Nandipha “Ubomi Benene”

UYEHOVA UTHIXO udale abantu banomnqweno wokuphila ngonaphakade. (INtshumayeli 3:​11) Oku kwenza abantu bazive bengenamandla xa bejamelene nokufa, kodwa kwangaxeshanye, bazive benomnqweno ongapheliyo wokuphila.

IBhayibhile Engcwele, iLizwi likaThixo eliphefumlelweyo, isinika ithemba elikhulu. (2 Timoti 3:​16) UYehova, oyimbangi yothando, wayengenakwenza umntu ukuba asoloko ecinga ngokuphila ngonaphakade aze amgwebele ukuba aphile nje iminyaka embalwa. Ukusidalela ukuba sigcume ziintlungu kwahluke gqitha kubuntu bukaThixo. Asidalwanga “njengezilwanyana ezingaqiqiyo ngokwemvelo ezizalelwe ukubanjwa nokutshatyalaliswa.”​—⁠2 Petros 2:⁠12.

Xa wayedala uAdam noEva nabantu abanomnqweno wokuphila, uYehova uThixo wenza into ‘elungileyo kunene’; wabenza banomnqweno wokuphila ubomi obungunaphakade. (Genesis 1:​31) Kodwa okubuhlungu kukuba, isibini sokuqala esingabantu asizange siyisebenzise kakuhle inkululeko yaso yokuzikhethela, asizange sisithobele isalelo soMdali esicacileyo saza saphulukana nemfezeko yaso yasekuqaleni. Ngenxa yoko, safa, sadlulisela ukungafezeki nokufa kwinzala yaso.​—⁠Genesis 2:​17; 3:​1-24; Roma 5:⁠12.

IBhayibhile ayifihli nanye into ngokuphathelele ukungaqondwa kwenjongo yobomi noko kukuthethayo ukufa. Ithi ekufeni “akukho kwenza, nakucinga, nakwazi, nabulumko” nokuba abafileyo “abazi lutho.” (INtshumayeli 9:​5, 10) Ngamanye amazwi, abafileyo bafile. Imfundiso yokungafi komphefumlo ayiveli eBhayibhileni, ngoko akukho nto ingacacanga ifanele icaciswe ngokuphathelele imeko yabafi.​—⁠Genesis 3:​19; INdumiso 146:⁠4; INtshumayeli 3:​19, 20; Hezekile 18:⁠4.a

UThixo wayenenjongo; akazange alidale nje ihlabathi “ukuba kube senyanyeni.” Walibumba “ukuba limiwe” ngabantu abafezekileyo kwiimeko eziyiparadesi, yaye uThixo akakayiguquli injongo yakhe. (Isaya 45:​18; Malaki 3:⁠6) Ukuze ayizalisekise le njongo, wathumela uNyana wakhe emhlabeni. Ngokuhlala ethembekile kude kube sekufeni, uYesu Kristu walungiselela idini lentlawulelo esonweni nasekufeni. Enyanisweni, uYesu wathi: “UThixo walithanda kakhulu ihlabathi kangangokuba wanikela ngoNyana wakhe okuphela kwamzeleyo, ukuze wonk’ ubani oqhelisela ukholo kuye angatshabalali kodwa abe nobomi obungunaphakade.”​—⁠Yohane 3:⁠16.

