Benza Ukuthanda KukaYehova

UPawulos Unikela Ubungqina Ngenkalipho Kwiindwalutho

UMAHLUKO owawuphakathi kwala madoda mabini wawungenakuthelekiswa nanto. Enye yayinxibe isithsaba ngoxa enye yayikwimixokelelwane. Enye yayingukumkani; enye ilibanjwa. Emva kweminyaka emibini ethothoza entolongweni, umpostile uPawulos wema phambi komlawuli wamaYuda, uHerode Agripa II. Ukumkani nenkosikazi yakhe, uBhernike, “beza benobuyokoyoko obuninzi baza bangena kwigumbi labaphulaphuli ndawonye nabaphathi-mikhosi kwakunye namadoda anobuhandiba esixekweni.” (IZenzo 25:23) Enye incwadi ithi: “Kufanele ukuba kwakukho abantu abangamakhulu aliqela apho.”

Irhuluneli eyayisandul’ ukunyulwa, uFesto, yayibize intlanganiso. Irhuluneli awangena ezihlangwini zayo, uFeliks, yanela nje kukumshiya uPawulos enkolonkoloza entolongweni. Kodwa uFesto wabuzisa ngezityholo awayebekwa zona uPawulos. UPawulos wagxininisa ngeyona ndlela kubumsulwa bakhe de wathi ityala lakhe malisiwe kuKesare! Ityala likaPawulos lavuselela umdla kaKumkani Agripa. “Nam ngokwam ndingathanda ukumva lo mntu,” watsho. Ngokukhawuleza uFesto wenza amalungiselelo, ekusenokuba wayelangazelela ukuva oko kwakuya kucingwa ngukumkani ngeli banjwa lahlukileyo.—IZenzo 24:27–25:22.

Ngosuku olulandelayo, uPawulos wazifumana sele emi phambi kwesihlwele esikhulu seendwalutho. “Ndizibalela ekuthini ndinoyolo ekubeni ndiza kuzithethelela phambi kwakho ngalo mhla,” watsho kuAgripa, “ngokukodwa njengoko uyingcali kuwo onke amasiko kwakunye neembambano eziphakathi kwamaYuda. Ngoko ke ndiyakubongoza ukuba undive ngomonde.”—IZenzo 26:2, 3.

UPawulos Uzithethelela Ngenkalipho

Kuqala, uPawulos waxelela uAgripa ngokutshutshisa kwakhe amaKristu ngaphambili. “Ndazama ukubanyanzelela ukulukhanyela ukholo,” watsho. “Ndandide ndiye kubatshutshisa kwanakwizixeko ezingaphandle.” UPawulos wacacisa indlela awabona ngayo umbono owothusayo nalapho uYesu ovusiweyo wambuzayo: “Kutheni unditshutshisa nje? Ukuthi gqolo ukhaba iimviko kukwenzela nzima.”a—IZenzo 26:4-14.

Wandula ke uYesu wamthuma uSawule ukuba abe lingqina kubantu bazo zonke iintlanga “kokubini lezinto ozibonileyo nezinto endiya kukwenza uzibone ngokuphathelele mna.” UPawulos wabalisa ukuba ngenkuthalo wazabalazela ukusifeza isabelo sakhe. Kanti, “ngenxa yezi zinto,” waxelela uAgripa, “amaYuda andixhakamfula etempileni aza alinga ukundigwinta.” Esazi ukuba uAgripa wayenomdla kubuYuda, uPawulos wakubethelela oko enyanisweni kwakuthethwa bubungqina bakhe “ndingatsho nto ngaphandle kwezinto abazixelayo abaProfeti kwakunye noMoses ukuba zaziza kwenzeka” ngokuphathelele ukufa nokuvuka kukaMesiya.—IZenzo 26:15-23.

