoza amaKristu angamaHebhere ukuba abambelele kuyo ‘aqinise kude kuse ekupheleni,’ ibe sinokusisebenzisa njani isiluleko sakhe?
11 Ngokwenene, amaKristu angamaHebhere ayesemanqwanqweni. UPawulos wawakhumbuza ukuba ‘ayenenxaxheba kubizo lwasezulwini,’ ilungelo elalimele lixatyiswe ngaphezu kwayo nayiphi na into eyayinokuziswa yinkqubo yamaYuda. (Hebhere 3:1) Amazwi kaPawulos amele ukuba enza loo maKristu athanjisiweyo aziva enombulelo ngenxa yokuba ayeza kufumana ilifa elitsha kunokuba athi khunubembe ngenxa yokuba eyeke izinto eziphathelele inkcubeko yamaYuda. (Filipi 3:8) Ewabongoza ukuba alinkonye ilungelo lawo yaye angaze alijongele phantsi, uPawulos wathi: “UKristu wayethembekile njengoNyana phezu kwendlu [kaThixo]. Thina siyindlu yaLowo, ukuba sibambelela nkqi kwinkululeko yethu yokuthetha nasekuqhayiseni kwethu ngethemba siqinise kude kuse ekupheleni.”—Hebhere 3:6.
12 Ewe, ukuba amaKristu angamaHebhere ayefuna ukusinda kwisiphelo senkqubo yezinto yamaYuda esasisondele, kwakufuneka abambelele ngokuthe nkqi kwithemba elivela kuThixo ‘aqinise kude kuse ekupheleni.’ Nathi simele senze okufanayo ukuba sifuna ukusinda kwisiphelo sale nkqubo. (Mateyu 24:13) Asimele sivumele amaxhala obu bomi, inkcaso yabantu, okanye utyekelo lwethu lokungafezeki lugungqise ukholo lwethu kumadinga kaThixo. (Luka 21:16-19) Ukuze sibone indlela esinokuziqinisa ngayo, makhe sinikele ingqalelo koko kuthethwa nguPawulos ngokulandelayo.
“Musani Ukuzenza Lukhuni Iintliziyo Zenu”
13. Sisiphi isilumkiso esanikelwa nguPawulos, ibe wayichaza njani INdumiso 95?
13 Emva kokuhlolisisa isikhundla esiphakamileyo awayekuso amaKristu angamaHebhere, uPawulos wanikela esi silumkiso: “Kanye njengokuba nomoya oyingcwele usitsho: ‘Namhlanje ukuba niyaliphulaphula ilizwi lakhe, musani ukuzenza lukhuni iintliziyo zenu njengakwisihlandlo sokubangela umsindo okrakra, njengakumhla wokuvavanya entlango.’” (Hebhere 3:7, 8) UPawulos wayecaphula kwiNdumiso yama-95, ibe ngoko wakwazi ukuthi ‘umoya oyingcwele uthi.’b (INdumiso 95:7, 8; Eksodus 17:1-7) IZibhalo ziphefumlelwe nguThixo ngomoya wakhe oyingcwele.—2 Timoti 3:16.
14. AmaSirayeli asabela njani koko uYehova wayewenzele kona, yaye kwakutheni?
14 Emva kokukhululwa ebukhobokeni eYiputa, amaSirayeli avavwa ngelungelo lokungena kulwalamano lomnqophiso noYehova. (Eksodus 19:4, 5; 24:7, 8) Noko ke, kunokubonakalisa uxabiso ngoko uThixo wayewenzela kona, kungekudala avukela. (Numeri 13:25–14:10) Yayinokwenzeka njani into enjalo? UPawulos walatha isizathu: ukuba lukhuni kweentliziyo zawo. Kodwa kwenzeka njani ukuba iintliziyo ezithambileyo nezisabela msinya kwiLizwi likaThixo zibe lukhuni? Yaye simele senze ntoni ukuze sithintele le nto?
15. (a) Liye leviwa njani ‘ilizwi likaThixo,’ kwixesha elidluleyo nangoku? (b) Yiyiphi imibuzo ekufuneka sizibuze yona ngokuphathelele ‘ilizwi likaThixo’?
