‘Thixo, Thumela Ukukhanya Kwakho’
“Thumela ukukhanya kwakho nenyaniso yakho. Ngamana zingandikhokela.”—INDUMISO 43:3.
1. UYehova uzityhila njani iinjongo zakhe?
UYEHOVA ubonisa ulwazelelelo kakhulu kwindlela azazisa ngayo iinjongo zakhe kubakhonzi bakhe. Endaweni yokuba atyhile inyaniso ngaxeshanye njengelitha eliqaqambileyo eliphandlayo, usikhanyisela ngokuthe ngcembe. Uhambo lwethu kwindlela yobomi lusenokufaniswa nomntu ohamba uhambo olude. Uvuka ngenj’ ixukuxa engaboni nakakuhle. Njengoko ilanga liphuma kancinane elundini, umhambi uyakwazi ukubona izinto ezimbalwa ezikufuphi kuye. Ezinye izinto uzibona luzizi. Kodwa njengoko ilanga liqhubeka liphuma, uya ebona nakude. Kunjalo ke nangokukhanya kokomoya okuvela kuThixo. Usivumela ukuba siqonde izinto ezimbalwa ngexesha. UYesu Kristu, uNyana kaThixo, wadlulisela ukukhanya kokomoya ngendlela efanayo. Makhe sihlole indlela uYehova awabakhanyisela ngayo abantu bakhe kumaxesha amandulo nendlela abakhanyisela ngayo namhlanje.
2. UYehova wayekudlulisela njani ukukhanya kumaxesha angaphambi kobuKristu?
2 Kusenokwenzeka ukuba INdumiso yama-43 yaqanjwa ngoonyana bakaKora. NjengabaLevi, babenelungelo lokufundisa abantu uMthetho kaThixo. (Malaki 2:7) Kakade ke, uYehova wayengumYaleli wabo Ozukileyo, yaye babekhangela kuye njengoMthombo wabo bonke ubulumko. (Isaya 30:20) “Thixo, . . . thumela ukukhanya kwakho nenyaniso yakho,” wathandaza wenjenjalo umdumisi. “Ngamana zingandikhokela.” (INdumiso 43:1, 3) Lo gama amaSirayeli ayethembekile kuye, uYehova wawafundisa iindlela zakhe. Kwiinkulungwane ezithile kamva, uYehova wawajizeka ngokukhanya nenyaniso ebalaseleyo. UThixo wakwenza oko ngokuthumela uNyana wakhe emhlabeni.
3. AmaYuda ayivavanya ngayiphi indlela imfundiso kaYesu?
3 Njengomntu uYesu Kristu uNyana kaThixo ‘wayelukhanyiselo lwehlabathi.’ (Yohane 8:12) Wafundisa abantu “izinto ezininzi ngemizekeliso”—izinto ezintsha. (Marko 4:2) Waxelela uPontiyo Pilato oku: “Ubukumkani bam abuyonxalenye yeli hlabathi.” (Yohane 18:36) Yayiyinto entsha leyo kwiindlebe zomntu waseRoma yaye ngokuqinisekileyo nakumaYuda emvelo, kuba ayecinga ukuba uMesiya wayeza kuboyisa uBukhosi baseRoma aze abuyisele uSirayeli kuzuko awayenalo ngaphambili. UYesu wayedlulisela ukukhanya okuvela kuYehova, kodwa amazwi akhe awazange athandeke kubalawuli abangamaYuda, ‘ababethanda uzuko lwabantu ngakumbi kunozuko lukaThixo.’ (Yohane 12:42, 43) Uninzi lwabantu lwakhetha ukunamathela kwizithethe zabantu kunokuba lwamkele ukukhanya kokomoya nenyaniso evela kuThixo.—INdumiso 43:3; Mateyu 13:15.
