Athiyiwe Ngenxa Yokholo Lwawo

“Niya kuba zizinto zokuthiywa ngabantu bonke ngenxa yegama lam.”—MATEYU 10:22.

1, 2. Ungakhe ubalise amava okwenene ekuye kwafuneka awanyamezele amaNgqina kaYehova ngenxa yokuba elandela iinkolelo zawo zonqulo?

KWISIQITHI saseKrete unovenkile othile ubequqa ebuyelela entolongweni ibe uye kuma phambi kwenkundla yamaGrike kangangezihlandlo ezininzi gqitha. Ubeqamela ngenqind’ entolongweni kangangeminyaka emithandathu, eshiya ngasemva owakwakhe nabantwana abahlanu. EJapan umfundi oneminyaka eli-17 ubudala ugxothiwe esikolweni, nangona engoyena unesimilo yaye enkqenkqeza phambili kwiklasi akuyo enabafundi abangama-42. EFransi, inkungu nelanga yabantu iye yazibona sele ingoomahlalela, nangona ibidume ngokukhuthala nokuba nenkathalo emisebenzini ibikuyo. Yintoni edibanisa ezi ziganeko zenzeke kwaba bantu?

² Bonke aba bantu bangamaNgqina kaYehova. Nguwuphi umthetho “abawaphuleyo”? Eyona ngxaki, kukulandela iinkolelo zonqulo lwabo. Kuba ethobela iimfundiso zikaYesu Kristu, loo novenkile wayethetha nabantu ngokholo analo. (Mateyu 28:19, 20) Wagwetywa phantsi komthetho omdala wamaGrike wokuba umntu oguqulela abantu kwinkonzo yakhe unetyala. La mfundi yena wagxothwa ngenxa yokuba isazela sakhe esiqeqeshwe yiBhayibhile singamvumeli aqeqeshelwe ikendo (umlo wamakrele waseJapan). (Isaya 2:4) Yaye abo babegxothwe emisebenzini eFransi baxelelwa ukuba esona sizekabani sokuba bakhonjisw’ emnyango sasikukuba nje besuke bathi bangamaNgqina kaYehova.

3. Kutheni amanye amaNgqina kaYehova iwanqabele into yokuba angcungcuthekiswe ngabanye abantu?

³ La ngamava akutshanje ekuye kwafuneka amaNgqina kaYehova awanyamezele kwamanye amazwe. Noko ke, inkoliso yamaNgqina kaYehova iwanqabele into yokuba angcungcuthekiswe ngabanye abantu. Abantu bakaYehova baziwa ehlabathini lonke ngesimilo esihle—dumo olo olwenza kungabikho mntu unasizathu sivakalayo sokufuna ukuwenzakalisa. (1 Petros 2:11, 12) Akenzeli mntu yelenqe okanye enze izinto ezibuhlungu kwabanye. (1 Petros 4:15) Kunoko, azama ukuphila ngesiluleko seBhayibhile sokuba athobele uThixo kuqala, aze ke athobele oorhulumente abaphetheyo. Ahlawula iirhafu ezifunekayo emthethweni yaye azabalazela ukuba “noxolo nabantu bonke.” (Roma 12:18; 13:6, 7; 1 Petros 2:13-17) Kumsebenzi wawo wokufundisa iBhayibhile, akhuthaza ukuhlonelwa komthetho, imilinganiselo yentsapho nokuziphatha okuhle. Oorhulumente abaninzi baye bawothulel’ umnqwazi ngokuba ngabemi abathobela umthetho. (Roma 13:3) Sekunjalo, njengokuba isiqendu sokuqala sibonisa, maxa wambi aye azizisulu zenkcaso—kwamanye amazwe, ade avalwa nomlomo ngoorhulumente. Ngaba oko kufanele kube ngumnqa kuthi?

“Iindleko” Zokuba Ngumfundi

4. Ngokutsho kukaYesu, xa umntu eza kuba ngumfundi wakhe yintoni amele ayilindele?

⁴ UYesu Kristu wayicacisa gca into ekuyiyo ukuba ngumfundi wakhe. Waxelela abafundi bakhe oku: “Ikhoboka alikho likhulu ngakumbi kunenkosi yalo. Ukuba banditshutshisile mna, baya kunitshutshisa kwanani.” UYesu wayethiywe “ngaphandle kwesizathu.” (Yohane 15:18-20, 25; INdumiso 69:4; Luka 23:22) Abafundi bakhe babenokulindela okufanayo—ukusuka nje bachaswe bengenzanga nto. Izihlandlo eziliqela wabalumkisa wathi: “Niya kuba zizinto zokuthiywa.”—Mateyu 10:22; 24:9.

