Incwadi Yobulumko Enesigidimi Sanamhlanje
“INGXOWA ezele ubulumko ixabisa ngaphezu kwezele ziiperile,” watsho usolusapho wakudala uYobhi, nekungathandabuzekiyo ukuba wayeyenye yawona madoda azizityebi ngexesha lakhe. (Yobhi 1:3; 28:18, NW; 42:12) Liyinyaniso elokuba, ubulumko buxabiseke gqitha ngaphezu kwezinto eziphathekayo xa kufikelelwa ekuncedeni ubani aphumelele ebomini. UKumkani uSolomon osisilumko wathi: “Ngokuba ubulumko bungumthunzi, imali ingumthunzi; ke ukugqithisela kokwazi, kukuba ubulumko buyabasindisa abo banabo.”—INtshumayeli 7:12.
Kodwa bunokufunyanwa phi ubulumko obunjalo namhlanje? Abanye babhenela kubantu ababhala imihlathi yamacebiso, kwizazinzulu ngengqondo, koogqirha bezigulo zengqondo, kwanakubalungisi beenwele noonoteksi ngeengxaki zabo. Yaye iingcali eziliqela zikulungele ukunikela icebiso kuzo zonke iingxaki—zize zifune imali evakalayo. Noko ke, ngokufuthi, amazwi “obulumko” anjalo aye akhokelela ekudimazekeni, nakwintlekele. Ngoko ke, sinokubufumana njani ubulumko bokwenene?
UYesu Kristu, owayeziqonda iingxaki zabantu, wakha wathi: “Ubulumko bungqineka bububulungisa ngemisebenzi yabo.” (Mateyu 11:19) Makhe siqwalasele iingxaki eziqhelekileyo kubomi babantu size sibone amazwi obulumko aye abanceda aza angqineka exabiseke ngaphezu ‘kwengxowa ezele iiperile.’ Nawe usenokufumana “ingxowa ezele ubulumko” uze ungenelwe kuyo.
Ngaba Uthwaxwa Ludandatheko?
I-International Herald Tribune yaseLondon ithi: “Ukuba inkulungwane yama-20 izise isiZukulwana Sokuxhalaba, loo nto ithetha ukuba xa iphela kuya kubakho isiZukulwana Sodandatheko.” Yongezelela isithi “uhlolisiso lokuqala olwenziwayo lodandatheko olukhulu lubonisa ukwanda kwesiphithiphithi emhlabeni. Kumazwe awahlukahlukeneyo anjengeTaiwan, iLebanon neNew Zealand isizukulwana emva kwesinye sichanabeke ngakumbi kwesi sifo.” Abo bazalwe emva kowe-1955 kuthiwa banamathuba aphindwe kathathu okudandatheka kunoomawokhulu babo.
Oko kwaba njalo kuTomoe, owayedandatheke kakhulu nowayechitha inkoliso yeentsuku elele. Ekubeni wayengakwazi ukunyamekela unyana wakhe oneminyaka emibini ubudala, wagoduka waya kubazali bakhe. Ummelwane owayenentombi elingana nonyana kaTomoe ngokukhawuleza wakha ubuhlobo naye. Xa uTomoe waxelela ummelwane wakhe indlela awayeziva engungantweni ngayo, ummelwane wambonisa isibhalo kwincwadi ethile. Yayifundeka ngolu hlobo: “Iliso alinakuthi kwisandla: ‘Andikufuni nganto’; okanye, kwakhona, intloko ayinakuthi kwiinyawo: ‘Andinifuni nganto.’ Kodwa kunoko okona kwenzekayo kukuba amalungu omzimba abonakala ebuthathaka ngakumbi ngawo ayimfuneko.”a Zehla iinyembezi emehlweni kaTomoe njengokuba wayeqonda ukuba wonke umntu unendima yakhe emhlabeni yaye uyafuneka.
Ummelwane wamkhuthaza ukuba ajonge encwadini eyayinaloo mazwi. UTomoe wavuma, nangona ukuza kuthi ga ngelo xesha wayengekakwazi ukwenza nto, engazimiselanga nokwenza isibhambathiso nje esingenamsebenzi. Kwakhona lo mmelwane wayemnceda emyela ezivenkileni, yaye wayelungiselela ukutya kunye noTomoe yonke imihla. Emva kwenyanga uTomoe wayekwazi ukuvuka ekuseni, ahlambe iimpahla, acoce indlu, aye ezivenkileni, aze alungiselele isidlo, kanye ngendlela enza ngayo nawuphi na umfazi. Kwakumele ajamelane nomsebenzi onzima, kodwa uthi, “Ndandiqinisekile ukuba, xa ndinokulandela amazwi obulumko endiwafumeneyo, iingxaki zaziya kuphela.”
