Ngaba Imithandazo Yakho ‘Isisiqhumiso’?
“Umthandazo wam mawuhlale uhleli phambi kwakho usisiqhumiso.”—INDUMISO 141:2.
1, 2. Kwakufuzisela ntoni ukutshiswa kwesiqhumiso?
UYEHOVA UTHIXO wayalela umprofeti wakhe uMoses ukuba alungiselele isiqhumiso esingcwele ukuze sisetyenziswe kumnquba wonqulo wakwaSirayeli. UThixo wathi masibe ngumxube weziqholo ezine. (Eksodus 30:34-38) Sasisitsho ngevumba elimyoli ngokwenene.
2 Umnqophiso woMthetho owawenziwe luhlanga lwakwaSirayeli wawusithi kumele kusetyenziswe isiqhumiso imihla ngemihla. (Eksodus 30:7, 8) Ngaba ukusetyenziswa kwesi siqhumiso kwakunentsingiselo ekhethekileyo? Kunjalo kanye, kuba umdumisi wavuma ingoma esithi: “Umthandazo wam mawuhlale uhleli phambi kwakho [Yehova Thixo] usisiqhumiso, nokuphakamisa kwam izandla kube ngumnikelo wangokuhlwa.” (INdumiso 141:2) Kwincwadi yeSityhilelo, umpostile uYohane uthi abo bajikeleze itrone yasezulwini kaThixo baphethe izitya zegolide ezizele ziziqhumiso. Le ngxelo iphefumlelweyo ithi: “Kwaye iziqhumiso zithetha imithandazo yabo bangcwele.” (ISityhilelo 5:8) Ngoko ke, isiqhumiso esitsho ngevumba elimyoli sasifuzisela imithandazo eyamkelekileyo eyayisenziwa ngabakhonzi bakaYehova imini nobusuku.—1 Tesalonika 3:10; Hebhere 5:7.
3. Yintoni efanele isincede ukuze ‘imithandazo yethu ihlale isisiqhumiso phambi koThixo’?
3 Ukuba sifuna imithandazo yethu yamkeleke kuThixo, simele sithandaze kuye ngegama likaYesu Kristu. (Yohane 16:23, 24) Kodwa sinokuyiphucula njani imithandazo yethu? Kaloku, ukuqwalasela eminye yemizekelo enikelwa ziZibhalo kufanele kusincede senze imithandazo yethu ibe sisiqhumiso kuYehova.—IMizekeliso 15:8.
Thandaza Unokholo
4. Ukholo ludibana njani nomthandazo owamkelekayo?
4 Ukuba sifuna imithandazo yethu inyuke njengesiqhumiso esilivumba elimyoli kuThixo, simele sithandaze sinokholo. (Hebhere 11:6) Xa abadala abangamaKristu befumana umntu ogulayo ngokomoya nolwamkelayo uncedo lweZibhalo abalunikelayo, ‘umthandazo wabo wokholo uya kumenza aphile lowo ungaphilanga.’ (Yakobi 5:15) Imithandazo eyenziwa ngokholo iyamkholisa uBawo wethu wasezulwini, ibe kunjalo nangokulifundisisa ngenzondelelo iLizwi likaThixo. Umdumisi wabonisa isimo sengqondo esihle xa wavuma ingoma esithi: “Ndiziphakamisa izandla zam emithethweni yakho endiyithandayo, ndicamngce ngemimiselo yakho. Ndifundise, ndibe nemvo nokwazi okulungileyo, ngokuba ndikholwa yimithetho yakho.” (INdumiso 119:48, 66) ‘Masiziphakamise izandla zethu’ size sithandaze ngokuthobeka yaye sibonakalise ukholo ngokuphila ngokuvisisana nemithetho kaThixo.