15 UPawulos waqalisa isilumkiso sakhe ngesigaba sentetho soxhomekeko esithi “ukuba niyaliphulaphula ilizwi lakhe.” UThixo wathetha nabantu bakhe esebenzisa uMoses nabanye abaprofeti. Emva koko, uYehova wathetha nabo ngoNyana wakhe, uYesu Kristu. (Hebhere 1:1, 2) Namhlanje, sineLizwi likaThixo eliphefumlelweyo elipheleleyo, iBhayibhile Engcwele. Yaye ‘sinekhoboka elithembekileyo neliyingqondi,’ elimiselwe nguYesu ukuba lilungiselele ‘ukutya kokomoya ngexesha elifanelekileyo.’ (Mateyu 24:45-47) Ngaloo ndlela, uThixo usaqhubeka ethetha. Kodwa ngaba siyaphulaphula? Ngokomzekelo, sisabela njani xa kunikelwa isiluleko ngesinxibo nendlela yokuzilungisa okanye ngezinto esikhetha ukuzonwabisa ngazo nangomculo? Ngaba ‘siyaphulaphula,’ ngamany’ amazwi, sinikele ingqalelo yaye sithobele oko sikuvayo? Ukuba sinomkhwa wokwenza izingxengxezo okanye wokuzichonga iziluleko, sidlalela ezandleni zomnyebelelana ongaqondakaliyo wengozi yokuzenza lukhuni iintliziyo zethu.
16. Yiyiphi enye indlela ezinokwenziwa lukhuni ngayo iintliziyo zethu?
16 Iintliziyo zethu zinokuba lukhuni okwenyengane ukuba asifuni kwenza into esinako nesifanele ukuyenza. (Yakobi 4:17) Phezu kwayo yonke into uYehova awayenzela amaSirayeli, asilela ukuqhelisela ukholo, avukela uMoses, akhetha ukukholelwa ingxelo engentle ngeKanan, aza akavuma ukungena kwiLizwe Ledinga. (Numeri 14:1-4) Ngoko ke, uYehova wayalela ukuba achithe iminyaka engama-40 entlango—ixesha elide ngokwaneleyo ukuze bade bafe abo babengenalukholo kweso sizukulwana. Ekruqukile ngabo, uThixo wathi: ‘“Basoloko belahleka ezintliziyweni zabo, yaye bona ngokwabo abafikelelanga ekuzazini iindlela zam.” Ngoko ndafunga ndinomsindo ndathi, “Abasayi kungena ekuphumleni kwam.”’ (Hebhere 3:9-11) Ngaba ikho into esiyifundayo kulo mbandela?
Isifundo Kuthi
17. Kwakutheni ukuze amaSirayeli aswele ukholo nangona ayezibonile izenzo zamandla yaye esiva izibhengezo zikaYehova?
17 Isizukulwana samaSirayeli esaphuma eYiputa sazibonela ngamehlo aso saza sazivela ngeendlebe zaso izenzo zamandla nezibhengezo zikaYehova. Sekunjalo, sasingakholwa ukuba uThixo wayenokusikhokelela kwiLizwe Ledinga sikhuselekile. Ngoba? ‘Wona ngokwawo akafikelelanga ekuzazini iindlela zam,’ watsho uYehova. Ayekwazi oko uYehova wayekuthethile nawayekwenzile, kodwa ayengenantembelo nathemba lokuba unokukwazi ukuwanyamekela. Ayethe phithi ziintswelo neemfuno zawo zobuqu kangangokuba aziphosa kwelokulibala iindlela neenjongo zikaThixo. Ewe, ayeswele ukholo kumadinga akhe.
18. Ngokutsho kukaPawulos, liliphi inyathelo eliya kuphumela ‘kwintliziyo engendawo eswele ukholo’?
18 La mazwi alandelayo aya kumaHebhere asebenza ngokufanayo nakuthi: “Lumkani, bazalwana, ngokoyikela ukuba hleze kuvele nakuwuphi na wenu intliziyo engendawo eswele ukholo ngokuthi imke kuThixo ophilayo.” (Hebhere 3:12) UPawulos waphatha owona mbandela uyintloko ngokuchaza ukuba “intliziyo engendawo eswele ukholo” ibangelwa ‘kukumka kuThixo ophilayo.’ Ngaphambilana kwakule ncwadi, uthethe ‘ngokukhukuliseka’ ngenxa yokunganikeli ngqalelo. (Hebhere 2:1) Noko ke, ibinzana lesiGrike eliguqulelwe ngokuthi “ukumka” lithetha “ukucezela kude” ibe linxibelelene negama elithi “uwexuko.” Lithetha ukuxhathisa, ukurhoxa, nokuphambuka kukabani ngabom, kuba eyicekisa loo nto.
