Intsikelelo Kayehova ‘Kwilizwe’ Lethu

“Yonke imiphefumlo ephilileyo, enyakazelayo ezindaweni zonke othe wafika kuzo umlambokazi lowo, iphile.”​—⁠HEZEKILE 47:⁠9.

1, 2. (a) Abaluleke kangakanani amanzi? (b) Afanekisela ntoni amanzi omlambo osembonweni kaHezekile?

AMANZI alulwelo olumangalisayo. Zonke izinto eziphilayo zixhomekeke kuwo. Akukho namnye kuthi onokuphila ixesha elide ngaphandle kwawo. Sikwaxhomekeke kuwo naxa sifuna ukuhlamba, ekubeni amanzi enokukhucula aze asuse ubumdaka. Ngawo sihlamba imizimba, impahla, kwanokutya. Ukwenjenjalo kunokubusindisa ubomi bethu.

² IBhayibhile isebenzisa amanzi ukuze ifanekisele amalungiselelo okomoya kaYehova okunika ubomi. (Yeremiya 2:​13; Yohane 4:​7-15) La malungiselelo aquka ukuhlanjululwa kwabantu bakhe ngedini lentlawulelo likaKristu kunye nolwazi lukaThixo olufumaneka kwiLizwi lakhe. (Efese 5:​25-27) Kumbono kaHezekile wetempile, umlambo ongummangaliso oqukuqela uphuma etempileni ufuzisela ezo ntsikelelo zinika ubomi. Kodwa uqukuqela nini lo mlambo, yaye kuthetha ntoni kuthi namhlanje oko?

Umlambo Uqukuqela Kwilizwe Elibuyiselweyo

3. Yintoni eyabonwa nguHezekile, echazwe kuHezekile 47:​2-⁠12?

³ Abantu bakuloHezekile babewafuna gqitha amalungiselelo kaYehova, ngoxa babethinjiwe eBhabhiloni. Ngoko hayi indlela ekumele ukuba kwamkhuthaza ngayo uHezekile ukubona amanzi ethontsiza kwingcwele aza aqukuqela ukuphuma kwitempile yasembonweni! Ingelosi ilinganisa lo msinga ngeekubhite ezili-1 000. Uya usiba nzulu ukusuka emaqatheni, uye emadolweni, uye esinqeni de ube ngumlambo ekunokuqujwa kuwo. Lo mlambo uyaphilisa yaye uyachumisa. (Hezekile 47:​2-11) UHezekile uxelelwa oku: “Kophuma phezu komlambo, phezu kodini lwawo, ngapha nangapha, imithi yonke edliwayo.” (Hezekile 47:​12a) Njengoko lo mlambo ungena kuLwandle Olufileyo​—⁠kumanzi angenanto iphilileyo​—⁠kutsho kunyakazele izinto eziphilayo! Iintlanzi zidlal’ abantwana. Ishishini leentlanzi liyakhula.

4, 5. Isiprofeto sikaYoweli esiphathelele umlambo sifana njani nesikaHezekile, yaye kutheni kubalulekile nje oku?

⁴ Esi siprofeto sihle sisenokuba sakhumbuza abathinjwa abangamaYuda ngesinye isiprofeto esasibhalwe kwiinkulungwane ezingaphezu kwezimbini ngaphambilana, esithi: “Kuphume umthombo endlwini kaYehova, useze isihlambo semingampunzi.”a (Yoweli 3:​18) Isiprofeto sikaYoweli, njengesikaHezekile, sisixelela kusengaphambili ukuba kukho umlambo oza kuqukuqela uphuma kwindlu kaThixo, itempile, uze uwuchumise ummandla obharhileyo.

⁵ Kudala IMboniselo ichaza ukuba isiprofeto sikaYoweli sizaliseka kweli xesha siphila kulo.b Ngoko, ngokuqinisekileyo kukwanjalo nangalo mbono ufanayo kaHezekile. NjengakuSirayeli wamandulo, ngokwenene iintsikelelo zikaYehova ziye zaqukuqela kwilizwe elibuyiselweyo labantu bakaThixo namhlanje.