Mandulo phayaa, uThixo wathembisa ukuba uya kudala “amazulu amatsha nomhlaba omtsha.” (Isaya 65:​17; 2 Petros 3:​13) Oko kwakuya kuquka ukunyula kwakhe iqela lamaKristu athembekileyo elaliya kuphila ezulwini. Likunye noYesu Kristu, liseka urhulumente. IBhayibhile ibhekisela koku ‘njengobukumkani bamazulu,’ okanye “ubukumkani bukaThixo” obuya kulawula ‘izinto ezisemhlabeni.’ (Mateyu 4:​17; 12:​28; Efese 1:​10; ISityhilelo 5:​9, 10; 14:​1, 3) Emva kokuphelisa konke ukungahlonelwa kukaThixo kwihlabathi lethu nokulihlambulula, uThixo uya kuzisa ibutho labantu elitsha nelingamalungisa, okanye ‘umhlaba omtsha.’ Oku kuya kuquka abantu uThixo abakhuselayo ngentshabalalo ekhawulezileyo yale nkqubo yezinto ingendawo. (Mateyu 24:​3, 7-14, 21; ISityhilelo 7:​9, 13, 14) Baya kuhlala nabo babuyiselwe ebomini ngovuko oluthenjisiweyo.​—⁠Yohane 5:​28, 29; IZenzo 24:⁠15.

“Ubomi Benene” Ngoko

Esiqinisekisa ngenkcazelo ebangel’ umdla yobomi kwiParadesi ezayo, uThixo uthi: “Khangela! Zonke izinto ndizenza ntsha.” (ISityhilelo 21:⁠5) Kunzima ukuba ingqondo yomntu iyiqonde ngokupheleleyo imisebenzi emangalisayo eya kwenziwa nguThixo eyenzela uluntu. UThixo uya kwenza iparadesi yomhlaba wonke, efana ne-Eden. (Luka 23:​43) Njengase-Eden, kuya kubakho izinto ezintle eziyimibalabala, izandi nezinto ezinencasa eyahlukahlukeneyo. Akuyi kuphinda kubekho ubuhlwempu nokunqongophala kokutya, kuba ngokuphathelele elo xesha iBhayibhile ithi: “Izinto zangaphambili zidlule.” (ISityhilelo 21:⁠4; INdumiso 72:​16) Akuyi kuphinda kubekho umntu othi, “ndiyafa,” njengokuba konke ukugula kuya kube kupheliswe ngonaphakade. (Isaya 33:​24) Ewe, zonke izinto ezibangela iintlungu ziya kuphela, kuquka olona tshaba lwakudala lomntu, ukufa. (1 Korinte 15:​26) Kumbono omangalisayo ‘womhlaba omtsha,’ abantu abatsha abaphantsi kolawulo lukaKristu, umpostile uYohane weva ilizwi lisithi: “[UThixo] uya kuzisula zonke iinyembezi emehlweni alo, yaye ukufa akusayi kubakho, kungayi kubakho nakukhedama nasikhalo nantlungu kwakhona.” Yintoni enokubangela ulwaneliseko novuyo ngaphezu kokuzaliseka kwesi siprofeto sikaThixo?

Xa ichaza ubomi kwixa elizayo, iBhayibhile igxininisa ngokukhethekileyo iimeko eziya kwanelisa abantu ngokokuziphatha nangokomoya. Zonke izinto ezibubulungisa umntu ebesoloko ezabalazela ukuba zenziwe kodwa engaphumeleli de kube ngoku ziya kwenziwa ngokoqobo. (Mateyu 6:​10) Phakathi kwezi ngumnqweno wokusesikweni, oye wangazaliseki ngenxa yokuba umntu uye ngokufuthi wathuthunjiswa ngabacinezeli abaye balawula abo bangenamandla. (INtshumayeli 8:⁠9) Umdumisi ebhala ngokuprofetayo ngeemeko eziya kubakho phantsi korhulumente kaKristu wathi: “Ngemihla yakhe ilungisa liya kutyatyamba, kubekho noxolo oluninzi.”​—⁠INdumiso 72:⁠7, The New Jerusalem Bible.

Ukulingana ngomnye umnqweno abantu abaye bazinikela ngenxa yawo. ‘Ekudalweni okutsha,’ uThixo uya kuluphelisa ucalu-calulo. (Mateyu 19:​28) Bonke abantu baya kuba nesidima esifanayo. Oku akuyi kuba kukulingana okubangelwa ngurhulumente orhabaxa. Ngokwahlukileyo koko, oonobangela bocalu-calulo baya kususwa ngokupheleleyo, kuquka ukubawa nekratshi elikhokelela ekubeni abantu babathwalise imithwalo enzima abo babalawulayo. UIsaya waprofeta wathi: “Baya kwakha izindlu, bazihlale; batyale izidiliya, badle iziqhamo zazo. Abayi kwakha kuhlale bambi; abayi kutyala kudle bambi.”​—⁠Isaya 65:​21, 22.