19. Ukusilela ukuphulaphula isiluleko kunokukhokelela njani kwimiphumo emibi? Zekelisa.
19 Ngoko ke, esikufunda apha kukuba ukuba sinomkhwa ‘wokungaliphulaphuli ilizwi lakhe,’ sisityeshele isiluleko esivela kuYehova ngeLizwi lakhe nangodidi lwekhoboka elithembekileyo, kungekudala iintliziyo zethu ziya kuqaqadeka, zibe lukhuni. Ngokomzekelo, isibini esingatshatanga sisenokugqithisa ekubonakaliseni uthando omnye komnye. Kuthekani ukuba sisuka siyityeshele nje loo nto? Ngaba loo nto ibiya kusithintela ekubeni siphinde esezolo, okanye ngaba ibiya kwenza kube lula ngakumbi ukuphinda kwakhona? Ngokufanayo, xa udidi lwekhoboka lunikela isiluleko ngemfuneko yokuwukhetha umculo esiwuphulaphulayo nendlela esizonwabisa ngayo, nezinye izinto, ngaba sisamkela ngezandla ezishushu size silungise xa kuyimfuneko? UPawulos wasibongoza ukuba “singakutyesheli ukuhlanganisana kwethu ndawonye.” (Hebhere 10:24, 25) Nangona kukho esi siluleko, bambi abazikhathalele iintlanganiso zamaKristu. Basenokuvakalelwa kukuba akukho monakalo unokubangelwa kukuphoswa zezinye zazo okanye ukungayi nje kwaphela kwiintlanganiso ezithile.
20. Kutheni kubalulekile ukuba sizamkele iziluleko ezisekelwe kwiZibhalo?
20 Ukuba asisabeli kakuhle ‘kwilizwi’ likaYehova, elivakaliswe ngokucacileyo kwiZibhalo nakwiimpapasho ezisekelwe eBhayibhileni, kungekudala siya kuzifumana ‘sisimka kuThixo ophilayo.’ Kulula ukuba ukungasihoyi isiluleko kuphumele ekusideleni, ekusigxekeni nasekusixhathiseni. Ukuba ayilungiswa le nto, umphumo uba ‘yintliziyo engendawo eswele ukholo,’ yaye kudla ngokuba nzima gqitha ukubuya kwikhondo elinjalo. (Thelekisa eyabase-Efese 4:19.) Ngokufanelekileyo uYeremiya wabhala: “Intliziyo inenkohliso ngaphezu kweento zonke, isisifo esibi; ngubani na onokuyazi?” (Yeremiya 17:9) Ngenxa yoku, uPawulos wabongoza abazalwana bakhe abangamaHebhere esithi: “Hlalani nibongozana umhla ngamnye, lo gama kusathiwa ‘Namhlanje,’ ngokoyikela ukuba nabani na kuni unokwenziwa lukhuni ngamandla akhohlisayo esono.”—Hebhere 3:13.
21. Yintoni esibongozwa sonke ukuba siyenze, yaye ngawaphi amathemba esinawo?
21 Hayi indlela esivuya ngayo kuba uYehova esathetha nathi namhlanje, esebenzisa iLizwi lakhe nentlangano yakhe! Sinombulelo kuba “ikhoboka elithembekileyo neliyingqondi” lisaqhubeka lisinceda ‘sibambelele nkqi kwintembelo esasinayo ekuqaleni siqinise kude kuse ekupheleni.’ (Hebhere 3:14) Ngoku lixesha lokuba sisabele kuthando nakulwalathiso lukaThixo. Xa sisenjenjalo, sinokufumana elinye lamadinga amangalisayo kaYehova—‘ukungena ekuphumleni’ kwakhe. (Hebhere 4:3, 10) Lo ngumbandela oxutyushwa nguPawulos ngokulandelayo kumaKristu angamaHebhere, yaye ngumbandela esiza kuwuhlolisisa kwinqaku elilandelayo.
[Imibhalo esemazantsi]
a UJosephus wanikela ingxelo yokuba kamsinya nje emva kokufa kukaFesto, uAnanasi (uAnaniya) wehlelo labaSadusi waba ngumbingeleli omkhulu. Wezisa uYakobi, umninawa kaYesu ngonina, kunye nabanye abafundi phambi kweSanhedrin waza wabangela ukuba bagwetywe ukufa baze baxulutywe ngamatye.
b Kubonakala ukuba uPawulos wayecaphula kwiSeptuagint yesiGrike, eyayiguqulela igama lesiHebhere elithi “Meribha” nelithi “Massah” ngelithi “ukuxabana” nangelithi “ukuvavanya” ngokokulandelana kwawo. Bona iphepha 350 nelama-379 kuMqulu 2 weInsight on the Scriptures, epapashwe yiWatchtower Bible and Tract Society of New York, Inc.
Ngaba Unokuchaza?
◻ Kwakutheni ukuze uPawulos abhalele amaKristu angamaHebhere isiluleko esinamandla ngolo hlobo?
◻ UPawulos wawanceda njani amaKristu angamaHebhere aqonda ukuba ayephila bhetelana kunaphantsi kobuYuda?
◻ Intliziyo kabani yenziwa lukhuni ngayiphi indlela?
◻ Yintoni esimele siyenze ukuze siphephe ukuba ‘nentliziyo engendawo eswele ukholo’?
[Umfanekiso okwiphepha 10]
Ngaba uqhelisela ukholo kuYesu, uMoses Omkhulu?