Ukunceda Abantu Basondele KuYehova
“Akukho bani uzayo kuBawo ngaphandle kokuza ngam.”—YOHANE 14:6.
1. Nguwuphi umyalelo owanikelwa nguYesu ovusiweyo kubafundi bakhe, ibe uye waba yintoni umphumo wokuwuthobela kwamaNgqina kaYehova?
UYESU KRISTU wayalela abalandeli bakhe ukuba ‘benze abafundi abantu beentlanga zonke, bebabhaptiza egameni loYise neloNyana nelomoya oyingcwele.’ (Mateyu 28:19) Kwiminyaka elishumi edluleyo, amaNgqina kaYehova aye anceda abantu abangaphezulu lee kwizigidi ezithathu ukuba bamazi uThixo, yaye ethubeni aye ababhaptiza efuzisela ukuzinikela kwabo ekwenzeni ukuthanda kwakhe. Hayi indlela esikuvuyela ngayo ukubanceda basondele kuThixo!—Yakobi 4:8.
2. Yintoni eye yenzeka nangona bebaninzi abantu abatsha ababhaptizwayo?
2 Noko ke, kwamanye amazwe apho kuye kwabhaptizwa abafundi abatsha, akubangakho lwando olufanayo lwenani labavakalisi boBukumkani. Kakade ke, kumelwe kucingwe nangabo baye basutywe kukufa, ibe umlinganiselo wabafa ngonyaka usisinye ekhulwini.Ok for X Ukanti, kwiminyaka embalwa edluleyo, abaninzi baye bayeka ngenxa yesizathu esithile. Sisiphi eso sizathu? Eli nqaku nelilandelayo aza kuxubusha ngendlela abantu abasondela ngayo kuYehova nezinto ezisenokuba zibangela abanye bayeke.
Injongo Yokushumayela Kwethu
3. (a) Uthumo olunikwe abafundi bakaYesu lufana njani nolo lwengelosi olukhankanywe kwiSityhilelo 14:6? (b) Yiyiphi indlela eye yabonakala iphumelela ekuvuseleleni umdla wabantu kwisigidimi soBukumkani, kodwa yiyiphi ingxaki ekhoyo?
3 Kweli “xesha lokuphela,” abafundi bakaYesu banikwe uthumo lokusasaza “ulwazi lokwenyaniso” oluphathelele “ezi ndaba zilungileyo zobukumkani.” (Daniyeli 12:4, thelekisa iNW; Mateyu 24:14) Uthumo lwabo lufana nolwengelosi ‘eyayineendaba ezilungileyo ezingunaphakade ukuba izivakalise njengesigidimi esichulumancisayo kwabo bahleli emhlabeni, nakuzo zonke iintlanga nezizwe neelwimi nabantu.’ (ISityhilelo 14:6) Kweli hlabathi elixakeke zizinto ezingenamsebenzi, eyona ndlela edla ngokuphumelela ekuvuseleleni umdla wabantu kuBukumkani bukaThixo nasekubancedeni basondele kuYehova kukubaxelela ngethemba lobomi obungunaphakade kumhlaba oyiparadesi. Ngoxa kuqondakala oku, abo banxulumana nabantu bakaThixo kuba nje befuna ukungena eParadesi abakazinzi kwindlela emxinwa esa ebomini.—Mateyu 7:13, 14.
4. Ngokutsho kukaYesu nengelosi ephaphazela esazulwini sezulu, iyintoni injongo yomsebenzi wethu wokushumayela?
4 UYesu wathi: “Oku kuthetha ubomi obungunaphakade, ukungenisa kwabo ulwazi ngawe, wena ukuphela koThixo oyinyaniso, nangalowo umthumeleyo, uYesu Kristu.” (Yohane 17:3) Ingelosi ephaphazela esazulwini sezulu ivakalisa “iindaba ezilungileyo ezingunaphakade” kwaye ixelela abo bawumiyo umhlaba isithi: “Moyikeni uThixo nize nimnike uzuko, ngenxa yokuba lifikile ilixa lokugweba kwakhe, yaye ngoko mnquleni Lowo wenza izulu nomhlaba nolwandle nemithombo yamanzi.” (ISityhilelo 14:7) Ngoko ke, eyona njongo yokushumayela kwethu iindaba ezilungileyo kukunceda abantu basondele kuYehova ngoKristu uYesu.
