Indlela Yothando Ayize Isilele
“Hlalani nifuna ngenzondelelo iziphiwo ezikhulu ngakumbi. Ukanti ndinibonisa indlela encamisileyo.”—1 KORINTE 12:31.
1-3. (a) Ukufunda ukubonakalisa uthando kufana njani nokufunda ulwimi olutsha? (b) Ziziphi izinto ezinokubangela ukuba ukufunda ukubonakalisa uthando kube lucelomngeni?
NGABA ukhe wazama ukufunda ulwimi ongalwaziyo? Ngamafutshane nje singathi akuyondlwan’ iyanetha! Kakade ke, umntwana unako ukulufunda ulwimi ngokuba phakathi kwabantu abaluthethayo nje kuphela. Ingqondo yakhe iyazibamba izandi neentsingiselo zamagama, kangangokuba kuthi kungekabi phi umve unkabi sele elukhupha nangeempumlo olo lwimi, mhlawumbi ke ade antyuntye into engenasiphelo. Nkqi kubantu abakhulu. Thina sibetha sibuyelela kwisichazi-magama solo lwimi lwasemzini, kuba nje sifuna ukuqhelana namabinzana alo ambalwa asisiseko. Noko ke, njengoko ixesha lihamba yaye sihleli nabantu abaluthethayo, iingqondo zethu ziqalisa ukucinga ngendlela yolo lwimi lutsha ibe kuba lula noko ukuluthetha.
2 Ukufunda ukubonakalisa uthando kufana twatse nokufunda ulwimi olutsha. Kuyinyaniso kona ukuba umlinganiselo othile wolu phawu lukaThixo ukho ngokwemvelo ebantwini. (Genesis 1:27; thelekisa eyoku-1 kaYohane 4:8.) Kodwa ke, ukufunda ukubonakalisa uthando kufuna umgudu ongaphaya koqhelekileyo—ngokukodwa namhlanje, apho umsa wemvelo unqabe okwezinyo lenkuku. (2 Timoti 3:1-5) Maxa wambi oku kwenzeka kanye phakathi kwentsapho. Ewe, uninzi lwabantu lukhula phantsi kweemeko ezinzima nekungumnqa ukuva amazwi othando—ukuba phofu akhe abekho. (Efese 4:29-31; 6:4) Ngoko ke, sinokufunda njani ukubonakalisa uthando—kwanokuba ibinqabile into yokuba lubonakaliswe kuthi?
3 IBhayibhile inalo icebo. Kweyoku-1 kwabaseKorinte 13:4-8, uPawulos akenzi nje amavandlakanya oko uthando lukuko, kodwa uyichaza ngokucacileyo indlela olu hlobo lubalaseleyo lothando olusebenza ngayo. Ukuba nje sinokuziqwalasela ezi ndinyana siya kutsho siqonde ukuba luyintoni kanye olu phawu lukaThixo size sifumane indlela ebhetele yokulubonakalisa. Makhe singene nzulu kwezinye zeenkalo zothando oluchazwe nguPawulos. Ubukhulu becala siza kuzahlukanisa zibe ziindidi ezintathu: ihambo yethu ngokubanzi; kulandele ezigxininisa kulwalamano lwethu nabanye; size sigqibelise ngokunyamezela kwethu.
Uthando Lusinceda Soyise Ikratshi
4. Yiyiphi ingqiqo enikelwa yiBhayibhile ngekhwele?
4 Emva kwamagqabantshintshi awawenza ngothando, uPawulos wabhalela abaseKorinte esithi: “Uthando alunakhwele.” (1 Korinte 13:4) Ikhwele linokuphutshuluka ngokuba nomona xa abanye besenza inkqubela okanye befumana okuthile. Ikhwele elinjalo liyatshabalalisa—emzimbeni, kwiimvakalelo nangokomoya.—IMizekeliso 14:30; Roma 13:13; Yakobi 3:14-16.
5. Uthando lunokusinceda njani soyise umona xa sibona ngathi sivinjwa ilungelo elithile elingokobuthixo?
5 Ngenxa yoku, khawuzibuze, ‘Ngaba ndiba nomona xa ndibona ngathi ndivinjwa ilungelo elithile elingokobuthixo?’ Ukuba impendulo ithi ewe, musa ukuphelelwa lithemba. Umbhali weBhayibhile uYakobi uyasikhumbuza ukuba bonke abantu abangafezekanga ‘batyekela ekumoneleni.’ (Yakobi 4:5) Ukumthanda umzalwana wakho kunokukunceda ulungelelane kwakhona. Kunokukwenza uvuye nabavuyayo uze ungacingi ukuba uyahlaselwa xa omnye efumana intsikelelo okanye ewongwa.—Thelekisa eyoku-1 kaSamuweli 18:7-9.
