Ukusuka Ekunquleni Umlawuli Ukusa Kunqulo Lokwenyaniso

NGOKUBALISWA NGUISAMU SUGIURA

Nangona kwakucace mhlophe ukuba ngowe-1945 iJapan yayisoyiswa kwiMfazwe Yehlabathi II, sasiqinisekile ukuba ikamikaze (“umoya wobuthixo”) iza kulutshabalalisa ize iloyise utshaba. Ikamikaze ibhekisela kwiinkqwithela zowe-1274 nowe-1281 ezathi kabini zatshabalalisa umkhosi weenqanawa zeMongol ezazihlasela kunxweme lwaseJapan, ngoko zinyanzeleka ukuba zirhoxe.

NGOKO KE, xa uMlawuli Hirohito, ngoAgasti 15, 1945, wazisa isizwe ukuba iJapan iye yanikezela kwiMikhosi Emanyeneyo, abantu abalikhulu lezigidi ababezinikele kuye baphelelwa lithemba. Ngelo xesha ndandiyinkwenkwana ehamba isikolo, yaye nam ndaphelelwa lithemba. Ndazibuza: ‘Ukuba umlawuli akangoThixo uphilayo, ngubani ke? Ngubani endimele ndikholose ngaye?’

Enyanisweni, ukoyiswa kweJapan kwiMfazwe Yehlabathi II kwavulela mna namawaka abantu baseJapan ithuba lokuba sifunde ngoThixo oyinyaniso, uYehova. Ngaphambi kokuba ndikuxelele ngotshintsho endandifanele ndilwenze, makhe ndikwazise ngonqulo endikhuliswe kulo.

Iimpembelelo Zonqulo Zamandulo

Ndazalwa kwisixeko saseNagoya ngoJuni 16, 1932, ndiliphelo kumakhwenkwe amane. UTata wayesebenza njengomhloli weziza zomhlaba. UMama wayelikholwa elinenzondelelo kwihlelo lamaShinto iTenrikyo, yaye umkhuluwa wam wayeqeqeshelwe ukuba abe ngumfundisi weTenrikyo. Mna noMama sasisondelelene kakhulu, yaye wayesiya nam kwindawo yonqulo.

Ndafundiswa ukuqubuda intloko nokuthandaza. Unqulo lweTenrikyo lwalufundisa inkolelo kumdali obizwa ngokuba nguTenri O no Mikoto, kwanabanye oothixo abangaphantsi kwakhe abalishumi. Amalungu ayephilisa ngokholo, yaye ayegxininisa ekuncedeni abanye nasekusasazeni iinkolelo zabo.

Njengenkwenkwana, ndandilufuna gqitha ulwazi. Ndandichukumiseka gqitha ndakubona inyanga neenkwenkwezi ezininzi esibhakabhakeni ebusuku, yaye ndandizibuza apho wawuphelela khona ummandla ongaphaya kwesibhakabhaka. Ndandikufumanisa kunomtsalane ukubukela iieggplants neenkonkomire endandizilime kwisitiya esisemva kwendlu zikhula. Ukuqwalasela indalo kwaqinisa ukholo lwam kuThixo.

Iminyaka Yemfazwe

Iminyaka endandikumabanga aphantsi ukususela ngowe-1939 ukusa ngowe-1945 yayingqubana nexesha leMfazwe Yehlabathi II. Ukunqula umlawuli, inxalenye ebalulekileyo kubuShinto, kwakugxininiswa kwimfundo yethu yesikolo. Sasifundiswa ishushin, eyayiquka ukufundiswa ngobuzwe nangezomkhosi. Imisitho yokuphakanyiswa kweflegi, ukucula umhobe wesizwe, ukufunda ngemithetho yomlawuli kwanokunikela imbeko kumfanekiso womlawuli konke oku kwakuyinxalenye yezinto zemihla ngemihla kwisikolo sethu.

Sasisiya nakwingcwaba leengcwele zamaShinto lasekuhlaleni sithandaza kuThixo ukuba umkhosi womlawuli woyise. Abakhuluwa bam ababini babesemkhosini. Ngenxa yendlela endafundiswa ngayo ngonqulo lobuhlanga, ndandivuya xa ndisiva ngoloyiso lomkhosi wamaJapan.