5. Simele senze ntoni xa siswele ubulumko?
5 Masithi ke sixakwe yindlela yokuhlangabezana nesilingo esithile. Mhlawumbi asiqinisekanga nokuba isiprofeto esithile seBhayibhile sizaliseka ngoku kusini na. Kunokuba sivumele loo nto isigungqise ngokomoya, masithandazele ubulumko. (Galati 5:7, 8; Yakobi 1:5-8) Kakade ke, asinakulindela ukuba uThixo asiphendule ngendlela enokubonwa nangubani na. Kufuneka sibonakalise ukunyaniseka kwimithandazo yethu ngokwenza konke alindele ukuba abantu bakhe bakwenze. Kufuneka senze ufundisiso lweZibhalo olwakha ukholo size sisebenzise neempapasho eziluncedo ezilungiselelwe “likhoboka elithembekileyo neliyingqondi.” (Mateyu 24:45-47; Yoshuwa 1:7, 8) Kwakhona kufuneka sandise ulwazi ngokuba nenxaxheba rhoqo kwiintlanganiso zabantu bakaThixo.—Hebhere 10:24, 25.
6. (a) Yintoni esifanele siyiqonde sonke ngomhla wethu nangokuzaliseka kweziprofeto zeBhayibhile? (b) Ukongezelela ekuthandazeleni ukungcwaliswa kwegama likaYehova, yintoni esifanele siyenze?
6 Namhlanje, amanye amaKristu asukela izinto nemisebenzi ngendlela entama ukungaqondi kwabo ukuba ngoku sele singene nzulu ‘kwixesha lokuphela.’ (Daniyeli 12:4) Amanye amakholwa anokuthandazela ukuba abanjalo bavuselele okanye baqinise ukholo lwabo kubungqina beZibhalo bokuba ubukho bukaKristu baqalisa ngowe-1914 xa uYehova wamthwesa njengoKumkani wasezulwini nokuba ulawula phakathi kweentshaba zakhe. (INdumiso 110:1, 2; Mateyu 24:3) Sonke sifanele siqonde ukuba iziganeko ezaxelwa kwangaphambili ezinjengokutshatyalaliswa konqulo lobuxoki—“iBhabhiloni Enkulu”—uhlaselo lolunya lukaGogi wasezweni lakwaMagogi kubantu bakaYehova, kunye nokuhlangulwa kwabo nguThixo uSomandla kwimfazwe yeArmagedon zinokwenzeka ngokuphanyaza nje kweliso ibe zonke zinokwenzeka ngexesha nje elingephi. (ISityhilelo 16:14, 16; 18:1-5; Hezekile 38:18-23) Ngoko masithandazele uncedo lukaThixo ukuze sihlale sithe qwa ngokomoya. Ngamana sonke singakuthandazela ngokunyaniseka ukungcwaliswa kwegama likaYehova, sicela ukuba uBukumkani bakhe bufike, yaye ukuthanda kwakhe kwenziwe emhlabeni njengasezulwini. Ewe, ngamana singaqhubeka siqhelisela ukholo size sibonise ukuba imithandazo yethu inyanisekile. (Mateyu 6:9, 10) Eneneni, ngamana bonke abo bamthandayo uYehova bangafuna kuqala uBukumkani nobulungisa bakhe baze babe nesabelo kangangoko banako ekushumayeleni iindaba ezilungileyo ngaphambi kokuba isiphelo sifike.—Mateyu 6:33; 24:14.
Mdumise Yaye Umbulele UYehova
7. Yintoni ekuchukumisayo kumthandazo kaDavide onxalenye yawo ibhalwe kweyoku-1 yeziKronike 29:10-13?
7 Enye indlela engundoqo ‘yokwenza imithandazo yethu ibe ziziqhumiso’ kukuvakalisa indumiso nombulelo osuka entliziyweni kuThixo. UKumkani uDavide wenza umthandazo onjalo xa yena nabantu bakwaSirayeli babenikela ekwakhiweni kwetempile kaYehova. UDavide wathandaza esithi: “Mawubongwe wena, Yehova, Thixo kaSirayeli, ubawo wethu, kususela kwaphakade kude kuse ephakadeni. Bobakho, Yehova, ubukhulu, namandla, nozuko, noloyiso, nendili. Ewe, konke okusezulwini nokusehlabathini kokwakho; bobakho, Yehova, ubukumkani; uphakamile wayintloko yeento zonke. Ubutyebi nozuko luvela kuwe, ulawula zonke izinto; asesandleni sakho amandla nobugorha; kusesandleni sakho ukukhulisa nokomeleza zonke izinto. Ke ngoko, Thixo wethu, sinokubulela kuwe, sidumise igama lakho elibekekileyo.”—1 Kronike 29:10-13.
