“Itempile” Kunye ‘Nesikhulu’ Namhlanje
“Isikhulu songena siphakathi kwabo ekungeneni kwabo; bathi ekuphumeni kwabo, siphume kunye nabo.”—HEZEKILE 46:10.
1, 2. Yiyiphi inyaniso esinceda siqonde intsingiselo yombono kaHezekile wetempile?
ABANYE boorabhi bamandulo abazange bayiginye ncam incwadi kaHezekile. Ngokutsho kweTalmud, abanye bada bacinga nangokuyikhupha le ncwadi kuludwe lweencwadi zeZibhalo Ezingcwele. Babexakwe kukuchaza umbono wetempile yaye besithi ungaphaya kwengqondo yomntu. Phofu ke nabanye abaphengululi beBhayibhile baye badideka ngumbono kaHezekile wetempile kaYehova. Kuthekani ngathi?
2 Ukususela oko wabuyisela unqulo olunyulu, uYehova uye wasikelela abantu bakhe ngokukhanya kwengqiqo yokomoya, kuquka nokuqonda oko itempile yokomoya kaThixo ikuko—ilungiselelo likaYehova lonqulo olunyulu elifana netempile.a Le nyaniso iyasinceda ukuze sifumane intsingiselo yombono kaHezekile wetempile. Masikhe siqwalasele iinkalo ezine zalo mbono—itempile, ababingeleli, isikhulu kunye nelizwe. Zifuzisela ntoni ezi zinto namhlanje?
Itempile Kunye Nawe
3. Isifundisa ntoni isilingi ephakamileyo nemifanekiso ekroliweyo eseludongeni kwipaseji engena etempileni?
3 Masizibone sikhenketha kule tempile isembonweni. Siyasondela size sinyuke kwizinyuko ezisixhenxe siye kungena kwelinye lamasango amakhulu. Njengoko singena epasejini, siphakamisa amehlo ethu simangalisiwe. Isilingi yayo iziimitha ezingaphezu kwama-30 ukuphakama! Ngenxa yoko kutsho kuthi qatha into yokuba imilinganiselo yokungena kwilungiselelo likaYehova lonqulo iphakamile. Kuthe qhakra imitha yokukhanya engena ezifestileni ize ikhanyise imifanekiso ekroliweyo eyenziwe ngomthi wesundu, osetyenziswa kwiZibhalo ukubonisa ingqibelelo. (INdumiso 92:12; Hezekile 40:14, 16, 22) Le ndawo ingcwele yenzelwe abo bagqibeleleyo ngokokuziphatha nangokomoya. Ngokuvisisana noko, nathi sifuna ukuhlala sigqibelele ukuze unqulo lwethu lwamkeleke kuYehova.—INdumiso 11:7.
4. Ngoobani abangavunyelwayo ukuba bangene etempileni, yaye oko kusifundisa ntoni?
4 Kumacala omabini ale paseji, kukho amagumbi abalindi amathathu. Ngaba aba balindi baza kusivumela bethu ukuba singene etempileni? UYehova uxelela uHezekile ukuba “abangalukileyo ngentliziyo” abanakungena apho. (Hezekile 40:10; 44:9) Kuthetha ukuthini oku? UThixo wamkela kuphela abanquli abayithandayo imithetho yakhe nabaphila ngayo. (Yeremiya 4:4; Roma 2:29) Abanjalo uyabamkela kwintente yakhe yokomoya, indlu yakhe yonqulo. (INdumiso 15:1-5) Ukususela oko unqulo olunyulu lwabuyiselwa ngowe-1919, intlangano kaYehova yasemhlabeni iye yaphakamisa yaza ngokuqhubekayo yayicacisa imigaqo yakhe ephathelele ukuziphatha. Abo bangathobeliyo ngabom abamkelekanga phakathi kwabantu bakhe. Namhlanje, uqheliselo olusekelwe eBhayibhileni lokubasusa kubudlelane abenzi bobubi abangaguqukiyo luye lwalugcina lucocekile yaye lunyulu unqulo lwethu.—1 Korinte 5:13.