5, 6. (a) Yintoni le yayibangela uYesu abongoze abo babeza kuba ngabalandeli bakhe ngokuthi ‘mababale iindleko’? (b) Kutheni ke le nto singamele sime nematha xa sitshutshiswa?

⁵ Ngenxa yoko, uYesu wabongoza abo baza kuba ngabalandeli bakhe ukuba ‘babale iindleko’ zokuba ngumfundi. (Luka 14:28) Kwakutheni? Babengazi kwenzela ukubona enoba bangaba ngabafundi okanye bangabi ngabo kusini na, kodwa babesenzela ukuqinisekisa ukuba baza kwenza konke okufunekayo kusini na. Simele sikulungele ukunyamezela iimvavanyo okanye iinzima ezihambisana neli lungelo. (Luka 14:27) Akukho mntu usibambe ngesixhanti wasenza abakhonzi bakaYehova abangabalandeli bakaKristu. Senze isigqibo ngokuzithandela; ibe eso sisigqibo esicingisisiweyo. Sazi kusengaphambili ukuba ngaphandle nje kweentsikelelo esiza kuzixhamla kuba sinolwalamano noThixo yaye sizahlulele kuye, siya kuba “zizinto zokuthiywa.” Ngoko asisali simi nematha xa sichaswa. Siye ‘sabala iindleko,’ yaye sikulungele ukuzihlawula.—1 Petros 4:12-14.

⁶ Kutheni abanye, kuquka nabasemagunyeni baseburhulumenteni, bechasa amaKristu okwenyaniso? Ukuze uphenduleke, kuya kukunceda ukuhlolisisa amaqela eenkonzo amabini enkulungwane yokuqala yeXesha lethu Eliqhelekileyo. Omabini ayethiyw’ egazini—kodwa ngezizathu ezahluke gqitha.

Lwaluzel’ Intiyo Yaye Luthiyiwe

7, 8. Ziziphi iimfundiso ezazibonisa ukujongelwa phantsi kweeNtlanga, yaye oko kwabangela siphi isimo sengqondo phakathi kwamaYuda?

⁷ Ngenkulungwane yokuqala yeXesha lethu Eliqhelekileyo, amaSirayeli ayephantsi kolawulo lwamaRoma, yaye ubuYuda, inkqubo yonqulo yamaYuda, yayibanjwe nkxi ngobhongwane ziinkokeli ezingababhali nabaFarisi. (Mateyu 23:2-4) Ezi nkokeli zazithe phatsh’ iingqondo yimpambano zagqwetha amasolotya athile oMthetho kaMoses wokwahluka kwezinye iintlanga zawenza isingxengxezo sokugculela abo bangengawo amaYuda. Kusenzeka le nto nje, ecaleni avelisa unqulo olwaxhokonx’ intiyo ngeeNtlanga, yaye loo nto yawatsho anuk’ umzondo kwiiNtlanga.

⁸ Yayilula ke into yokuba iinkokeli zamaYuda zishumayele ukucekiswa kweeNtlanga, ekubeni amaYuda ngelo xesha ayezijonga iiNtlanga njengamabukubela nje ezinto. Iinkokeli zonqulo zazifundisa ukuba umfazi womYuda angaze abonwe eyedwa phakathi kweeNtlanga, kuba “zazirhanelwa ngokungcola.” Indoda engumYuda yayingamele “ibe yodwa phakathi kwazo kuba zazirhanelwa njengabaphalazi begazi.” Ubisi obelusengwa yiNtlanga lwalungafanele lusetyenziswe ngaphandle kokuba kwakukho umYuda obeyibek’ esweni xa ibisenga. Ngenxa yempembelelo yeenkonkeli zawo, amaYuda athi rhuthu into yokuba ziingcungcu ezithe gcodololo phayaa kwabanye.—Thelekisa uYohane 4:9.