Umsinga Onamandla Weentsikelelo

6. Ukutshizwa kwegazi kwisibingelelo esisembonweni kufanele ukuba kwakuwakhumbuza ntoni amaYuda?

⁶ Zivela phi iintsikelelo eziya kubantu bakaThixo ababuyiselweyo? Kaloku, phawula ukuba la manzi aqukuqela ephuma kwitempile kaThixo. Ngokufanayo namhlanje, iintsikelelo zivela kuYehova zisiza ngetempile yakhe enkulu yokomoya​—⁠ilungiselelo lonqulo olunyulu. Umbono kaHezekile ufakelela elinye isolotya elibalulekileyo. Kwintendelezo engaphakathi, la manzi aqukuqela edlula kumzantsi wesibingelelo. (Hezekile 47:⁠1) Isibingelelo sisembindini kanye wetempile esembonweni. UYehova umchazela ngokweenkcukacha ngaso uHezekile yaye uyalela ukuba igazi ledini litshizwe phezu kwaso. (Hezekile 43:​13-18, 20) Eso sibingelelo sasibaluleke gqitha kuwo onke amaSirayeli. Umnqophiso awayewenze noYehova wawenziwe wasebenza kwakude kudala xa uMoses watshiza igazi kwisibingelelo esasikumazantsi eNtaba yeSinayi. (Eksodus 24:​4-⁠8) Ukutshizwa kwegazi kwisibingelelo esisembonweni kufanele ukuba kwawakhumbuza ukuba ekubuyeleni kwawo kwilizwe lawo elibuyiselweyo, iintsikelelo zikaYehova zaziya kuthululwa logama nje ayewuthobela umnqophiso awayewenze naye.​—⁠Duteronomi 28:​1-⁠14.

7. Yiyiphi intsingiselo efunyanwa ngamaKristu anamhlanje kwisibingelelo sokomfuziselo?

⁷ Ngokufanayo nanamhlanje, abantu bakaThixo basikelelwa ngomnqophiso​—⁠olunge ngakumbi, umnqophiso omtsha. (Yeremiya 31:​31-34) Nawo wenziwa wasebenza kwamhlamnene ngegazi likaYesu Kristu. (Hebhere 9:​15-20) Namhlanje, enoba singabathanjiswa, abanenxaxheba kulo mnqophiso, okanye ‘singabezinye izimvu,’ abangenelwayo kuwo, sibaluleke gqitha esi sibingelelo sokomfuziselo kuthi. Sifuzisela ukuthanda kukaThixo ngokuphathelele idini likaKristu. (Yohane 10:​16; Hebhere 10:​10) Kanye njengokuba isibingelelo sokomfuziselo sisembindini wetempile yokomoya, idini lentlawulelo likaKristu lingundoqo kunqulo olunyulu. Lisisizinzi sokuxolelwa kwezono zethu yaye ngenxa yoko asekelwe kulo amathemba ethu ngekamva. (1 Yohane 2:⁠2) Ngaloo ndlela sizabalazela ukuphila ngokuvisisana nomthetho onxibelelene nomnqophiso omtsha, “umthetho kaKristu.” (Galati 6:⁠2) Logama nje sisenjenjalo, siya kungenelwa kumalungiselelo kaYehova obomi.

8. (a) Yintoni le yayingekho kwintendelezo engaphakathi yetempile yasembonweni? (b) Yiyiphi indlela ababenokuzihlambulula ngayo ababingeleli betempile yasembonweni?

⁸ Enye yezo ngenelo kukuma okucocekileyo phambi koYehova. Kwitempile esembonweni, intendelezo engaphakathi inanto ithile engenayo eyayibalulekile kwintendelezo yomnquba nakwitempile kaSolomon​—⁠isitya esikhulu, kamva esabizwa ngokuba lulwandle, ababehlambela kuso ababingeleli. (Eksodus 30:​18-21; 2 Kronike 4:​2-⁠6) Babeza kuhlamba phi ke bona ababingeleli betempile yombono kaHezekile? Kaloku, kukho laa mjelo uphuma kwintendelezo engaphakathi! Ewe, uYehova wayeza kubasikelela ngokubanika indlela yokuzigcina becocekile, okanye bengcwele.