5. (a) Ziziphi izinto ofana ngazo umbono kaHezekile nombono kaYohane okwiSityhilelo 7:9-15? (b) Kumbono kaHezekile, ngoobani abafuziselwa zizizwe ezili-12 ezinqula kwintendelezo engaphandle?
5 Le paseji iphumela kwintendelezo engaphandle, apho abantu banqula baze badumise uYehova. Itsho isikhumbuze ngombono kampostile uYohane ‘wesihlwele esikhulu’ esinqula uYehova “imini nobusuku etempileni yakhe.” Kuyo yomibini le mibono kukho amasundu. Kumbono kaHezekile ahombise iindonga zepaseji. Kumbono kaYohane aphethwe ngabanquli, kwaye afuzisela uvuyo abanalo ngokudumisa uYehova nangokwamkela uYesu njengoKumkani wabo. (ISityhilelo 7:9-15) Kumbono kaHezekile, izizwe ezili-12 zakwaSirayeli zifuzisela “ezinye izimvu.” (Yohane 10:16; thelekisa uLuka 22:28-30.) Ngaba nawe ungomnye wabo bavuyiswa kukudumisa uYehova nokuvakalisa uBukumkani bakhe?
6. Ayakhelwe ntoni amagumbi okudlela akwintendelezo engaphandle, yaye oku kusenokuzikhumbuza ngaliphi ilungelo ezinye izimvu?
6 Njengoko sithe chu sibuka le ntendelezo ingaphandle, sibona amagumbi okutyela angama-30 apho abantu babesisa khona iminikelo yabo yokuzithandela. (Hezekile 40:17) Namhlanje, abezinye izimvu abanyusi madini, kodwa abezi bephaca nje kwitempile yokomoya. (Thelekisa iEksodus 23:15.) Umpostile uPawulos wabhala: “Ngaye [uYesu] masisoloko sinikela kuThixo umbingelelo wendumiso, oko kukuthi, isiqhamo semilebe eyenza uvakaliso lwasesidlangalaleni kwigama lakhe. Ngaphezu koko, musani ukulibala ukwenza okulungileyo nokwabelana ngezinto nabanye, kuba uThixo ukholiswa kakuhle yimibingelelo enjalo.” (Hebhere 13:15, 16; Hoseya 14:2) Kulilungelo elikhulu ukunikela loo mibingelelo kuYehova.—IMizekeliso 3:9, 27.
7. Ukulinganiswa kwetempile kusiqinisekisa ngantoni?
7 UHezekile wakh’ umkhanya njengoko ingelosi ilinganisa itempile esembonweni. (Hezekile 40:3) Nompostile uYohane waxelelwa into efanayo, kwathiwa: “Sukuma uze ulinganise ingcwele yetempile kaThixo nesibingelelo nabo banqulayo kuyo.” (ISityhilelo 11:1) Kuthetha ntoni oku kulinganisa? Kuyabonakala ukuba kuyo yomibini le mibono ukulinganisa kwakusisiqinisekiso, umqondiso obonisa ukuba ayikho into enokuthintela uYehova ekuzalisekiseni iinjongo zakhe ngokuphathelele unqulo olunyulu. Nanamhlanje kusenjalo, sinokuqiniseka ukuba akukho nto—kwanenkcaso ekrakra evela koorhulumente abanamandla—enokuthintela ukubuyiselwa konqulo olunyulu.
