Wonke Umntu Uya Kukhululeka

“Iimbandezelo zeli xesha langoku ndizibalela ekuthini azilingani nayo nantoni na xa zithelekiswa nozuko oluza kutyhilwa kuthi. Kuba ngolindelo lwentumekelelo indalo ilindele ukutyhilwa koonyana bakaThixo. Kuba indalo yathotyelwa kokuphuthileyo, kungengakuthanda kwayo kodwa ngalowo wayithobelayo, ngesizinzi sethemba lokuba nayo indalo ngokwayo iya kukhululwa ekukhotyokisweni kukonakala ize ibe nenkululeko ezukileyo yabantwana bakaThixo. Kuba siyazi ukuba yonke indalo ihleli igcuma kunye kwaye isentlungwini kunye de kube ngoku.”​—⁠ROMA 8:​18-⁠22.

KULE nxalenye yale leta yakhe eya kumaKristu aseRoma, umpostile uPawulos usishwankathela kakuhle isizathu sokuba abantu bangayifumani inkululeko yokwenene yaye ngokufuthi beziva bengento yanto yaye besentlungwini. Kwakhona ucacisa indlela esinokufumana ngayo inkululeko yokwenene.

“Iimbandezelo Zexesha Langoku”

UPawulos akaziboni zincinane “iimbandezelo zeli xesha langoku” xa esithi “azilingani nayo nantoni na xa zithelekiswa nozuko oluza kutyhilwa kuthi.” Ngexesha likaPawulos nasemva koko, amaKristu abandezeleka gqitha ngaphantsi kolawulo olwalungqwabalala nelobuzwilakhe lwamaRoma, awayengawakhathalele kangako amalungelo abantu. Ngesinye isihlandlo iRoma yayikholelwa ukuba amaKristu alutshaba lukaRhulumente, yaza yawacinezela ngendlela ekhohlakeleyo. Umbhali-mbali uJ. M. Roberts uthi: “AmaKristu amaninzi kwikomkhulu [laseRoma] ngokuqinisekileyo atshabalala kabuhlungu kwesi siganeko apho abantu babetshiswa bephila.” (Shorter History of the World) Ithetha ngamaxhoba entshutshiso kaNero, enye ingxelo ithi: “Abanye babethelelwa, abanye bathungelwa izikhumba zezilwanyana baza baqwengwa zizinja, abanye baqatywa itela baza batshiswe ngomlilo ukuze bakhanyise xa kumnyama.”​—⁠New Testament History, nguF. F. Bruce.

Ngokuqinisekileyo loo maKristu enkulungwane yokuqala ayenokuthanda ukukhululwa kwingcinezelo enjalo, kodwa ayengazimiselanga ukwaphula iimfundiso zikaYesu Kristu ukuze akhululwe. Ngokomzekelo, ahlala engoondilele kwimfazwe eyayiphakathi kwabalawuli baseRoma nabalweli abangamaYuda benkululeko abanjengamaZealot. (Yohane 17:​16; 18:​36) KumaZealot, “ukuthetha ngokulinda ixesha likaThixo elifanelekileyo kwakungeyonto eyayifuneka kuloo mbambano yayikho.” Athi oko kwakufuneka, “yayikukuhlasela olo tshaba,” luyiRoma. (New Testament History) AmaKristu enkulungwane yokuqala acinga ngokwahlukileyo. “Ukulinda ixesha likaThixo elifanelekileyo” kwakukukuphela kwesicombululo esisengqiqweni ababenaso. Ayeyisekile lelokuba nguThixo kuphela owayeza kungenelela ngokupheleleyo aze aphelise “iimbandezelo zeli xesha langoku” aze azise inkululeko yokwenene, neya kuhlala ihleli. (Mika 7:⁠7; Habhakuki 2:⁠3) Ngaphambi kokuba siqwalasele ukuba kuya kwenzeka njani na oko, makhe sihlolisise isizathu sokuba “indalo yathotyelwa kokuphuthileyo” ekuqaleni.