9. Imfundiso yamaYuda ngabantu abangengomaYuda yazala nkomo ni?

⁹ Iimfundiso ezinjalo ngabantu abangengomaYuda azizange zidale moy’ umhle phakathi kwamaYuda neeNtlanga. IiNtlanga zaziwajonga amaYuda njengabantu abathiye wonk’ umntu. Umbhali-mbali ongumRoma uTacitus (owazalwa malunga nowama-56 C.E.) wathi amaYuda “ayemthiy’ okotshaba namphi na omnye umntu.” Lo kaTacitus wakwalichaphazela nelokuba iiNtlanga eziye zangabangeni ebuYudeni zazifundiswa ukuba ziwacekise amazwe azo zize zinyevulele iintsapho nezihlobo zazo. Eneneni, amaRoma awolulel’ intamb’ ende amaYuda, kuba ayemaninzi gqitha ukuba angasuka awathi qwakaqwaka nje. Kodwa imvukelo yamaYuda yowama-66 C.E. yawaphath’ emanyeni amaRoma, nto leyo eyakhokelela ekutshatyalalisweni kweYerusalem ngowama-70 C.E.

10, 11. (a) UMthetho kaMoses wawufuna baphathwe njani abantu basemzini? (b) Yintoni esinokuyifunda koko kwenzeka kubuYuda?

¹⁰ Le mbono ayenayo ngabantu basemzini yayahluke njani kunqulo oluchazwe kuMthetho kaMoses? Lo Mthetho wawukukhuthaza ukwahluka kwiintlanga, kodwa oku kwakusenzelwa ukukhusela amaSirayeli, ngokukodwa unqulo lwawo olunyulu. (Yoshuwa 23:6-8) Sekunjalo, uMthetho wawufuna ukuba abantu basemzini baphathwe ngokusesikweni nangovelwano baze benzelwe ububele—lo gama nje babengayinyevuleli imithetho yamaSirayeli. (Levitikus 24:22) Ngokutyeshela intsingiselo esengqiqweni eyayizicacele kuMthetho ngokuphathelele abantu basemzini, iinkokeli zamaYuda zomhla kaYesu zavelisa unqulo olwaluzel’ intiyo yaye luthiyiwe. Ekugqibeleni, uYehova wayeka ukukholiswa luhlanga lwakwaYuda lwenkulungwane yokuqala.—Mateyu 23:38.

¹¹ Ngaba kukho nto singayifunda koku? Ewe, ikho. Isimo sengqondo sokuba ngamalungisa agqithiseleyo aziphakamisileyo nabajongela phantsi abo singakholwa nabo asinto ilumela ngokuchanileyo unqulo olunyulu lukaYehova, yaye ayimkholisi. Cinga nje ngamaKristu athembekileyo enkulungwane yokuqala. Ayengabathiyanga abo bangengomaKristu, yaye akazange avukele amaRoma. Sekunjalo, aba “zizinto zokuthiywa.” Kwakutheni? Yaye ayethiywe ngoobani?

AmaKristu Okuqala—Ayethiywe Ngoobani?

12. NgokweZibhalo licace njani elokuba uYesu ufuna abalandeli bakhe babe nembono elungeleleneyo ngabo bangengomaKristu?

¹² Iimfundiso zikaYesu zilicacisa mhlophe elokuba wayefuna abafundi bakhe babe nembono elungeleleneyo ngabo bangengomaKristu. Kwelinye icala, wathi abalandeli bakhe babeya kwahluka kulo ihlabathi—oko kukuthi, babeya kusicekisa isimo sengqondo nokuziphatha okungqubanayo neendlela zikaYehova zobulungisa. Babeya kuhlala bengoondilele kwiimfazwe nakwezobupolitika. (Yohane 17:14, 16) Kwelinye icala, kunokuba afundise ukuba kunyevulelwe abo bangengomaKristu, uYesu waxelela abalandeli bakhe ukuba ‘bathande iintshaba zabo.’ (Mateyu 5:44) Umpostile uPawulos wabongoza amaKristu wathi: “Ukuba utshaba lwakho lulambile, londle; ukuba lunxaniwe, lunike into yokusela.” (Roma 12:20) Kwakhona waxelela amaKristu ukuba ‘asebenze oko kulungileyo kubo bonke.’—Galati 6:10.