INagoya yayisisazulu soshishino lweenqwelo-moya zamaJapan, ngoko yayiyeyona ndawo isesichengeni sokuhlaselwa nguMkhosi Womoya waseUnited States. Ebudeni bemini, abaqhushumbisi beB-29 Superfortress babhabha phezu kwedolophu belandelelana malunga neemitha ezingama-9 000, bewisa iibhombu ezininzi phezu kwemimandla yemizi-mveliso. Ebusuku xa kwakukhanyiswe izibane ezibukhali kwabhaqwa abaqhushumbisi besondele kangangeemitha ezili-1 300. Ukuhlaselwa ziinqwelo-moya ngeziqhushumbisi ezitshisayo ngokuphindaphindiweyo kwabangela imililo emikhulu kwimimandla enezindlu. INagoya iyodwa yahlaselwa izihlandlo ezingama-54 ebudeni beenyanga ezisithoba zokugqibela zemfazwe, oko kwabangela ingxwelerha ezininzi nokufa kwanabantu abangama-7700.

Ngeli xesha, ukugityiselwa kweebhombu ezivela kwiinqanawa kwaqaliswa ngokuhlaselwa kwezixeko ezilishumi eziselunxwemeni, yaye abantu babesithi kusenokwenzeka ukuba kufike imikhosi yaseUnited States kufuphi neTokyo. Amabhinqa namakhwenkwe aselula ayeqeqeshelwa ukulwa ngemikhonto eyenziwe ngoqalo ukuze bakhusele ilizwe. Amazwi esasisoloko siwathetha ayesithi “Ichioku Sougyokusai,” athetha ukuthi “Kungase kufe abazizigidi ezili-100 kunokuba sinikezele.”

NgoAgasti 7, 1945, umxholo wephephandaba wathi: “Uhlobo Olutsha Lwesiqhushumbisi Luwiselwe EHiroshima.” Kwiintsuku ezimbini kamva, esinye sawiselwa eNagasaki. Ezi yayiziziqhushumbisi zeathom, yaye kamva saxelelwa ukuba ziye zabulala abantu abangaphezu kwama-300 000. Kwandula ke, ngoAgasti 15, emva koqheliselo siphethe imipu yeplanga, seva intetho yomlawuli xa wenza isibhengezo sokunikezela kweJapan. Saqinisekiswa ukuba siza koyiswa, kodwa ngoku sasidane siyiloo nto!

Kuvela Ithemba Elitsha

Njengoko saqaliswa ukurhanqwa ngamajoni aseMerika, ngokuthe ngcembe sayamkela into yokuba iUnited States yoyisile emfazweni. Kwaqaliswa ulawulo lwedemokhrasi eJapan, kwanomgaqo-siseko omtsha owawuvumela inkululeko yonqulo. Iimeko zokuphila zazinzima, ukutya kwakunqongophele, yaye ngowe-1946 utata wafa ngenxa yokungondleki.

Ngelo xesha, kwaqaliswa ukufundiswa isiNgesi kwisikolo endandifunda kuso, yaye iziko likanomathotholo iNHK laqalisa inkqubo yencoko yesiNgesi. Kangangeminyaka emihlanu ndandiyiphulaphula yonke imihla le nkqubo idumileyo ndiphethe incwadi yesikhokelo. Oku kwandenza ndanomnqweno wokuya eUnited States ngenye imini. Ngenxa yokudaniswa lunqulo lwamaShinto namaBhuda, ndaqalisa ukucinga ukuba mhlawumbi inyaniso ngoThixo inokufunyanwa kwiinkonzo zaseNtshona.

Ngasekuqaleni kuka-Aprili, 1951, ndadibana noGrace Gregory, umvangeli wasemazweni weWatch Tower Society. Wayeme phambi kwesikhululo sikaloliwe saseNagoya ehambisa inkupho yesiNgesi yeMboniselo kwanencwadana yesiJapan ethetha ngeBhayibhile. Ndachukunyiswa yindlela awayethobeke ngayo ekwenzeni lo msebenzi. Ndazamkela zombini ezi mpapasho ndaza ngokulula ndasamkela isifundo seBhayibhile. Ndamthembisa ukuya ekhayeni lakhe ukuze ndibe nesifundo seBhayibhile kwiintsuku ezimbalwa kamva.

Njengoko ndandihlala phantsi kuloliwe ndaqalisa ukufunda IMboniselo, igama lokuqala kwinqaku lokuqala elithi, “Yehova,” labangela umdla. Andizange ndalibona elo gama ngaphambili. Ndandingalindelanga ukulifumana kwisichazi-magama esincinane sesiNgesi nesiJapan endandisiphethe, kodwa lalikho! “UYehova . . . , uThixo weBhayibhile.” Ngoku ndandiqalisa ukufumana ulwazi ngoThixo wamaKristu!