“Yathotyelwa Kokuphuthileyo”

Apha igama elithi “indalo,” utsho uBenjamin Wilson kwiThe Emphatic Diaglott, alithethi “indalo ekhohlakeleyo njengezilwanyana” njengokuba abanye besitsho, kunoko lithetha, “lonke uluntu.” (Thelekisa abaseKolose 1:​23.) Libhekisela kuyo yonke intsapho engabantu​—⁠sonke thina bantu banqwenela inkululeko. ‘Sathotyelwa kokuphuthileyo’ ngenxa yoko kwenziwa ngabazali bethu bokuqala. ‘Yayingekuko ukuthanda [kwethu]’ okanye umphumo wokuzikhethela okwabangela oku. Sayizuza njengelifa imeko yethu. Ngokwembono yeZibhalo, uRousseau wayephazama xa wathi “umntu wazalwa ekhululekile.” Ngamnye wethu wazalelwa ebukhobokeni besono nokungafezeki, elikhoboka ngokungathi kunjalo, kwinkqubo ezaliswe ziinkathazo nokuphuthileyo.​—⁠Roma 3:⁠23.

Kwakutheni ukuze kube njalo? Kwakungenxa yokuba abazali bethu bokuqala, uAdam noEva, babefuna ‘ukufana noThixo,’ benze abakuthandayo baze bazigqibele ngokwabo ngoko kulungileyo nokubi. (Genesis 3:⁠5) Batyeshela isibakala esinye esibalulekileyo ngenkululeko. NguMdali kuphela onokuba nenkululeko egqibeleleyo. UnguMongami Wendalo Iphela. (Isaya 33:​22; ISityhilelo 4:​11) Inkululeko yomntu ithetha inkululeko esikelwe imida. Kungenxa yeso sizathu umpostile uYakobi wakhuthaza amaKristu ngomhla wakhe ukuba alawulwe ‘ngumthetho ogqibeleleyo wenkululeko.’​—⁠Yakobi 1:⁠25.

UYehova wamgxotha ngokufanelekileyo uAdam noEva kwintsapho yakhe yendalo iphela, ngenxa yoko bafa. (Genesis 3:​19) Kodwa kuthekani ngenzala yabo? Nangona kwakuza kufuneka badlulisele ukungafezeki, isono nokufa, ngenceba yakhe uYehova wabavumela ukuba bazale abantwana. Ngoko ke “ukufa kwasasazeka kubo bonke abantu.” (Roma 5:​12) Ngaloo ndlela uThixo ‘wathobela [indalo] kokuphuthileyo.’

“Ukutyhilwa Koonyana BakaThixo”

UYehova wathobela indalo kokuphuthileyo “ngesizinzi sethemba” lokuba ngenye imini inkululeko iya kubuyiselwa kwintsapho engabantu ngenxa yemisebenzi ‘yoonyana bakaThixo.’ Ngoobani aba “nyana bakaThixo”? Ngabafundi bakaYesu Kristu abathi, njengayo yonke “indalo [engabantu],” bazalwe bengamakhoboka esono nokungafezeki. Bazalwa bengenayo indawo kwintsapho kaThixo ecocekileyo, negqibeleleyo yendalo iphela. Kodwa uYehova ubenzela into ekhethekileyo. Ngedini lentlawulelo likaYesu Kristu, uyabakhulula kwisono abasizuz’ ilifa aze abavakalise ‘bengamalungisa,’ okanye becocekile ngokomoya. (1 Korinte 6:​11) Emva koko ubamkela ‘njengoonyana bakaThixo,’ ebabuyisela kwintsapho yakhe yendalo iphela.​—⁠Roma 8:​14-⁠17.