8. (a) Ngawaphi amazwi okudumisa abhalwe kwiNdumiso 148 ukusa kweye-150 ayichukumisa ngokukhethekileyo intliziyo yakho? (b) Ukuba nathi sivakalelwa ngendlela ebhalwe kwiNdumiso 27:4, yintoni esiza kuyenza?
8 Anjani ukuba mnandi amazwi endumiso nombulelo! Sisenokungabi nabo ubuciko bokuthandaza ngaloo ndlela, kodwa sinako ukuthandaza ngokusuka entliziyweni ngolo hlobo. Incwadi yeeNdumiso izaliswe yimithandazo yokubulela neyokudumisa. Amagama esinokuwakhetha ukuze sidumise sinokuwafumana kwiNdumiso 148 ukusa kweye-150. Amazwi okubulela uThixo akho kwiindumiso ezininzi. UDavide wavuma ingoma esithi: “Ndicele nto-nye kuYehova, ndifuna yona: Ukuba ndihlale endlwini kaYehova yonke imihla yobomi bam, ndibone ubuhle bukaYehova, ndiphicothe etempileni yakhe.” (INdumiso 27:4) Masenze ngokungqinelana nayo le mithandazo ngokuba nenxaxheba ngenzondelelo kuyo yonke imisebenzi eyenziwa zizihlwele zikaYehova ezilungelelanisiweyo. (INdumiso 26:12) Ukwenza oku nokucamngca rhoqo ngeLizwi likaThixo kuya kusinika izizathu ezininzi zokusondela kuYehova ngendumiso nombulelo osuka entliziyweni.
Cela Uncedo LukaYehova Ngokuthobeka
9. Wathandaza njani uKumkani uAsa, ibe waba yintoni umphumo?
9 Ukuba sikhonza uYehova ngentliziyo epheleleyo njengamaNgqina akhe, sinokuqiniseka ukuba uyayiva imithandazo yethu xa sicela uncedo. (Isaya 43:10-12) Masenze umzekelo ngoKumkani uAsa wakwaYuda. Kwiminyaka eli-10 yokuqala yolawulo lwakhe olwathabatha iminyaka engama-41 (977-937 B.C.E.) kwakwesamele uxolo. Emva koko elakwaYuda lahlaselwa ngumkhosi wamadoda asisigidi owawubhexeshwa nguZera umTiyopiya. Nangona babeligcuntswana nje, uAsa namadoda akhe baphuma baya kubahlangabeza aba bahlaseli. Noko ke, ngaphambi kokuba lisuke idabi, uAsa wathandaza ngokunzulu. Wavuma ukuba uYehova wayenamandla okuhlangula. Ecela uncedo, lo kumkani wathi: “Sayame ngawe, size kule ngxokolo egameni lakho. Yehova, unguThixo wethu, makangabi namandla umntu okumelana nawe.” Baluchitha lwathi saa olo tshaba njengoko uYehova wayesindisa elakwaYuda ngenxa yegama lakhe elizukileyo. (2 Kronike 14:1-15) Enoba uThixo uyasihlangula xa silingwa okanye usinika amandla okunyamezela, asithandabuzi ukuba uyasiva xa sicela uncedo.
