Ukuzizuzela Okona Kulungileyo Ebomini Bakho
UYISE wayesendlwini, elele ngandletyana-nye, ebulawa ngumhlaza. Unyana wakhe wayekwindawo asebenzela kuyo, eqoqosha izixhobo zokuchwela zikayise. Njengoko wayephethe ezi zixhobo, wayecinga ngezinto ezintle ezazenziwe nguyise ngazo. Nangona le ndawo yayikufutshane nendlu, wayesazi ukuba uyise akanakuze aphinde angene apho, engenakuze abuye azibambe ezo zixhobo wayenobuchule bokuzisebenzisa ngeyona ndlela. Lalidlule elo xesha.
Unyana wacinga ngesibhalo esikwiNtshumayeli 9:10 esithi: “Yonke into esiyifumanayo isandla sakho ukuba siyenze, yenze ngamandla akho; ngokuba akukho kwenza, nakucinga, nakwazi, nakulumka kwelabafileyo [ingcwaba], apho uya khona wena.” Wayesazi kakuhle esi sibhalo. Wayesisebenzise izihlandlo ezininzi xa wayefundisa abanye inyaniso yeBhayibhile yokuba ukufa yimeko apho ubani angenakuphinda asebenze. Ngoku amazwi kaSolomon ayehlaba kweyakhe intliziyo—sifanele senze zonke izinto ebomini kwangoku yaye sinandiphe imihla yethu ngoxa sisenako kuba kuza ixesha apho singayi kuba nako ukwenjenjalo.
Bunandiphe Ubomi
Kuyo yonke incwadi yeNtshumayeli, isilumko uKumkani uSolomon sibongoza abafundi baso ukuba babunandiphe ubomi. Ngokomzekelo, isahluko 3 sichaza oku: “Ndiyazi ke ukuba akukho nto ilungileyo phakathi kwabo [abantu], ingekukuvuya nokuzizuzela okulungileyo ebomini babo. Kwanokuba wonke umntu adle, asele, abone okulungileyo emigudwini yakhe yonke: sisipho sikaThixo eso.”—INtshumayeli 3:12, 13.
USolomon wayephefumlelwe nguThixo ukuze ayiphinde le ngcamango ithi: “Nantsi into endiyibonileyo mna, ilungile, intle: into yokuthi umntu adle, asele abone okulungileyo ngemigudu yakhe yonke aphuka yiyo phantsi kwelanga, ngokwenani lemihla yobomi bakhe amnikileyo uThixo; ngokuba kusisabelo sakhe oko.”—INtshumayeli 5:18.
Ngokufanayo, ubongoza abaselula athi: “Vuya, ndodana, ebutsheni bakho, ikuchwayitise intliziyo yakho ngemihla yobudodana [okanye, yobuntombi] bakho, uhambe ngeendlela zentliziyo yakho, nangokukhangela kwamehlo akho.” (INtshumayeli 11:9a) Hayi indlela ekukuhle ngayo ukunandipha amandla ngokuzeleyo yaye usempilweni yobutsha!—IMizekeliso 20:29.
“Uze Umkhumbule Ke UMdali Wakho”
Enyanisweni, uSolomon akathethi ukuba kububulumko ukusukela yonke into esenokunqwenelwa yintliziyo okanye ngamehlo ethu. (Thelekisa eyoku-1 kaYohane 2:16.) Oku kucaca gca koko akubhalayo emva koku xa esithi: “Kodwa yazi ukuba ngenxa yezo zinto zonke [ukusukela ukwanelisa iminqweno yakho] uThixo uya kukusa ematyaleni.” (INtshumayeli 11:9b) Enoba sibadala kangakanani, sifanele sikhumbule ukuba uThixo ukuqwalasele oko sikwenzayo ngobomi bethu yaye uya kusigweba ngokusuka kuko.