8. Ngoobani abangena kumasango entendelezo engaphakathi, yaye la masango asikhumbuza ntoni?
8 Njengoko singcemba kuhle sinqumla intendelezo engaphandle, sibona amasango amathathu angena kwintendelezo engaphakathi; la masango angena ngaphakathi angqamene yaye alingana namasango aphumela ngaphandle. (Hezekile 40:6, 20, 23, 24, 27) Ngababingeleli kuphela abanokungena kwintendelezo engaphakathi. Amasango angena ngaphakathi asikhumbuza ukuba abathanjiswa bamele bayifikelele imilinganiselo nemithetho kaThixo, kodwa ikwayimilinganiselo nemithetho efanayo emele ilandelwe ngawo onke amaKristu. Kodwa ke uyintoni umsebenzi wababingeleli, ibe unayiphi intsingiselo namhlanje?
Ababingeleli Abathembekileyo
9, 10. “Ububingeleli basebukhosini,” obufuziselwa ludidi lwababingeleli abakumbono kaHezekile, buye bayinikela njani imiyalelo yokomoya?
9 Kumaxesha angaphambi kobuKristu, ababingeleli babesebenza nzima etempileni. Ukuxhela izilwanyana, ukuzinyusa njengamadini esibingelelweni, nokukhonza abanye ababingeleli kunye nabantu kwakungumsebenzi onzima. Kodwa ke wawusekho omnye umsebenzi obalulekileyo ababemele bawenze. UYehova wayalela oku ngokuphathelele ababingeleli: “Bobayala abantu bam, ukuba bahlule okungcwele kokuhlambeleyo, babazise okuyinqambi nokuhlambulukileyo.”—Hezekile 44:23; Malaki 2:7.
10 Ngaba uyakuxabisa ukuzibhokoxa nokukhonza ngokuthobeka kwabathanjiswa xa bebonke, “ububingeleli basebukhosini,” ngenxa yonqulo olunyulu? (1 Petros 2:9) Njengababingeleli bamandulo abangabaLevi, baye bakhokela ekunikeleni imiyalelo yokomoya, benceda abantu ukuba baqonde oko kuhlambulukileyo nokwamkelekileyo emehlweni kaThixo noko kungenjalo. (Mateyu 24:45) Loo miyalelo, eza ngeempapasho ezisekelwe eBhayibhileni nangeentlanganiso neendibano zamaKristu, iye yanceda izigidi zabantu ukuba zixolelaniswe noThixo.—2 Korinte 5:20.
11. (a) Umbono kaHezekile wakubethelela njani ukubaluleka kokuhlambuluka kwababingeleli? (b) Ngemihla yokugqibela, abathanjiswa baye bahlanjululwa njani ngokomoya?
11 Noko ke, ababingeleli abamele bafundise abanye ukuba bahlambuluke nje kuphela; nabo bamele bahlambuluke. Ngaloo ndlela, uHezekile wakubona kusengaphambili ukusulungekiswa kwababingeleli bakwaSirayeli. (Hezekile 44:10-16) Ngendlela efanayo, imbali ibonisa ukuba ngowe-1918, uYehova wahlala “njengomsulungekisi” kwitempile yakhe yokomoya, ehlola udidi lwababingeleli abathanjisiweyo. (Malaki 3:1-5, NW) Abo bagqalwa njengabacocekileyo ngokomoya okanye abaguquka kunqulo-zithixo ababelwenza ngaphambili bavunyelwa baqhubeka benelungelo lokukhonza kwitempile yakhe yokomoya. Noko ke, njengaye nabani na, kusenokwenzeka nangamalungu abathanjiswa ukuba angahlambuluki—ngokomoya nangokokuziphatha. (Hezekile 44:22, 25-27) Kuye kwafuneka azibhokoxe ukuze ahlale ‘engenabala kulo ihlabathi.’—Yakobi 1:27; thelekisa uMarko 7:20-23.
