Phaphani Nize Nikhuthale!
“Ngoko ke, hlalani nilindile, ngenxa yokuba ningayazi imini okanye ilixa.”—MATEYU 25:13.
1. Yintoni awayekhangele phambili kuyo umpostile uYohane?
KWINCOKO yakhe yokugqibela eseBhayibhileni, uYesu wathembisa: “Ndiyeza ngokukhawuleza.” Umpostile wakhe uYohane waphendula: “Amen! Yiza, Nkosi Yesu.” Lo mpostile wayeqinisekile ukuba uYesu wayeza kuza. Kaloku uYohane wayengomnye wabapostile ababebuze uYesu besithi: “Ziya kubakho nini na ezi zinto, kwaye uya kuba yintoni na umqondiso wobukho bakho [ipa·rou·siʹa ngesiGrike] nowokuqosheliswa kwenkqubo yezinto?” Ewe, ngentembelo uYohane wayekhangele phambili kubukho bukaYesu bexesha elizayo.—ISityhilelo 22:20; Mateyu 24:3.
2. Ngokuphathelele ubukho bukaYesu, injani imeko ezicaweni?
2 Intembelo enjalo inqabile namhlanje. Uninzi lweecawa lunayo imfundiso esemthethweni ephathelele “ukuza” kukaYesu, kodwa ambalwa amarhamente azo akulindele ngokwenene. Izenzo zawo zintama loo nto kanye. Incwadi ethi The Parousia in the New Testament ithi: “Incinane kakhulu impembelelo entle elinayo ithemba le-Parousia kubomi, iingcinga nakumsebenzi wecawa. . . . Ungxamiseko efanele icawa iyiphumeze ngalo imisebenzi yayo yokuguqula nokushunyayelwa kwevangeli, lubuthathaka ukuba phofu lusekho.” Kodwa akunjalo kuye wonk’ ubani!
3. (a) AmaKristu okwenyaniso ayigqala njani ipa·rou·siʹa? (b) Yintoni esiza kuyiqwalasela ngokukhethekileyo?
3 Abafundi bokwenene bakaYesu bakulindele ngolangazelelo ukuphela kwale nkqubo ikhoyo yezinto. Xa sisenza oko ngokunyaniseka, kufuneka sibe nembono efanelekileyo ngayo yonke into ebandakanya ubukho bukaYesu size senze ngokuvisisana naloo mbono. Oko kuya kusenza sikwazi ‘ukunyamezela kude kube sekupheleni size sisindiswe.’ (Mateyu 24:13) Xa wayedlulisela isiprofeto esisifumana kuMateyu isahluko 24 nesama-25, uYesu wanikela icebiso lobulumko esinokulisebenzisa, ibe loo nto iya kuhlala iyingelo kuthi. Isahluko 25 siqulethe imizekeliso ekusenokwenzeka ukuba uyayazi, omnye ngoweentombi ezilishumi (iintombi eziziingqondi nezizizidenge) kunye nomzekeliso weetalente. (Mateyu 25:1-30) Sinokungenelwa njani yile mizekeliso?
Phapha, Njengeentombi Ezintlanu!
4. Iyintoni eyona ngongoma yomzekeliso weentombi?
4 Mhlawumbi uya kuthanda ukuwufunda kwakhona lo mzekeliso weentombi, ofumaneka kuMateyu 25:1-13. Kaloku le nto yenzeka kwisihika-hika somtshato wamaYuda athi umyeni aye kuphuthuma umtshakazi kowabo aze amse kowabo (kulomyeni). Kolo ngcelele kusenokwenzeka ukuba kukho iimvumi nemilonji, yaye akwaziwa ukuba luya kufika nini na kanye. Kulo mzekeliso, iintombi ezilishumi zazilinde ukufika komyeni de kwasebusuku. Ngobudenge ezintlanu zazingaphethanga oli yaneleyo yezibane ibe ngaloo ndlela kwafuneka zihambe ziye kuthenga enye. Ukanti ezinye ezintlanu ngobulumko zeza neoli eyongezelelekileyo kwizikhongozelo ukuze zikwazi ukuzalisa izibane zazo xa kuyimfuneko ngoxa zisalindile. Zezi zintlanu kuphela ezazikho yaye zilungile xa myeni wafikayo. Ngenxa yoko, zizo kuphela ezavunyelwayo ukuba zingene kwelo theko. Xa iintombi ezintlanu ezizizidenge zabuyayo, zazisele zishiywe lixesha yaye zingasenakungena.