Hayi indlela ekububudenge ngayo ukuqiqa ngelithi sinokuphila ubomi bokuzingca khe sime ngozinikelo lobuthixo de kube kwiminyaka yethu yokugqibela! Ubomi bethu bunokunqamka nanini na. Enoba akunjalo, akuyondlwan’ iyanetha ukukhonza uThixo xa umdala. Esiqonda esi sibakala, uSolomon ubhala athi: “Uze umkhumbule ke uMdali wakho ngemihla yobutsha bakho, ingekezi imihla yobubi, ingekafiki iminyaka owothi ngayo, Ayindiyolele.”—INtshumayeli 12:1.
Ukwaluphala kunezako iinkathazo. Ngamazwi afuziselayo alandelayo uSolomon ucacisa imiphumo yokuhamba kweminyaka. Izandla neengalo ziyangcangcazela, imilenze ibe buthathaka, namazinyo abe mbalwa. Iinwele zibe zizimvi yaye zixhwitheke. Ubuthongo abusehli kangangokuba uvuswa nayintsholo yentaka. Izivamvo—zokubona, ukuva, ukuchukumisa, ukujoja nokungcamla—ziba buthuntu. Umzimba obuthathaka ukhulelwa kukoyika ukuwa nezinye izinto “ezoyikekayo” kwiindlela zikawonke wonke. Ekugqibeleni umntu uyafa.—INtshumayeli 12:2-7.
Kuba kubi ngokukodwa ukwaluphala kwabo bangakhange ‘bamkhumbule uMdali wabo’ ebutsheni babo. Ngenxa yokudlala ngobomi bakhe, umntu onjalo ‘akananto imvuyisayo’ kwiminyaka yokugqibela. Ukuphila ubomi obuchaseneyo noThixo kusenokongeza iingxaki neentlungu zokwaluphala. (IMizekeliso 5:3-11) Okulusizi kukuba, xa ekhangela ngaphambili, umntu onjalo akusekho nto akhangele phambili kuyo ujongwe lingcwaba kuphela.
Ukuvuya Ebudaleni
Oku akuthethi ukuba abantu abadala abanakubunandipha ubomi. EBhayibhileni, “imihla emide, neminyaka yobomi” ikwanxulunyaniswa nentsikelelo kaThixo. (IMizekeliso 3:1, 2) UYehova waxelela umhlobo wakhe uAbraham oku: “Ke wena . . . ungcwatywe uyingwevu enkulu.” (Genesis 15:15) Phezu kwawo nje amahlandinyuka okuhamba kweminyaka, uAbraham wafumana uxolo nenzolo kwiminyaka yakhe yokugqibela, ekhangele emva ngolwaneliseko kubomi bokuzinikela kuYehova. Kwakhona wayekhangele phambili ngokholo ‘kwisixeko esineziseko zokwenene,’ uBukumkani bukaThixo. (Hebhere 11:10) Ngenxa yoko, wafa “aluphele, ephelele ebudaleni [anelisekile, NW].”—Genesis 25:8.
Ngoko ke, uSolomon uyalela ngelithi: “Umntu, ukuba uthe wadla ubomi iminyaka emininzi, makavuye ngayo yonke iphela.” (INtshumayeli 11:8) Nokuba siselula okanye sibadala, uvuyo lokwenene lunxulumene nolwalamano lwethu noThixo.
Njengoko eli gatyana likwindawo yokusebenzela kayise liqoqosha izixhobo zakhe zokugqibela, lalicinga ngezi zinto. Lalicinga ngabo bonke abantu elalibazi ababezama ukuzizuzela okona kulungileyo ebomini babo kodwa bengazange bafumane lonwabo kuba babengenalwalamano noMdali wabo. Hayi indlela ekubonakala kufaneleka ngayo ukuthi emva kokukhuthaza ukuba ubani avuye ngexesha lokuphila kwakhe, uSolomon ashwankathele lo mbandela ngala mazwi: “Ukuhlanganiswa kwentetho, yakuba ivakele into yonke, naku: Yoyika uThixo, ugcine imithetho yakhe; ngokuba indawo leyo yimfanelo yoluntu lonke”!—INtshumayeli 12:13.