Imibuzo Evela Kubafundi
AmaNgqina kaYehova akujonga njani ukuvota?
Kukho imigaqo ebekwe yacaca eBhayibhileni eyenza abantu bakaThixo babe nembono efanelekileyo ngalo mba. Noko ke, kubonakala kungekho mgaqo onxamnye novoto ngokwalo. Ngokomzekelo, akukho nto ityhulu ngokuba iqumrhu labalathisi livote xa lifuna ukufikelela kwisigqibo esichaphazela inkampani yalo. Ngokufuthi amabandla amaNgqina kaYehova aye enze izigqibo eziphathelele amaxesha eentlanganiso nezokusetyenziswa kweemali zebandla ngokuphakanyiswa kwezandla kuze kuvotwe.
Noko ke, kuthekani ngokuvota kunyulo lwezobupolitika? Kakade ke, kwamanye amazwe alawulwa yidemokrasi, abantu abamalunga nama-50 ekhulwini abayi kwaukuya evotini ngomhla wonyulo. AmaNgqina kaYehova akaphazamisani nelungelo labanye lokuvota; kananjalo engaphumi iphulo elikhuthaza abantu ukuba bangangeni kunyulo lwezobupolitika. Ayabahlonela yaye ayasebenzisana nabasemagunyeni abanyulwe ngokufanelekileyo kunyulo olunjalo. (Roma 13:1-7) Xa kufikwa kumba wokuba aya kumvotela kusini na ubani ozigqatse kunyulo, iNgqina likaYehova ngalinye lizenzela isigqibo lincedwa sisazela esiqeqeshwe yiBhayibhile kunye nokuqonda kwalo imbopheleleko yalo kuThixo nakuRhulumente. (Mateyu 22:21; 1 Petros 3:16) Xa ezenzela eso sigqibo, amaNgqina aye aqwalasele iinkalo ezininzi.
Okokuqala, uYesu Kristu wathetha wenjenje ngabalandeli bakhe: “Abayonxalenye yehlabathi, kanye njengoko nam ndingeyonxalenye yehlabathi.” (Yohane 17:14) AmaNgqina kaYehova awuthabatha nzulu lo mgaqo. ‘Ekubeni engeyonxalenye yehlabathi,’ aba ngoondilele kwimicimbi yezobupolitika yehlabathi.—Yohane 18:36.
Okwesibini, umpostile uPawulos wazibiza ngokuthi ‘ungunozakuzaku’ omela uKristu kubantu bomhla wakhe. (Efese 6:20; 2 Korinte 5:20) AmaNgqina kaYehova akholelwa ukuba uKristu uYesu ngoku unguKumkani obekwe etroneni yoBukumkani bukaThixo basezulwini, yaye njengoonozakuzaku, amele akubhengeze oku ezintlangeni. (Mateyu 24:14; ISityhilelo 11:15) Kuyinto elindelekileyo ukuba oonozakuzaku bangathabathi cala, kwaye bayakuphepha ukufak’ impumlo kwimicimbi edl’ umzi yamazwe abathunyelwe kuwo. Njengabameli boBukumkani bukaThixo basezulwini, amaNgqina kaYehova aziva enaloo mbopheleleko ifanayo yokuba angangeni kwezobupolitika zamazwe ahlala kuwo.
Inkalo yesithathu emele iqwalaselwe kukuba abo baba nenxaxheba ekuvoteleni ubani ukuze alawule basenokuba nembopheleleko ngezenzo zaloo mntu. (Thelekisa eyoku-1 kuTimoti 5:22, The New English Bible.) AmaKristu amele acingisise nzulu enoba ayakufuna kusini na ukuthwala loo mbopheleleko.
Okwesine, amaNgqina kaYehova alugqala njengento exabiseke gqitha umanyano lwawo lobuKristu. (Kolose 3:14) Xa iinkonzo zibandakanyeka kwezobupolitika, ngokufuthi umphumo uba kukwahlulelana phakathi kwamalungu azo. Exelisa uYesu Kristu, amaNgqina kaYehova ayakuphepha ukubandakanyeka kwezobupolitika ibe ngaloo ndlela ayalulondoloza umanyano lwawo lobuKristu.—Mateyu 12:25; Yohane 6:15; 18:36, 37.