13. Kwakutheni ukuze iinkokeli zonqulo zamaYuda zibachase kangaka abafundi bakaKristu?

¹³ Sekunjalo, abafundi bakaKristu bazibona sele ‘bezizinto zokuthiywa’ ziindidi ezintathu zabantu. Okokuqala babethiywe ziinkokeli zonqulo zamaYuda. Alimangalisi ke elokuba zakhawuleza zawaphawula amaKristu! AmaKristu ayenemigaqo ephakamileyo yokuziphatha neyokugcina ingqibelelo, yaye ayevutha yinzondelelo ekushumayeleni isigidimi esinik’ ithemba. Amawakawaka abantu abushiy’ apho ubuYuda aza amkela ubuKristu. (IZenzo 2:41; 4:4; 6:7) Ngokweenkokeli zonqulo zamaYuda, abafundi bakaYesu abangamaYuda babengabawexuki! (Thelekisa IZenzo 13:45.) Ezi nkokeli zazilugcalagcala ngumsindo zazivakalelwa kukuba ubuKristu buze kugxobha isithethe sazo. Ewe, babungahambisani nembono ezazinazo ngeeNtlanga! Ukususela ngowama-36 C.E., iiNtlanga zazinokuba ngamaKristu, zibe nokholo olufanayo zize zinandiphe amalungelo afanayo nawamaKristu angamaYuda.—IZenzo 10:34, 35.

14, 15. (a) Kwakutheni ukuze amaKristu athiywe kangaka ngabahedeni? Zekelisa. (b) Liliphi iqela lesithathu amaKristu ‘ayezizinto zokuthiywa’ lilo?

¹⁴ Okwesibini, amaKristu ayethiyiwe ngabahedeni. Ngokomzekelo, kwiEfese yamandulo, iitempile zesilivere zikathixokazi uArtemis zazingenisa intywenka yemali. Kodwa xa uPawulos washumayela apho, inkitha yamaEfese yaba nomdla, yalushiya unqulo luka-Artemis. Bathi bakubona ukuba ishishini labo liyakekela, abakhandi besilivere baqhway’ isiphithiphithi. (IZenzo 19:24-41) Kwenzek’ into eyelele kuleyo xa ubuKristu banaba bada baya kufika eBhithiniya (ngoku engumntla-ntshona weTurkey). Ngethutyana nje emva kokugqitywa kweZibhalo ZamaKristu ZesiGrike, irhuluneli yaseBhithiniya, uPliny Omncinane, wanikela ingxelo yokuba iitempile zazikhal’ ibhungane yaye ishishini lokutya kwezilwanyana zokunyusa amadini lalitshone le. Ityala loko labhaxekwa kumaKristu—yaye atshutshiswa—ekubeni unqulo lwawo lwalungavumelani nokunyuswa kwamadini ezilwanyana nonqulo-zithixo. (Hebhere 10:1-9; 1 Yohane 5:21) Licacile ke elokuba, ukusasazeka kobuKristu kwatshintsha nezinto ezazisele zimile neengcambu kubahedeni, yaye abo babelahlekelwa yimali yabo ngenxa yoko babebuthiy’ egazini.

¹⁵ Okwesithathu, amaKristu aba “zizinto zokuthiywa” ngamaRoma anobuhlanga. Ekuqaleni, amaRoma ayewajonga amaKristu njengegcudwana nje elincinane leqela lonqulo mhlawumbi eliphambeneyo. Ukanti, ekuhambeni kwexesha, kwaukuvula nje umlomo uthi ungumKristu kwaba sisono onokude ubulawe ngenxa yaso. Yintoni le yayide ibangele ukuba abemi abanyanisekileyo abaziphilela ubomi bobuKristu bajongwe njengabafanelwe kukuba zizisulu nje zokutshutshiswa bade babulawe?

AmaKristu Okuqala—Kutheni Ayethiywe Kangaka NgamaRoma?