Ngokusebenzisa amazwi obulumko awayewafumene, uTomoe waloyisa udandatheko awayenalo. Ngoku uTomoe usebenza ixesha elizeleyo enceda abanye ukuba basebenzise la mazwi amncedayo ukuba akwazi ukujamelana neengxaki awayenazo. Loo mazwi obulumko afumaneka kwincwadi endala enesigidimi sabo bonke abantu namhlanje.
Ngaba Ujamelene Neengxaki Zasekhaya?
Ehlabathini jikelele uqhawulo-mtshato luyanda. Iingxaki zasekhaya ziyanda kwanakumazwe aseMpuma, apho abantu babekhe baneqhayiya ngomanyano olwalukho kwiintsapho zabo. Sinokulufumana phi ukhokelo lobulumko lomtshato nolusebenzayo?
Cinga ngemeko kaShugo noMihoko, isibini esasineengxaki zomtshato ezingapheliyo. Sasixambulisana ngezinto nje ezincinane. UShugo wayekhawuleza abe nomsindo, yaye uMihoko wayephindisa ngalo lonke ixesha xa efumene impazamo kuye. UMihoko wada wathi, ‘Akunakwenzeka ukuba sivumelane nangenye into.’
Ngenye imini elinye ibhinqa latyelela uMihoko laza lamfundela la mazwi kwenye incwadi: “Zonke izinto, ke ngoko, enifuna abantu bazenze kuni, nani nimele nenze ngokunjalo kubo.”b Nangona wayengenamdla elunqulweni, uMihoko wavuma ukuyifunda incwadi eyayiqulethe loo mazwi. Umdla wakhe wawusekubeni aphucule ubomi bentsapho yakhe. Ngoko, xa wayemenywa ukuba aye kwintlanganiso apho kwakuxutyushwa incwadi ethi Ukwenza Ubomi Bentsapho Bonwabe, uMihoko—kunye nomyeni wakhe—bavuma ngokulula.c
Kuloo ntlanganiso, uShugo waphawula ukuba abo babekho babekwenza ngokwenene oko babekufunda yaye babekhangeleka bonwabile. Wagqiba kwelokuba ahlolisise incwadi eyayifundisiswa ngumfazi wakhe. Kungekudala wadibana namazwi awathimba ingqalelo yakhe: “Ozeka kade umsindo unengqondo eninzi; ke yena ozekanekayo ucaphula ukumatha.”d Nangona kwathabatha ixesha ukuba awusebenzise lo mgaqo ebomini bakhe, ukuguquka kwakhe ngokuthe ngcembe kwabonakala kwabo babemazi, kuquka nasemfazini wakhe.
Ebona iinguqulelo ezenziwe yindoda yakhe, naye uMihoko waqalisa ukukusebenzisa oko wayekufunda. Omnye umgaqo owamnceda ngakumbi yayingulo: “Yekani ukugweba ukuze ningagwetywa; kuba ngogwebo enigweba ngalo, niya kugwetywa ngalo.”e Ngoko ke uMihoko nomyeni wakhe bagqiba kwelokuba baza kuthetha ngeempawu zabo ezintle nendlela abanokuphucula ngayo kunokugxekana. Oku kwaba nawuphi umphumo? UMihoko uthi: “Oko kuye kwandonwabisa gqitha. Oku besikwenza xa sisidla busuku ngabunye. Kwanonyana wethu oneminyaka emithathu ubudala uyangenelela encokweni. Oku kuye kwasihlaziya ngokwenene!”
Xa le ntsapho yasebenzisa isiluleko esisengqiqweni eyayisifumene, yakwazi ukuhlangabezana neengxaki ezazixhalabisa ulwalamano lwayo olwalusemngciphekweni. Ngaba oko akuxabisekanga kubo ngaphezu kwengxowa ezele ziiperile?
Ngaba Ufuna Ukuphumelela Ebomini Bakho?
Abaninzi namhlanje, basukela ukuba zizityebi ebomini. Ukanti, omnye usomashishini osisigwili eUnited States owanikela ngamakhulu ezigidi zeedola kumbutho wokunceda amahlwempu wakha wathi: “Kukho abantu abayithandayo imali, kodwa akakho umntu onokunxiba izihlangu ezine ngexesha.” Bambalwa abantu abayivumayo le nyaniso yaye bambalwa ngakumbi abo baye bayeka ukusukela ubutyebi.