5. Ziziphi izibhalo ezisikhanyiselayo ngentsingiselo yokomfuziselo yomzekeliso weentombi?
5 Zininzi iinkalo zalo mzekeliso ezinokuqondwa njengezifuziselayo. Ngokomzekelo, iZibhalo zichaza uYesu ngokuthi ngumyeni. (Yohane 3:28-30) UYesu wazifanisa nonyana wokumkani othile owenzelwa itheko lomtshato. (Mateyu 22:1-14) Kwaye iBhayibhile ifanisa uKristu nendoda enomfazi. (Efese 5:23) Okubangel’ umdla kukuba, ngoxa amaKristu athanjisiweyo kwenye indawo ebizwa ngokuba ‘ngumtshakazi’ kaKristu, lo mzekeliso awumkhankanyi umtshakazi. (Yohane 3:29; ISityhilelo 19:7; 21:2, 9) Noko ke, uyathetha ngeentombi ezilishumi, yaye kwenye indinyana abathanjiswa bafaniswa nentombi ethenjiswe ukutshatiselwa kuKristu.—2 Korinte 11:2.a
6. Sisiphi isibongozo esadluliselwa nguYesu xa wayequkumbela umzekeliso weentombi?
6 Nangaphandle kwezo nkcukacha kunye nayo nayiphi na intsingiselo engokwesiprofeto, ngokuqinisekileyo ikho imigaqo emihle esinokuyifunda kulo mzekeliso. Ngokomzekelo, phawula ukuba uYesu wawuqukumbela ngamazwi athi: “Ngoko ke, hlalani nilindile, ngenxa yokuba ningayazi imini okanye ilixa.” Ngoko lo mzekeliso ubonisa imfuneko yokuba ngamnye kuthi aphaphe, athi qwa njengoko isiphelo sale nkqubo yezinto sisondela. Esi siphelo siyeza ngokuqinisekileyo, nangona ke singenakuwutyumba umhla. Kulo mba, khawuqwalasele izimo zengqondo ezabonakaliswa ngala maqela mabini eentombi.
7. Kungayiphi ingqiqo ezathi iintombi ezintlanu zomzekeliso zangqineka zizizidenge?
7 UYesu wathi: “Ezintlanu zazo zazizizidenge.” Ngaba kwakungenxa yokuba zazingakholelwa ukuba umyeni uyeza? Ngaba zazisathe swii ziziyolo? Okanye ke ngaba zazilahlekisiwe? Akukho nanye echanileyo kwezi. UYesu wathi ezi ntombi zintlanu “zaphuma zaya kuhlangabeza umyeni.” Zazisazi ukuba uyeza, ibe zazifuna ukuba lapho nazo, zibekho “kwitheko lomtshato.” Kodwa ke, ngaba zazizilungiselele ngokwaneleyo? Zamlinda okwethutyana de ‘kwaphakathi kobusuku,’ kodwa ke zazingakulungelanga ukufika kwakhe enoba ufika nini na—enoba wayeza kufika ngaphambilana okanye emva kwexesha ezazimlindele ngalo.
8. Iintombi ezintlanu zomzekeliso zangqineka njani ziziingqondi?
8 Nezinye ezintlanu—uYesu awazibiza ngokuthi ziingqondi—zaya ziphethe izibane ezikhanyisiweyo, zalinda ukufika komyeni. Nazo kwafuneka zilinde, kodwa ke zona ‘zaziziingqondi.’ Igama lesiGrike eliguqulelwe ngokuthi “ingqondi” linokudlulisela ingcamango yokuba “nobulumko, nengqondo, nobuqili.” Ezi ntombi zintlanu zazingqina ziziingqondi ngokuza nezikhongozelo zazo zineoli eyongezelelekileyo ukuze zizalise izibane zazo xa kuyimfuneko. Enyanisweni, zazizimisele ukuhlala zilungile xa umyeni efika kangangokuba zazingenakunanisa ngeoli yazo. Ukuphapha kwazo kwangqineka kufanelekile, kuba zazikho yaye zizilungiselele ngokupheleleyo akufika umyeni. Ezo “zazilungile zangena naye kwitheko lomtshato; yaye ucango lwavalwa.”
9, 10. Iyintoni eyona ngongoma yomzekeliso weentombi, yaye yiyiphi imibuzo esifanele sizibuze yona?