16. Ziziphi iindlela amaKristu awayahluke ngazo kwihlabathi, yaye kwakutheni ukuze oku kuwenze angafunwa ngamaRoma?

¹⁶ Ngokuyintloko, eyona nto yayithiywe ngamaRoma kumaKristu kukulandela kwawo iinkolelo zawo zonqulo. Ngokomzekelo, ahlala ahlukile kulo ihlabathi. (Yohane 15:19) Ngoko ayengenazigxina kwezobupolitika, yaye ayengafuni ukuzibandakanya nezomkhosi. Ngenxa yoko, ngokutsho kombhali-mbali uAugustus Neander, “ayengamadoda nje afe ethwel’ umnqwazi, imidunkanka nje ethe dukumfa engenamdla kwimicimbi yobomi.” Ukungabi yonxalenye yehlabathi kwawo kwakufuna ukuba abhebhethe neendlela ezingendawo zamaRoma aqaqadekileyo. Umbhali-mbali uWill Durant usityebisela enjenje: “Ukuzinikela nocwangco kwelo qaqobana lamaKristu lwalubamise mantsantsa abo bahedeni babethe phatsh’ iingqondo ziziyolo.” (1 Petros 4:3, 4) Xa ayetshutshisa yaye ebulala amaKristu, amaRoma amele ukuba ayefuna ukuwavala umlomo ahlukane nokuthunukana nezazela zawo.

17. Yintoni ebonisa ukuba umsebenzi wokushumayela wamaKristu enkulungwane yokuqala wawuphumelela?

¹⁷ AmaKristu enkulungwane yokuqala ayeshumayela iindaba ezilungileyo zoBukumkani bukaThixo ngenzondelelo yaye engalalanisi. (Mateyu 24:14) Malunga nowama-60 C.E., uPawulos wayenokutsho athi iindaba ezilungileyo “zishunyayelwe kwindalo yonke ephantsi kwezulu.” (Kolose 1:23) Ngasekupheleni kwenkulungwane yokuqala, abalandeli bakaYesu benza abafundi kubo bonke uBukhosi baseRoma—eAsia, eYurophu naseAfrika! Kwanamalungu athile ‘endlu kaKesare’ aba ngamaKristu.a (Filipi 4:22) Oku kushumayela ngenzondelelo kwaqhway’ ingqumbo. Lo kaNeander uthi: “UbuKristu babuthe ngcembe busamkelwa ngabantu beendidi zonke, yaye babubonakala bungalubhukuqa nanini na unqulo lwesizwe.”

18. Ukuzinikela kuYehova kuphela kwamaKristu kwawenza njani anuka kurhulumente waseRoma?

¹⁸ Abalandeli bakaYesu babezinikele kuYehova kuphela. (Mateyu 4:8-10) Mhlawumbi le, ngaphezu kwazo zonke ezinye izinto, yinto eyabenza banuka kumaRoma. AmaRoma ayezinyamezela ezinye iinkonzo, logama nje amarhamente azo ayemnqula nomlawuli. AmaKristu okuqala wona ayengenakuzibandakanya nonqulo olunjalo. Ayezikhathaza ngokwanelisa elona gunya longamileyo elingaphezulu kuRhulumente waseRoma, oko kukuthi, uYehova uThixo. (IZenzo 5:29) Ngenxa yoko, kungakhathaliseki ukuba umKristu wayengummi olunge kangakanani na, wayejongwa njengotshaba lukaRhulumente.

19, 20. (a) Ngoobani ababetshotsh’ entla kwintlebendwane eyayisasazwa ngamaKristu athembekileyo? (b) Ngawaphi amabala awayebekwa wona amaKristu?

¹⁹ Sekunjalo kukho esinye isizathu sokuba amaKristu athembekileyo abe “zizinto zokuthiywa” ngamaRoma: Abantu bakhawuleza bayikholelwa intlebendwane abayivayo ngawo, yaye abona babetshotsh’ entla kolu lwimi yayiziinkokeli zamaYuda zonqulo. (IZenzo 17:5-8) Malunga nowama-60 okanye owama-61 C.E., xa uPawulos wayeseRoma elindele ukuchotshelwa kwetyala lakhe nguMlawuli uNero, iinkokeli zamaYuda zathi ngamaKristu: “Ngokubhekisele kweli hlelo kuyazeka kuthi ukuba kuyo yonk’ indawo kuthethwa ngokunxamnye nalo.” (IZenzo 28:22) UNero wayengenakungafane angakuva oko kunyokwa kwawo. Ngowama-64 C.E., xa wayetyholwa ngomlilo owatshis’ iRoma yaqhuqhumba, uNero wabalekela kulo mzi ungenazinja wamaKristu owawusele unkone kakade ngamabala. Oku kubonakala ngathi kwaba negalelo kwintshutshiso eyayibhokile yokucim’ igama amaKristu.