Njengabo uYehova abamkele njengoonyana, baya kuba nelungelo elizukileyo. Baya kuba ‘ngababingeleli kuThixo wethu yaye baza kulawula njengookumkani phezu komhlaba’ kunye noYesu Kristu njengenxalenye yoBukumkani bukaThixo basezulwini, okanye urhulumente. (ISityhilelo 5:​9, 10; 14:​1-⁠4) Lo ngurhulumente omiselwe ngokuqinileyo kwimigaqo yenkululeko nokusesikweni​—⁠kungekhona kwingcinezelo nembandezelo. (Isaya 9:​6, 7; 61:​1-⁠4) Umpostile uPawulos uthi aba nyana bakaThixo bazizinxulumani zikaYesu, ‘imbewu ka-Abraham eyathenjiswa kudala.’ (Galati 3:​16, 26, 29) Ngenxa yoko, banendima enkulu ekuzalisekeni kwesithembiso uThixo awasenza kumhlobo wakhe uAbraham. Inxalenye yeso sithembiso ikukuba ngembewu (okanye inzala) ka-Abraham, ‘ziya kuzisikelela zonke iintlanga zomhlaba.’​—⁠Genesis 22:⁠18.

Yiyiphi intsikelelo eziswa ebantwini? Oonyana bakaThixo banesabelo ekukhululeni intsapho engabantu kwimiphumo ebuhlungu yesono sika-Adam nasekubuyiseleni uluntu kwimfezeko. Abantu ‘abaphuma kuzo zonke iintlanga nezizwe namaqela abantu’ banokuzigcina ngokuqhelisela ukholo kwidini lentlawulelo likaYesu Kristu nangokuzithoba kulawulo lwakhe loBukumkani olunesisa. (ISityhilelo 7:​9, 14-17; 21:​1-⁠4; 22:​1, 2; Mateyu 20:​28; Yohane 3:​16) Ngale ndlela “yonke indalo” iya kuphinda inandiphe ‘inkululeko yabantwana bakaThixo.’ Le ayiyi kuba yinkululeko esikelw’ umda, neyethutyana yezobupolitika, kunoko, inkululeko kuyo yonke into eye yabangela intlungu nenkxwaleko kwintsapho yabantu ukususela oko uAdam noEva bathi balugatya ulongamo lukaThixo. Akumangalisi ke ngoko ukuba umpostile uPawulos athi “iimbandezelo zeli xesha langoku ndizibalela ekuthini azilingani nayo nantoni na” xa zithelekiswa nozuko oluya kuphunyezwa ngabo bathembekileyo!

Kuqala nini “ukutyhilwa koonyana bakaThixo”? Kungekudala ukususela ngoku, xa uYehova ebenza bacace kubo bonke abo bangoonyana bakaThixo. Oku kuya kwenzeka xa aba “nyana,” bevuselwa kummandla womoya, bekunye noYesu Kristu ekucoceni lo mhlaba kubo bonke ubungendawo nengcinezelo kwimfazwe kaThixo yeArmagedon. (Daniyeli 2:​44; 7:​13, 14, 27; ISityhilelo 2:​26, 27; 16:​16; 17:​14; 19:​11-21) Singqongwe bubungqina obuninzi obubonisa ukuba siphakathi ‘kwimihla yesiphelo,’ xa ukunyamezela kukaThixo imvukelo nemiphumo yayo yobungendawo kuya kuphela.​—⁠2 Timoti 3:​1-⁠5; Mateyu 24:​3-⁠31.

Ewe, kuyinyaniso, njengokuba umpostile uPawulos esitsho ukuba “yonke indalo ihleli igcuma kunye kwaye isentlungwini kunye de kube ngoku”​—⁠kodwa oko akuyi kuthabatha ithuba elide. Izigidi eziphilayo ngoku ziya kubona ‘ukubuyiselwa kwezinto zonke awathetha ngako uThixo ngomlomo wabaprofeti bakhe abangcwele bexesha lakudala,’ kuquka nokubuyiselwa koxolo, inkululeko, nobulungisa kuyo yonke intsapho engabantu.​—⁠IZenzo 3:⁠21.