Kolo tyelelo lokuqala kwikhaya labavangeli basemazweni, ndafumanisa ukuba uNathan H. Knorr, owayengumongameli weWatch Tower Bible and Tract Society ngelo xesha wayeza kunikela intetho yeBhayibhile kwiiveki ezimbalwa kamva. Wayetyelele elaseJapan nonobhala wakhe, uMilton Henschel, yaye wayesiza eNagoya. Nangona ndandingenalwazi lungako ngeBhayibhile, ndayinandipha kakhulu loo ntetho, kwakunye nobudlelana nabavangeli basemazweni nabanye ababekho apho.

Kwithuba leenyanga ezinokuba mbini, ndafunda kwisifundo endandisiqhutyelwa nguGrace ngeenyaniso ezisisiseko ngoYehova, uYesu Kristu, intlawulelo, uSathana uMtyholi, iArmagedon nagomhlaba oyiParadesi. Iindaba ezilungileyo zoBukumkani zazisisigidimi kanye endandisifuna. Kwangelo xesha endaqalisa ngalo ukufundisisa, kwakhona ndaqalisa ukuya kwiintlanganiso zebandla. Ndandiwuthanda umoya wobuhlobo owawubonakaliswa kwezi ntlanganiso, apho abavangeli basemazweni babexubana ngokukhululekileyo nabantu baseJapan yaye behlala kwitatami (ukhuko oluphothwe ngengca) nathi.

Ngo-Okthoba 1951, indibano yesiphaluka yokuqala eJapan yaqhutyelwa eNakanoshima Public Hall kwisixeko saseOsaka. Kuyo yonke iJapan kwakukho amaNgqina ayenokuba ngaphantsi kuma-300; sekunjalo kwakukho abantu abamalunga nama-300 abeza kwindibano, kuquka nabavangeli basemazweni abangama-50. Ndaba nenxalenye emfutshane kucwangciso. Oko ndakubonayo noko ndakuvayo kwandichukumisa kangangokuba ndagqiba entliziyweni ukuba ndimkhonze uYehova ubomi bam bonke. Kusuku olulandelayo, ndabhaptizwa kumanzi adikidiki kwiqula lasekuhlaleni.

Uvuyo Kwinkonzo Yobuvulindlela

Ndandifuna ukuba nguvulindlela, njengoko babebizwa njalo abalungiseleli bexesha elizeleyo bamaNgqina kaYehova, kodwa kwakhona ndaziva ndinembopheleleko yokuxhasa intsapho yakowethu. Xa ndaba nesibindi sokuxelela umqashi wam ngomnqweno wam, ndamangaliswa xa ndamva esithi: “Ndingakuvuyela ukusebenzisana nawe ukuba oko kuza kukwenza wonwabe.” Ndakwazi ukusebenza iintsuku ezimbini kuphela ngeveki yaye ndandisakwazi ukuncedisa umama ngeendleko zasekhaya. Ndaziva ngathi ndiyintaka ephuncuke ibivalelwe.

Njengoko iimeko zaqhubeka zisiba bhetele, ndaqalisa ubuvulindlela ngoAgasti 1, 1954, kwintsimi esemva kwesikhululo sikaloliwe saseNagoya, uhambo lwemizuzu nje embalwa ukusuka apho ndadibana khona noGrace okwesihlandlo sokuqala. Emva kweenyanga eziliqela, ndafumana isabelo sokukhonza njengovulindlela okhethekileyo eBeppu, isixeko kwintshona yesiqithi saseKyushu. UTsutomu Miura wabelwa njengeqabane lam.a Ngelo xesha, kwakungekho mabandla amaNgqina kaYehova kuso sonke eso siqithi, kodwa ngoku kukho angamakhulu, ahlulwe aziziphaluka ezingama-22!

Ukungcamla Ihlabathi Elitsha

Xa uMzalwan’ uKnorr watyelela iJapan kwakhona ngoAprili 1956, wandicela ukuba ndifunde iziqendu ezimbalwa ngokuvakalayo kwiphephancwadi lesiNgesi IMboniselo. Andizange ndixelelwe isizathu soko, kodwa kwiinyanga ezimbalwa kamva, ndafumana incwadi endimema ukuba ndiye kwiklasi yama-29 kwisikolo sobuvangeli basemazweni saseGiliyadi. Ngoko ngoNovemba kuloo nyaka, ndaqalisa ukhenketho olubangel’ umdla lokuya eUnited States olwazalisekisa iphupha endandinalo kangangexesha elide. Ukuhlala nokusebenza iinyanga ezimbalwa nentsapho enkulu yaseBheteli eBrooklyn kwaluqinisa ukholo lwam kwintlangano kaYehova ebonakalayo.