12. Kutheni sifanele sikuxabise ukusebenza nabathanjiswa?
12 Ngamnye wethu usenokuzibuza, ‘Ngaba ndiyawuxabisa umzekelo omiselwe ngabathanjiswa ukutyhubela iminyaka emininzi yokukhonza ngentembeko? Ngaba ndiyaluxelisa ukholo lwabo?’ Isihlwele esikhulu simele sikhumbule ukuba asiyi kusoloko sikunye nabathanjiswa apha emhlabeni. Ethetha ngababingeleli abakumbono kaHezekile, uYehova wathi: “Ningabaniki nzuzo [yomhlaba] kwaSirayeli; ndim inzuzo yabo.” (Hezekile 44:28) Kunjalo ke nakubathanjiswa, abayi kusoloko belapha emhlabeni. Ilifa labo lisezulwini, kwaye abesihlwele esikhulu bakugqala kulilungelo ukubaxhasa nokubakhuthaza ngoxa besesemhlabeni.—Mateyu 25:34-40; 1 Petros 1:3, 4.
Isikhulu—Singubani?
13, 14. (a) Kutheni isikhulu simele ukuba yinxalenye yezinye izimvu? (b) Sifanekisela bani isikhulu?
13 Ngoku kuphakama umbuzo obangel’ umdla. Ngubani ofuziselwa sisikhulu? Ekubeni kubhekiswa kumntu omnye kuphinde kubhekiswe kwiqela labantu xa kuthethwa ngaso, sisenokucinga ukuba simela udidi lwabantu. (Hezekile 44:3; 45:8, 9) Ngoobani ke? Ngokuqinisekileyo asingobathanjiswa abo. Kulo mbono, sisebenza kunye nababingeleli, kodwa sona asingombingeleli. Ngokungafaniyo nodidi lwababingeleli, sona siyalifumana ilifa lelizwe yaye ngaloo ndlela ikamva laso lisemhlabeni, kungekhona ezulwini. (Hezekile 48:21) Ukongezelela, uHezekile 46:10 uthi: “Isikhulu songena siphakathi kwabo ekungeneni [kwintendelezo engaphandle yetempile] kwabo [bezizwe ezingengobabingeleli]; bathi ekuphumeni kwabo, siphume kunye nabo.” Asingeni kwintendelezo engaphakathi yetempile kodwa sinqula sikwintendelezo engaphandle, siphuma singena etempileni kunye nabantu. Ezi ngongoma zitsho kucace gca ukuba esi sikhulu simele sibe phakathi kwesihlwele esikhulu sezinye izimvu.
14 Kucacile ukuba, isikhulu esi sinembopheleleko esiyiphathisiweyo kubantu bakaThixo. Xa sifika kwintendelezo engaphakathi, siye sihlale kwiveranda ekwiSango eliseMpuma. (Hezekile 44:2, 3) Oku bekuya kubonisa ukuba singumveleli othile, kanye njengamadoda amakhulu akwaSirayeli awayehlala esangweni lesixeko aze achophele amatyala. (Rute 4:1-12; IMizekeliso 22:22) Ngoobani phakathi kwezinye izimvu namhlanje abakwisigxina sokuvelela? Ngabadala abanethemba lokuphila emhlabeni abaye bamiselwa ngomoya oyingcwele. (IZenzo 20:28) Ngoko sithethanje udidi lwesikhulu luyaqeqeshwa ngenjongo yokuba lwalathise imicimbi kwihlabathi elitsha.
15. (a) Umbono kaHezekile usichazela ntoni ngolwalamano oluphakathi kwabadala besihlwele esikhulu nodidi lwababingeleli abathanjisiweyo? (b) Yintoni abaye bakhokela kuyo abadala abathanjisiweyo kwintlangano kaThixo yasemhlabeni?