6. Yiyiphi ingxaki eyabakho kwibandla laseKorinte lenkulungwane yokuqala?
6 UPawulos wongezelela ngelithi uthando “alugwagwisi, alukhukhumali.” (1 Korinte 13:4) Ukuba sinesiphiwo okanye ubuchule obuthile, akuyomfuneko ukuba sibe sesidlisela ngabo. Kuyabonakala ukuba le yingxaki awayenayo amadoda athile awayenamabhongo awayenyebelezele kwibandla laseKorinte lamandulo. Kusenokwenzeka ukuba ayenobuchule obungayiwayo ekudluliseleni iingcamango okanye ke enesandla esihle ekwenzeni izinto. Kusenokwenzeka ukuba yayikukutsalela kwawo ingqalelo kwiziqu zawo okwakulahlula phakathi ibandla. (1 Korinte 3:3, 4; 2 Korinte 12:20) Le meko yaba mbi kangangokuba kamva uPawulos kwafuneka ebakhalimele kabukhali abaseKorinte ngenxa ‘yokubanyamezela abantu abangenangqiqo,’ uPawulos awabaphoxa ngelithi ‘ngabapostile abaziincamisa.’—2 Korinte 11:5, 19, 20.
7, 8. Ngokusuka eBhayibhileni bonisa indlela esinokuzisebenzisa ngayo iziphiwo esinazo ngokwemvelo ukuze sikhuthaze umanyano.
7 Kusenokuba njalo ke nanamhlanje. Ngokomzekelo, bambi basenokutyekela ekuzigwagwiseni ngoko bakuphumezayo kubulungiseleli okanye ngamalungelo abanawo kwintlangano kaThixo. Kwanokuba sinobuchule obuthile abangenabo abanye ebandleni, ngaba loo nto ithetha ukuba masithwal’ amaphiko? Kaloku, iziphiwo zemvelo esinazo sifanele sizisebenzisele ukukhuthaza umanyano—kungekhona ukuziphakamisa.—Mateyu 23:12; 1 Petros 5:6.
8 UPawulos wabhala esithi nangona ibandla linamalungu amaninzi, “uThixo wawumanya umzimba.” (1 Korinte 12:19-26) Igama lesiGrike eliguqulelwe ngokuthi ‘ukumanya’ lithetha ukudibanisa izinto zifanelane, njengaxa udibanisa imibala. Ngoko akakho umntu ebandleni ofanele azive emkhulu ngenxa yobuchule bakhe aze azame ukugagamela abanye. Ikratshi namabhongo azinayo nencinane le indawo entlanganweni kaThixo.—IMizekeliso 16:19; 1 Korinte 14:12; 1 Petros 5:2, 3.
9. Yiyiphi imizekelo esisilumkiso enikelwa yiBhayibhile ngabo babexhalabele izilangazelelo zabo?
9 Uthando “alufuni ezalo izilangazelelo.” (1 Korinte 13:5) Umntu onothando akaxhaphazi abanye ukuze aphumeze iinjongo zakhe. IBhayibhile inemizekelo esilumkisayo ngokuphathelele lo mba. Eminye yayo yile: Sifunda ngoDelila, uIzebhele noAtaliya—abafazi abasebenzisa abanye ukuze baphumeze usukelo lwabo lokuzingca. (ABagwebi 16:16; 1 Kumkani 21:25; 2 Kronike 22:10-12) Omnye yayinguAbhisalom unyana kaKumkani uDavide. Wayedla ngokuchwechwela abo baya eYerusalem beye kuxoxa amatyala aze ngobuqili abathofiyele esithi ibhotwe likakumkani alibakhathalele kunye nezo ngxaki zabo. Andule ke alikhuphe litsole elokuba ekuphela kwento efunekayo nje phaya ebhotwe yindoda enothando njengaye! (2 Samuweli 15:2-4) Kakade ke, uAbhisalom lo wayengenaxesha labantu abacinezelekileyo, kodwa wayecinga ngesiqu sakhe. Ezenza ukumkani, wazithimba iintliziyo zabaninzi. Kodwa ke ethubeni, uAbhisalom wabethwa washiywa elutywantsi. Namhla wathi wafa, wagqalwa njengento engafanelwe nakukungcwatywa kakuhle.—2 Samuweli 18:6-17.