Bangaphi abantu abaye babandezeleka ngenxa yokuphalazwa kwegazi ngabantu abathile nasezimfazweni! Oku kuye kwaqhubeka ukususela ekubulaweni kuka-Abheli ukuza kutsho kwiimfazwe ezikhoyo zanamhlanje. Hayi indlela elide ngayo ixesha abantu abaye balihlala belindile yaye benethemba lokubakho koxolo, nto leyo eye yabonakala ililize! KwiParadesi ebuyiselweyo, bonke abantu baya kuba noxolo baze balulame; baya ‘kuziyolisa ngobuninzi boxolo.’​—⁠INdumiso 37:⁠11.

UIsaya 11:⁠9 uthi: “Ilizwe liya kuzala kukwazi uYehova, njengamanzi egubungele ulwandle.” Ngenxa yokungafezeki esikuzuze ilifa, kuquka nezinye izinto, akunakwenzeka ngathi ukuba sikuqonde ngokupheleleyo oko kuthethwa ngaloo mazwi. Indlela ulwazi oluchanileyo ngoThixo oluya kusimanyanisa ngayo nendlela oko okuya kuphumela ngayo kuvuyo lokwenene, kusenokuba kufuneka sifunde ngayo. Kodwa ekubeni iZibhalo zisixelela ukuba uYehova uThixo mkhulu ngamandla, ngobulumko, ngokuba nokusesikweni nangothando, sinokuqiniseka ukuba uya kuyiva imithandazo yabemi ‘bomhlaba omtsha.’

“Ubomi Benene” Busisiqinisekiso​—⁠Buxhakamfule!

Kwabaninzi, ubomi obungenasiphelo kwihlabathi elitsha liphupha nje okanye ukuza kukaNxele. Noko ke, kwabo banokholo lokwenene kwizithembiso zeBhayibhile, oku kuqinisekile. Kunjengeankile kubomi babo. (Hebhere 6:​19) Kanye njengokuba iankile iyibamba iqine inqanawa ingaphoseki ngapha nangapha, ithemba lokuphila ubomi obungenasiphelo lenza abantu bazinze baze babe nentembelo lize libenze bakwazi ukujamelana neengxaki ezinzulu ebomini yaye bazeyise.

Sinokuqiniseka ukuba uThixo uya kuzizalisekisa izithembiso zakhe. Ude wasiqinisekisa ngokwenza isifungo, ezibophelela ngendlela engenakuze iguquke. Umpostile uPawulos wabhala: “UThixo, xa wayenenjongo yokubonakalisa kakhulu ngakumbi kwiindlalifa zesithembiso ukungatshintsheki kwecebo lakhe, wangenelela ngesifungo, ukuze, ngezinto ezimbini ezingatshintshekiyo ekungenakwenzeka kuzo ukuba uThixo axoke, . . . sibe nokhuthazo olunamandla lokubambelela kwithemba elibekwe phambi kwethu.” (Hebhere 6:​17, 18) “Izinto ezimbini ezingatshintshekiyo” uThixo angenakuziguqula sisithembiso nesifungo sakhe, apho sisekele khona ulindelo lwethu.