9 UYesu wayengafundisi abantu ngendlela yokwenza izinto emitshatweni, kananjalo wayenganikeli siluleko ngokwabelana nabanye abantu. Ingongoma yakhe yayiyile: “Ngoko ke, hlalani nilindile, ngenxa yokuba ningayazi imini okanye ilixa.” Khawuzibuze, ‘Ngaba ndibuphaphele ngokwenene ubukho bukaYesu’? Siyakholwa ukuba uYesu sele elawula ezulwini, kodwa siyifake kangakanani ezingqondweni zethu into yokuba ‘kungekudala uNyana womntu uza kuza esemafini ezulu enamandla nozuko olukhulu’? (Mateyu 24:30) Ngokuqinisekileyo ixesha ‘laphakathi kobusuku,’ xa umyeni wafikayo, lalikufutshane kunokuba lalinjalo xa ezi ntombi zaziphuma zisiya kumhlangabeza. Ngokufanayo, ixesha lokufika koNyana womntu eze kutshabalalisa le nkqubo ikhoyo yezinto likufutshane kunokuba lalinjalo xa sasiqalisa ukulindela ukuza kwakhe. (Roma 13:11-14) Ngaba siye sazigcina siphaphile, siphaphe nangaphezulu njengoko isiphelo sisondela?
10 Ukuze sithobele umyalelo othi “hlalani nilindile” kufuneka sihlale siphaphile. Iintombi ezintlanu zayeka ioli yazo yaphela zaza zaya kuthenga enye. Nanamhlanje umKristu unokuphazamiseka de angakulungeli ngokupheleleyo ukufika kukaYesu okusele kumbovu. Le nto yenzeka kwamanye amaKristu enkulungwane yokuqala. Inokwenzeka nakwabanye namhlanje. Ngoko masizibuze, ‘Ngaba iyenzeka kum?’—1 Tesalonika 5:6-8; Hebhere 2:1; 3:12; 12:3; ISityhilelo 16:15.
Khuthala Njengoko Isiphelo Sisondela
11. Nguwuphi umzekeliso awalandelisa ngawo uYesu, yaye wawufana nawuphi?
11 Kumzekeliso wakhe olandelayo, uYesu akazange aphelele ekubongozeni abalandeli bakhe ukuba baphaphe. Emva kokubalisa ngeentombi ezizizilumko nezizizidenge, wabalisa umzekeliso weetalente. (Funda uMateyu 25:14-30.) Lo mzekeliso ufana ngezinto ezininzi nomzekeliso wangaphambilana weemina, uYesu awawenza ngenxa yokuba abaninzi “babesiba ubukumkani bukaThixo babuza kuzibonakalisa ngephanyazo.”—Luka 19:11-27.
12. Iyintoni eyona ngongoma yomzekeliso weetalente?
12 Kumzekeliso weetalente, uYesu wabalisa ngendoda ethile eyathi, ngaphambi kokuba ithabathe uhambo oluya kude, yabiza amakhoboka ayo amathathu. Elinye yaliphathisa iitalente ezintlanu, elinye zambini, yaye elokugqibela yalinika yanye nje kuphela—“ngalinye ngokwamandla alo.” Kusenokwenzeka ukuba yayiyitalente yesilivere le kuthethwa ngayo, isixa semali ngoko esasingumvuzo womsebenzi weminyaka eli-14—isityhwentye semali! Ekubuyeni kwayo le ndoda, yathi la makhoboka makanikele ingxelo ngoko akwenzileyo ebudeni belo “xesha elide” eyayingekho ngalo. Amakhoboka amabini okuqala ayeyiphindaphinde kabini loo nto awayeyiphathisiwe. Yathi ‘nenze kakuhle,’ yaza yathembisa ngalinye ngokulinika imbopheleleko engakumbi, iqukumbela ngelithi: ‘Ngenani kuvuyo lwenkosi yenu.’ Limi ngelithi inkosi yalo ingumntu onyanzelisayo, ikhoboka elalinetalente enye lalingayisebenzisanga ngokuyingenelo loo talente. Layifihla loo mali, alizange liyifake nasebhankini ukuze ibe nenzala. Inkosi yalo yalichaza ngokuthi ‘lingendawo yaye lidangele’ kuba lalenze okunxamnye nezilangazelelo zenkosi yalo. Ekugqibeleni, yahluthwa loo talente kulo laza laphoswa phandle apho “kuya kubakho ukulila kwalo nokutshixiza kwamazinyo alo.”
13. UYesu wazingqina njani efana nenkosi ekuthethwa ngayo kuloo mzekeliso?
13 Kwakhona, iinkcukacha zalo mzekeliso zinokujongwa ngelifuziselayo. Ngokomzekelo, uYesu, ofanekiselwa yindoda eya kwilizwe elikude, wayeza kushiya abapostile bakhe aye ezulwini, aze alinde ixesha elide de afumane amandla obukumkani.b (INdumiso 110:1-4; IZenzo 2:34-36; Roma 8:34; Hebhere 10:12, 13) Noko ke, nakulo mzekeliso sinako ukufumana isifundo okanye umgaqo ophangaleleyo esifanele siwusebenzise sonke kubomi bethu. Nguwuphi loo mgaqo?