4. Sazi njani ukuba abafundi bakaYesu babeya kuqhubeka bekhula ekuqondeni?
4 Noko ke, amadoda namabhinqa ambalwa antliziyo zinyanisekileyo ayamkela ngovuyo inyaniso eyayifundiswa nguYesu. Enza inkqubela ngokuthe ngcembe ekuqondeni iinjongo zikaThixo. Noko ke, njengoko ubomi basemhlabeni boMfundisi wawo babufikelela esiphelweni, kwakukuninzi ekwakusafuneka akufunde. UYesu wawaxelela oku: “Ziseninzi izinto endinokuzithetha kuni, kodwa aninakukwazi ukuzithwala okwangoku.” (Yohane 16:12) Ewe, abafundi babeza kuqhubeka bekhula ekuqondeni inyaniso kaThixo.
Ukukhanya Kuqhubeka Kuqaqamba
5. Nguwuphi umbuzo owabuzwayo ngenkulungwane yokuqala, yaye ngoobani ababenembopheleleko yokuwuzinzisa?
5 Emva kokufa nokuvuswa kukaYesu, ukukhanya okuvela kuThixo kwakhanya ngakumbi kunangaphambili. Embonweni owabonwa nguPetros, uYehova watyhila ukuba ukususela ngoko abeeNtlanga abangalukanga babenokuba ngabalandeli bakaKristu. (IZenzo 10:9-17) Eso yayisisityhilelo! Sekunjalo, kamva kwabuzwa lo mbuzo: Ngaba uYehova wayefuna ukuba abo bantu beeNtlanga baluke emva kokuba beye baba ngamaKristu? Loo mbuzo awuzange uphendulwe embonweni, yaye lo mbandela wavusa ingxoxo eshushu phakathi kwamaKristu. Kwakufuneka izinziswe, ngapha koko yayiza kuphelisa umanyano lwawo oluhle. Ngoko ke, “abapostile namadoda amakhulu bahlanganisana ndawonye ukuba babonisane ngalo mcimbi” eYerusalem.—IZenzo 15:1, 2, 6.
6. Yiyiphi indlela eyalandelwa ngabapostile namadoda amakhulu xa babeqwalasela umbuzo wolwaluko?
6 Abo babekuloo ntlanganiso babeza kukwazi njani ukuthanda kukaThixo ngokuphathelele abeeNtlanga abakholwayo? UYehova akazange athumele ingelosi ukuba iye kusingatha loo ngxoxo, yaye akazange abonise abo babelapho umbono. Sekunjalo, abapostile namadoda amakhulu abazange bashiywe enyanyeni bengazi ukuba mabathini na. Bahlola ubungqina obabuvela kumaYuda athile angamaKristu awayezibonele ngokwawo indlela uThixo awaqalisa ngayo ukuqhubana nabantu beentlanga, ethululela umoya wakhe oyingcwele kwabeeNtlanga abangalukanga. Bakhangela ulwalathiso naseZibhalweni. Ngenxa yoko, umfundi uYakobi wenza uncomelo ngokusekelwe ekukhanyeni awakufumana ezibhalweni. Njengoko babehlola ubungqina, kwatsho kwacaca ukuthanda kukaThixo. Abeentlanga kwakungeyomfuneko ukuba baluke ukuze bafumane inkoliseko kaYehova. Ngokukhawuleza abapostile namadoda amakhulu basibhala phantsi eso sigqibo ukuze namanye amaKristu akhokelwe siso.—IZenzo 15:12-29; 16:4.
7. AmaKristu enkulungwane yokuqala ayenenkqubela ngayiphi indlela?
7 Ngokungafaniyo neenkokeli zamaYuda ezazinamathele kwizithethe zookhokho bazo, inkoliso yamaYuda angamaKristu yavuya yakufumana le ndlela intsha ibalaseleyo yokuqonda injongo kaThixo ngokuphathelele abantu beentlanga, nangona ukuyamkela kwakuya kuthetha ukuguqula indlela ayebajonga ngayo abeeNtlanga ngokubanzi. UYehova wawusikelela umoya wawo wokuthobeka, yaye “amabandla aqhubeka eqiniswa elukholweni yaye esanda ngenani imihla ngemihla.”—IZenzo 15:31; 16:5.
