Uthixo Akacothi Ngokuphathelele Isithembiso Sakhe

“KUNINI na, ndizibika, ungeva; ndikhala kuwe ndisithi, ugonyamelo, ungasindisi?” Lawo ngamazwi omprofeti uHabhakuki, owayephila ngenkulungwane yesixhenxe Ngaphambi kweXesha Eliqhelekileyo. Kodwa akhangeleka ngathi asengqiqweni, akunjalo? Umntu utyekele ekubeni afumane izinto azilangazelela gqitha ngokukhawuleza okanye ngoko nangoko. Oko kunjalo ingakumbi kweli xesha lethu kuba abantu bafuna ulwaneliseko olukhawulezileyo.​—⁠Habhakuki 1:⁠2.

Ngenkulungwane yokuqala, kwakukho abathile ababevakalelwa kukuba uThixo wayemele azizalisekise izithembiso zakhe ngokukhawuleza. Baphelelwa ngumonde kangangokuba babona ukuba uThixo uyacotha okanye wenza kade. Kule ngxelo, umpostile uPetros kwafuneka abakhumbuze ukuba imbono kaThixo ngexesha yahluke gqitha kweyethu. UPetros ubhala esithi: “Esi sibakala sinye masingakhe singaphawuleki kuni, zintanda, ukuba imini enye kuYehova injengeminyaka eliwaka neminyaka eliwaka injengemini enye.”​—⁠2 Petros 3:⁠8.

Ngokwale ndlela yokubala ixesha, umntu oneminyaka engama-80 uphile malunga neeyure ezimbini kuphela, yaye imbali yoluntu ibekho iintsuku ezintandathu nje kuphela. Xa sijonga izinto ngale ndlela, kuba lula kuthi ukuqonda indlela aqhubana ngayo nathi uThixo.

Noko ke, uThixo, akangomntu ungenamdla exesheni. Ngokwahlukileyo koko, ulikhathalele ixesha. (IZenzo 1:⁠7) Ngenxa yoko, uPetros, uqhubeka esithi: “UYehova akacothi ngokuphathelele isithembiso sakhe, njengoko bambi abantu bekugqala ikukucotha, kodwa unomonde kuni ngenxa yokuba akanqweneli ukuba kutshabalale nabani na kodwa unqwenela ukuba bonke bafikelele enguqukweni.” (2 Petros 3:⁠9) Ngokungafaniyo nabantu, uThixo akaziva enyanzelekile ukuba enze izinto ngokungathi ushiywa lixesha. ‘NjengoKumkani kanaphakade,’ ukubona konke okwenzekayo yaye unokugqiba ukuba kunini ekuhambeni kwexesha apho aya kubenzela okulungileyo bonke abantu.​—⁠1 Timoti 1:⁠17.

Emva kokucacisa isizathu sokuba uThixo abonakale ngathi uyacotha, uPetros unikela esi silumkiso: “Imini kaYehova iya kuza njengesela.” Oko kukuthi, imini yokuziphendulela iya kufika kanye ngexesha abantu abangayilindelanga ngayo. Emva koko, kwezi ndinyana zilandelayo, uPetros walatha kwithemba elizukileyo eliya kufunyanwa ngabantu ‘abanezenzo ezingcwele nezenzo zozinikelo lobuthixo,’ nto leyo ethetha ukuba, banokusindela ‘kumazulu amatsha nomhlaba omtsha’ awuthembisileyo uThixo.​—⁠2 Petros 3:​10-⁠13.

Oku kumele kusenze siqonde ngakumbi ukuba umgwebo kaThixo awukafiki. Umonde wakhe usenze sakwazi ukuyazi injongo yakhe saze salungisa ubomi bethu ukuze sikwazi ukufumana iintsikelelo zakhe azithembisileyo. Ngaba asimele siwugqale “umonde weNkosi yethu njengosindiso,” njengokuba uPetros esitsho? (2 Petros 3:​15) Noko ke, kukho esinye isibakala ngokuphathelele umonde kaThixo.