9. Intsalela kunye nesihlwele esikhulu sinokuba nako njani ukuma okucocekileyo namhlanje?

⁹ Ngokufanayo ke nanamhlanje, abathanjiswa baye basikelelwa ngokuma okucocekileyo phambi koYehova. UYehova ubagqala njengabangcwele, ebavakalisa bengamalungisa. (Roma 5:​1, 2) Kuthekani ‘ngesihlwele esikhulu,’ esifuziselwa zizizwe ezingengobabingeleli? Sinqula sikwintendelezo engaphandle, kwaye lo mjelo mnye uyadlula kuloo nxalenye yetempile esembonweni. Ngoko, hayi indlela ekufaneleke ngayo ukuba umpostile uYohane abone isihlwele esikhulu sinxibe iingubo ezimhlophe njengoko sinqula kwintendelezo yetempile yokomoya! (ISityhilelo 7:​9-14) Kungakhathaliseki ukuba siye saphathwa njani na leli hlabathi liwohlokileyo, sinokuqiniseka ukuba logama sisenokholo kwidini lentlawulelo likaKristu, uYehova usigqala sicocekile yaye sinyulu. Silubonakalisa njani ukholo? Ngokulandela amanyathelo kaYesu, sinentembelo epheleleyo kwidini lentlawulelo.​—⁠1 Petros 2:⁠21.

10, 11. Yiyiphi enye inkalo ebalulekileyo yamanzi okomfuziselo, yaye idibana njani nokukhula komlambo ngendlela emangalisayo?

¹⁰ Njengoko besikhe sathi thsuphe ngaphambili, ikho enye inkalo ebalulekileyo yala manzi okomfuziselo​—⁠ulwazi. KuSirayeli obuyiselweyo, uYehova wabasikelela abantu bakhe ngemfundiso yeZibhalo esebenzisa ababingeleli. (Hezekile 44:​23) Ngendlela efanayo, namhlanje uYehova uye wabasikelela abantu bakhe ngemfundiso eninzi yeLizwi lakhe lenyaniso, esebenzisa “ububingeleli basebukhosini.” (1 Petros 2:⁠9) Ulwazi ngoYehova uThixo, iinjongo zakhe ngoluntu, ngokukodwa ngoYesu Kristu nangoBukumkani obungoMesiya, luye lwaqukuqelela kwisihlambo esiya sikhula ebudeni bale mihla yokugqibela. Hayi indlela ozuke ngayo umsinga oya usiba nzulu wamanzi okomoya ahlaziyayo esiwafumanayo!​—⁠Daniyeli 12:⁠4.

¹¹ Kanye njengokuba umlambo owalinganiswa yingelosi waya usiba nzulu, iintsikelelo ezinika ubomi zikaYehova ziye zanda ngendlela emangalisayo ukuze zilingane inkumbula yabantu abangena kwilizwe lethu elisikelelweyo. Esinye isiprofeto sokubuyiselwa saxela kwangaphambili sisithi: “Omncinanana uya kuba liwaka, noweyeleyo abe luhlanga olunamandla. Mna, Yehova, ndiya kukukhawulezisa oko ngexesha lako oko.” (Isaya 60:​22) La mazwi aye azaliseka​—⁠izigidi zabantu ziye zathontelana kunqulo olunyulu! UYehova uye wenza ukuba “amanzi” amaninzi afumaneke kuye wonk’ ubani ophethukela kuye. (ISityhilelo 22:​17) Uyaqinisekisa ukuba intlangano yakhe yasemhlabeni isasaza iiBhayibhile kunye noncwadi olusekelwe eBhayibhileni kulo lonke ihlabathi, ngeelwimi ezingamakhulukhulu. Kuye kwalungiselelwa neentlanganiso kunye neendibano zamaKristu ehlabathini lonke ukuze bonke abantu bafumane amanzi acwengileyo enyaniso. La malungiselelo abachaphazela njani abantu?

La Manzi Ayaphilisa!

12. (a) Kutheni imithi yombono kaHezekile ikwazi ukuvelisa njengoko isenza? (b) Yintoni emelwa yile mithi exakatha iziqhamo kule mihla yokugqibela?