8. (a) Sazi njani ukuba kwakunokulindelwa ukukhanya okungakumbi emva kokuphela kwenkulungwane yokuqala? (b) Yiyiphi imibuzo ebalulekileyo esiza kuyiqwalasela?
8 Ukutyhubela inkulungwane ukukhanya kokomoya kwaqhubeka kukhanya. Kodwa uYehova akazange atyhile zonke iinkalo zeenjongo zakhe kumaKristu okuqala. Umpostile uPawulos waxelela amanye amakholwa enkulungwane yokuqala oku: “Okwangoku sibona luzizi ngesipili sesinyithi.” (1 Korinte 13:12) Eso sipili sasingabonisi kakuhle. Ngoko, ekuqaleni ukukhanya kokomoya kwakungayi kuqondakala ngokucacileyo. Emva kokufa kwabapostile, ukukhanya kwaya kusiba luzizi okwexeshana, kodwa kutshanje ulwazi lweZibhalo luye lwaba yintabalala. (Daniyeli 12:4) UYehova ubakhanyisela njani abantu bakhe namhlanje? Yaye sifanele sisabele njani xa esenza indlela esiqonda ngayo iZibhalo iphangalale?
Ukukhanya Kuya Kukhanya Ngakumbi
9. Yiyiphi indlela ebalaseleyo nephumelelayo yokufundisisa iBhayibhile eyasetyenziswa ngaBafundi BeBhayibhile bokuqala?
9 Kule mihla ilitha lokuqala lokukhanya kokwenene laqalisa ukubonakala kwikota yokugqibela yenkulungwane ye-19 xa iqela lamadoda namabhinqa angamaKristu laqalisa ukufundisisa iZibhalo ngenyameko. Aqalisa indlela esebenzisekayo yokufundisisa iBhayibhile. Ubani wayebuza umbuzo; landule ke iqela lihlalutye zonke iZibhalo ezinokuthanani nawo. Xa indinyana yeBhayibhile yayibonakala iphikisana nenye, la maKristu anyanisekileyo ayezama ukuzivisisanisa. Ngokungafaniyo neenkokeli zonqulo zaloo mihla, aBafundi BeBhayibhile (njengoko amaNgqina kaYehova ayesaziwa ngaloo ndlela) babezimisele ukuvumela iZibhalo Ezingcwele zibakhokele, kungekhona izithethe okanye iimfundiso zabantu. Emva kokuqwalasela bonke ubungqina beZibhalo obufumanekayo, babesibhala phantsi isigqibo abafikelela kuso. Ngaloo ndlela yaya icaca ngakumbi indlela ababeziqonda ngayo iimfundiso zeBhayibhile ezisisiseko.
10. Ngawaphi amanqaku aluncedo ekufundisiseni iBhayibhile awabhalwa nguCharles Taze Russell?
10 Owayebalasele phakathi kwabo Bafundi BeBhayibhile yayinguCharles Taze Russell. Wabhala ungcelele lwamanqaku amathandathu aluncedo ekufundisiseni iBhayibhile anomxholo othi Studies in the Scriptures. UMzalwan’ uRussell wayezimisele ukubhala umqulu wesixhenxe, owawuza kuchaza incwadi yeBhayibhile kaHezekile neSityhilelo. Wathi: “Nanini na ndifumana isikhokelo ndiya kubhala uMqulu wesiXhenxe.” Noko ke, wongezelela wathi: “Ukuba iNkosi isinika omnye eso sikhokelo, angawubhala.”