10. Xa singakwazi ukusingatha ingxaki ethile, unokusinceda njani umthandazo kaKumkani uYehoshafati?
10 Ukuba asiyazi indlela yokusingatha ingxaki ethile, sinokuqiniseka ukuba uYehova uya kuyiva imithandazo yethu yokucela uncedo. Oku unokukubona kakuhle kwimihla kaKumkani uYehoshafati wakwaYuda, owaqalisa ulawulo lwakhe lweminyaka engama-25 ngowama-936 B.C.E. Xa elakwaYuda lalisongelwa yimikhosi emanyeneyo yamaMowabhi, ama-Amon nabemi beleentaba zakwaSehire, uYehoshafati wabongoza esithi: “Thixo wethu, akuyi kubagweba na? Ngokuba asinamandla okumelana nale ngxokolo ininzi isizelayo; thina asazi ukuba sothini na, kodwa amehlo ethu akuwe.” UYehova wawuphendula loo mthandazo ubonakalisa ukuthobeka, walilwela elakwaYuda ngokudala isiphithiphithi kwizintlu zotshaba lwaza lwabulalana lodwa. Ngenxa yoko, iintlanga ezingabamelwane zoyika, kwaza kwabakho uxolo kwelakwaYuda. (2 Kronike 20:1-30) Xa siswele ubulumko bokusingatha ingxaki ethile, sinokuthandaza njengoYehoshafati sithi: ‘Asazi ukuba sothini na, kodwa amehlo ethu akuwe, Yehova.’ Umoya oyingcwele unokusenza sikhumbule iingongoma ezithile zeZibhalo ezinokusinceda siphume kuloo ngxaki, okanye uThixo unokusinceda ngendlela engaphezu kwengqiqo yomntu.—Roma 8:26, 27.
11. Okwenziwa nguNehemiya ngokuphathelele udonga lweYerusalem kunokusifundisa ntoni ngomthandazo?
11 Kusenokufuneka sizingise xa sithandazela uncedo lukaThixo. UNehemiya wazila, walila, wazila ukutya yaye wathandaza kangangeentsuku ezithile ngenxa yodonga olwaludilikile lwaseYerusalem nangenxa yemo elusizi yabemi bakwaYuda. (Nehemiya 1:1-11) Kuyabonakala ukuba imithandazo yakhe yanyukela kuThixo njengesiqhumiso esinuka kamnandi. Ngenye imini uKumkani uArtashashta wasePersi wabuza uNehemiya owayexhwalekile oku: “Ufuna ntoni na ke?” UNehemiya ubalisa esithi: “Ndathandaza ke kuThixo wamazulu.” Loo mthandazo mfutshane awawenza entliziyweni waphendulwa, kuba uNehemiya wavunyelwa ukuba aye kuzalisekisa umnqweno wentliziyo yakhe ngokuya kwakha udonga olwaludilikile lwaseYerusalem.—Nehemiya 2:1-8.
Funda Indlela Yokuthandaza KuYesu
12. Ngamazwi akho, ubunokuzishwankathela njani iingongoma eziyintloko zomthandazo kaYesu ongumzekelo?
12 Kuyo yonke imithandazo ebhalwe kwiZibhalo, owona sinokufunda kuwo ngumthandazo ongumzekelo owanyuswa nguYesu Kristu njengesiqhumiso esinuka kamnandi. Incwadi yeVangeli kaLuka ithi: “Uthile wakubafundi [bakaYesu] wathi kuye: ‘Nkosi, sifundise indlela yokuthandaza, kanye njengoko noYohane wabafundisayo abafundi bakhe.’ Ngoko wathi kubo: ‘Xa sukuba nithandaza, yithini, “Bawo, malingcwaliswe igama lakho. Ubukumkani bakho mabufike. Siphe isonka sethu sale mini ngokwemfuneko yemini le. Yaye sixolele izono zethu, kuba nathi ngokwethu siyamxolela wonk’ ubani onetyala kuthi; ibe ungasingenisi ekuhendweni.” ’ ” (Luka 11:1-4; Mateyu 6:9-13) Makhe siwuqwalasele lo mthandazo ungenzelwanga kucengcelezwa kodwa onjongo yawo ikukusikhokela.
13. Ubunokuyichaza njani intsingiselo yamazwi athi, “Bawo, malingcwaliswe igama lakho”?
13 “Bawo, malingcwaliswe igama lakho.” Ukubiza uYehova ngokuthi Bawo kulilungelo elikhethekileyo kubakhonzi bakhe abazahluleleyo. Ekubeni abantwana besiya lula kubawo onenceba xa kukho nantoni na ebaxhalabisayo, rhoqo sifanele siziphe ixesha lokuthandaza ngendlela endilisekileyo nebonakalisa ukumoyika uThixo. (INdumiso 103:13, 14) Kwimithandazo yethu sifanele sibonakalise ukukuxhalabela ukungcwaliswa kwegama likaYehova ekubeni silangazelela ukulubona lususiwe lonke ugculelo olubekwe phezu kwalo. Ewe, sifuna ukuba igama likaYehova lahluke yaye liphathwe ngobungcwele, okanye lingcwaliswe.—INdumiso 5:11; 63:3, 4; 148:12, 13; Hezekile 38:23.