Impazamo Ethile Iza Kuzaliseka

Xa sifundisisa indlela uThixo awaqhubana ngayo noluntu, siphawula ukuba wayesoloko engagwebi de libe liphelile ithemba lokuphucula kwezinto. Ngokomzekelo, ngokuphathelele imigwebo kaThixo kumaKanan, waxelela uAbraham ngezono zawo kwakudala. Kodwa ixesha lokuphunyezwa komgwebo wakhe lalingekafiki. Ngoba? Ngenxa yokuba iBhayibhile ithi: “Kuba ubugwenxa bama-Amori [amaKanan] abukazaliseki,” okanye njengokuba inguqulelo kaKnox ikubeka: “Ubungendawo bama-Amori abukafikeleli incopho.”​—⁠Genesis 15:​16.a

Noko ke, kwiminyaka enokuba ngama-400 kamva, umgwebo kaThixo wafika, yaye inzala ka-Abraham, amaSirayeli, alithabatha elo lizwe. AmaKanan ambalwa, anjengoRahabhi namaGibheyoni asinda ngenxa yesimo sawo sengqondo, nezenzo zawo, kodwa ukongezelela, ayengcole ngaphezu komlinganiselo, njengokuba oko kutyhilwa kukumbiwa kwezinto zakudala. Ayenqula amalungu esini, enoonongogo basetempileni, yaye ebingelela ngabantwana. IHalley’s Bible Handbook ithi: “Abembi bezinto zakudala abemba amabhodlo ezixeko zamaKanan bazibuza isizathu sokuba uThixo angawatshabalalisi ngokukhawuleza kunokuba wenzayo.” Ekugqibeleni, ‘umlinganiselo wesono samaKanan wawanele’; ubungendawo bawo ‘babuzalisekile.’ Akakho omnye umntu owayenokutyhola uThixo ngokuthi akanabulungisa xa walihlambululayo elo lizwe ngoxa wabalondolozayo abo babenesimo sengqondo esihle.

Sifumanisa into efanayo ngomhla kaNowa. Phezu kwaso nje isibakala sokuba abantu ngaphambi koMkhukula babengendawo, ngenceba uThixo wagqiba kwelokuba babeya kuhlala eminye iminyaka eli-120. Ebudeni benxalenye yelo xesha, uNowa ‘wayengumshumayeli wobulungisa.’ (2 Petros 2:⁠5) Njengoko ixesha lalihamba, ubungendawo babo banda. “UThixo walikhangela ihlabathi, nalo, lonakele! Ngokuba yonke inyama ibiyonakalisile indlela yayo ehlabathini.” (Genesis 6:​3, 12) ‘Umlinganiselo wesono sabo wawanele’; ukuhamba kwexesha kwakubangela iingcinga ezingalunganga ngakumbi. Xa uThixo wathabatha inyathelo wathetheleleka. Ngabantu abasibhozo kuphela abazingqina bengamalungisa emehlweni kaThixo, yaye wabasindisa.

UThixo wasebenzisa indlela efanayo xa wayeqhubana namaSirayeli. Phezu kwako nje ukungaziphathi kakuhle nokungathembeki kwawo, uThixo waba nomonde kangangamakhulu eminyaka. Ingxelo ithi: “UYehova . . . wathumela . . . abathunywa bakhe, wanyameka ukuthumela; ngokuba wayenemfesane ngabantu bakhe . . . Baye bebagculela abathunywa bakaThixo, bewadela amazwi akhe, bebagxeka abaprofeti bakhe, bada benyuka ubushushu bukaYehova, beza kubantu bakhe, kwada akwabakho mpilo.” (2 Kronike 36:​15, 16) Abantu babefikelele kwinqanaba lokuba bangakwazi ukuphucula. NguYeremiya kuphela nabanye abambalwa ababenokusindiswa. UThixo wayengenakugqalwa njengongenabulungisa xa ekugqibeleni wazisa umgwebo kwabanye.

Ixesha LikaThixo Lokuthabath’ Inyathelo Lingoku

Kule mizekelo sinokubona ukuba uThixo akafuni ukuyigweba le nkqubo yezinto de ibe lixesha elifanelekileyo. Oku kucacisiwe kumyalelo onikwe umphumezi wemigwebo wokomfuziselo: “ ‘Lifake irhengqa lakho elibukhali uze uzihlanganise izihloko zomdiliya womhlaba, ngenxa yokuba iidiliya zawo sele zivuthiwe.’ Kwaye ingelosi yalifaka ngamandla irhengqa layo emhlabeni yawuhlanganisa umdiliya womhlaba, yaza yawuphosa kwisixovulelo esikhulu sewayini yomsindo kaThixo.” Phawula ukuba ubungendawo babantu ‘babuvuthiwe,’ oko kuthetha ukuba, babufikelele kwinqanaba lokuba kungabikho nto inokwenziwa ukuphucula izinto. Xa uThixo ephumeza umgwebo, alithandabuzeki elokuba ukungenelela kwakhe kuya kuba kufanelekile.​—⁠ISityhilelo 14:​18, 19.