11. Kukuphi ukunxibelelana okukhoyo kwixesha nasekuqondeni kwethu iinjongo zikaThixo?
11 La mazwi angasentla kaC. T. Russell abonisa uthunywashe obalulekileyo ekuqondeni kwethu izicatshulwa ezithile zeBhayibhile—ixesha. UMzalwan’ uRussell wayesazi ukuba wayengenako ukunyanzela ukukhanya ukuba kukhanye kwincwadi yeSityhilelo kanye njengokuba umhambi engenakwenza ukuba ilanga liphume ngaphambi kwexesha lalo elimiselweyo.
Ityhiliwe—Kodwa Ngexesha LikaThixo Elimiselweyo
12. (a) Isiprofeto seBhayibhile siqondwa kakuhle nini? (b) Nguwuphi umzekelo obonisa ukuba ukukwazi kwethu ukuqonda isiprofeto seBhayibhile kuxhomekeke kubalo-maxesha lukaThixo? (Bona umbhalo osemazantsi.)
12 Kanye njengokuba abapostile baqonda iziprofeto ezininzi eziphathelele uMesiya emva kokufa nokuvuswa kukaYesu, namhlanje amaKristu aqonda iinkcukacha ezipheleleyo zesiprofeto seBhayibhile kuphela emva kokuba sizalisekile. (Luka 24:15, 27; IZenzo 1:15-21; 4:26, 27) ISityhilelo yincwadi yesiprofeto, ngoko sifanele silindele ukusiqonda ngokucace ngakumbi njengoko iziganeko ezichazwe kuso zisenzeka. Ngokomzekelo, uC. T. Russell wayengenakuyiqonda ngokuchanileyo intsingiselo yerhamncwa lokomfuziselo elimbala ungqombela ekuthethwe ngalo kwiSityhilelo 17:9-11, ekubeni iintlangano ezifanekiselwa leli rhamncwa, ezizezi, uManyano Lwezizwe neZizwe Ezimanyeneyo, zazingekabikho de kwaba semva kokufa kwakhe.a
13. Yintoni eyenzekayo maxa wambi xa kukhanyiswa umxholo othile weBhayibhile?
13 Athi amaKristu okuqala akufumanisa ukuba abeeNtlanga abangalukanga babenokuba ngamakholwa, loo nguqulelo yabangela ukuba kubuzwe omnye umbuzo ngokuphathelele imfuneko yokuba abantu beentlanga baluswe. Oku kwabangela ukuba abapostile namadoda amakhulu bawuhlolisise kwakhona lo mbandela wolwaluko. Kusasetyenziswa indlela efanayo nanamhlanje. Ilitha eliqaqambileyo elikhanyisa umbandela othile weBhayibhile maxa wambi libangela ukuba abakhonzi bakaThixo abathanjisiweyo, ‘ikhoboka elithembekileyo neliyingqondi,’ baphinde bayihlolisise imibandela enokuthanani nawo, njengoko lo mzekelo ulandelayo wamvanje ubonisa.—Mateyu 24:45.
14-16. Ukulungiswa kwembono yethu ngokuphathelele itempile yokomoya kwayichaphazela njani indlela esisiqonda ngayo isahluko 40 ukusa kwesama-48 sikaHezekile?
14 Ngowe-1971 kwapapashwa inkcazelo yesiprofeto sikaHezekile kwincwadi ethi “The Nations Shall Know That I Am Jehovah”—How? Kukho icandelo kuloo ncwadi elithi gqaba gqaba ngombono kaHezekile wetempile. (Hezekile, isahluko 40-48) Ngelo xesha, kwagxininiswa kwindlela umbono kaHezekile wetempile owawuya kuzaliseka ngayo kwihlabathi elitsha.—2 Petros 3:13.
15 Noko ke, amanqaku amabini awapapashwa kwiMboniselo (yesiNgesi) kaDisemba 1, 1972, ayichaphazela indlela esiwuqonda ngayo umbono kaHezekile. Athetha ngetempile enkulu yokomoya echazwe ngumpostile uPawulos kumaHebhere isahluko 10. Le Mboniselo yachaza ukuba igumbi eliNgcwele nentendelezo engaphakathi yetempile yokomoya ifanekisela imeko yabathanjiswa ngoxa besesemhlabeni. Kwiminyaka ethile kamva kwahlolisiswa isahluko 40 ukusa kwesama-48 sikaHezekile kwakhona, yaye kwafunyaniswa ukuba kanye njengokuba itempile yokomoya isebenza namhlanje, kumele ukuba netempile eyabonwa nguHezekile embonweni iyasebenza namhlanje. Njani?
