Yiva Oko Kuthethwa Ngumoya
“Neendlebe zakho ziya kuva ilizwi emva kwakho lisithi: ‘Nantsi indlela. Hambani ngayo,’ nokuba nisinga ekunene, nokuba nisinga ekhohlo.”—ISAYA 30:21.
1, 2. UYehova uye wanxibelelana njani nabantu ukutyhubela imbali?
ISIQITHI sasePuerto Rico silikhaya lesona sixhobo samaza kanomathotholo esimile okwesitya esikhulu nesinamandla ehlabathini lonke. Kangangamashumi eminyaka, izazinzulu bezinethemba lokuba ziza kufumana izigidimi ezivela kwizidalwa eziphila kummandla osemajukujukwini, zisebenzisa esi sixhobo sikhulu. Kodwa akukhange kufunyanwe sigidimi sinjalo. Noko ke, okuhlekisayo kukuba kukho izigidimi ezicacileyo ezisuka kummandla ongaphandle ezinokufunyanwa nangubani na kuthi nangaliphi na ixesha—nangaphandle kokusebenzisa izixhobo ezintsonkothileyo. Ezi zigidimi zisuka kuMthombo ophakame ngaphezu kwaso nasiphi na isidalwa esiqikelelwayo esikummandla osemajukujukwini. Ngubani uMthombo wezo zigidimi, yaye ngoobani abazifumanayo? Zithini ezo zigidimi?
2 Ingxelo yeBhayibhile ibalisa ngezihlandlo eziliqela apho izigidimi ezivela kuThixo zathi zavakala ezindlebeni zabantu. Maxa wambi ezi zigidimi zazidluliselwa zizidalwa zomoya ezazikhonza njengabathunywa bakaThixo. (Genesis 22:11, 15; Zekariya 4:4, 5; Luka 1:26-28) Ilizwi likaYehova ngokwakhe leviwa kangangezihlandlo ezithathu. (Mateyu 3:17; 17:5; Yohane 12:28, 29) Kwakhona uThixo wathetha esebenzisa abaprofeti abangabantu, uninzi lwabo olwakubhalayo oko lwaluphefumlelwe ukuba lukuthethe. Namhlanje sineBhayibhile, equka ingxelo ebhaliweyo yenkoliso yezi zigidimi, kunye neemfundiso zikaYesu nabafundi bakhe. (Hebhere 1:1, 2) Okunene uYehova ebedlulisela inkcazelo kwizidalwa zakhe ezingabantu.
3. Iyintoni injongo yezigidimi zikaThixo, yaye yintoni elindelekileyo kuthi?
3 Zonke ezi zigidimi ziphefumlelweyo ezivela kuThixo zisityhilela okuncinane ngendalo ebonakalayo. Zitsalela ingqalelo kwizinto ezibaluleke ngakumbi, ezinempembelelo kubomi esibuphila ngoku nakwikamva. (INdumiso 19:7-11; 1 Timoti 4:8) UYehova uzisebenzisa ukuze achaze ukuthanda kwakhe yaye anikele ukhokelo. Ziyenye yeendlela azalisekiswa ngazo amazwi omprofeti uIsaya athi: “Neendlebe zakho ziya kuva ilizwi emva kwakho lisithi: ‘Nantsi indlela. Hambani ngayo,’ nokuba nisinga ekunene, nokuba nisinga ekhohlo.” (Isaya 30:21) UYehova akasinyanzeli ukuba siphulaphule “ilizwi” lakhe. Kuxhomekeke kuthi ukuba silulandele ulwalathiso lukaThixo size sihambe ngendlela yakhe. Ngenxa yoko, iZibhalo ziyasibongoza ukuba siphulaphule izigidimi ezivela kuYehova. Kwincwadi yeSityhilelo, sikhuthazwa kangangezihlandlo ezisixhenxe ukuba ‘sive oko ukutshoyo umoya.’—ISityhilelo 2:7, 11, 17, 29; 3:6, 13, 22.