10. Sinokubonisa njani ukuba siyazicingela izilangazelelo zabanye?
10 Sisilumkiso ke esi nakumaKristu namhlanje. Enoba uyindoda okanye ulibhinqa, kusenokwenzeka ukuba unesiphiwo esingokwemvelo sokukwazi ukweyisela umntu entweni. Ngokungathi kunjalo, kusenokuba kulula ukuba izinto zihambe ngendlela esithanda ngayo njengokuyithabathela kuthi incoko okanye ngokubadimaza abo baneembono ezahlukileyo kwezethu. Noko ke, ukuba sinothando siya kuzicingela nezilangazelelo zabanye. (Filipi 2:2-4) Asiyi kubagagamela abanye okanye sikhuthaze iingcamango ezithandabuzekayo kuba nje sinamava okanye sinesikhundla esithile kwintlangano kaThixo, ngokungathi ziimbono zethu kuphela ezimelwe ziqwalaselwe. Kunoko, siya kukhumbula umzekeliso weBhayibhile othi: “Ikratshi likhokela intshabalalo; ukuzidla kukhokela ukukhubeka.”—IMizekeliso 16:18.
Uthando Ludala Ulwalamano Olunoxolo
11. (a) Ziziphi iindlela esinokulubonakalisa ngazo uthando olunobubele nolundilisekileyo? (b) Sinokubonisa njani ukuba asiyivuyeli intswela-bulungisa?
11 Kwakhona uPawulos wabhala esithi uthando “lunobubele” yaye “aluziphathi ngokungandilisekanga.” (1 Korinte 13:4, 5) Ewe, uthando aluyi kusivumela ukuba sibe krwada okanye singabi nantlonelo. Kunoko, siya kuzicingela iimvakalelo zabanye. Ngokomzekelo, umntu onothando uya kukuphepha ukwenza izinto ezinokuphazamisana nezazela zabanye. (Thelekisa eyoku-1 kwabaseKorinte 8:13.) Uthando “alubi nemihlali ngentswela-bulungisa, kodwa luvuyisana nenyaniso.” (1 Korinte 13:6) Ukuba siyawuthanda umthetho kaYehova, asiyi kukuqwabazel’ iliso ukuziphatha okubi okanye sizonwabise ngezinto azithiyileyo uThixo. (INdumiso 119:97) Uthando luya kusinceda sivuyele izinto ezakhayo kunezingakhiyo.—Roma 15:2; 1 Korinte 10:23, 24; 14:26.
12, 13. (a) Sifanele sisabele njani xa omnye umntu esicaphukisa? (b) Khawuthi gqaba-gqaba ngemizekelo yeBhayibhile ebonisa ukuba kwanaxa umntu efanele ukuba nomsindo unokuphela sele esenza into engebobulumko.
12 UPawulos ubhala esithi uthando “alucaphuki” (“alunachuku,” Phillips). (1 Korinte 13:5) Kuyavunywa ukuba njengabantu abangafezekanga kuyinto eqhelekileyo ukuxakaniseka okanye ukuba nomsindo xa kukho umntu osicaphukisayo. Noko ke, bekuya kuba yinto ephosakeleyo ukufukama ingqumbo kangangexesha elide okanye ukuhlala ucaphukile. (INdumiso 4:4; Efese 4:26) Kwanomsindo obufanele ke phofu ukubakho unokusenzisa izinto ezingebobulumko ukuba asiwulawuli, ibe uYehova unokusiphendulisa ngaloo nto.—Genesis 34:1-31; 49:5-7; Numeri 12:3; 20:10-12; INdumiso 106:32, 33.
13 Bambi baye bavumela ukungafezeki kwabanye kwaphazamisana nesigqibo sabo sokuya kwiintlanganiso zamaKristu okanye sokuba nesabelo kubulungiseleli basentsimini. Ngaphambili, abaninzi kwaba baye balwa umlo onzima wokholo, mhlawumbi bethwele isikade sokuchaswa yintsapho, ukugculelwa ngabo basebenza nabo, nabanye. Baye bayinyamezela loo miqobo baza bayijonga njengevavanya ingqibelelo yabo, ibe bachan’ ucwethe xa besitsho. Kodwa ke kusuke kuthini xa ingomnye umKristu othetha okanye owenza into ebonisa ukungabi naluthando? Ngaba leyo into ayiyivavanyi ingqibelelo kabani? Iyayivavanya, kuba kaloku ukuba sihlala sicaphukile, ‘sinokumvulela indawo uMtyholi.’—Efese 4:27.
14, 15. (a) Kuthetha ntoni ‘ukugcina ingxelo yobubi’? (b) Sinokumxelisa njani uYehova ngokuxolela?