Okwesihlanu nokokugqibela, ngokucezela kude kwawo kwezobupolitika amaNgqina kaYehova aba nenkululeko yokuthetha nabantu abaneengcamango ezahlukeneyo zobupolitika ngesigidimi esibalulekileyo soBukumkani.—Hebhere 10:35.
Ngenxa yale migaqo yeZibhalo edweliswe ngasentla, kumazwe amaninzi amaNgqina kaYehova azenzela isigqibo sobuqu sokuba angavoti kunyulo lwezobupolitika, kwaye inkululeko yawo yokuzenzela eso sigqibo iyaxhaswa ngumthetho welo lizwe. Noko ke, kuthekani ukuba umthetho uthi abemi mabavote? Kwimeko enjalo, iNgqina ngalinye limele lizenzele isigqibo esiqhutywa sisazela nesisekelwe eBhayibhileni ngendlela yokusingatha loo meko. Ukuba ubani ugqiba kwelokuba makaye kwisikhululo sovoto, sisigqibo sakhe eso. Into afika ayenze kwisikhululo sovoto iphakathi kwakhe noMdali wakhe.
Inkupho yeMboniselo (yesiNgesi) kaNovemba 15, 1950, kwiphepha 445 nelama-446, yathi: “Xa uKesare esithi kunyanzelekile ukuba abemi bavote . . . [amaNgqina] anokuya kwizikhululo zokuvota aze angene kwiindawo zokuvota. Kulapho ekuye kufuneke aphawule iphepha lokuvota okanye abhale oko akumelayo. Abavoti benza oko bakuthandayo ngamaphepha abo okuvota. Ngoko ephambi koThixo, amangqina akhe amele enze ngokuvisisana nemithetho yakhe kunye nokholo lwawo. Akuyombopheleleko yethu ukuwayalela oko amele akwenze ngephepha lokuvota.”
Kuthekani ukuba umyeni ongakholwayo womfazi ongumKristu uyamnyanzela ukuba aye kuvota? Kaloku ungaphantsi kwegunya lomyeni wakhe, kanye njengokuba amaKristu engaphantsi kwamagunya awongamileyo. (Efese 5:22; 1 Petros 2:13-17) Kusisigqibo sakhe sobuqu ukuba uza kumthobela umyeni wakhe aze aye kwisikhululo sokuvota. Akakho umntu ofanele amgxeke.—Thelekisa eyabaseRoma 14:4.
Kuthiwani ke kwilizwe apho uvoto lunganyanzeliswa ngumthetho kodwa apho bachaswayo abo bangayiyo kwizikhululo zovoto—mhlawumbi ubomi babo bube sesichengeni? Okanye kuthekani ukuba abantu, ngoxa benganyanzeliswa ngumthetho ukuba bavote, ngandlel’ ithile bafumana isohlwayo esiqatha xa bengayi kwisikhululo sovoto? Kwiimeko ezinje nakwezifana nazo, umKristu umele azenzele isigqibo. “Ngamnye uya kuthwala umthwalo wakhe.”—Galati 6:5.
Bakho abantu abanokukhubeka xa bebona ukuba ebudeni bonyulo kwilizwe labo, amanye amaNgqina kaYehova ayaya kwizikhululo zovoto ngoxa amanye engayi. Basenokuthi, ‘AmaNgqina kaYehova akenzi nto ifanayo.’ Noko ke, abantu bafanele baqonde ukuba kwimibandela efuna isazela sikabani enjengalo, umKristu ngamnye umele azenzele isigqibo phambi kukaYehova uThixo.—Roma 14:12.
Enoba sisiphi na isigqibo azenzela sona amaNgqina kaYehova xa ephantsi kweemeko ezahlukeneyo, akuxhalabele ukulondoloza ubundilele bamaKristu kunye nenkululeko yokuthetha. Kuzo zonke izinto, ayama ngoYehova uThixo ukuze awomeleze, awanike ubulumko, yaye awancede aphephe ukulalanisa kukholo lwawo nangayiphi na indlela. Ngaloo ndlela abonisa ukuba anentembelo kumazwi omdumisi athi: “Ingxondorha yam nemboniselo yam nguwe; ngenxa yegama lakho uya kundikhapha undithundeze.”—INdumiso 31:3.