Siyayifuna Intlangano KaYehova

NGABA wakhe wamva umntu esithi, “Ndiyakholelwa kuThixo kodwa andikholelwa kwintlangano yonqulo”? Abantu abathile ababeyihamba ngenzondelelo icawa kodwa abaye banxunguphaliswa kukusilela konqulo lwabo ukubondla ngokomoya, badla ngokuvakalelwa ngendlela efanayo. Nangona bephoxwe ziintlangano zonqulo, abaninzi bagxininisa ngelithi basafuna ukunqula uThixo. Noko ke, bakholelwa ekubeni kubhetele ukumkhonza ngendlela yabo kunokuba unxulumane necawa okanye enye intlangano.

Ithini iBhayibhile? Ngaba uThixo ufuna amaKristu anxulumane nentlangano ethile?

AmaKristu Okuqala Angenelwa Ngenxa Yokulungelelaniswa

NgePentekoste yowama-33 C.E., uYehova wathulula umoya wakhe oyingcwele, kungekhona kwabakholwayo abambalwa, kodwa kwiqela lamadoda namabhinqa awayehlanganisene “kwindawo enye,” kwigumbi eliphezulu eYerusalem. (IZenzo 2:1) Ngelo xesha, kwasekwa ibandla lamaKristu, elaba yintlangano yehlabathi lonke. Oku kwaba yintsikelelo yokwenene kwabo bafundi bokuqala. Ngoba? Phakathi kwezinye izinto, babenikwe isabelo esibalulekileyo—sokushumayela iindaba ezilungileyo zoBukumkani bukaThixo ekugqibeleni “kuwo wonke umhlaba omiweyo.” (Mateyu 24:14) Ebandleni ababesandul’ ukuguquka babesenokufunda kwabakhonza nabo abanamava indlela yokuhambisela phambili umsebenzi wokushumayela.

Kungekudala isigidimi soBukumkani sasasazeka nangaphaya kweendonga zeYerusalem. Phakathi kowama-62 nowama-64 C.E., umpostile uPetros wabhala incwadi yakhe yokuqala eyayisiya kumaKristu “achithachitheke ePonto, eGalati, eKapadokiya, eAsiya, naseBhithiniya,” izixeko zonke ezikwiTurkey yanamhlanje. (1 Petros 1:1) Kwakukho amakholwa nasePalestina, eLebhanon, eSiriya, eSipro, eGrisi, eKrete naseItali. Kunjengokuba uPawulos wababhalela abaseKolose phakathi kowama-60 nowama-61 C.E., iindaba ezilungileyo ‘zazisele zishunyayelwe kwindalo yonke ephantsi kwezulu.’—Kolose 1:23.

Indlela yesibini esingenelwa ngayo ngokunxulumana nentlangano kukukhuthazana kwamaKristu. Xa enxulumana nebandla, amaKristu ayenokuva iintetho eziphefumlelweyo, afundisise kunye iZibhalo Ezingcwele, abelane ngamava omelezayo, aze athandaze kunye namanye amakholwa.(1 Korinte, isahluko 14) Yaye amadoda aqolileyo ‘anokuwalusa umhlambi kaThixo.’—1 Petros 5:2.

Njengamalungu ebandla, amaKristu azana aza athandana. Engavakalelwa nakancinane kukuba kuluxanduva ukunxulumana nebandla, amaKristu ayesakhana yaye eqiniswa lunxulumano olunjalo.— IZenzo 2:42; 14:27; 1 Korinte 14:26; Kolose 4:15, 16.

Esinye isizathu sokuba ibandla okanye intlangano yomhlaba wonke emanyeneyo ibekho, yayikukukhuthaza umanyano. AmaKristu afunda ‘ukuthetha ngokuvumelanayo.’ (1 Korinte 1:10) Oku kwakubalulekile. Amalungu ebandla ayeneemvelaphi ezahlukahlukeneyo zemfundo nezentlalo. Ayethetha iilwimi ezahlukahlukeneyo, yaye kwakucace mhlophe ukuba ayeneempawu zobuntu ezahlukeneyo. (IZenzo 2:1-11) Maxa wambi, kwakubakho ukwahlukana ngezimvo. Noko ke, amaKristu ayencedwa ukuba azinzise iimbambano ezinjalo phakathi ebandleni.—IZenzo 15:1, 2; Filipi 4:2, 3.