14. Kuthetha ntoni ukuthandaza uthi, “Ubukumkani bakho mabufike”?
14 “Ubukumkani bakho mabufike.” UBukumkani lulawulo lukaYehova oluphunyezwa ngorhulumente wasezulwini ongoMesiya owonganyelwe nguNyana wakhe uYesu kunye nezinxulumani zakhe ‘zabangcwele.’ (Daniyeli 7:13, 14, 18, 27; ISityhilelo 20:6) Kungekudala buza ‘kubafikela’ bonke abachasi abasemhlabeni bolongamo lukaThixo, bubashenxise emhlabeni. (Daniyeli 2:44) Emva koko ke kuya kwenziwa ukuthanda kukaYehova emhlabeni, njengasezulwini. (Mateyu 6:10) Olunjani uvuyo obuya kuluzisa kuzo zonke izidalwa ezimkhonza ngokunyaniseka uMongami Wendalo Iphela!
15. Kubonisa ntoni ukuthandazela “isonka sethu sale mini” kuYehova?
15 “Siphe isonka sethu sale mini ngokwemfuneko yemini le.” Ukucela ukutya ‘kwemini’ kuYehova kubonisa ukuba asimele sicele intabalala yezinto kodwa simele sicelele iintswelo zethu zemihla ngemihla kuphela. Nangona sithembe uThixo ukuba uya kusilungiselela, siyasebenza yaye sisebenzisa naziphi na iindlela ezifanelekileyo ezikhoyo ukuze sifumane ukutya nezinye izinto eziyimfuneko. (2 Tesalonika 3:7-10) Kakade ke, sifanele simbulele uMondli wethu wasezulwini kuba luthando, ubulumko namandla akhe abangela ukuba ezi zinto zifumaneke.—IZenzo 14:15-17.
16. Sinokwenza ntoni ukuze sixolelwe nguThixo?
16 “Sixolele izono zethu, kuba nathi ngokwethu siyamxolela wonk’ ubani onetyala kuthi.” Ekubeni singafezekanga yaye sinesono, asinakukwazi ukuyifikelela ngokupheleleyo imilinganiselo kaYehova egqibeleleyo. Ngenxa yoko, kufuneka sithandazele ukuxolelwa nguye ngesizinzi sedini lentlawulelo likaYesu. Kodwa ukuba sifuna ‘uMphulaphuli wemithandazo’ azicamagushele izono zethu, simele siguquke size sikulungele ukulwamkela naluphi na uqeqesho esilufumana kuye. (INdumiso 65:2; Roma 5:8; 6:23; Hebhere 12:4-11) Ngaphezu koko, sinokulindela ukuba uThixo asixolele kuphela ukuba siye ‘sabaxolela abanetyala kuthi,’ abo basonayo.—Mateyu 6:12, 14, 15.
17. Athetha ntoni amazwi athi, “Ungasingenisi ekuhendweni”?
17 “Ungasingenisi ekuhendweni.” Maxa wambi iBhayibhile ithi uYehova uyazenza izinto ngoxa yena ezivumela nje kuphela. (Rute 1:20, 21) UThixo akasihendi ukuba senze isono. (Yakobi 1:13) Oyena mhendi usikhokelela kokungendawo nguMtyholi, inyama yethu enesono kunye nehlabathi. USathana nguMhendi ozama ukusirhwebeshela ekubeni simone uThixo. (Mateyu 4:3; 1 Tesalonika 3:5) Xa sisenza isicelo esithi, “Ungasingenisi ekuhendweni,” sicela uThixo ukuba angasivumeli ukuba soyisakale xa sihendwa ukuba singamthobeli. Unokusalathisa ukuze singanikezeli yaye singagaganyelwa nguSathana, “lowo ungendawo.”—Mateyu 6:13; 1 Korinte 10:13.