UHitoshi wakhula elihlwempu, ngoko wayekunqwenela ngamandla ukuba sisityebi. Emva kokubona indlela abantu ababolekisa ngemali ababangcungcuthekisa ngayo abanye abantu, wagqiba kwelokuba: “Ofumana imali eninzi nguye ophumelelayo.” UHitoshi wayekholelwa gqitha emalini kangangokuba wada wacinga ukuba ubomi babantu babunokuthengwa ngayo. Ukuze abe sisityebi, wasebenza kwishishini lakhe lemibhobho yamanzi waza wasebenza unyaka wonke, engathabathi nosuku lwekhefu. Njengokuba wayezame kangako, uHitoshi wakhawuleza waqonda ukuba, njengomntu osebenza phantsi komnye akanakukwazi ukuphumelela njengabantu abamnike umsebenzi. Yonke imihla wayesoloko enxunguphaliswa kukucinga ngokubhanga kweshishini lakhe.
Emva koko kwafika ndoda ithile kwaHitoshi yaza yambuza enoba wayesazi kusini na ukuba uYesu Kristu wamfela. Ekubeni uHitoshi wayevakalelwa kukuba akakho umntu owayenokufela umntu onjengaye, waba nomdla gqitha waza wavuma ukuba nenxaxheba kwiingxubusho ezingakumbi. Kwiveki elandelayo, wayekho kwintetho yesidlangalala yaye wabamb’ ongezantsi akuva isilumkiso esithi ‘gcina iliso lakho lingenakumbi.’ Isithethi sacacisa ukuba iliso ‘elingenakumbi’ lelo libona kude lize ligxininise kwizinto zokomoya; kwelinye icala, iliso ‘elingendawo,’ okanye ‘elinomona,’ lijonge kuphela kwiminqweno yangoku yenyama yaye aliphangalalanga. Isiluleko esithi, “Apho bukhoyo ubuncwane benu, nentliziyo yenu iya kuba lapho,” samchukumisa gqitha.f Kukho into ebaluleke ngakumbi kunokuba zizityebi! Wayengazange ayive into enjengale.
Echukumisekile, waqalisa ukukusebenzisa oko wayekufunda. Kunokuba azibhokoxe efuna imali, waqalisa ukubeka izilangazelelo zokomoya kuqala ebomini bakhe. Kwakhona wachitha ixesha enyamekela impilontle yokomoya yentsapho yakhe. Ngokusengqiqweni, oko kwakuthetha ukusebenza ixesha elifutshane, ukanti ishishini lakhe laqhuba kakuhle. Ngoba?
Ubuntu bakhe obungqwabalala bajika baba bobuzolileyo noboxolo njengokuba wayesabela kwisiluleko awasinikwayo. Wachukunyiswa ngakumbi sesi siluleko: “Ngokwenene lahlani konke, ingqumbo, umsindo, ububi, yaye makungaphumi ntetho itshabhisayo, nantetho ingamanyala emlonyeni wenu. Musani ukuxokisana. Buhlubeni ubuntu obudala kunye noqheliselo lwabo, nize nambathe ubuntu obutsha, obuthi ngolwazi oluchanileyo benziwe bube butsha ngokomfanekiso waLowo wabudalayo.”g Ukulandela eli cebiso akuzange kumenze abe sisityebi, kodwa “ubuntu obutsha” bakhe bamenza wathandwa ngabathengi bakhe baza banentembelo engakumbi kuye. Ewe, amazwi obulumko awawafumanayo amnceda wakwazi ukuphumelela ebomini. Kuye, ngokoqobo ayexabiseke kakhulu ngaphezu kwengxowa ezele ziiperile okanye yimali.
Ngaba Uya Kuyivula Le Ngxowa?
Ngaba uyayazi ingxowa ezele bubulumko eye yangqineka ibalulekile kubantu abakule mizekelo ingasentla? Bubulumko obufumaneka eBhayibhileni, incwadi esasazwe ngokubanzi nefumaneka lula emhlabeni. Kusenokwenzeka ukuba unawo umbhalo wakho okanye usenokuwufumana ngokulula. Noko ke, ukuba ubani unengxowa ezele ziiperile ezixabisekileyo aze angazisebenzisi aziyi kumzuzisa kangako, ngokufanayo ukuba neBhayibhile nje kuphela nako akuyi kuba nangenelo ingako. Kutheni ungayivuli nje le ngxowa, ngokungathi kunjalo, uze usebenzise icebiso leBhayibhile lobulumko necebiso elisexesheni uze ubone indlela elinokukunceda ngayo ukwazi ukuhlangabezana neengxaki zobomi ngokuphumelelayo.
Ukuba wakha wanikwa ingxowa ezele ziiperile, ngaba ubungayi kuvuya uze uzame ukufumana loo mntu ukuncedileyo umbulele? Ngaba uyazi ukuba ngubani uMniki weBhayibhile?