14. Umzekeliso weetalente ugxininisa yiphi imfuneko ebalulekileyo?
14 Enoba sinethemba lokuphila ubomi bokungafi ezulwini okanye lokuphila ubomi obungunaphakade kumhlaba oyiparadesi, ngokutsho kwalo mzekeliso kaYesu kucacile ukuba sifanele sizibhokoxe kwimisebenzi yamaKristu. Enyanisweni, isigidimi salo mzekeliso sinokushwankathelwa ngegama elinye: inkuthalo. Ukususela ngePentekoste yowama-33 C.E. abapostile bahlahl’ indlela. Sifunda oku: “Ngamanye amazwi amaninzi [uPetros] wanikela ubungqina obucokisekileyo waza wathi gqolo ebabongoza, esithi: ‘Sindiswani kwesi sizukulwana sigoso.’ ” (IZenzo 2:40-42) Yaye enjani ukuba mihle imiphumo awayifumana ngemigudu yakhe! Njengoko abanye babethelela abapostile kumsebenzi wamaKristu wokushumayela, nabo bakhuthala, ibe iindaba ezilungileyo ‘zanda kulo lonke ihlabathi.’—Kolose 1:3-6, 23; 1 Korinte 3:5-9.
15. Kungayiphi indlela ekhethekileyo esifanele siyisebenzise ngayo ingongoma eyintloko yomzekeliso weetalente?
15 Ungawulibali umongo walo mzekeliso—sisiprofeto esiphathelele ubukho bukaYesu. Sinabo ubungqina obubambekayo bokuba sele iqhubeka ipa·rou·siʹa kaYesu yaye kungekudala iza kufikelela incopho yayo. Khumbula xa uYesu wayenxibelelanisa “ukuphela” nomsebenzi ekwakufuneka amaKristu awenze: “Ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga; kwandule ke kufike ukuphela.” (Mateyu 24:14) Sinaloo nto ezingqondweni, sicinga ukuba singamakhoboka anjani? Khawuzibuze: ‘Ngaba sikho isizathu sokuba ndicinge ukuba ndinjengekhoboka elakufihlayo oko likuphathisiweyo, mhlawumbi ngoxa lalisaxakeke zezalo? Okanye ngaba ndibonakala ndifana namakhoboka alungileyo nathembekileyo? Ngaba ndizinikele ngokupheleleyo ekwandiseni izilangazelelo zeNkosi ngawo onke amathuba?’
Ukuphapha Nokukhuthala Ebudeni Bobukho Bakhe
16. Sisiphi isigidimi osifumana kule mizekeliso mibini esiye sayixubusha?
16 Ewe, nangaphandle kwentsingiselo yayo engokomfuziselo nengokwesiprofeto, le mizekeliso mibini isinika ukhuthazo olucacileyo olusuka kuYesu ngokungqalileyo. Isigidimi sithi: Phapha; khuthala, ngokukodwa xa ubonakala umqondiso wepa·rou·siʹa kaKristu. Ngamany’ amazwi yenze ngoku loo nto. Ngoko ngaba ngokwenene siphaphile yaye sikhuthele?
17, 18. Sisiphi isiluleko esanikelwa ngumfundi uYakobi ngokuphathelele ubukho bukaYesu?
17 Umninawa kaYesu ngonina, uYakobi, akazange asive isiprofeto sikaYesu awasidlulisela kwiNtaba yemiNquma kuba wayengekho; kodwa kamva wasazi, waza wayibona ngokucacileyo indlela esibaluleke ngayo. Wabhala: “Qheliselani umonde, ke ngoko, bazalwana, de ibe bubukho beNkosi. Khangelani! Umfama uhlala elindele isiqhamo esixabisekileyo somhlaba, eqhelisela umonde ngenxa yaso de afumane imvula yokuqala nemvula yamva. Nani qheliselani umonde; zenzeni ziqine iintliziyo zenu, ngenxa yokuba ubukho beNkosi busondele.”—Yakobi 5:7, 8.