15 Noko ke, luluphi ulwalamano olukhoyo namhlanje phakathi kodidi lwababingeleli abathanjisiweyo naloo madoda amakhulu athi, njengenxalenye yesihlwele esikhulu, akhonze njengabaveleli? Umbono kaHezekile ubonisa ukuba abadala abangamalungu esihlwele esikhulu bayaxhasa baze basekele, ngoxa abathanjiswa benikela ukhokelo ngokomoya. Njani? Khumbula kaloku ukuba, kulo mbono, imbopheleleko yokuyala abantu ngezinto zokomoya yayinikwe ababingeleli. Ikwangabo ekuthiwe mabagwebe kwimibandela ephathelele umthetho. Ukongezelela koko, abaLevi banikwa isabelo ‘sokuvelela’ kumasango etempile. (Hezekile 44:11, 23, 24) Kucacile ukuba isikhulu esi sasiza kuzithoba kumalungiselelo okomoya nakukhokelo lwababingeleli. Ngoko, abathanjiswa baye ngokufanelekileyo bakhokela kunqulo olunyulu kule mihla siphila kuyo. Ngokomzekelo, amalungu eQumrhu Elilawulayo lamaNgqina kaYehova aye akhethwa phakathi kwabo. Sele kungamashumi eminyaka aba badala bathembekileyo bathanjisiweyo beqeqesha udidi lwesikhulu olusaqingqayo, bexonxa abo baza kuba ngamalungu olu didi ukuze balungele umhla aya kuze alinikwe ngokupheleleyo igunya kwihlabathi likaThixo elitsha elizayo.
16. Ngokutsho kukaIsaya 32:1, 2, yintoni abamele bonke abadala bayenze?
16 Kodwa ke angabaveleli abanjani la malungu ekusele kumbovu ukuba anikwe iimbopheleleko ezingakumbi njengodidi lwesikhulu? Isiprofeto esifunyanwa kuIsaya 32:1, 2 sithi: “Yabona, ukumkani uya kulawula ngokobulungisa, abathetheli bathethele ngokwesiko; umntu abe njengendawo yokuzimela umoya, neyokusithela esiphangweni; abe njengemijelo yamanzi emqwebedwini, njengomthunzi wengxondorha enkulu ezweni elibharhileyo.” Esi siprofeto siyazaliseka namhlanje njengoko abadala abangamaKristu—bengabathanjiswa okanye bengabezinye izimvu—besebenzela ukukhusela umhlambi ‘kwiziphango’ ezinjengentshutshiso nokudimazeka.
17. Abalusi abangamaKristu bafanele bazigqale njani, kwaye umhlambi ufanele ubagqale njani?
17 Igama elithi “umthetheli” nelithi “isikhulu,” anentsingiselo efanayo ngesiHebhere, awasetyenziswa njengezibizo ezenzelwe ukuphakamisa abantu. Kunoko, achaza imbopheleleko anayo la madoda ekunyamekeleni izimvu zikaThixo. UYehova ukhupha isilumkiso esingqongqo esithi: “Yanelani, nina zikhulu zakwaSirayeli; yekani ukugonyamela nokubhuqa, nenze okusesikweni nobulungisa.” (Hezekile 45:9) Bonke abadala banamhlanje baya kuba bayatyapha xa besinikela ingqalelo eso siluleko. (1 Petros 5:2, 3) Nomhlambi ngokwawo uyaqonda ukuba uYesu ulungiselele ukuba kubekho abalusi ‘abazizipho ezikuhlobo lwabantu.’ (Efese 4:8) Iimfaneleko zabo zibhalwe kwiLizwi likaThixo eliphefumlelweyo. (1 Timoti 3:1-7; Tito 1:5-9) Ngoko amaKristu alandela ukhokelo lwabadala.—Hebhere 13:7.
18. Ziziphi ezinye zeembopheleleko abanazo ngoku abo baza kuba ludidi lwesikhulu, kwaye yiyiphi imbopheleleko abaza kuba nayo kwixesha elizayo?