UFesto wambeth’ emlonyeni. “Ukufunda kakhulu kukuqhubela kwimpambano!” wadanduluka watsho. Ephendula uPawulos: “Andiphambani, Festo Obalaseleyo, kodwa ndithetha amazwi enyaniso nawengqondo ephilileyo.” Wandula ke uPawulos wathi kuAgripa: “Ukumkani endithetha kuye ngenkululeko yokuthetha wazi kakuhle ngezi zinto; kuba ndeyisekile ukuba akukho nanye kwezi zinto engaphawulekiyo kuye, kuba le nto ibingenzelwanga embombeni.”—IZenzo 26:24-26.

Wandula uPawulos wathetha ngokungqalileyo noAgripa. “Uyabakholelwa na, Kumkani Agripa, abaProfeti?” Ngokungathandabuzekiyo lo mbuzo awuzange umphathe kakuhle uAgripa. Ngapha koko, wayenesidima ekwakufanele asilondoloze, yaye ukuvumelana noPawulos kwakuya kuba kukuma ngakuloo nto uFesto wayibiza ngokuba “yimpambano.” Mhlawumbi eqonda isizathu sokuzilazila kuka-Agripa, uPawulos waziphendula. Wathi “Ndiyazi ukuba uyabakholelwa.” UAgripa watsho wathetha, kodwa elumkele ukurhintyelwa ngamazwi akhe. “Ngexesha elifutshane,” watsho kuPawulos, “ubuya kundeyisela ekubeni ndibe ngumKristu.”—IZenzo 26:27, 28.

Ngobuchule uPawulos wasebenzisa loo mazwi wayephepha ngawo uAgripa ukuvelisa ingongoma ethile ebalulekileyo. “Ndinganqwenela kuThixo ukuba enoba kungexesha elifutshane okanye ngexesha elide ingabi nguwe kuphela kodwa kwanabo bonke abo bandivayo namhlanje bangaba ngabantu abanjengoko ndinjalo nam, ngaphandle nje kwale mixokelelwane.”—IZenzo 26:29.

UAgripa noFesto abazange babone nto ifanelwe kukufa okanye kukuvalelwa kukaPawulos. Sekunjalo, isicelo sakhe sokuya kuma phambi kukaKesare sasingenakubethwa ngoyaba. Kungenxa yoko le nto uAgripa wathi kuFesto: “Lo mntu ngekhululwe ukuba wayengabhenelanga kuKesare.”—IZenzo 26:30-32.

Oko Sikufundayo

Indlela kaPawulos yokunikela ubungqina phambi kweendwalutho isimisela umzekelo obalaseleyo. Ekuthetheni noKumkani Agripa uPawulos wasebenzisa ingqiqo. Ngokungathandabuzekiyo wayelazi ihlazo awayekulo uAgripa noBhernike. Umtshato wabo wawungumbulo, kuba uBhernike yayingudade boAgripa ncam. Kodwa kwesi isihlandlo uPawulos akazange akhethe kufundisa ngeendlela zokuziphatha. Kunoko, wagxininisa kwiingongoma yena noAgripa ababezikholelwa ngokufanayo. Ngaphezu koko, nangona uPawulos wayefundiswe yingcungela yomFarisi uGamaliyeli, wavuma ukuba uAgripa wayeyingcali kumasiko obuYuda. (IZenzo 22:3) Phezu kwayo nje imilinganiselo yokuziphatha ka-Agripa uPawulos wathetha naye ngentlonelo kuba uAgripa wayesegunyeni.—Roma 13:7.

Ngoxa sinikela ubungqina ngenkalipho ngeenkolelo zethu, asilosukelo lwethu ukubhenca okanye sigwebe izenzo zokungcola zabaphulaphuli bethu. Kunoko, ukwenza izinto lula baze bayamkele inyaniso, sifanele sigxininise kwizinto ezakhayo zeendaba ezilungileyo, sibethelela amathemba esikholelwa kuwo ngokufanayo. Xa sithetha nabo badala okanye basemagunyeni, sifanele sisihlonele isikhundla sabo. (Levitikus 19:32) Ngale ndlela, sinokuxelisa uPawulos, owathi: “Ndiye ndaba zizinto zonke kubantu bazo zonke iintlobo, ukuze ngandlela zonke ndisindise abathile.”—1 Korinte 9:22.

[Imibhalo esemazantsi]