16 Embonweni kaHezekile, ababingeleli behla benyuka entendelezweni yetempile njengoko bekhonza iintlanga ezingengobabingeleli. Aba babingeleli bafanekisela “ububingeleli basebukhosini,” abakhonzi bakaYehova abathanjisiweyo. (1 Petros 2:9) Noko ke, abayi kukhonza kwintendelezo yetempile yasemhlabeni ebudeni boLawulo Lweminyaka Eliwaka lukaKristu. (ISityhilelo 20:4) Ebudeni benkoliso yelo xesha, ukuba akuyi kuba ngalo lonke elo xesha, abathanjiswa baya kube bekhonza uThixo kweYona Ngcwele kwitempile yokomoya, “ezulwini ngokwalo.” (Hebhere 9:24) Ekubeni ababingeleli bebonwa besihla benyuka kwiintendelezo zetempile ekuHezekile, loo mbono umele ukuba uyazaliseka namhlanje, ngoxa abanye babathanjiswa besesemhlabeni. Ngako oko, inkupho yeli phephancwadi kaMatshi 1, 1999, yachaza imbono elungisiweyo ngalo mbandela. Ngaloo ndlela, ukutyhubela inkulungwane yama-20 yonke, ilitha lokukhanya kokomoya liye lakhanyisa kwisiprofeto sikaHezekile.
Kulungele Ukulungelelanisa Imbono Yakho
17. Luluphi uhlengahlengiso oye walwenza kwimbono yakho ukususela ngexesha owaqala ngalo ukwazi inyaniso, yaye uye wangenelwa njani kulo?
17 Nabani na onqwenela ukufumana ulwazi ngenyaniso ufanele akulungele ‘ukuthimba zonke iingcamango, azenze zithobele uKristu.’ (2 Korinte 10:5) Oko akusoloko kulula, ingakumbi ukuba iimbono zendele nzulu. Ngokomzekelo, ngaphambi kokuba ufunde inyaniso kaThixo, kusenokwenzeka ukuba wawukunandipha ukubhiyozela iiholide ezithile zonqulo kunye nentsapho yakho. Emva kokuba uqalise ukufundisisa iBhayibhile, waphawula ukuba le mibhiyozo eneneni inemvelaphi yobuhedeni. Ekuqaleni, kusenokwenzeka ukuba wawumadolw’ anzima ukukusebenzisa oko ukufundayo. Noko ke, ekugqibeleni, uthando ngoThixo lomelela ngakumbi kuneembono zonqulo, yaye wayeka ukubandakanyeka kwimibhiyozo engamkholisiyo uThixo. Ngaba uYehova akakhange asisikelele eso sigqibo sakho?—Thelekisa amaHebhere 11:25.
18. Sifanele sivakalelwe njani xa kucaciswa indlela esiyiqonda ngayo inyaniso yeBhayibhile?
18 Siyazuza ngalo lonke ixesha sisenza izinto ngendlela kaThixo. (Isaya 48:17, 18) Ngoko xa imbono yethu ngendinyana ethile yeBhayibhile icacisiwe, masivuye ngokuhambela phambili kwenyaniso! Eneneni, ukuqhubeka kwethu sikhanyiselwa kuqinisekisa ukuba sikumendo ofanelekileyo. ‘Ngumendo wamalungisa onjengokukhanya okuqaqambileyo okuya kukhanya ngokukhanya de kube semini emaqanda.’ (IMizekeliso 4:18) Enyanisweni, okwangoku ezinye iinkalo zenjongo kaThixo sizibona “luzizi.” Kodwa ngexesha likaThixo elifanelekileyo, siya kububona ubuhle benyaniso, ukuba nje siye sema ngokuqinileyo kulo ‘mendo.’ Okwangoku, ngamana singagcoba ngenxa yeenyaniso azenze zacaca uYehova, size silindele ukukhanyiselwa ezo zingekaqondakali ngokucacileyo.