18 Ngamaxesha okubhalwa kweBhayibhile, ezinye izikhulu zaziba negunya elingaphezulu, ngoxa ezinye ziba nelingaphantsi. Namhlanje, abadala besihlwele esikhulu baneembopheleleko ezingalinganiyo. Bambi bakhonza kwibandla elinye; abanye bakhonza amabandla amaninzi njengabaveleli abahambahambayo; abanye bakhonza ilizwe elithile njengamalungu eKomiti Yesebe; baze abanye bancedise ngokungqalileyo kwiikomiti ezahlukeneyo zeQumrhu Elilawulayo. Kwihlabathi elitsha, uYesu uza kumisela “abathetheli ehlabathini lonke” ukuze bakhokele abanquli bakaYehova abasemhlabeni. (INdumiso 45:16) Alithandabuzeki elokuba uza kukhetha uninzi lwabo phakathi kwabadala abathembekileyo banamhlanje. Ngenxa yokuba la madoda ezingqina engamadoda kwanangoku, uza kukhetha ukunika uninzi lwawo amalungelo angakumbi kwixesha elizayo xa etyhila indima yodidi lwesikhulu kwihlabathi elitsha.
Ilizwe Labantu BakaThixo Namhlanje
19. Limela ntoni ilizwe elikumbono kaHezekile?
19 Umbono kaHezekile ukwabonisa ilizwe elibuyiselweyo lakwaSirayeli. Imela ntoni ke le inkalo yombono? Ezinye iziprofeto zokubuyiselwa zaxela kwangaphambili ukuba eli lizwe, elakwaSirayeli, laliza kuba yiparadesi njenge-Eden. (Hezekile 36:34, 35) Namhlanje, ‘sikwilizwe’ elibuyiselweyo, yaye ngandlel’ ithile, nalo lifana ne-Eden. Nathi ngokufanayo, sidla ngokuthetha ngeparadesi yethu yokomoya. IMboniselo iye yachaza “ilizwe” lethu “njengommandla oxakekileyo” wabantu abanyulwe nguThixo.b Naphi na apho umkhonzi kaYehova akhoyo, ukwilizwe elibuyiselweyo logama nje yena ezabalazela ukuphakamisa unqulo lokwenyaniso ngokuhamba kumanyathelo kaKristu uYesu.—1 Petros 2:21.
20. Nguwuphi umgaqo esinokuwufunda ‘kumrhumo ongcwele’ wombono kaHezekile, yaye sinokuwusebenzisa njani loo mgaqo?
20 Kuthekani ngesiqwenga somhlaba obizwa ngokuba ‘ngumrhumo ongcwele’? Esi siqwenga sasingumrhumo wabantu wokuxhasa ababingeleli kunye nesixeko. “Bonke abantu belizwe” babemele banikele ngesiqwenga somhlaba nakwisikhulu. Kuthetha ntoni oku namhlanje? Kakade ke, akuthethi kuthi abantu bakaThixo mabakrwitshwe ngokuhlawuliswa imivuzo yabefundisi. (2 Tesalonika 3:8) Kunoko, ubukhulu becala inkxaso enikelwa kubadala yeyokomoya. Iquka ukufak’ isandla kumsebenzi oqhubekayo ngoku sithethayo nokubonakalisa umoya wentsebenziswano nowokuthobela. Kodwa ke, ngomhla kaHezekile, lo mrhumo wawusenziwa ‘kuYehova,’ kungekhona emntwini.—Hezekile 45:1, 7, 16, akekeliswe sithi.
21. Yintoni esinokuyifunda ngokwahlulwa kwelizwe elikumbono kaHezekile?
21 Ayisosikhulu nababingeleli kuphela abanendawo kweli lizwe libuyiselweyo. Ukwahlulwa kwalo mhlaba kubonisa ukuba isizwe ngasinye kwezili-12 sinelifa eliqinisekileyo. (Hezekile 47:13, 22, 23) Ngoko abesihlwele esikhulu abaneli kuba nendawo nje kuphela kwiparadesi yokomoya yanamhlanje, kodwa bakwafumana isabelo somhlaba xa bezuza indawo njengelifa kummandla wasemhlabeni woBukumkani bukaThixo.