Indima Yethu Kumsebenzi KaYehova
5. Ngawaphi amazwi kaPawulos noYesu abonisa ukuba senza umsebenzi kaYehova, kungekhona owethu?
5 Xa ebhalela amanye amaKristu athanjisiweyo, umpostile uPawulos uthetha ‘ngobulungiseleli boxolelwaniso’ kwaye uthi uThixo uzixolelanisa nabantu ngesizinzi sedini lentlawulelo likaYesu Kristu. UPawulos uthi ‘kungathi uThixo ebesenza isibongozo ngathi’ kwaye “njengabasendaweni kaKristu siyabongoza sisithi: ‘Yibani ngabaxolelanisiweyo noThixo.’ ” Enjani ukukhuthaza yona ingcamango! Enoba “singoonozakuzaku abasendaweni kaKristu” abathanjisiweyo okanye singabathunywa abanethemba lokuphila emhlabeni, sifanele singalibali ukuba lo ngumsebenzi kaYehova, asingowethu. (2 Korinte 5:18-20) Kaloku nguYehova otsala abantu nofundisa abo beza kuKristu. UYesu wathi: “Akukho mntu unako ukuza kum ngaphandle kokuba uBawo, owandithumayo, amtsale; yaye ndiza kumvusa ngomhla wokugqibela. Kubhaliwe ebaProfetini kwathiwa, ‘Kwaye bonke baya kufundiswa nguYehova.’ Wonk’ ubani omvileyo uBawo waza wafunda uyeza kum.”—Yohane 6:44, 45.
6. UYehova ukutshayelela njani ukunyikimisa iintlanga, yaye, kwangaxeshanye ngoobani abafumana ukunqabiseka ‘kwindlu’ yakhe yonqulo?
6 Kule mihla yokugqibela, uYehova ubatsala njani abantu ukuze abavulele “umnyango wokholo”? (IZenzo 14:27; 2 Timoti 3:1) Eyona ndlela iphambili kukuba amaNgqina akhe avakalise isigidimi sosindiso nesomgwebo onxamnye nale nkqubo ingendawo yezinto. (Isaya 43:12; 61:1, 2) Esi sigidimi sivakaliswa ehlabathini lonke siyazinkwantyisa iintlanga—ibe ke singumfuziselo womgwebo oza kufika kungekudala. Kwangaxeshanye, abantu “abaxabisekileyo” emehlweni kaThixo bayakhutshwa kule nkqubo kwaye bayanqatyiswa ‘kwindlu’ yakhe yonqulo lokwenyaniso. Ngaloo ndlela uYehova uzalisekisa amazwi akhe esiprofeto abhalwe nguHagayi athi: “Ndizinyikimise zonke iintlanga, zifike izinto ezinqwenelekayo zeentlanga zonke, ndiyizalise le ndlu ngobuqaqawuli.”—Hagayi 2:6, 7; ISityhilelo 7:9, 15.
7. UYehova uzivula njani iintliziyo zabantu, yaye ubatsalela njani kuye nakuNyana wakhe?
7 UYehova uyazivula iintliziyo zaba bantu boyika uThixo—“izinto ezichongiweyo zazo zonke iintlanga”—ukuze ‘banikele ingqalelo kwizinto ezithethwa’ ngamaNgqina akhe. (Hagayi 2:7, Jewish Publication Society; IZenzo 16:14) Njengakwinkulungwane yokuqala, maxa wambi uYehova usebenzisa iingelosi zakhe ukwalathisa amaNgqina akhe kubantu abanyanisekileyo abaye bakhala kuye becela uncedo. (IZenzo 8:26-31) Njengoko abantu befunda ngamalungiselelo amahle abawenzelwe nguThixo ngoNyana wakhe, uYesu Kristu, uthando lukaYehova lubatsalela kuye. (1 Yohane 4:9, 10) Ewe, uThixo utsalela abantu kuye nakuNyana wakhe esebenzisa “ububele obunothando,” okanye “uthando olunyanisekileyo.”—Yeremiya 31:3, umbhalo osemazantsi weNW.
Ngoobani Abatsalwa NguYehova?