19. Yiyiphi enye indlela esinokubonisa ngayo ukuba siyayithanda inyaniso?
19 Yiyiphi indlela esinokulubonakalisa ngayo uthando esinalo ngokukhanya? Enye indlela esinokwenza ngayo kukufunda iLizwi likaThixo rhoqo—ukuba kunokwenzeka yonke imihla. Ngaba ululandela rhoqo ucwangciso lokufunda iBhayibhile? Amaphephancwadi iMboniselo noVukani! asinika intabalala yokutya kokomoya okunempilo ukuze sikunandiphe. Ungazilibali neencwadi, iincwadana ezinemifanekiso, nezinye iimpapasho esinazo ezilungiselelwe inzuzo yethu. Kuthekani ngeengxelo ezilukhuthazo zomsebenzi wokushumayela ngoBukumkani ezipapashwe kwiNcwadi Yonyaka YamaNgqina KaYehova?
20. Kukuphi ukunxibelelana okukhoyo phakathi kokukhanya nenyaniso evela kuYehova nokuza kwethu kwiintlanganiso zamaKristu?
20 Ewe, uYehova uye wawuphendula ngendlela engummangaliso umthandazo okwiNdumiso 43:3. Ekupheleni kwaloo ndinyana, sifunda oku: “Ngamana [ukukhanya nenyaniso yakho] zingandisa entabeni yakho engcwele nasemnqubeni wakho ozukileyo.” Ngaba ukhangele phambili ekunquleni uYehova kunye nabanye abayindimbane? Imfundo yokomoya esiyifumana kwiintlanganiso zethu yindlela ebalulekileyo uYehova asikhanyisela ngayo namhlanje. Yintoni esinokuyenza ukuze sikhulise uxabiso esinalo ngeentlanganiso zamaKristu? Siyakumema ukuba uwuqwalasele lo mbandela ngomthandazo kwinqaku elilandelayo.
[Umbhalo osemazantsi]
a Emva kokufa kukaC. T. Russell, kwalungiselelwa umqulu wesixhenxe weStudies in the Scriptures kuzanywa ukuchaza incwadi kaHezekile neyeSityhilelo. Lo mqulu, ngokuyinxenye wawusekelwe kumagqabaza awayenziwe ngulo kaRussell ngezo ncwadi zeBhayibhile. Noko ke, lalingekafiki ixesha lokutyhila intsingiselo yezo ziprofeto, yaye ngokubanzi, ingcaciso eyayikuloo mqulu weStudies in the Scriptures yayiluzizi. Kwiminyaka elandelayo, ububele obungasifanelanga bukaYehova nenkqubela kwiziganeko zehlabathi ziye zabangela ukuba amaKristu ayiqonde ngokuchane ngakumbi intsingiselo yezo ncwadi zesiprofeto.
Ngaba Unokuphendula?
• Kutheni uYehova ezityhila ngokuthe ngcembe iinjongo zakhe?
• Abapostile namadoda amakhulu aseYerusalem bayizinzisa njani imbambano yolwaluko?
• Yiyiphi indlela yokufundisisa iBhayibhile eyasetyenziswa ngaBafundi BeBhayibhile bokuqala, yaye kutheni le nto yayikhethekile?
• Bonisa indlela ukukhanya kokomoya okutyhilwa ngayo ngexesha likaThixo elifanelekileyo.
[Umfanekiso okwiphepha 12]
UCharles Taze Russell wayesazi ukuba ukukhanya kwakuza kukhanya kwincwadi yeSityhilelo ngexesha likaThixo elifanelekileyo