NgoFebruwari 1957, uMzalwan’ uKnorr wahamba nathi ngenqwelo-mafutha singabafundi abathathu ukuya kwiSikolo saseGiliyadi kuMzantsi Lansing, kumntla New York. Kwiinyanga ezintlanu ezilandelayo ndikwiSikolo saseGiliyadi, njengoko ndandifundiswa iLizwi likaYehova yaye ndihlala kwindawo entle nabo ndandifunda nabo, ndayingcamla kwangaphambili iParadesi esemhlabeni. Ishumi kubafundi abali-103, kuquka nam, labelwa eJapan.

Ukuzixabisa Izabelo Zam

Kwakukho amaNgqina anokuba ngama-860 eJapan xa ndabuyelayo ngo-Oktobha 1957. Ndabelwa kumsebenzi wokuhambahamba njengomveleli wesiphaluka, kodwa ndaqala ndaqeqeshwa iintsuku ezimbalwa ngalo msebenzi nguAdrian Thompson eNagoya. Isiphaluka sam sasiquka ummandla ukusuka eShimizu, kufuphi neNtaba iFuji, ukuya kwiSiqithi saseShikoku yaye sasiquka izixeko ezikhulu njengeKyoto, iOsaka, iKobe neHiroshima.

Ngowe-1961, ndabelwa ukuba ndibe ngumveleli wesithili. Oku kwakuquka ukuhambahamba ukusuka kwisiqithi esinekhephu esisemntla saseHokkaido ukusa kwisiqithi esinganeno kweleenjiko saseOkinawa yaye nangaphaya kweziqithi zaseIshigaki kufuphi neTaiwan, umgama ongangeekhilomitha ezinokuba ngama-3 000.

Kwandula ke, ngowe-1963, ndamenywa ukuba ndiye kwisifundo seenyanga ezilishumi kwiSikolo saseGiliyadi kwiBheteli yaseBrooklyn. Ebudeni bezi zifundo, uMzalwan’ uKnorr wagxininisa ukubaluleka kokuba nesimo sengqondo esifanelekileyo ngezabelo zomsebenzi. Wathi ukucoca izindlu zangasese yayisisabelo esibaluleke njengokusebenza eofisini. Wathi, ukuba izindlu zangasese bezingacocekanga, intsapho yonke yaseBheteli nomsebenzi wayo ubuya kuchaphazeleka. Kamva, inxalenye yomsebenzi wam eBheteli yaseJapan yayikukucoca izindlu zangasese, yaye ndasikhumbula eso siluleko.

Emva kokubuyela eJapan, kwakhona ndabelwa kumsebenzi wokuhambahamba. Kwiminyaka embalwa kamva, ngowe-1966, ndatshata uJunko Iwasaki, uvulindlela okhethekileyo owayekhonza kwisixeko saseMatsue. ULloyd Barry, owayengumveleli wesebe laseJapan ngelo xesha, wanikela intetho yomtshato echukumisayo. Wandula ke uJunko wandipheleka kumsebenzi wokuhambahamba.

Izabelo zethu zatshintsha ngowe-1968 xa ndabizwa kwiofisi yesebe eTokyo ukuba ndenze umsebenzi wokuguqulela. Ngenxa yokunqongophala kwamagumbi okulala, ndandingumsebenzi ohlala ngaphandle eSumida Ward, eTokyo, yaye uJunko wayekhonza njengovulindlela okhethekileyo kwibandla lasekuhlaleni. Ngelo xesha, kwafuneka isakhiwo sesebe esikhudlwana. Ngoko ngowe-1970 kwathengwa umhlaba eNumazu, ongekude kakhulu neNtaba iFuji. Apho, kwakhiwa umzi-mveliso onemigangatho emithathu neendawo zokuhlala. Ngaphambi kokuqaliswa komsebenzi wokwakha, izindlu ezimbalwa kweso siza zasetyenziswa ekuqhubeni iSikolo Sobulungiseleli SoBukumkani, esifundisa abaveleli bebandla. Ndafumana ilungelo lokufundisa kweso sikolo, yaye uJunko wayelungiselela ukutya kwabafundi. Kwakuchulumancisa kakhulu ukubona amadoda angamaKristu angamakhulu efumana uqeqesho olukhethekileyo kubulungiseleli.