²⁰ La mabala awayebekwa wona amaKristu ayedla ngokungxengwa ngobuxoki obuphindaphindiweyo yaye kugqwethwa neenkolelo zawo. Ekubeni ayekholelwa kumntu omnye yaye ayengamnquli umlawuli, athiwa tyabe ngelokuba ngabahedeni. Ekubeni amanye amalungu entsapho awayengengomaKristu ayezichasa izalamane zawo ezazingamaKristu, amaKristu abhaxekwa nangelokuba aqhekez’ iintsapho. (Mateyu 10:21) Athiwa dyubhu nangelokuba angamazim, sityholo eso, ngokutsho kwabanye, ekuthiwa sakhiwa kumazwi kaYesu awawathetha ngeSidlo SeNkosi Sangokuhlwa.—Mateyu 26:26-28.

21. AmaKristu aba “zizinto zokuthiywa” ngenxa yaziphi izizathu ezibini?

²¹ Ngoko ke, amaKristu athembekileyo aba “zizinto zokuthiywa” ngamaRoma ngezizathu ezibini ezisisiseko: (1) iinkolelo nezenzo zawo ezisekelwe eBhayibhileni, kwakunye (2) nezityholo zobuxoki awayetyatyekwa zona. Enoba sasiyintoni isizathu sabo, abo bachasi babezimisele kwinto enye—ukubucim’ igama ubuKristu. Kakade ke, oomakhonya kuyo yonke loo ntshutshiso yamaKristu ziinkuntsela zabachasi, imimoya engendawo engabonakaliyo.—Efese 6:12.

22. (a) Nguwuphi umzekelo obonisa ukuba amaNgqina kaYehova azabalazela ‘ukusebenza okulungileyo kubo bonke’? (Bona ibhokisi ekwiphepha 11.) (b) Yintoni eza kuxutyuswa kwinqaku elilandelayo?

²² Kanye njengamaKristu okuqala, amaNgqina kaYehova kule mihla aye aba “zizinto zokuthiywa” kumazwe amaninzi. Ukanti akabathiyanga abo bangengomaNgqina; yaye akakaze abe ngabaqhwayi bodushe nxamnye noorhulumente. Kunoko, aziwa nanguthathatha ngokuba nothando lokwenene olungathintelwa yimiqobo yezentlalo neyobuhlanga. Ngoku ke atshutshiselwa ntoni? Yaye enzani xa etshutshiswa? Le mibuzo iza kuxutyushwa kwinqaku elilandelayo.

[Imibhalo esemazantsi]

Ubuya Kuphendula Uthini?

◻ Kwakutheni ukuze uYesu abongoze abo babeza kuba ngabalandeli bakhe ukuba babale iindleko zokuba ngumfundi?

◻ Imbono eyayixhaphakile ngabo bangengomaYuda yaba nawuphi umphumo kumaYuda, yaye sifunda ntoni koku?

◻ AmaKristu athembekileyo okuqala ayechaswe ziziphi iindidi ezintathu zabantu?

◻ Ziziphi izizathu ezisisiseko amaKristu okuqala ‘awayezizinto zokuthiywa’ ngenxa yazo ngamaRoma?

[Ibhokisi ekwiphepha 11]

‘UKUSEBENZA OKO KULUNGILEYO KUBO BONKE’

AmaNgqina kaYehova azabalazela ukuthobela isiluleko seBhayibhile sokuba ‘asebenze oko kulungileyo kubo bonke.’ (Galati 6:10) Ngamaxesha kaxakeka, ukuthanda ummelwane kuwaqhubela ukuba ancede abo bangakholwa nawo. Ngokomzekelo, xa imeko yayimaxongo eRwanda ngowe-1994, amaNgqina aseYurophu azincama aya eAfrika eye kunikela uncedo. Kwamiselwa iinkampu nezibhedlele ezikwalapho ukuze kunikelwe uncedo. Kwathunyelwa intaphane yokutya, yempahla neengubo ngenqwelo-moya. Inani leembacu eziye zangenelwa kolu ncedo laliliphinda nangaphezu kwesithathu inani lamaNgqina aloo mmandla.

[Umfanekiso okwiphepha 9]

AmaKristu enkulungwane yokuqala ayeshumayela iindaba ezilungileyo ngenzondelelo yaye engalalanisi