8. Ngabantu abanjani abatsalwa nguYehova?
8 UYehova utsalela abo bamfunayo kuye nakuNyana wakhe. (IZenzo 17:27) Phakathi kwabo kukho abantu ‘abagcumayo nabancwinayo ngenxa yamasikizi onke awenzekayo’ kwiNgqobhoko, nasehlabathini lonke ke phofu. (Hezekile 9:4) ‘Bayiphaphele intswelo yabo yokomoya.’ (Mateyu 5:3) Okunene, ‘bangabalulamileyo [“abathobekileyo,” umbhalo osemazantsi weNW] belizwe,’ abaza kuhlala kumhlaba oyiparadesi ngonaphakade.—Zefaniya 2:3.
9. UYehova unokubona njani ukuba abantu ‘banotyekelo olufanelekileyo ngobomi obungunaphakade,’ kwaye ubatsala njani abo bantu?
9 UYehova uyakwazi ukufunda intliziyo yomntu. UKumkani uDavide waxelela unyana wakhe uSolomon esithi: “UYehova uyazingxoka zonke iintliziyo, akuqonde konke ukuyila kweengcinga zabantu. Ukuba uthe wamfuna, wofunyanwa nguwe.” (1 Kronike 28:9) Ngokusuka kwimeko yentliziyo nakumoya kabani, okanye isimo sengqondo esimlawulayo, uYehova unokubona enoba usenokusabela kumalungiselelo kaThixo okuxolelwa kwezono nakwithemba lobomi obungunaphakade kwinkqubo kaThixo entsha yobulungisa kusini na. (2 Petros 3:13) Esebenzisa iLizwi lakhe, elishunyayelwa lize lifundiswe ngamaNgqina akhe, uYehova utsalela kuye nakuNyana wakhe ‘bonke abo banotyekelo olufanelekileyo ngobomi obungunaphakade,’ ibe “baba ngamakholwa.”—IZenzo 13:48.
10. Yintoni ebonisa ukuba ukutsala kukaYehova abanye aze abanye angabatsali akubandakanyi ukumiselwa kwangaphambili kwekamva labantu?
10 Ngaba into yokuba uYehova etsala abanye aze abanye angabatsali ithetha ukuba, ngandlel’ ithile, ulimisela kwangaphambili ikamva labantu? Ngokuqinisekileyo akunjalo! Ukubatsala kukaThixo abantu kuxhomekeke koko bakufunayo bona. Uyayihlonela inkululeko yabo yokuzikhethela. Namhlanje uYehova ubeke phambi kwabemi bomhlaba ukhetho olufana nolo lwalubekwe phambi kwamaSirayeli kwiminyaka engaphezu kwama-3 000 eyadlulayo, xa uMoses wathi: “Ndibeke phambi kwakho namhla ubomi nokulunga, ukufa nobubi. . . . Ndingqinisisa amazulu nehlabathi namhla ngani; ndibeke phambi kwenu ubomi nokufa, intsikelelo nesiqalekiso. Nyula ke ubomi, ukuze uphile, wena nembewu yakho; ukuba umthande uYehova uThixo wakho, uliphulaphule ilizwi lakhe, unamathele kuye: ngokuba bubomi bakho, nokolulwa kweemini zakho.”—Duteronomi 30:15-20.
11. AmaSirayeli kwafuneka akukhethe njani ukuphila?
11 Phawula ukuba amaSirayeli kwakufuneka akhethe ubomi ‘ngokuthanda uYehova, ngokuphulaphula ilizwi lakhe nangokunamathela kuye.’ Xa kwakuthethwa loo mazwi, abantu bakwaSirayeli babengekangeni kwiLizwe Ledinga. Babengxange kumaThafa akwaMowabhi, belungiselela ukuwela uMlambo iYordan baze bangene eKanan. Ngoxa kwakunokuba lula ukuba iingqondo zabo zithi swii lilizwe ‘elilungileyo nelibanzi,’ “elibaleka amasi nobusi” ababeza kulifumana kungekudala, ukuzaliseka kwamaphupha abo kwakuxhomekeke ekumthandeni kwabo uYehova, ekuphulaphuleni ilizwi lakhe, nasekunamatheleni kwabo kuye. (Eksodus 3:8) UMoses wakwenza kwacaca oku, esithi: “Ukuba uthe wayiphulaphula imiyalelo kaYehova uThixo wakho, endikuyalela yona namhlanje, yokuba umthande uYehova uThixo wakho, uhambe ngeendlela zakhe, ugcine imiyalelo yakhe nemimiselo yakhe nezigwebo zakhe, ngokuqinisekileyo ke wophila, wande, akusikelele uYehova uThixo wakho kwelo lizwe uya kulo ukuba ulidle ilifa.”—Duteronomi 30:16, NW.