14 Ngesizathu esiqondakalayo, uPawulos wongezelela esithi uthando “alugcini ingxelo yobubi.” (1 Korinte 13:5) Apha usebenzisa igama eliqheleke kucwangciso-mali, ekubonakala ukuba wayebonisa ukuyibhala kwincwadi yamatyala loo nto ikucaphukisileyo ukuze ungayilibali. Ngaba kukubonakalisa uthando ukuwagcina engqondweni amagama okanye isenzo esikuvise ubuhlungu, ngokungathi ngeny’ imini kuza kufuneka sibhekisele kuso? Hayi indlela esinokuvuya ngayo ngenxa yokuba uYehova engasiphathi ngokungenanceba ngolo hlobo! (INdumiso 130:3) Ewe, xa siguquka, uyazicima iimpazamo zethu.—IZenzo 3:19.
15 Sinako ukumxelisa uYehova kulo mba. Masingabi nochuku xa sibona ngathi omnye umntu uyasidela. Xa sicaphuka msinya, kusenokwenzeka ukuba sizivisa ubuhlungu ngaphezu kokuba loo mntu usicaphukisayo ebeya kwenza. (INtshumayeli 7:9, 22) Kunoko, kufuneka sikhumbule ukuba uthando “lukholelwa izinto zonke.” (1 Korinte 13:7) Kakade ke, akakho kuthi ofuna ukuba nguvuma-zonke, kodwa ke asifanelanga kananjalo sizikrokrele nalapho kungeyomfuneko iintshukumisa zabazalwana bethu. Nanini na xa kunokwenzeka, masithembane.—Kolose 3:13.
Uthando Luyasinceda Sinyamezele
16. Kukwiziphi iimeko olunokuthi uthando lusincede sizeke kade umsindo?
16 UPawulos uyandula ke asixelele ukuba uthando “luzeka kade umsindo.” (1 Korinte 13:4) Lusenza sikwazi ukunyamezela izilingo, mhlawumbi kangangethuba elide. Ngokomzekelo, uninzi lwamaKristu sele lunexesha elide luphila kwiintsapho ezahluleleneyo ngonqulo. Amanye akatshatanga, kungengakuba akafuni, kodwa kuba engalifumani iqabane elifanelekayo ‘neliseNkosini.’ (1 Korinte 7:39; 2 Korinte 6:14) Kuphinde kubekho abo banyamezele umvambo weengxaki zempilo eziqobayo. (Galati 4:13, 14; Filipi 2:25-30) Enyanisweni, kule nkqubo ingagqibelelanga, akakho umntu ongenayo nje kwaphela into efuna unyamezelo ebomini bakhe.—Mateyu 10:22; Yakobi 1:12.
17. Yintoni eya kusinceda sinyamezele zonke izinto?
17 UPawulos uyasiqinisekisa ukuba uthando “luthwala izinto zonke, . . . luthemba izinto zonke, lunyamezela izinto zonke.” (1 Korinte 13:7) Ukumthanda kwethu uYehova kuya kusenza sinyamezele nayiphi na ingxaki esingena kuyo ngenxa yobulungisa. (Mateyu 16:24; 1 Korinte 10:13) Asizingelani neendlela zokufela ukholo. Kunoko sifuna ukuziphilela ubomi obunoxolo nobuzolileyo. (Roma 12:18; 1 Tesalonika 4:11, 12) Noko ke, xa kuvela iimvavanyo zokholo, siyakuvuyela ukuzinyamezela sizigqala njengexabiso elifunekayo ukuze ubani abe ngumfundi ongumKristu. (Luka 14:28-33) Njengoko sinyamezela, siyazama ukuba sihlale sinesimo sengqondo esakhayo, sinethemba lokuba emva kwezo zilingo noko izinto zolunga.
18. Ukunyamezela kubaluleke njani kwanaxa izinto zihamba kakuhle?
18 Asiyombandezelo yodwa efuna ukuba ubani anyamezele. Maxa wambi, ukunyamezela kuthetha ukuqhubeka, ukuhlala uhamba kumendo omiselweyo enoba zikho okanye azikho izilingo. Ukunyamezela kubandakanya ukugcina imikhwa emihle yokomoya. Ngokomzekelo, ngaba uba nesabelo esibonakalayo kubulungiseleli, ngokuvisisana neemeko zakho? Ngaba uyafunda uze ucamngce ngeLizwi likaThixo yaye uthethe noYihlo osemazulwini ngomthandazo? Ngaba uya rhoqo kwiintlanganiso zebandla, yaye ngaba uyangenelwa lukhuthazo oluvela kwabanye okholwa nabo? Ukuba kunjalo, enoba izinto zikuhambela kakuhle okanye azikuhambeli kakuhle ngoku, uyanyamezela. Ungatyhafi, “kuba ngexesha elililo siya kuvuna ukuba asidinwa.”—Galati 6:9.