Ukuba nokholo kwizithembiso zikaThixo kuyomeleza yaye kuyakhuthaza ngokomoya. UYoshuwa, inkokeli yabantu bakwaSirayeli, yayinokholo olunjalo. Xa uYoshuwa wayethetha okokugqibela namaSirayeli, wayekhulile yaye wayesazi ukuba uza kufa. Ukanti, wabonakalisa amandla nokunyaniseka, okwabangela ukuthembela ngakumbi kwizithembiso zikaThixo. Emva kokuba ethe uhamba “ngendlela yoluntu lonke,” indlela ebasa ekufeni bonke abantu, uYoshuwa wathi: “Niyazi ngentliziyo yenu yonke nangomphefumlo wenu wonke, ukuba akuwanga phantsi nalinye ilizwi emazwini onke alungileyo, abewathethile uYehova uThixo wenu ngani; onke enzekile kuni; akuwanga phantsi nalinye ilizwi kuwo.” Ewe, uYoshuwa waphindaphinda izihlandlo zazithathu esithi uThixo usoloko ezigcina zonke izithembiso zakhe.​—⁠Yoshuwa 23:⁠14.

Nawe unokuba nokholo olufanayo kwisithembiso sikaThixo sehlabathi elitsha eliza kubakho kungekudala. Ngokufundisisa iBhayibhile ngenkuthalo, uya kukwazi ukuba uYehova ungubani nesizathu sokuba kufuneka sikholose ngaye ngokupheleleyo. (ISityhilelo 4:​11) UAbraham, uSara, uIsake, uYakobi, nabanye abathembekileyo babenokholo olungenakushenxiswa, olusekelwe kulwazi lwabo oluchanileyo ngoThixo oyinyaniso uYehova. Bahlala benethemba, phezu kwaso nje isibakala sokuba “bengazange bayifumane inzaliseko yazo izithembiso,” ngoxa babesaphila. Ukanti, “bazibona zisekude baza bazithakazelela.”​—⁠Hebhere 11:⁠13.

Ngenxa yokuba siziqonda iziprofeto zeBhayibhile, ngoku sibona ukuza ‘kwemini enkulu kaThixo uSomandla,’ ixesha lokuba umhlaba ucocwe kubo bonke ubungendawo. (ISityhilelo 16:​14, 16) Njengamadoda athembekileyo amandulo, simele sihlale siqinisekile silindele iziganeko zexesha elizayo, sikhuthazwe lukholo nangokuba nothando ngoThixo ‘nangobomi benene.’ Ukusondela kwehlabathi elitsha kubangela ukuba basikhuthaze ngakumbi abo baqhelisela ukholo kuYehova nabo bamthandayo. Ukholo olunjalo nothando lufuna ukuhlakulelwa ukuze sifumane inkoliseko kaThixo nokukhuselwa nguye ngomhla wakhe omkhulu, osondelayo.​—⁠Zefaniya 2:⁠3; 2 Tesalonika 1:⁠3; Hebhere 10:​37-⁠39.

Ngoko ke, ngaba uyabuthanda ubomi? Yaye ngaba ngokungakumbi unomnqweno wokufumana “ubomi benene”​—⁠ubomi njengomkhonzi kaThixo, onethemba lekamva elonwabisayo, ewe, onombono wobomi obungunaphakade? Ukuba oko koko ukufunayo, thobela isiluleko sompostile uPawulos, owabhala wathi sifanele ‘sibeke ithemba lethu, kungekhona kubutyebi obungaqinisekanga, kodwa kuThixo.’ UPawulos wongezelela wathi: ‘Masityebe emisebenzini emihle,’ ehlonela uThixo, ukuze ‘sibubambe ngokuqinileyo ubomi benene.’​—⁠1 Timoti 6:​17-⁠19.

Ngokwamkela isifundo seBhayibhile namaNgqina kaYehova, unokufumana ulwazi ‘oluthetha ubomi obungunaphakade.’ (Yohane 17:⁠3) Ngothando, iBhayibhile idlulisela esi sibongozo sisuka kubawo kubo bonke: “Nyana wam, musa ukuwulibala umyalelo wam; intliziyo yakho mayiyibambe imithetho yam; kuba iya kukongeza imihla emide, neminyaka yobomi, noxolo.”​—⁠IMizekeliso 3:​1, 2.

[Imibhalo esemazantsi]