4. Ngaba kusengqiqweni kumhla wethu ukulindela ukuba uThixo anxibelelane nathi ngokusuka ngqo ezulwini?
4 Namhlanje, uYehova akathethi nathi ngokungqalileyo ekummandla wezulu. Kwanangamaxesha okubhalwa kweBhayibhile, olu nxibelelwano lungelolwamvelo lwaluba ngumnqa, maxa wambi lwenzeke kube kanye emva kwenkulungwane. Ukutyhubela imbali, uYehova ebedla ngokunxibelelana nabantu bakhe ngeendlela ezingangqalanga. Kunjalo ke nakumhla wethu. Makhe siqwalasele iindlela ezintathu uYehova anxibelelana ngazo nathi namhlanje.
“Sonke ISibhalo Siphefumlelwe”
5. Sisiphi esona sixhobo siyintloko sikaYehova sokunxibelelana namhlanje, yaye sinokungenelwa njani kuso?
5 Esona sixhobo siyintloko esinxibelelanisa uThixo nabantu yiBhayibhile. Iphefumlelwe nguThixo, yaye yonke into ebhalwe kuyo iyingenelo kuthi. (2 Timoti 3:16) IBhayibhile inentlaninge yemizekelo yabantu ababephila ngokwenene abasebenzisa inkululeko yabo yokuzikhethela ukuze bagqibe enokuba baphulaphule ilizwi likaYehova okanye bangenzi njalo. Imizekelo enjalo isikhumbuza ngesizathu sokuba kubalulekile ukuphulaphula oko kuthethwa ngumoya kaThixo. (1 Korinte 10:11) IBhayibhile ikwaqulethe ubulumko obusebenzisekayo, iyasicebisa xa kufuneka senze izigqibo ebomini. Kuba ngathi uThixo ulapha emva kwethu, usisebezela endlebeni esithi: “Nantsi indlela. Hambani ngayo.”
6. Kutheni iBhayibhile izigqitha kude lee zonke ezinye iincwadi?
6 Ukuze sive oko kuthethwa ngumoya ngeBhayibhile, simele siyifunde rhoqo. IBhayibhile asiyoncwadi nje ebhalwe kakuhle nethandwayo, enye nje yeencwadi ezikhoyo namhlanje. IBhayibhile iphefumlelwe ngomoya yaye iqulethe iingcamango zikaThixo. EyamaHebhere 4:12 ithi: “Ilizwi likaThixo liphilile, linamandla yaye libukhali ngaphezu kwalo naliphi na ikrele elintlangothi-mbini, lihlaba lide lahlule umphefumlo nomoya, kwanamalungu nomongo wawo, yaye liyakwazi ukuphicotha iingcamango notyekelo lwentliziyo.” Njengoko sifunda iBhayibhile, oko ikuquletheyo kugqobhozela kwiingcamango nakwiintshukumisa ezisezintliziyweni zethu njengekrele, kutyhile umlinganiselo obuthi ubomi bethu buvisisane ngawo nokuthanda kukaThixo.
7. Kutheni kubalulekile ukufunda iBhayibhile, yaye sikhuthazwa ukuba siyifunde ngokufuthi kangakanani?
7 “Iingcamango notyekelo lwentliziyo” zinokuguquka ngokuhamba kwexesha nanjengoko sichatshazelwa zizinto esidibana nazo ebomini—ezimnandi nezinzima. Ukuba asilifundisisi rhoqo iLizwi likaThixo, iingcamango, izimo zengqondo kunye neemvakalelo zethu ziya kuyeka ukuvisisana nemigaqo yobuthixo. Ngenxa yoko, iBhayibhile iyasibongoza: “Hlalani nizivavanya enoba niselukholweni kusini na, hlalani nizicikida oko nikuko nina ngokwenu.” (2 Korinte 13:5) Ukuba sifuna ukuqhubeka sisiva oko umoya ukutshoyo, sifanele sithobele isiluleko esithi masifunde iLizwi likaThixo imihla ngemihla.—INdumiso 1:2.