¹² Umlambo okumbono kaHezekile unika ubomi kwaye uyaphilisa. Xa uHezekile efumanisa ukuba kukho imithi eyayiza kukhula eludinini lwalo mlambo, uxelelwa oku: “Amagqabi ayo akayi kubuna. . . . Iziqhamo zayo ziya kuba zezokudliwa, namagqabi ayo abe ngawokuphilisa.” Kutheni le mithi inemveliso emangalisa ngolu hlobo? “Ngokuba amanzi awo wona aphuma engcweleni.” (Hezekile 47:​12b) Le mithi yokomfuziselo ifuzisela onke amalungiselelo awenziwa nguThixo ngesizinzi sedini lentlawulelo likaYesu ukuze abuyisele uluntu emfezekweni. Emhlabeni namhlanje yintsalela ethanjisiweyo ekhokelayo ekondleni nasekuphiliseni abantu ngokomoya. Emva kokuba bonke abali-144 000 befumene umvuzo wabo wasezulwini, iingenelo ezibangelwa yinkonzo yabo yokuba ngababingeleli abalawula noKristu ziya kunabela kwixesha elizayo, de koyiswe ngokupheleleyo ukufa okwabangelwa nguAdam.​—⁠ISityhilelo 5:​9, 10; 21:​2-⁠4.

13. Kukuphi ukuphilisa okuye kwenziwa ebudeni bexesha lethu?

¹³ Lo mlambo usembonweni ungena kuLwandle Olufileyo olungenazinto ziphilileyo uze uphilise yonke into ofikelela kuyo. Olu lwandle lufuzisela imeko yokufa ngokomoya. Kodwa izinto eziphilileyo zinyakazela “ezindaweni zonke othe wafika kuzo umlambokazi lowo.” (Hezekile 47:⁠9) Ngendlela efanayo, kule mihla yokugqibela, naphi na apho la manzi obomi aye afikelela khona, abantu baye baphila ngokomoya. Abokuqala abahlaziywayo yayiyintsalela yabathanjiswa ngowe-1919. Yaphila kwakhona, ivuka kwimeko efana nokufa ngokomoya. (Hezekile 37:​1-14; ISityhilelo 11:​3, 7-12) Ukususela ngoko la manzi aphilisayo aye abafikelela abanye abafileyo ngokomoya, yaye nabo baye baphila baza baba sisihlwele esikhulu esiqhubeka sisanda, esimthandayo nesimkhonzayo uYehova. Kungekudala, eli lungiselelo liza kuquka indimbane yabavusiweyo.

14. Yintoni efanekiselwa kakuhle lishishini lokuloba iintlanzi eliye lakhula kunxweme loLwandle Olufileyo namhlanje?

¹⁴ Ukuphila ngokomoya kubonakaliswa yimveliso. Oku kuzekeliswa lishishini lokuloba iintlanzi elakhulayo kunxweme lolwandle olwalufile ngaphambili. UYesu wabaxelela oku abalandeli bakhe: “Ndiza kunenza abalobi babantu.” (Mateyu 4:​19) Kule mihla yokugqibela, umsebenzi wokuloba uqaliswe ngokuhlanganiswa kwentsalela yabathanjiswa, kodwa awukhange uphelele apho. Amanzi aphilisayo aphuma kwitempile kaYehova yokomoya, kunye nolwazi oluchanileyo oluyintsikelelo, achaphazela abantu bazo zonke iintlanga. Naphi na apho lo mlambo ufikelela khona, abantu bayaphila ngokomoya.

15. Yintoni ebonisa ukuba asinguye wonk’ ubani oya kuwamkela amalungiselelo kaThixo obomi, yaye siyintoni isiphelo sabanjalo?

¹⁵ Kakade ke, asinguye wonk’ ubani osamkela ngoko nangoko isigidimi sobomi; kananjalo bengayi kusamkela bonke nabo baza kuvuswa ebudeni boLawulo Lwewaka Leminyaka lukaKristu. (Isaya 65:​20; ISityhilelo 21:⁠8) Ingelosi ithi ezinye iinxalenye zolwandle aziphiliswa. Le migxobhozo ekungekho nto iphilayo kuyo ‘inikelwa ekubeni mtyuba.’ (Hezekile 47:​11) Xa sisiza kubantu banamhlanje, asingabo bonke abanikwa amanzi anika ubomi kaYehova abaya kuwamkela. (Isaya 6:​10) Bonke abo baye bakhetha ukuhlala befile okanye begula ngokomoya baya kunikelwa ekubeni mtyuba, ngamany’ amazwi, baya kutshatyalaliswa ngonaphakade eArmagedon. (ISityhilelo 19:​11-21) Noko ke, abo bebewasela ngentembeko la manzi banokuba nethemba lokuba baya kusinda baze babone inzaliseko yokugqibela yesi siprofeto.