Izenzo Zakho Mazivisisane Nemithandazo Yakho
18. Imisebenzi yethu inokungqinelana njani nemithandazo yethu yokufumana ulonwabo emtshatweni nakubomi bentsapho?
18 Umthandazo kaYesu ongumzekelo wawugubungela iingongoma ezingundoqo, kodwa sinokuthandazela nantoni na. Ngokomzekelo, sisenokuthandaza size sivakalise umnqweno wethu wokufumana ulonwabo emtshatweni. Ukuze sihlale sinyulu de sitshate, sisenokuthandazela ukuzeyisa. Kodwa ke kuya kufuneka izenzo zethu zivisisane nemithandazo yethu ngokuphepha uncwadi kunye neendlela zokuzonwabisa ezikhuthaza ukuziphatha okubi. Kwakhona masizimisele ‘ukutshata kuphela eNkosini.’ (1 Korinte 7:39; Duteronomi 7:3, 4) Xa sele sitshatile, kuza kufuneka izenzo zethu zivisisane nemithandazo yethu yokufuna ulonwabo ngokusebenzisa isiluleko sikaThixo. Kwaye ukuba sinabantwana, asimele sanele nje ukuthandazela ukuba babe ngabakhonzi abathembekileyo bakaYehova. Simele senze konke okusemandleni ethu ukuze sibethelele inyaniso kaThixo ezingqondweni zabo ngokufundisisa nabo iBhayibhile nangokuya nabo rhoqo kwiintlanganiso zamaKristu.—Duteronomi 6:5-9; 31:12; IMizekeliso 22:6.
19. Yintoni esifanele siyenze xa sithandazela ubulungiseleli bethu?
19 Ngaba sikhe siyithandazele intsikelelo kubulungiseleli? Ngoko masenze ngokuvisisana naloo mithandazo ngokuba nenxaxheba ebonakalayo kumsebenzi wokushumayela ngoBukumkani. Ukuba sithandazela ukufumana amathuba okunceda abanye bangene kumendo okhokelela kubomi obungunaphakade, kufuneka siyigcine kakuhle ingxelo yabo banomdla size sikulungele ukukufaka kucwangciso lwethu ukuqhuba izifundo zeBhayibhile zamakhaya. Kuthekani ukuba sinqwenela ukuqalisa umsebenzi wokushumayela ixesha elizeleyo njengoovulindlela? Ngoko masithabathe amanyathelo angqinelana nemithandazo yethu ngokwandisa umsebenzi wethu wokushumayela nangokuba nesabelo kubulungiseleli kunye noovulindlela. Ukuthabatha amanyathelo anjalo kuya kubonisa ukuba senza ngokuvisisana nemithandazo yethu.
20. Yintoni eza kuxutyushwa kwinqaku elilandelayo?
20 Ukuba uYehova simkhonza ngokuthembeka, sinokuqiniseka ukuba uya kuyiphendula imithandazo yethu evisisana nokuthanda kwakhe. (1 Yohane 5:14, 15) Ngokuqinisekileyo, siye sazuza iingongoma eziyingenelo ngokuhlolisisa eminye yemithandazo ebhalwe eBhayibhileni. Inqaku lethu elilandelayo liza kuxubusha olunye ulwalathiso lweZibhalo lwabo banqwenela ukuba ‘imithandazo yabo ihlale isisiqhumiso phambi kukaYehova.’
Ubunokuphendula Uthini?
◻ Kutheni sifanele sithandaze sinokholo?
◻ Iindumiso nemibulelo zifanele zibe nayiphi indima kwimithandazo yethu?
◻ Kutheni sinokulucela ngentembelo uncedo lukaYehova ngomthandazo?
◻ Ziziphi ezinye zeengongoma eziziintloko zomthandazo ongumzekelo?
◻ Izenzo zethu zinokuvisisana njani nemithandazo yethu?
[Caption on page 12]
NjengoKumkani uYehoshafati, maxa wambi kusenokufuneka sithandaze sithi: ‘Asazi ukuba sothini na, kodwa amehlo ethu akuwe Yehova’
[Caption on page 13]
Ngaba uthandaza ngokuvisisana nomthandazo ongumzekelo kaYesu?