Benza Ukuthanda Kukayehova
Ukuxolela Kuvula Ithuba Lokusindiswa
OONYANA abalishumi bakaYakobi ababemi phambi kwenkulumbuso yaseYiputa badiza ihlebo elibi gqitha. Kwiminyaka engaphambilana babethengise umntakwabo ngoyise uYosefu ebukhobokeni, beceba ukuxelela uyise ukuba wayebulewe lirhamncwa.—Genesis 37:18-35.
Ngoku, kwiminyaka enokuba ngama-20 kamva, indlala yanyanzela la madoda alishumi ukuba aze eYiputa eze kuthenga ukutya okuziinkozo. Kodwa izinto azizange zibahambele kakuhle. Inkulumbuso, neyayikwangumlawuli wokutya, yabatyhola ngokuba ziintlola. Yavalela omnye wabo entolongweni ngelithi bonke mabagoduke babuye nomninawa wabo, uBhenjamin. Xa bakwenzayo oko, le nkulumbuso yenza icebo lokubamba uBhenjamin.—Genesis 42:1–44:12.
UYuda, omnye woonyana bakaYakobi wakhalaza. Wathi: ‘Ukuba siyagoduka engekho uBhenjamin, ubawo uya kufa.’ Emva koko kwenzeka into angazange ayicinge uYuda kwanabo babehamba naye. Emva kokuba icele bonke abantu ukuba baphume ngaphandle koonyana bakaYakobi, inkulumbuso yatsho ngesililo esikhulu. Emva koko, yakuba izolile yathi: “NdinguYosefu.”—Genesis 44:18–45:3.
Ukuba Nenceba Nokukhululwa
UYosefu wababuza abantakwabo esithi: “Usaphilile na ubawo?” Akuzange kubekho mpendulo. Enyanisweni, abantakwabo Yosefu ngoyise babeziinkuku ezisikw’ umlomo. Ngaba babefanele bachwayite, okanye babefanele boyike bangcangcazele? Ngapha koko, kwiminyaka engama-20 eyadlulayo, bayithengisa le ndoda ebukhobokeni. UYosefu wayenegunya lokubavalela, abagoduse bengenakutya, okanye—eyona inkulu—ababulale! Ngesizathu esivakalayo, abantakwabo Yosefu ngoyise ‘abazange babe nako ukumphendula, kuba bakhwankqiswa phambi kwakhe.’—Genesis 45:3.
UYosefu wakhawuleza wawakhulula la madoda. Wathi: “Khanisondele kum apha.” Basondela. Emva koko wathi: “NdinguYosefu, umzalwana wenu, enathengisayo ngaye eYiputa. Ngoko musani ukuba buhlungu, ningaziqumbeli, ukuba nathengisa ngam apha; kuba uThixo wandithuma phambi kwenu ukuze ndisindise abantu.”—Genesis 45:4, 5.
UYosefu wayefanele ukubonakalisa inceba kubo. Wayesele ebubonile ubungqina bokuguquka kwabo. Ngokomzekelo, xa uYosefu watyhola abantakwabo ngoyise ngokuba ziintlola, wabava bezithethela besithi: “Inyaniso, sinetyala ngenxa yomninawa wethu, . . . kungenxa yoko le nto kusifikeleyo oku kubandezeleka.” (Genesis 42:21) Kwakhona, uYuda wayevumile ukuba abe likhoboka endaweni kaBhenjamin ukuze lo mfana abuyiselwe kuyise.—Genesis 44:33, 34.
Ngenxa yoko, uYosefu wayefanele ukubonakalisa inceba. Enyanisweni, waqonda ukuba ukwenjenjalo kwakunokuphumela ekusindisweni kwentsapho yakhe iphela. Ngaloo ndlela, uYosefu waxelela abantakwabo ngoyise ukuba baye kuyise, uYakobi, baze bathi kuye: “Utsho unyana wakho uYosefu ukuthi, uThixo undenze inkosi kuyo yonke iYiputa; yihla uze kum, musa ukulibala. Wohlala ezweni laseGoshen, ube kufuphi kum, wena, noonyana bakho, noonyana boonyana bakho, nempahla yakho emfutshane, neenkomo zakho, nezinto zonke onazo; ndikondle khona.”—Genesis 45:9-11.
UYosefu Omkhulu
UYesu Kristu unokubizwa ngokuba nguYosefu Omkhulu, ngenxa yokuba kukho ukufana okuthile kula madoda mabini. NjengoYosefu, uYesu akazange aphathwe kakuhle ngabantakwabo, inzala ka-Abraham. (Thelekisa IZenzo 2:14, 29, 37.) Ukanti, izinto zaguquka ngokuphawulekayo kula madoda mabini. Ekuhambeni kwexesha, uYosefu wayeka ukuba likhoboka waza waba yinkulumbuso, inguFaro kuphela owayengaphezulu kunaye. Ngokufanayo, uYehova wamvusa uYesu kwabafileyo waza wambeka kweyona ndawo iphakamileyo “kwisandla sasekunene sikaThixo.”—IZenzo 2:33; Filipi 2:9-11.
Njengenkulumbuso, uYosefu wakwazi ukubanika ukutya bonke abo babeye eYiputa ukuze bathenge ukutya okuziinkonzo. Namhlanje, uYosefu Omkhulu emhlabeni unekhoboka elithembekileyo neliyingqondi elikhupha ukutya kokomoya “ngexesha elifanelekileyo.” (Mateyu 24:45-47; Luka 12:42-44) Enyanisweni, abo beza kuYesu “abasayi kulamba yaye bengayi kunxanwa kwakhona . . . ngenxa yokuba iMvana, ephakathi kwetrone, iya kubalusa, kwaye iya kubakhokelela emithonjeni yamanzi obomi.”—ISityhilelo 7:16, 17.
Oko Sikufundayo
UYosefu usibonisa owona mzekelo ubalaseleyo wokubonisa inceba. Ukulandelwa kokusesikweni ngokungqongqo kwakunokubangela ukuba abohlwaye abo babemthengise ebukhobokeni. Kwelinye icala, iimvakalelo ngezazimshukumisele ukuba azibethe ngoyaba izono zabo. UYosefu akazange enze nanye kwezi. Kunoko, wavavanya inguquko yabantakwabo ngoyise. Emva koko, akubona ukuba babezisola ngenene, wabaxolela.
Sinokumxelisa uYosefu. Xa umntu osonileyo ebonisa intliziyo eguqukayo yokwenene, simele simxolele. Kakade ke, asimele sivumele nje iimvakalelo zisenze sisiqwabazele iliso isenzo sobubi. Kwelinye icala, asimele sivumele ingqumbo isenze singakwazi ukuyibona inguquko yokwenene. Ngoko ke, ‘masiqhubeke sinyamezelana yaye sixolelana ngesisa ukuba nabani na unonobangela wokukhalazela omnye.’ (Kolose 3:13) Ngokwenjenjalo, siya kuba sixelisa uThixo wethu, uYehova, ‘okulungeleyo ukuxolela.’—INdumiso 86:5; Mika 7:18, 19.