18 Akuba enikele isiqinisekiso sokuba uThixo uya kubagweba ngokuqatha abo basebenzisa kakubi ubutyebi babo, uYakobi wabongoza amaKristu ukuba angasweli umonde xa elinde uYehova ukuba athabathe amanyathelo. UmKristu ongenamonde usenokufukama inzondo, ngokungathi nguye siqu omele alungise iziphoso ezenziweyo. Noko ke, oko akumele kube njalo kuba ngokuqinisekileyo ixesha lomgwebo liza kufika. Umzekelo womfama uyenza icace loo nto, njengoko uYakobi wacacisayo.
19. Hlobo luni lomonde olwalunokubonakaliswa ngumfama ongumSirayeli?
19 Xa umfama wakwaSirayeli etyale imbewu, okokuqala kwakufuneka alinde de intshule, alinde eso sityalo sikhule, aze ekugqibeleni alinde isivuno. (Luka 8:5-8; Yohane 4:35) Ebudeni bezo nyanga, kwakubakho amaxesha yaye mhlawumbi nezizathu zokuxhalaba. Ngaba iimvula zokuqala zaziza kuna ngokwaneleyo? Kuthekani ngezinye iimvula? Ngaba kwakungayi kufika izinambuzane okanye isichotho size sizivuthulule ezo zityalo? (Thelekisa uYoweli 1:4; 2:23-25.) Noko ke, kuyo yonke loo nto umfama wakwaSirayeli wayenokukholosa ngoYehova nangemijikelo yemvelo ayimiseleyo. (Duteronomi 11:14; Yeremiya 5:24) Umonde waloo mfama wawunokumenza abe nolindelo lokuba izinto ziya kuhamba kakuhle. Ukholo lwaluya kumenza azi ukuba oko akulindeleyo kwakuza kwenzeka. Ngokwenene kwakuza kwenzeka!
20. Sinokuwubonakalisa njani umonde ngokuvisisana nesiluleko sikaYakobi?
20 Ngoxa umfama esenokulazi ixesha lokuvuna, amaKristu enkulungwane yokuqala ayengakwazi ukulibala ixesha lobukho bukaYesu. Kodwa ke ngokuqinisekileyo laliza kufika elo xesha. UYakobi wabhala: “Ubukho [ipa·rou·siʹa ngesiGrike] beNkosi busondele.” Xa uYakobi wayebhala loo mazwi, wawungekabonakali ngomlinganiselo omkhulu, okanye ehlabathini lonke, umqondiso wobukho bukaKristu. Kodwa nanku siwubona namhlanje! Ngoko sifanele sivakalelwe njani kweli xesha lethu? Nanku umqondiso phambi kwamehlo ethu. Siyawubona. Sinokutsho siqinisekile sithi, ‘Ndiyawubona umqondiso uzaliseka.’ Sinokutsho ngokuqinisekileyo sithi, ‘Ubukho beNkosi bufikile yaye incopho yabo isemnyango.’
21. Yintoni esizimisele ngokupheleleyo ukuyenza?
21 Ekubeni kunjalo ke, sinesizathu esikhethekileyo sokuba sisamkele yaye sisisebenzise isifundo esingundoqo esidluliselwa yimizekeliso emibini kaYesu esisele siyixubushile. Wathi: “Ngoko ke, hlalani nilindile, ngenxa yokuba ningayazi imini okanye ilixa.” (Mateyu 25:13) Ngoku ngokuqinisekileyo lixesha lokuba siyizondelele inkonzo yethu yamaKristu. Masibonise kubomi bethu bemihla ngemihla ukuba siyifumene ingongoma eyadluliselwa nguYesu. Masiphaphe! Masikhuthale!
[Imibhalo esemazantsi]
a Ukuze ufumane iinkcukacha zoko kufuziselwa ngulo mzekeliso, bona incwadi ethi God’s Kingdom of a Thousand Years Has Approached, iphepha 169-211, epapashwe yiWatchtower Bible and Tract Society of New York, Inc.
b Bona incwadi ethi God’s Kingdom of a Thousand Years Has Approached, iphepha 212-56.
Ngaba Usakhumbula?
◻ Sisiphi isigidimi esiyintloko oye wasifumana kumzekeliso weentombi ezilumkileyo nezizizidenge?
◻ Esebenzisa umzekeliso wetalente, liliphi icebiso elibalulekileyo uYesu alinikela kuwe?
◻ Umonde wakho ngokuphathelele ipa·rou·siʹa ufana njani nowomfama ongumSirayeli?
◻ Kutheni eli xesha siphila kulo libangel’ imincili yaye licel’ umgeni?
[Imifanekiso ekwiphepha 23]
Sisiphi isifundo osifumene kumzekeliso weentombi nomzekeliso weetalente?