Ekugqibeleni Inkululeko Yokwenene

Yintoni omele uyenze ukuze unandiphe le ‘nkululeko izukileyo yabantwana bakaThixo’? UYesu Kristu wathi: “Ukuba nithe nahlala kulo izwi lam, ngokwenene ningabafundi bam, yaye niya kuyazi inyaniso, ibe inyaniso iya kunikhulula.” (Yohane 8:​31, 32) Lowo ngundoqo okhokelela kwinkululeko​—⁠ukufunda uze uthobele imiyalelo neemfundiso zikaKristu. Oku kubangela umlinganiselo othile wenkululeko kwanangoku. Kwixesha elingekude elizayo, iya kuzisa inkululeko yokwenene ngaphantsi kolawulo lukaKristu Yesu. Ikhondo lobulumko kukwazi “izwi” likaYesu ngokufundisisa iBhayibhile. (Yohane 17:⁠3) NjengamaKristu okuqala, nxulumana rhoqo nebandla labafundi bakaKristu bokwenyaniso. Ngokwenjenjalo, unokungenelwa kwiinyaniso ezikhululayo uYehova azenza zifumaneke ngentlangano yakhe namhlanje.​—⁠Hebhere 10:​24, 25.

Ngoxa ‘ulinde ukutyhilwa koonyana bakaThixo,’ unokuhlakulela intembelo awayenayo umpostile uPawulos kwinkuselo nenkathalo kaKristu, kwanaxa ubona ukuba iintlungu nokungabikho kokusesikweni kubonakala ngathi akunyamezeleki. Emva kokuxubusha ukutyhilwa koonyana bakaThixo, uPawulos wabuza: “Ngubani na oya kusahlula eluthandweni lukaKristu? Ngaba yimbandezelo okanye yinkxwaleko okanye yintshutshiso okanye kukulamba okanye bubuze okanye yingozi okanye likrele?” (Roma 8:​35) Kakade ke, amaKristu ngomhla kaPawulos ayefanele asebenzise amazwi kaRousseau athi ‘akhonkxiwe’ ngenxa yokucinezelwa yimikhosi eyahlukahlukeneyo. ‘Mihla yonke ayebulawa, egqalwa njengezimvu zokuxhelwa.’ (Roma 8:​36) Ngaba bakuvumela oko kwaboyisa?

UPawulos uyabhala: “Ngokwahlukileyo koko, kuzo zonke ezi zinto siphumelela soyise ngokupheleleyo ngaye lowo wasithandayo.” (Roma 8:​37) Ngaba amaKristu enkulungwane yokuqala oyisa ngaphezu kwako nje oko kwafuneka akunyamezele? Njani? Uphendula athi: “Kuba ndeyisekile kukuba kwanokufa nobomi neengelosi noorhulumente nezinto ezilapha ngoku nezinto eziza kuza namandla nomphakamo nobunzulu naso nasiphi na esinye isidalwa aziyi kuba nako ukusahlula eluthandweni lukaThixo olukuye uKristu Yesu iNkosi yethu.” (Roma 8:​38, 39) Nawe ‘usenokoyisa’ kuyo yonke ‘imbandezelo okanye inkxwaleko okanye intshutshiso’ ekusenokufuneka uyinyamezele ngoku. Uthando lukaThixo lusiqinisekisa ukuba kungekudala​—⁠ngoku​—⁠‘siya kukhululwa ekukhotyokisweni size sifumane inkululeko ezukileyo yabantwana bakaThixo.’

[Imifanekiso ekwiphepha 6]

“Yonke indalo ihleli igcuma kunye kwaye isentlungwini kunye de kube ngoku”

[Umfanekiso okwiphepha 7]

‘Indalo iya kukhululwa ekukhotyokisweni kukonakala ize ibe nenkululeko ezukileyo yabantwana bakaThixo’