Uthando—“Indlela Encamisileyo”
19. Uthando ‘luyindlela encamisileyo’ njani?
19 UPawulos waqwela ukubonisa ukubaluleka kokubonakalisa uthando ngokubiza olu phawu lukaThixo ngokuthi ‘yindlela encamisileyo.’ (1 Korinte 12:31) ‘Luncamise’ ngayiphi indlela? Kaloku, uPawulos wayesandul’ ukubala iziphiwo zomoya, ezazibonakala kumaKristu enkulungwane yokuqala. Amanye ayekwazi ukuprofeta, amanye enikwe amandla okuphilisa izigulo, uninzi lwawo lukwazi ukuthetha ngeelwimi. Ngokwenene ezo yayiziziphiwo ezimangalisayo! Ukanti, uPawulos wabaxelela oku abaseKorinte: “Ukuba ndithetha ngeelwimi zabantu nezeengelosi kodwa uthando ndingenalo, ndiye ndaba yixina ehlokomayo okanye icangci elikhenkcezayo. Yaye ukuba ndinesiphiwo sokuprofeta ibe ndisazana nazo zonke iimfihlelo ezingcwele nalo lonke ulwazi, kwaye ukuba ndinalo lonke ukholo khon’ ukuze ndifuduse iintaba, kodwa uthando ndingenalo, ndiyinto engento.” (1 Korinte 13:1, 2) Ewe, kwanezenzo ebezinokuba yingenelo ziba ‘yimisebenzi efileyo’ xa intshukumisa yazo ingelothando ngoThixo nangommelwane.—Hebhere 6:1.
20. Kutheni kufuneka umgudu oqhubekayo ukuze sihlakulele uthando?
20 UYesu usinika esinye isizathu sokuba sihlakulele uphawu lukaThixo lothando. Wathi: “Ngako oku bonke baya kwazi ukuba ningabafundi bam, ukuba ninothando phakathi kwenu.” (Yohane 13:35) Igama elithi “ukuba” lishiyela kumKristu ngamnye ukuba uza kufunda kusini na ukubonakalisa uthando. Ngapha koko, ukuhlala nje kwilizwe lasemzini bekungayi kusinyanzela ukuba sithethe ulwimi lwalapho. Kananjalo nokubakho nje ezintlanganisweni kwiHolo yoBukumkani okanye ukunxulumana namanye amaKristu akusifundisi ngokuzenzekelayo ukubonakalisa uthando. Kufuneka senze umgudu oqhubekayo ukuba sifuna ukufunda olu “lwimi.”
21, 22. (a) Sifanele sisabele njani xa singayifikeleli inkalo ethile exutyushwe nguPawulos ngothando? (b) Kunokutshiwo njani ukuba “uthando aluze lusilele”?
21 Maxa wambi, akuyi kuyifikelela inkalo ethile exutyushwe nguPawulos ngothando. Kodwa mus’ ukutyhafa. Zibhokoxe ngomonde. Qhubeka ufunda iBhayibhile yaye usebenzisa imigaqo yayo xa uqhubana nabanye. Ungaze uwulibale umzekelo esiwumiselwa nguYehova. UPawulos wabongoza abase-Efese esithi: “Yibani nobubele omnye komnye, ninemfesane yofefe, nixolelana ngesisa kanye njengokuba noThixo wanixolelayo ngesisa ngaye uKristu.”—Efese 4:32.
22 Kanye njengokuba ukuthetha ulwimi olutsha ekugqibeleni kusiba lula noko, ethubeni uya kukufumanisa kulula noko ukubonakalisa uthando. UPawulos uyasiqinisekisa ukuba “uthando aluze lusilele.” (1 Korinte 13:8) Ngokungafaniyo neziphiwo zomoya, uthando alunakuze luphele. Ngoko qhubeka ufunda ukulubonakalisa olu phawu lukaThixo. ‘Luyindlela encamisileyo’ kanye njengokuba uPawulos esitsho.
Ngaba Ungachaza?
◻ Uthando lunokusinceda njani soyise ikratshi?
◻ Uthando lunokusinceda ngaziphi iindlela sikhuthaze uxolo ebandleni?
◻ Uthando lunokusinceda njani sinyamezele?
◻ Uthando ‘luyindlela encamisileyo’ njani?
[Caption on page 19]
Uthando luya kusinceda sizityeshele iimpazamo zamanye amakholwa
[Caption on page 23]
Ukunyamezela kuthetha ukuhlala sihamba kumendo wethu wobuthixo