Xa siqwalasela oku kungasentla, licacile elokuba umgwebo kaThixo kweli hlabathi ufanele ukuba ukufuphi ngenxa yokuba ihlabathi liye lazenza zonke izinto ezalenza lawufanelekela umgwebo kaThixo mandulo. Kuyo yonke indawo, ihlabathi lizele lugonyamelo, njengokuba lalinjalo ngaphambi koMkhukula womhla kaNowa. Izimo zengqondo zabantu ziya zifana nqwa noko kuchazwe kwiGenesis 6:⁠5: “Konke ukuyila kweengcinga zentliziyo yabo [abantu] kubububi bodwa imihla yonke.” Kwanezono ezinzulu ezabangela ukuba uThixo awagwebe amaKanan zizinto eziqhelekileyo namhlanje.

Ingakumbi ukususela ngeMfazwe Yehlabathi I, uluntu luye lwajamelana neenguqulelo ezimasikizi. Umhlaba uye wazaliswa ligazi lamawaka abantu. Ehlabathini lonke kuye kwakho iimfazwe, ukutshatyalaliswa kohlanga, ubugrogrisi, ulwaphulo-mthetho nokuchas’ umthetho. Umhlaba wethu uphela uye wazaliswa yindlala, izifo nokuziphatha okubi. Bonke ubungqina obukhoyo bubonisa ukuba ngoku siphila phakathi kwesizukulwana esingendawo eso wathi ngaso uYesu: “Esi sizukulwana asisayi kuze nangayiphi na indlela sidlule de zonke ezi zinto zenzeke.” (Mateyu 24:​34) Ngoku ihlabathi lizalisa ‘umlinganiselo walo wesono.’ “Izihloko zomdiliya womhlaba” sele zivuthelwe ukuvunwa.

Lingoku Ixesha Lokuba Uthabathe Amanyathelo

Umpostile uYohane waxelelwa ukuba njengokuba ixesha lomgwebo likufuphi, kuya kubakho iintlobo ezimbini zokuvuthwa. Kwelinye icala, “lowo wenza okungebobulungisa, makaqhubeke esenza okungebobulungisa, yaye lowo unyhukunyhuku makaqhubeke esenziwa nyhukunyhuku.” Kodwa kwelinye icala, “lowo ulilungisa makaqhubeke esenza ubulungisa, nalowo ungcwele makaqhubeke esenziwa ngcwele.” (ISityhilelo 22:​10, 11) AmaNgqina kaYehova aqhubeka esenza ubulungisa ngomsebenzi owenziwa zwenibanzi wokufundisisa iBhayibhile. Injongo yaloo msebenzi kukufundisa abantu ngoko uThixo akufunayo kubo ukuze bakwazi ukubalwa njengabo bakufaneleyo ukufumana ubomi obungunaphakade. Ngoku lo msebenzi wenziwa kumazwe angama-233 kumabandla anokuba ngama-87 000.

UThixo akacothi. Ngomonde uye wanika abantu ixesha elifunekayo ukuze ‘bambathe ubuntu obutsha’ ukuze bakwazi ukufumana izithembiso zakhe. (Efese 4:​24) Namhlanje, uThixo usalindile, phezu kwazo nje iimeko eziya zisiba maxongo kweli hlabathi. AmaNgqina kaYehova ehlabathini lonke enza konke anokukwazi ukukwenza ukuze abelane nabamelwane bawo ngolwazi olukhokelela kubomi obungunaphakade. (Yohane 17:​3, 17) Okuvuyisayo kukuba, nyaka ngamnye abantu abangaphezu kwama-300 000 bayasabela baze babhaptizwe.

Sicinga ngobomi obungunaphakade, lingoku ixesha, kungekhona elokulinda, kodwa elokuthabath’ inyathelo. Kuba ngexesha nje elifutshane, siya kukubona ukuzaliseka kwesithembiso sikaYesu esithi: “Wonk’ ubani ophilayo aze aqhelisele ukholo kum akasayi kuze afe konke konke.”​—⁠Yohane 11:⁠26.

[Imibhalo esemazantsi]

[Umfanekiso okwiphepha 6]

Umphumezi wemigwebo kaThixo waxelelwa ukuba alungise irhengqa xa imidiliya yomhlaba ivuthiwe

[Umfanekiso okwiphepha 7]

AmaNgqina kaYehova ehlabathini lonke anceda abantu ukuba bazifumanele iintsikelelo zikaThixo ezingenasiphelo