Umlambo Uqukuqelela EParadesi

16. Umbono kaHezekile wetempile uya kuzaliseka okokugqibela nini yaye njani?

¹⁶ Njengezinye iziprofeto zokubuyiselwa, umbono kaHezekile wetempile uzaliseka okokugqibela ebudeni beMinyaka Eliwaka. Ngelo xesha udidi lwababingeleli luya kube lungasekho apha emhlabeni. “Baya kuba ngababingeleli bakaThixo nabakaKristu ibe baya kuphatha njengookumkani kunye naye [ezulwini] kangangeminyaka eliwaka.” (ISityhilelo 20:⁠6) Aba babingeleli basezulwini baza kuba noKristu ekusebenziseni iingenelo ezipheleleyo zedini lentlawulelo likaKristu. Ngaloo ndlela uluntu olungamalungisa luya kusinda, lubuyiselwe emfezekweni!​—⁠Yohane 3:⁠17.

17, 18. (a) Uchazwe njani umlambo onika ubomi kwiSityhilelo 22:​1, 2, yaye linini elona xesha lokuzaliseka kwaloo mbono? (b) Kutheni umlambo wamanzi obomi uya kwanda kakhulu eParadesi?

¹⁷ Ekugqibeleni, umlambo owabonwa nguHezekile uya kuphuphuma ngamanzi obomi anamandla. Eli iya kuba lelona xesha lokuzaliseka kwesiprofeto esibhalwe kwiSityhilelo 22:​1, 2 esithi: “Yandibonisa umlambo wamanzi obomi, ungcwengeke njengekristale, uqukuqela uphuma kwitrone kaThixo neyeMvana usihla phakathi kwendlela yaso ephangaleleyo. Ibe kweli cala lomlambo nakweliya icala kwakukho imithi yobomi evelisa izilimo zeziqhamo ezilishumi elinesibini, ivelisa iziqhamo zayo nyanga nganye. Yaye amagqabi emithi ayengawokunyanga iintlanga.”

¹⁸ Ebudeni beMinyaka Eliwaka, zonke izigulo​—⁠ezasemzimbeni, ezengqondo kunye nezeemvakalelo​—⁠ziya kuphiliswa. Oku kufanekiselwa kakuhle yimithi yokomfuziselo ‘enyanga iintlanga.’ Ngenxa yamalungiselelo abiwa nguKristu nabali-144 000, “akayi kuthi ummi wakhona, Ndiyafa.” (Isaya 33:​24) Kwaye lo mlambo uza kufikelela kwinqanaba lokuba ube mkhulu kakhulu. Uza kuba banzi yaye ube nzulu ukuze uncede izigidi, mhlawumbi amawaka ezigidi zabantu abavusiweyo abaya kusela la manzi acocekileyo obomi. Umlambo osembonweni walunyanga uLwandle Olufileyo, uphilisa zonke izinto afikelela kuzo amanzi awo. EParadesi, amadoda namabhinqa aza kuphila ngengqiqo epheleleyo, anyangwe ekufeni awakuzuza njengelifa kuAdam ukuba phofu abonakalisa ukholo kwiingenelo zentlawulelo azinikwayo. ISityhilelo 20:​12 sixela kusengaphambili ukuba ngaloo mihla kuya kuvulwa ‘imisongo,’ enikela ukuqonda okungakumbi nabaya kungenelwa kuko abavusiweyo. Okulusizi kukuba abanye abayi kuvuma ukuphiliswa, kwanaseParadesi. Aba bavukeli baya “kunikelwa ekubeni mtyuba” ngentshabalalo kanaphakade.​—⁠ISityhilelo 20:⁠15.

19. (a) Uya kwabiwa njani umhlaba eParadesi? (b) Isixeko sifanekisela ntoni eParadesi? (c) Kuthetha ntoni ukuma kwesixeko kumgama othile ukusuka etempileni?

