Benza Ukuthanda Kukayehova

Utyelelo Olwavuzwa Ngokutyebileyo

KUMELE ukuba uhambo lokusuka eShebha ukuya eYerusalem lwaluyindinisa kukumkanikazi. Wayeqhele ukuhlala kwindawo etofotofo. Ngoku, wayehamba ngesantya seenkamela kuhambo oluziikhilomitha ezingama-2 400, kwintlango eyayigqats’ ubhobhoyi. Ngokutsho kolunye uqikelelo, olo hambo lwaluya kuthabatha iintsuku ezinokuba ngama-75, yaye oko yayikukuya nje kuphela!a

Kwakutheni ukuze lo kumkanikazi usisityebi ashiye ikhaya lakhe elitofotofo eShebha aze athabathe uhambo olunjalo ukuba yindinisa?

Ingxelo Ebangel’ Umdla

Ukumkanikazi waseShebha weza eYerusalem emva kokuba ‘eve udaba lukaSolomon, olusingisele kwigama likaYehova.’ (1 Kumkani 10:⁠1) Awakuvayo ngokwenene ukumkanikazi akubhalwanga. Noko ke, siyazi ukuba uYehova wamsikelela uSolomon ngobulumko obukhethekileyo, ngobutyebi nangozuko. (2 Kronike 1:​11, 12) Ukumkanikazi wakwazi njani oku? Ekubeni iShebha yayiyindawo yezorhwebo, kusenokwenzeka ukuba weva ngodumo lukaSolomon ngabarhwebi ababetyelela ilizwe lakhe. Kusenokwenzeka ukuba elinye lala mazwe yayililizwe lakwaOfire, ilizwe uSolomon awayerhweba gqitha nalo.​—⁠1 Kumkani 9:​26-⁠28.

Enoba kwakwenzeke ntoni, lo kumkanikazi wafika eYerusalem “nesihlwele esinzima kunene, esineenkamela ezithwele ubulawu, negolide eninzi kunene, namatye anqabileyo.” (1 Kumkani 10:2a) Abanye bathi esi ‘sihlwele sinzima’ sasiquka iimpelesi ezazixhobile. Oku kuyaqondakala, xa sicinga ukuba ukumkanikazi wayengumntu obekekileyo yaye wayephethe izinto ezixabisa amashumi ezigidi zeerandi.b

Noko ke, phawula ukuba ukumkanikazi waseShebha weva ngodumo lukaSolomon “olusingisele kwigama likaYehova.” Ngoko olu yayingelulo uhambo nje lwezoshishino. Kubonakala ukuba, ukumkanikazi ngokuyintloko weza ukuze eve ngobulumko bukaSolomon​—⁠mhlawumbi nokufunda okuthile ngoThixo wakhe, uYehova. Ekubeni kusenokwenzeka ukuba wayengowomnombo kaShem okanye uHam, ababengabakhonzi bakaYehova, kusenokwenzeka ukuba wayenomdla wokuva ngonqulo lookhokho bakhe.

Imibuzo Elukhuni, Iimpendulo Ezanelisayo

Akudibana noSolomon, ukumkanikazi waqalisa ukumvavanya ‘ngemibuzo elukhuni.’ (1 Kumkani 10:⁠1) Igama lesiHebhere elisetyenziswe apha lisenokuguqulelwa ngokuthi “amaqhina.” Kodwa oku akuthethi ukuthi ukumkanikazi wayedlala ngaye uSolomon. Okubangel’ umdla kukuba, kwiNdumiso 49:⁠4, eli gama linye lesiHebhere lisetyenziselwe ukuchaza imibuzo enzulu ephathelele isono, ukufa nentlawulelo. Ngoko ke, kusenokwenzeka ukuba ukumkanikazi waseShebha wayexubusha imibandela enzulu noSolomon eyavavanya ubunzulu bobulumko bakhe. IBhayibhile ithi “wathetha naye konke okube kusentliziyweni yakhe.” Emva koko uSolomon “wamtyhilela onke amazwi akhe; akubangakho lizwi lifihlakeleyo kukumkani, angabanga nakumtyhilela lona.”​—⁠1 Kumkani 10:2b, 3.

Ukumkanikazi waseShebha wachukumiseka gqitha bubulumko bukaSolomon nobutyebi bobukumkani bakhe kangangokuba “akwaba sabakho kuqina kwamxhelo kuye.” (1 Kumkani 10:​4, 5) Bambi bathi eli binzana lithetha ukuba ukumkanikazi “wabindeka.” Omnye umphengululi uthi wawa isiduli! Enoba kwenzeka ntoni, ukumkanikazi wamangaliswa gqitha koko wakubonayo nawakuvayo. Wathi abakhonzi bakaSolomon ngabona bonwabileyo ngenxa yokuba beve ubulumko balo kumkani, yaye wambulela uYehova ngokumenza uSolomon ukumkani. Emva koko wanika ukumkani izipho ezinexabiso eliphakamileyo, igolide iyodwa ngokwamaxabiso anamhlanje imalunga nama-R247 600-​000. Naye uSolomon wampha izipho, wanika ukumkanikazi “konke awakucelayo.”c​—⁠1 Kumkani 10:​6-⁠13.

Oko Sikufundayo

UYesu wasebenzisa ukumkanikazi waseShebha njengomzekelo abanokufunda kuwo ababhali nabaFarisi. “Ukumkanikazi wasemzantsi uya kuvuswa ngomgwebo nesi sizukulwana yaye uya kusigwebela isohlwayo; ngenxa yokuba weza evela eziphelweni zomhlaba esiza kuva ubulumko bukaSolomon, kodwa, khangelani! okuthile okungaphezu koSolomon kulapha.” (Mateyu 12:​42) Ewe, ukumkanikazi waseShebha wabonisa uxabiso lokwenene ngobulumko awabunikwa nguThixo. Ukuba wathabath’ uhambo lweekhilomitha ezingama-2 400 ukuya kuphulaphula uSolomon, ngokuqinisekileyo ababhali nabaFarisi kumele ukuba bamphulaphula ngenyameko uYesu, owayephambi kwabo.

Nathi namhlanje sinokubonakalisa uxabiso lokwenene ngoSolomon Omkhulu, uYesu Kristu. Njani? Enye indlela kungokulandela umyalelo wakhe ‘wokwenza abafundi abantu beentlanga zonke.’ (Mateyu 28:​19) Enye indlela kungokuqwalasela ngokusondeleyo umzekelo kaYesu nesimo sakhe sengqondo size sizixelise.​—⁠Filipi 2:⁠5; Hebhere 12:​2, 3.

Liyinyaniso elokuba, ukulandela umzekelo kaSolomon Omkhulu kuya kufuna umzamo kuthi. Sekunjalo, siya kuvuzwa ngokwenene. Enyanisweni, uYehova uthembisa abantu bakhe esithi ukuba babonisa umoya wokuzincama, uya ‘kubavulela iingcango zezulu, abathululele iintsikelelo, kude kungasweleki lutho.’​—⁠Malaki 3:​10.

[Imibhalo esemazantsi]