12. Umzekelo wamaSirayeli ufanele usifundise ntoni ngomsebenzi wethu wokushumayela nowokufundisa?
12 Ngaba oku kuchazwe ngasentla akufanele kusifundise okuthile ngomsebenzi wethu wokushumayela nowokufundisa kweli xesha lesiphelo? Sicinga ngomhlaba oyiParadesi kwaye sithetha ngawo kubulungiseleli bethu. Kodwa thina okanye abafundi esibenzayo asiyi kuyibona inzaliseko yelo dinga ukuba simkhonza uThixo sishukunyiswa kukuzingca. NjengamaSirayeli, sikunye nabo sibafundisayo simele sifunde ‘ukumthanda uYehova, siphulaphule ilizwi lakhe size sinamathele kuye.’ Ukuba siyakukhumbula oku xa siqhubeka nobulungiseleli bethu, enyanisweni siya kuba sisebenzisana noThixo xa etsalela abantu kuye.
Abasebenzi Abangamadlelane NoThixo
13, 14. (a) Ngokutsho kweyoku-1 kwabaseKorinte 3:5-9, kungayiphi indlela esiba ngabasebenzi abangamadlelane noThixo? (b) Lumele luye kubani uzuko ngalo naluphi na ulwando olukhoyo, ibe ngoba?
13 UPawulos wafanisa ukusebenzisana noThixo nokusebenza intsimi. Wabhala: “Uyintoni na, ngoko, uApolo? Ewe, uyintoni na uPawulos? Ngabalungiseleli enathi ngabo naba ngamakholwa, kwanjengoko iNkosi yamnikayo ngamnye. Mna ndatyala, uApolo wankcenkcesha, kodwa uThixo wathi gqolo ekhulisa; kangangokuba nalowo utyalayo akabi yiyo nantoni na engeyiyo nalowo unkcenkceshayo, kodwa nguThixo okhulisayo. Ke kaloku lowo utyalayo nalowo unkcenkceshayo banto-nye, kodwa umntu ngamnye uya kwamkela owakhe umvuzo ngokokubulaleka kwakhe. Kuba singabasebenzi abangamadlelane kaThixo. Nina niyintsimi kaThixo elinywayo, isakhiwo sikaThixo.”—1 Korinte 3:5-9.
14 Njengabasebenzi abangamadlelane noThixo, simele silityale ngokuthembeka “ilizwi lobukumkani” ezintliziyweni zabantu, sandule ke ukunkcenkcesha nawuphi na umdla obonisiweyo ngokwenza amatyelelo okubuyela nokuqhuba izifundo zeBhayibhile ezilungiselelwe kakuhle. Ukuba umhlaba, intliziyo, uyachuma, uYehova uya kuphumeza indima yakhe ngokwenza imbewu yenyaniso yeBhayibhile intshule ize ibe sisityalo esinemveliso. (Mateyu 13:19, 23) Uya kumtsalela kuye nakuNyana wakhe loo mntu. Ngoko ke, ekugqibeleni, naluphi na ulwando olubakho kubavakalisi boBukumkani lubangelwa ngumsebenzi owenziwa nguYehova ezintliziyweni zabantu, xa esenza imbewu yenyaniso intshule yaye etsalela abo bantu kuye nakuNyana wakhe.