Ngenye imva kwemini ndafumana ucingo olungxamisekileyo. UMama wayesesibhedlele yaye egulela ukufa. Ndathabatha uloliwe okhawulezayo oya eNagoya ndaza ndabaleka ndaya esibhedlele. Wayengekho zingqondweni, kodwa ndabuchitha obo busuku ndisecaleni kwebhedi yakhe. UMama wafa ekuseni. Njengoko ndandibuyela eNumazu, ndandingakwazi ukuzibamba iinyembezi xa ndandikhumbula amaxesha anzima awayetyhubele kuwo ebomini bakhe nendlela awayendithanda ngayo. Ukuba uYehova uyathanda, ndiya kuphinda ndimbone eluvukweni.

Kungekudala izakhiwo zaseNumazu zaba ncinane. Ngoko kwathengwa umhlaba oziihektare ezisixhenxe kwisiXeko sase-Ebina, yaye kwaqaliswa ukwakhiwa isakhiwo sesebe esitsha ngowe-1978. Ngoku yonke indawo kwesi siza igutyungelwe ngumzi-mveliso nezakhiwo zokuhlala, kwaneHolo yeNdibano ehlala abantu abangaphezu kwama-2 800. Ukwandiswa kwakutshanje, okuquka iindawo zokuhlala ezinemigangatho eli-13 nesakhiwo sokumisa iinqwelo-mafutha nesokunikela ezinye iinkonzo esinemigangatho emi-5 sagqitywa ekuqaleni kwalo nyaka. Ngoku intsapho yethu yaseBheteli inamalungu anokuba ngama-530, kodwa izakhiwo ezandisiweyo ziya kwenza sikwazi ukuba nabantu abangama-900.

Izizathu Ezininzi Zokuvuya

Kuye kwavuyisa kakhulu ukubona iziprofeto zeBhayibhile zizaliseka, ewe, ukubona ‘oweyeleyo ekhula abe luhlanga olunamandla.’ (Isaya 60:22) Ndikhumbula omnye wabakhuluwa bam endibuza emva phayaa ngowe-1951, “Mangaphi amaNgqina eJapan?”

Ndaphendula ndathi: “Malunga nama-260.”

Ngelizwi elibonisa ukweya, wabuza: “Qha?”

Ndisakhumbula ndicinga, ‘Kuza kubonakala njengokuba ixesha lihamba ukuba bangaphi abantu uYehova aya kubatsalela kunqulo lwakhe kweli lizwe lobuShinto nobuBhuda.’ Yaye uYehova uye waphendula! Namhlanje, akusekho mihlaba engabelwanga bani ekunokushunyayelwa kuyo eJapan, yaye inani labakhonzi liye lantinga ukuya kutsho ngaphezu kwama-222 000 kumabandla angama-3 800!

Kwiminyaka engama-44 yobomi bam kubulungiseleli bexesha elizeleyo—engama-32 ndinomfazi wam othandekayo—iye yandivuyisa ngokukhethekileyo. Kangangeminyaka engama-25 kuloo minyaka, ndiye ndakhonza kwiSebe Lokuguqulela eBheteli. NgoSeptemba 1979, kwakhona ndafumana isimemo sokuba ndibe lilungu lekomiti yesebe lamaNgqina kaYehova eJapan.

Kuye kwaba lilungelo nentsikelelo ukuba nesabelo esincinane ekuncedeni abantu abanyanisekileyo nabathanda uxolo beze kunqulo lukaYehova. Uninzi luye lwenza njengoko ndenzile—lwaguquka ekuzinikeleni kumlawuli lwaza lwanqula okuphela koThixo oyinyaniso, uYehova. Enyanisweni kungumnqweno wam ukunceda abaninzi abangakumbi beze kwicala likaYehova eloyisayo baze bafumane ubomi obungenasiphelo kwihlabathi elitsha elinoxolo.—ISityhilelo 22:17.

[Imibhalo esemazantsi]

[Umfanekiso okwiphepha 29]

Imfundiso yesikolo yayisekelwe ekunquleni umlawuli

[Inkcazelo]

The Mainichi Newspapers

[Umfanekiso okwiphepha 29]

ENew York noMzalwan’ uFranz

[Umfanekiso okwiphepha 29]

Ndinomfazi wam, uJunko

[Umfanekiso okwiphepha 31]

Emsebenzini kwiSebe Lokuguqulela