Benza Ukuthanda Kukayehova

UMariya Ukhetha “Isahlulo Esilungileyo”

NGOMHLA kaYesu, amabhinqa angamaYuda ayebotshelelwe zizithethe zoorabhi. Ngenxa yoko, ayengavunyelwa ukuba afunde uMthetho. Enyanisweni, enye ingcamango ecatshulwe kwiMishnah yathi: “Ukuba nayiphi na indoda ifundisa intombi yayo uMthetho kwakufana nokungathi iyifundisa ukuziphatha vakalala ngokwesini.”​—⁠Sotah 3:⁠4.

Ngenxa yoko, ngenkulungwane yokuqala amabhinqa aliqela akwaYuda ayengafundanga. IThe Anchor Bible Dictionary ithi: “Akukho bungqina bokuba ngaphambi kobulungiseleli bukaYesu amabhinqa angamaYuda ayekhe avunyelwa ukuba abe ngabafundi bomfundisi omkhulu, yaye ngokuqinisekileyo ayengavumelekanga ukuba ahambe nomfundisi, okanye afundise nabani ngaphandle kwabantwana.” Ngenjongo yokuwanyelisa ngakumbi amabhinqa, ezinye iinkokeli zonqulo zade zabeka umthetho othi indoda ayimele ithethe nebhinqa esidlangalaleni!

UYesu wayezichasile iimbono ezinjalo ezingezozabuthixo. Wafundisa amabhinqa namadoda, yaye phakathi kwabalandeli bakhe kwakukho amadoda namabhinqa. (Luka 8:​1-⁠3) Ngesinye isihlandlo, uYesu wayemenyiwe ukuba abe lundwendwe lukaMarta noMariya. (Luka 10:​38) La mabhinqa mabini ayengoodade boLazaro, yaye bobathathu babengabafundi nabahlobo abakhulu bakaYesu. (Yohane 11:⁠5) Kusenokwenzeka ukuba le ntsapho yayisaziwa gqitha, xa kujongwa inani elikhulu labantu eleza lize kuthuthuzela uMarta noMariya ukufa kukaLazaro. Enoba imeko yayinjani na, oko kwenzeka kwikhaya labo xa uYesu wayelundwendwe kwabonisa isifundo esibalulekileyo kungekhona kubo kuphela kodwa nakuthi.

Ukufunda Ezinyaweni ZikaYesu

Alithandabuzeki elokuba, uMarta noMariya babekulungele ukumenzela esona sidlo uYesu, yaye mhlawumbi oku babenako ukukwenza. (Thelekisa uYohane 12:​1-⁠3.) Noko ke, xa kwafika undwendwe lwabo, uMariya “wahlala phantsi ngasezinyaweni zeNkosi waza wamana ukuphulaphula ilizwi layo.” (Luka 10:​39) Asikho isithethe sabantu esasinokuthintela uYesu ekubeni afundise eli bhinqa elalizimisele kangaka ukufunda! Sinokuba nomfanekiso-ngqondweni kaMariya ehleli phambi kukaYesu, ezenza umfundi ozimisele gqitha ukuphulaphula imfundiso yeNkosi yakhe.​—⁠Thelekisa iDuteronomi 33:⁠3; IZenzo 22:⁠3.

Ngokungafaniyo noMariya, uMarta “wayephazanyiswa kukunyamekela imisebenzi emininzi.” Xa wayelungiselela isidlo esikhulu, wayexakeke gqitha yimisebenzi yasendlwini. Kungekudala, uMarta wacaphuka ngenxa yokuba washiywa yedwa ukuba asebenze ngoxa udade wabo wayehleli ezinyaweni zikaYesu! Ngoko uMarta waphazamisa amazwi kaYesu ethetha noMariya, mhlawumbi ngequbuliso wathi: “Nkosi, akunamsebenzi na kuwe ukuba udade wethu endishiye ndedwa enyamekela ezinye izinto? Mxelele, ke ngoko, athelele ngokundincedisa.”​—⁠Luka 10:⁠40.

Kwakungekho nto iphosakeleyo ngesicelo sikaMarta. Ngapha koko, ukulungiselela iqela labantu ukutya ngumsebenzi onzima, yaye akumele ube ngumthwalo womntu omnye lowo. Noko ke, uYesu wabona isifundo esibalulekileyo amele amfundise sona. “Marta, Marta, uxhalele yaye uphazamiseke ngezinto ezininzi. Zizinto ezimbalwa, ngoko, ezifunekayo, okanye inye kuphela. Ngokukokwakhe, uMariya unyule isahlulo esilungileyo, yaye asiyi kususwa kuye.”​—⁠Luka 10:​41, 42.

UYesu wayengathi uMarta wayengenamdla kwizinto zokomoya. Ngokwahlukileyo koko, wayemazi njengebhinqa elimhlonela ngokunzulu uThixo.a Ngokungathandabuzekiyo eso sisizathu esabangela ukuba kwasekuqaleni amemele uYesu ekhayeni lakhe. Noko ke, ngokumkhalimela ngobulali, uYesu wayebonisa ukuba uMarta, ngokuxhalabela kwakhe isidlo, wayephoswa lilungelo elinqabileyo lokufundiswa ngokobuqu nguNyana kaThixo.

Kuyavunywa ukuba, isithethe saloo mihla sasiya kuxhasa ingcamango yokuba ukubaluleka kwebhinqa kubonakala kakuhle xa likwazi ukusebenza kakuhle ekhaya. Kodwa amazwi kaYesu abonisa ukuba amabhinqa, njengamadoda, ayenokuhlala phantsi ezinyaweni zoNyana kaThixo ukuze afumane amazwi obomi! (Yohane 4:​7-15; IZenzo 5:​14) Ngenxa yoku, kwakuza kuba bhetele ngoMarta ukuba alungise iimbiza nje ezimbalwa​—⁠okanye ibe nye​—⁠ukuba wayeza kukwazi ukufumana ithuba lokuba ahlale ezinyaweni zeNkosi aze afunde kuyo.​—⁠Thelekisa uMateyu 6:⁠25.

Oko Sikufundayo

Namhlanje, amadoda namabhinqa ayafumaneka phakathi kwabo basabelayo kwisimemo sikaYesu ‘sokuthabatha amanzi obomi ngesisa.’ (ISityhilelo 22:​17) Bechukunyiswe luthando, abanye​—⁠njengoMarta⁠—​benza konke okusemandleni abo ukuze banelise iintswelo zabo bakhonza nabo. Banengqiqo yaye bayakhawuleza ukuzenza izinto, yaye uYehova ubathembisa ukuba uya kubavuza ngemisebenzi yabo yothando. (Hebhere 6:​10; 13:​16) Mhlawumbi abanye bafana kakhulu noMariya. Bazolile yaye bayacamngca ngezinto. Umnqweno wabo onzulu wokucamngca ngeLizwi likaThixo uyabanceda bahlale bemiliselwe elukholweni.​—⁠Efese 3:​17-⁠19.

Zombini ezi ntlobo zabantu zinegalelo elibalulekileyo kwibandla lobuKristu. Noko ke, ekugqibeleni zonke zimele ‘zikhethe isahlulo esilungileyo’ ngokugxininisa ngokuyintloko kwizinto zokomoya. Ngokuqiniseka ngezinto ezibaluleke ngakumbi, siya kuthandwa nguYehova yaye siya kufumana intsikelelo yakhe.​—⁠Filipi 1:​9-11.

[Imibhalo esemazantsi]