Umsebenzi Wokwakha Oya Kuhlala Uhleli
15. Nguwuphi umzekeliso osetyenziswa nguPawulos ukubonisa indlela esibanceda ngayo abanye ukuba bahlakulele ukholo?
15 Ngoxa siluvuyela ulwando, sikufuna ngokunyaniseka ukubona abantu beqhubeka bemthanda uYehova, bephulaphula ilizwi lakhe yaye benamathele kuye. Siba buhlungu xa sibona abanye bephola baze baphambuke. Ngaba ikho into esinokuyenza ukuze sikuthintele oku? Komnye umzekeliso, uPawulos ubonisa indlela esingabanceda ngayo abanye ukuba bahlakulele ukholo. Uyabhala: “Akukho mntu unokubeka nasiphi na esinye isiseko kuneso sibekiweyo, singuYesu Kristu. Ke kaloku ukuba nabani na wakha phezu kwesiseko ngegolide, ngesilivere, ngamatye axabisekileyo, ngezinto ezenziwe ngomthi, ngefula, ngeendiza, umsebenzi wakhe ngamnye uya kubonakaliswa, kuba imini iya kuwubonakalisa, ngenxa yokuba uya kutyhilwa ngomlilo; yaye umlilo ngokwawo uya kucikida ukuba uluhlobo luni na umsebenzi wakhe ngamnye.”—1 Korinte 3:11-13.
16. (a) Yahluke njani imizekeliso emibini esetyenziswe nguPawulos? (b) Isakhiwo esisakhileyo sinokunganelisi njani kwaye sinokungamelani njani nomlilo?
16 Kumzekeliso kaPawulos wentsimi, ukukhula kuxhomekeke ekutyaleni ngenyameko, ekunkcenkcesheni rhoqo nakwintsikelelo kaThixo. Omnye umzekeliso walo mpostile ubethelela imbopheleleko yomlungiseleli ongumKristu ngoko kwenzeka kwinto ayakhileyo. Ngaba wakhe phezu kwesiseko esiqinileyo esebenzisa izinto zokwakha ezisemgangathweni? UPawulos uyalumkisa: “Ngamnye makahlale eyiphaphele indlela akha ngayo.” (1 Korinte 3:10) Sakuba siwuvuselele umdla womntu ngokumxelela ngethemba lobomi obungunaphakade eParadesi, ngaba siye sijolise imfundiso yethu kwizinto nje ezisisiseko zolwazi lweZibhalo size ke sigxininise koko umntu amele akwenze ukuze afumane ubomi obungenasiphelo? Ngaba xa sifundisa, siphelela nje ekuthini: ‘Ukuba ufuna ukuphila ngonaphakade eParadesi, umele ufundisise, uye kwiintlanganiso uze ube nesabelo kumsebenzi wokushumayela’? Ukuba kunjalo, asilwakheli kwisiseko esomeleleyo ukholo lwaloo mntu, kwaye loo nto siyakhayo isenokungawunyamezeli umlilo wezilingo okanye ingamelani nezanzwili zexesha. Ukuzama ukutsalela abantu kuYehova ngokubathembisa ngobomi eParadesi xa beye bachitha iminyaka embalwa bemkhonza kufana nokwakha “ngomthi, ngefula, ngeendiza.”
Ukwakha Uthando NgoThixo NangoKristu
17, 18. (a) Yintoni eyimfuneko ukuze ukholo lukabani luhlale luhleli? (b) Sinokumnceda njani umntu ukuba avumele uKristu ahlale entliziyweni yakhe?
17 Ukuze ukholo luhlale luhleli, lumele lusekelwe kulwalamano lobuqu noYehova uThixo ngoYesu Kristu. Njengabantu abangafezekanga, ekuphela kwendlela esinokulufikelela ngayo olo lwalamano loxolo noThixo ingoNyana wakhe kuphela. (Roma 5:10) Khumbula ukuba uYesu wathi: “Akukho bani uzayo kuBawo ngaphandle kokuza ngam.” “Akukho mntu unokubeka nasiphi na esinye isiseko kuneso sibekiweyo, singuYesu Kristu,” xa enceda abanye bakhe ukholo. Kubandakanya ntoni oko?—Yohane 14:6; 1 Korinte 3:11.