Imibuzo enzulu engenakukwazi ukusingathwa ngabadala basekuhlaleni yayibhekiselwa kubaveleli abahambahambayo, njengoPawulos. Imibandela ebalulekileyo yemfundiso yayibhekiselwa kwiqumrhu elilawulayo eliseYerusalem. Ekuqaleni iqumrhu elilawulayo lalisekwe ngabapostile bakaYesu Kristu kodwa kamva laquka amadoda amakhulu ebandla eYerusalem. Bandla ngalinye lalilamkela igunya elivela kuThixo lequmrhu elilawulayo nabameli balo ukulungelelanisa ubulungiseleli, ukunyula amadoda kwizigxina zenkonzo, nokwenza izigqibo ngemibandela yemfundiso. Xa umbandela wawuzinzisiwe liqumrhu elilawulayo, amabandla ayesamkela isigqibo yaye ‘ayenemihlali ngenxa yokhuthazo olo.’—IZenzo 15:1, 2, 28, 30, 31.

Ewe, uYehova wasebenzisa intlangano kwinkulungwane yokuqala. Kodwa kuthekani namhlanje?

Siyayifuna Intlangano Namhlanje

Njengamahlakani awo enkulungwane yokuqala, amaNgqina kaYehova namhlanje aluthabatha nzulu uthumo lokushumayela iindaba ezilungileyo zoBukumkani. Enye indlela awenza ngayo lo msebenzi kungokusasaza iiBhayibhile neencwadi zokufundisisa iBhayibhile, nto leyo efuna ukuba kubekho ulungelelwaniso.

Iimpapasho zamaKristu zimele zilungiselelwe ngocoselelo, zihlolwe ukuba zichanile, zishicilelwe, zize zithunyelwe emabandleni. Emva koko, mKristu ngamnye umele ngokuzithandela ase uncwadi kwabo bafuna ukulufunda. Isigidimi soBukumkani sele sifikelele izigidi ngale ndlela. Abavakalisi beendaba ezilungileyo bazabalazela ukwenza umsebenzi wabo wokushumayela ngendlela ecwangcisiweyo, beqinisekisa ukuba akukho namnye umhlaba wentsimi osetyenzwa ngokuphindaphindiweyo ngoxa eminye iye yatyeshelwa. Yonke le nto ifuna ulungelelwaniso.

Ekubeni ‘uThixo engakhethi buso,’ kumele kuguqulelwe iiBhayibhile noncwadi lweBhayibhile. (IZenzo 10:34) Sithethanje, eli phephancwadi lifumaneka ngeelwimi ezili-132, yaye iqabane lalo, uVukani!, lipapashwa ngeelwimi ezingama-83. Oku kufuna amaqela alungelelaniswe kakuhle abaguquleli ehlabathini lonke.

Amalungu ebandla afumana ukhuthazo xa esiya kwiintlanganiso nakwiindibano zamaKristu. Apho aphulaphula iintetho ezichukumisayo zeBhayibhile, afundisise iZibhalo kunye, abelane ngamava omelezayo, aze athandaze kunye. Yaye njengabazalwana babo kwinkulungwane yokuqala, ayakuvuyela ukutyelelwa ngabaveleli abahambahambayo abaqinisa ukholo ngotyelelo lwabo. Ngaloo ndlela, amaKristu namhlanje ‘aba mhlambi mnye, malusi mnye.’—Yohane 10:16.

Kakade ke, amaNgqina kaYehova akafezekanga, njengoko kwakunjalo nangamahlakani awo angaphambili. Sekunjalo, asebenzisana ngomanyano. Ngenxa yoko, umsebenzi wokushumayela iindaba zoBukumkani uyenziwa emhlabeni wonke.—IZenzo 15:36-40; Efese 4:13.

[Umfanekiso okwiphepha 31]

AmaKristu namhlanje ‘aba mhlambi mnye, malusi mnye’