22. (a) Simela ntoni isixeko esikumbono kaHezekile? (b) Yintoni esinokuyifunda kwisibakala sokuba esi sixeko sinamasango kuwo onke amacala?
22 Okokugqibela, simela ntoni isixeko esikulo mbono? Ayisosixeko sasezulwini, kuba simi kwilizwe ‘elingengcwele’ (elihlanjelweyo). (Hezekile 48:15-17) Ngoko simele ukuba siyinto elapha emhlabeni. Phofu ke, yintoni isixeko? Ngaba asiyondawo abathi abantu bahlanganisane kuyo njengeqela elilungelelanisiweyo? Kunjalo kanye. Ngenxa yoko, kuyabonakala ukuba esi sixeko sifuzisela ulawulo lwasemhlabeni oluyingenelo kuye wonk’ ubani oyinxalenye yebutho labantu abangamalungisa abasemhlabeni. Siza kusebenza ngokupheleleyo ‘kumhlaba omtsha’ ozayo. (2 Petros 3:13) Amasango esi sixeko akumacala onke, isizwe ngasinye sinesango laso, nto leyo ekubonisa kakuhle ukwenziwa kwezinto ngokungafihlakalanga. Namhlanje, abantu bakaThixo abakho phantsi kolawulo olufihlakeleyo nolungabonakaliyo. Abazalwana abathwaliswe imbopheleleko bamele bangeneke; imigaqo abaphila ngayo imele yaziwe ngumntu wonke. Isibakala sokuba ingabantu bazo zonke izizwe abasebenza umhlaba oxhasa isixeko sisikhumbuza ukuba ezinye izimvu ziwaxhasa kwanangezinto eziphathekayo amalungiselelo olawulo awenzelwa abantu bakaThixo ehlabathini lonke.—Hezekile 48:19, 30-34.
23. Yintoni esiza kuyixubusha kwinqaku elilandelayo?
23 Noko ke, kuthekani ngomlambo oqukuqela uphuma kwingcwele yetempile? Oko kumelwa ngulo mlambo namhlanje nakwixesha elizayo kuza kuxutyuswa kwinqaku lesithathu nelilelokugqibela kolu ngcelele.
[Imibhalo esemazantsi]
a Bona incwadi ethi ISityhilelo—Incopho Yaso Ezukileyo Isondele!, iphepha 64, isiqendu 22, epapashwe yiWatchtower Bible and Tract Society of New York, Inc.
Iingongoma Zempinda
◻ Ifanekisela ntoni itempile ekumbono kaHezekile?
◻ Bafanekisela bani ababingeleli abasetempileni?
◻ Ngoobani abaludidi lwesikhulu, yaye ziziphi ezinye zeembopheleleko zabo?
◻ Liyintoni ilizwe elikumbono kaHezekile, yaye labelwa izizwe ezili-12 ngayiphi ingqiqo?
◻ Sifanekisela ntoni isixeko?
[Umzobo/Imaphu ekwiphepha 15]
(Ukuba ufuna inkcazelo ehlahlelwe kakuhle, yiya kwimpapasho)
Ukwabiwa komhlaba njengoko kuchazwe kumbono kaHezekile
IZIZWE EZILISHUMI ELINESIBINI
ULwandle Olukhulu
ULwandle LwaseGalili
UMlambo iYordan
ULwandle Lwetyuwa
UDAN
UASHERE
UNAFETALI
UMANASE
UEFRAYIM
URUBHEN
UYUDA
ISIKHULU
UBHENJAMIN
USIMON
UISAKARE
UZEBHULON
UGADI
[Umzobo]
UKWANDISWA KOMRHUMO ONGCWELE
A. “UYehova Ngokwakhe Ulapho” (Jehovah-Shammah); B. Umhlaba wesixeko ochumayo
Isabelo SabaLevi
Ingcwele kaYehova
Isabelo Sababingeleli
B A B