18 Ukwakha phezu kwesiseko esinguKristu kuthetha ukufundisa umfundi weBhayibhile ukuba ahlakulele uthando olunzulu ngoYesu ngokuyazi ngokuzeleyo indima Yakhe njengoMhlawuleli, iNtloko yebandla, uMbingeleli Omkhulu onothando noKumkani olawulayo. (Daniyeli 7:13, 14; Mateyu 20:28; Kolose 1:18-20; Hebhere 4:14-16) Kuthetha ukwenza uYesu abe ngumntu wokwenene kangangokuba abe ngathi uhleli ezintliziyweni zabo. Sifanele sibathandazele ngendlela uPawulos awawathandazela ngayo amaKristu ase-Efese. Wabhala: ‘Ndigoba amadolo am kuBawo, ukuze aninike ukuthi uKristu ngalo ukholo lwenu ahlale ezintliziyweni zenu ngothando; khon’ ukuze nimiliselwe nize nimiselwe kwisiseko.’—Efese 3:14-17.
19. Ufanele ube yintoni umphumo wokwakha uthando ngoKristu kwabo sifunda nabo iBhayibhile, kodwa yintoni emele ifundiswe?
19 Ukuba sakha ngendlela yokuba kwakheke uthando ngoKristu kwiintliziyo zabo sifunda nabo, ngokufanelekileyo oko kuya kubangela ukuba lwakheke uthando ngoYehova uThixo. Uthando, imvakalelo kunye nemfesane kaYesu zizibonisa ngokuchanileyo iimpawu zikaYehova. (Mateyu 11:28-30; Marko 6:30-34; Yohane 15:13, 14; Kolose 1:15; Hebhere 1:3) Ngoko okukhona abantu bemazi baze bamthande uYesu, kokukhona beya kumazi baze bamthande noYehova.a (1 Yohane 4:14, 16, 19) Kufuneka sifundise abafundi beBhayibhile ukuba nguYehova obangele konke oko uKristu akwenzele uluntu nokuba ngenxa yoko simele simbulele, simdumise yaye simnqule Yena ‘njengoThixo ongumsindisi wethu.’—INdumiso 68:19, 20; Isaya 12:2-5; Yohane 3:16; 5:19.
20. (a) Sinokubanceda njani abantu ukuba basondele kuThixo nakuNyana wakhe? (b) Yintoni eza kuxutyushwa kwinqaku elilandelayo?
20 Njengabasebenzi abangamadlelane noThixo, masincede abantu basondele kuye nakuNyana wakhe, sibancede bahlakulele uthando nokholo ezintliziyweni zabo. Ngaloo ndlela uYehova uya kuba ngumntu wokwenene kubo. (Yohane 7:28) NgoKristu, baya kukwazi ukwakha ulwalamano olusondeleyo noThixo, kwaye baya kumthanda baze banamathele kuye. Abayi kuyisikela ixesha inkonzo yabo eqhutywa luthando, benokholo lokuba amadinga amangalisayo kaYehova aya kuzaliseka ngexesha lakhe elifanelekileyo. (IZililo 3:24-26; Hebhere 11:6) Noko ke, ngoxa sinceda abanye ukuba bahlakulele ukholo, ithemba kunye nothando, simele silwakhe nolwethu ukholo ukuze lube njengenqanawa ezinzileyo enokumelana neenkqwithela ezinamandla. Oku kuza kuxutyushwa kwinqaku elilandelayo.
[Imibhalo esemazantsi]
a Incwadi eluncedo kakhulu xa ufuna ukumazi nangakumbi uYesu uze kwangaye, wazi uYise, uYehova, yethi Oyena Mntu Ubalaseleyo Wakha Waphila, epapashwe yiWatchtower Bible and Tract Society of New York, Inc.
Masenze Impinda
◻ Ngokufuthi siye siwuvuselele ngantoni umdla wabantu kwisigidimi soBukumkani, kodwa yiyiphi ingozi ekhoyo?
◻ Ngabantu abanjani uYehova abatsalela kuye nakuNyana wakhe?
◻ Ukungena kukaSirayeli kwiLizwe Ledinga kwakuxhomekeke entwenini, kwaye yintoni esinokuyifunda koko?
◻ Yiyiphi indima esiyiphumezayo ekuncedeni abantu basondele kuYehova nakuNyana wakhe?
[Umfanekiso okwiphepha 10]
Nangona sinika abantu ithemba lokuphila ngonaphakade eParadesi, olona sukelo lwethu kukubatsalela kuYehova
[Imifanekiso ekwiphepha 13]
Amatyelelo ethu okubuyela anokuphumelela kakhulu ukuba silungiselela kakuhle