¹⁹ Enye into eza kuzaliseka okokugqibela kukwabiwa komhlaba okumbono kaHezekile. UHezekile wabona umhlaba usabiwa kakuhle; ngokufanayo, ngamnye kumaKristu athembekileyo unokuqiniseka ukuba uza kuba nendawo, ilifa, eParadesi. Kusenokwenzeka ukuba, umnqweno wokuba ubani ahlale yaye anyamekele indlu yakhe uya kuzalisekiswa ngocwangco. (Isaya 65:​21; 1 Korinte 14:​33) Isixeko esabonwa nguHezekile silifanekisela kakuhle ilungiselelo lolawulo uYehova anenjongo yokulisebenzisa kumhlaba omtsha. Udidi lwababingeleli abangabathanjiswa luza kube lungasekho phakathi koluntu. Lo mbono ukubonisa oko ngokuchaza esi sixeko njengesimi kumhlaba ‘ongengcwele’ kumgama othile ukusuka etempileni. (Hezekile 48:​15) Ngoxa abali-144 000 belawula noKristu ezulwini, uKumkani unabo abameli abasemhlabeni. Abalawulwa bakhe abangabantu baya kungenelwa gqitha kukhokelo nakulwalathiso lothando lodidi lwesikhulu. Noko ke, elona komkhulu lalo rhulumente alizi kuba semhlabeni, kodwa liza kuba sezulwini. Nabani na osemhlabeni, kuquka nodidi lwesikhulu, uza kuba engaphantsi koBukumkani obungoMesiya.​—⁠Daniyeli 2:​44; 7:​14, 18, 22.

20, 21. (a) Kutheni igama lesi sixeko lifanelekile? (b) Ukuqonda kwethu umbono kaHezekile kufanele kusenze sizibuze yiphi imibuzo?

²⁰ Phawula amazwi okuqukumbela esiprofeto sikaHezekile: “Igama lawo umzi kothiwa kususela kuloo mini, nguYehova-ekhona.” (Hezekile 48:​35) Esi sixeko asiyi kubakho ngenjongo yokunika amadoda athile igunya okanye ukuwenza abe nempembelelo; kananjalo singayi kunyanzelisa ukwenziwa kokuthanda komntu. Esi sisixeko sikaYehova, kwaye sisoloko sibonakalisa indlela acinga ngayo nothando lwakhe, iindlela ezisengqiqweni. (Yakobi 3:​17) Oku kusisiqinisekiso esivuyisayo sokuba uYehova uya kuqhubeka elisikelela ibutho labantu ‘bomhlaba omtsha’ ukusa kwikamva elingunaphakade.​—⁠2 Petros 3:⁠13.

²¹ Ngaba alisichulumancisi eli themba libekwe phambi kwethu? Ngoko ke, kufanelekile ukuba sizibuze: ‘Ndisabela njani kwiintsikelelo ezimangalisayo ezityhilwa ngumbono kaHezekile? Ngaba ndiwuxhasa ngokuthembeka umsebenzi owenziwa ngabaveleli abanothando, kuquka abentsalela ethanjisiweyo kunye nabo baza kuba ngamalungu odidi lwesikhulu? Ngaba unqulo olunyulu ndiye ndalwenza eyona nto ibalulekileyo ebomini bam? Ngaba ndiwasebenzisa ngokuzeleyo amanzi obomi angumsinga namhlanje?’ Ngamana ngamnye wethu angaqhubeka esenjenjalo aze onwabele amalungiselelo kaYehova de kube ngunaphakade!

[Imibhalo esemazantsi]

Ubungaphendula Uthini?

◻ Afanekisela ntoni amanzi aqukuqela ephuma etempileni?

◻ Kukuphi ukuphilisa okuye kwenziwa nguYehova ngomlambo wokomfuziselo, yaye kutheni lo mlambo usiya usiba mkhulu nje?

◻ Ifanekisela ntoni imithi eseludinini lomlambo?

◻ Siza kufuzisela ntoni isixeko ebudeni boLawulo Lwewaka Leminyaka, yaye kutheni lifanelekile nje igama lesi sixeko?

[Imifanekiso ekwiphepha 23]

Umlambo wobomi umela amalungiselelo kaThixo okusindisa