IBhayibhile ityhila uMthombo wobulumko obufumaneka kuyo xa isithi: “Sonke iSibhalo siphefumlelwe nguThixo kwaye siyingenelo.” (2 Timoti 3:16) Kwakhona isixelela ukuba “ilizwi likaThixo liphilile kwaye linamandla.” (Hebhere 4:12) Kungenxa yeso sizathu le nto amazwi obulumko afumaneka eBhayibhileni esexesheni yaye eluncedo kuthi namhlanje. AmaNgqina kaYehova aya kukuvuyela ukukunceda ukuba ufunde ngalo Mniki unobubele, uYehova uThixo, ukuze ufumane “ingxowa ezele ubulumko” efumaneka eBhayibhileni—incwadi yobulumko enesigidimi sabantu bonke namhlanje.
[Imibhalo esemazantsi]
a Le ngcaphulo ithatyathwe kweyoku-1 kwabaseKorinte 12:21, 22.
c Ipapashwe yiWatchtower Bible and Tract Society of New York, Inc.
f Mateyu 6:21-23; umbhalo osemazantsi weNW.
[Ibhokisi/Umfanekiso okwiphepha 4]
Amazwi Obulumko Okukugcina Ulungelelene Ngokweemvakalelo
“Ukuba uthe wabunqala ubugwenxa, Yehova, ngubani na ongaba nokuma, Nkosi? Ngokuba kunawe ukuxolela ukuze woyikwe.”—INdumiso 130:3, 4.
“Intliziyo evuyileyo iyabuchwayithisa ubuso; ekubulalekeni kwentliziyo umoya uthi dakumba.”—IMizekeliso 15:13.
“Musa ukuba lilungisa ngokukhulu, ungabi sisilumko ngokugqithiseleyo; yini na ukuba uziphanzise?”—INtshumayeli 7:16.
“Kukho uyolo olungakumbi ekupheni kunokuba lukho ekwamkeleni.”—IZenzo 20:35.
“Qumbani, ukanti ningoni; malingatshoni ilanga nikwimo yokucaphuka.”—Efese 4:26.
[Ibhokisi/Umfanekiso okwiphepha 5]
Amazwi Obulumko Obomi Bentsapho Eyonwabileyo
“Iingcinga ziyatshitsha ngokungabikho kokucweya; ke zona zima ngamaphakathi amaninzi.”—IMizekeliso 15:22.
“Intliziyo yonengqondo irhweba ukwazi; nendlebe yezilumko ifuna ukwazi.”—IMizekeliso 18:15.
“Ziilamuni zegolide kwizitya zesilivere ezimakhazikhazi ilizwi elithethwe latyapha.”—IMizekeliso 25:11.
“Qhubekani ninyamezelana yaye nixolelana ngesisa ukuba nabani na unonobangela wokukhalazela omnye. Kwananjengoko noYehova wanixolela ngesisa, yenzani njalo nani. Kodwa, ngaphandle kwazo zonke ezi zinto, yambathani uthando, kuba lungumxokelelwane ogqibeleleyo womanyano.”—Kolose 3:13, 14.
“Yazini oku, bazalwana bam abaziintanda. Wonke umntu umele akhawuleze ukuva, acothe ukuthetha, acothe ukuqumba.”—Yakobi 1:19.
[Ibhokisi/Umfanekiso okwiphepha 6]
Amazwi Obulumko Okuphumelela Ebomini
“Isikali esikhohlisayo singamasikizi kuYehova; ilitye elizeleyo lilikholo kuye.”—IMizekeliso 11:1.
“Ikratshi likhokela intshabalalo; ukuzidla kukhokela ukukhubeka.”—IMizekeliso 16:18.
“Ngumzi otyhoboziweyo, ongenaludonga, indoda engenakuzibamba umoya wayo.”—IMizekeliso 25:28.
“Musa ukungxamela ukuqumba ngomoya wakho, ngokuba ingqumbo ilala esifubeni sezidenge.”—INtshumayeli 7:9.
“Siphose isonka sakho phezu kwamanzi, ngokuba wosifumana kwakuba ziintsuku ezininzi.”—INtshumayeli 11:1.
“Makungaphumi lizwi libolileyo emlonyeni wenu, kodwa mayibe lilo naliphi na ilizwi elilungele ukwakha njengoko kusenokuba yimfuneko, ukuze libanike oko kukholekileyo abevayo.”—Efese 4:29.
[Umfanekiso okwiphepha 7]
Ukufundisisa iBhayibhile linyathelo lokuqala lokuba ufumane “ingxowa ezele ubulumko”