8. Ngawaphi amazwi kampostile uPawulos asinceda sizihlole xa kufikwa kumba wokufunda iBhayibhile?
8 Nantsi into ebalulekileyo abafanele bayikhumbule abo bafunda iBhayibhile: Ziphe ixesha elaneleyo lokukwetyisa oko ukufundayo! Xa sizama ukuthobela isiluleko esithi masifunde iBhayibhile yonke imihla, asiyi kuzibona sele sifunda izahluko eziliqela singakhange siyive naloo nto siyifundayo. Ngoxa ukufunda iBhayibhile rhoqo kubalulekile, intshukumisa yethu ayifanelanga ibe kukunamathela kucwangciso kuphela; sifanele sibe nomnqweno wokwenene wokufunda ngoYehova nangeenjongo zakhe. Ngokuphathelele oku, sinokusebenzisa la mazwi alandelayo kampostile uPawulos ukuze sizihlole. Xa wayebhalela amanye amaKristu, wathi: “Ndiguqa ngamadolo kuBawo, ukuze ngokobutyebi bozuko lwakhe anenze . . . [nifumane] uKristu ngalo ukholo lwenu ahlale ezintliziyweni zenu ngothando; khon’ ukuze nimiliselwe nize nendele kwisiseko, ukuze nina nabo bonke abo bangcwele nicacelwe ngokucokisekileyo engqondweni koko bukuko ububanzi nobude nokuphakama nobunzulu, nilwazi nothando lukaKristu olugqwesa ulwazi, ukuze nizaliswe kuko konke ukuzala kukaThixo.”—Efese 3:14, 16-19.
9. Sinokuwuhlakulela size siwenze nzulu njani umnqweno wokufunda kuYehova?
9 Kuyavunywa ukuba abanye bethu abakuthandi nje ngendalo ukufunda, ngoxa abanye bekukhuthalele. Noko ke, enoba sinaluphi na utyekelo thina, sinako ukuwuhlakulela size siwenze nzulu umnqweno wethu wokufunda kuYehova. Umpostile uPetros wachaza ukuba sifanele silulangazelele ulwazi lweBhayibhile, kwaye wayiqonda into yokuba loo mnqweno usenokufuna ukukhuliswa. Wabhala: “Njengeentsana ezisandul’ ukuzalwa, langazelelani ubisi olungangxengwanga lwelizwi, ukuze ngalo nikhulele elusindisweni.” (1 Petros 2:2) Ukuziqeqesha kubalulekile ukuze ‘silangazelele’ ukufundisisa iBhayibhile. Kanye njengokuba siya siluthanda uhlobo olutsha lokutya emva kokuba siye salungcamla kaninzi, sinokusitshintsha size sisiphucule nesimo sethu sengqondo ngokuphathelele ukufunda nokufundisisa ukuba siziqeqeshela ukulandela ucwangciso oluthe rhoqo.
‘Ukutya Ngexesha Elifanelekileyo’
10. Ngoobani abayila “ikhoboka elithembekileyo neliyingqondi,” yaye uYehova ubasebenzisa njani namhlanje?
10 Enye indlela esetyenziswa nguYehova ukuze athethe nathi namhlanje ichazwe nguYesu kuMateyu 24:45-47. Apha wayethetha ngebandla lamaKristu athanjiswe ngomoya—“ikhoboka elithembekileyo neliyingqondi” elimiselwe ukuba lilungiselele ‘ukutya kokomoya ngexesha elifanelekileyo.’ Njengabantu ngabanye, amalungu eli qela ‘ayimpahla yendlu’ kaYesu. La malungu, ekunye ‘nesihlwele esikhulu’ ‘sezinye izimvu,’ afumana ukhuthazo kunye nokhokelo. (ISityhilelo 7:9; Yohane 10:16) Ubukhulu becala oku kutya kufika ngexesha elifanelekileyo kuza ngeempapasho ezishicilelweyo, ezinjengeMboniselo noVukani! nezinye. Ukutya kokomoya okungakumbi kusasazwa ngeentetho nangemiboniso eyenziwa kwiindibano ezinkulu nakwezincinane, nakwiintlanganiso zebandla.
11. Sinokuzingqina njani sikwamkela oko kuthethwa ngumoya ‘ngekhoboka elithembekileyo neliyingqondi’?
11 Inkcazelo elungiselelwa “likhoboka elithembekileyo neliyingqondi” ilungiselelwe ukomeleza ukholo lwethu nokuqeqesha amandla ethu okuqonda. (Hebhere 5:14) Isiluleko esinjalo sisenokuphangalala ukuze sivumele ngamnye ukuba asisebenzise ngendlela yakhe. Ngamanye amaxesha, sifumana nesiluleko esithetha ngeenkalo ezikhethekileyo zehambo yethu. Sisiphi isimo sengqondo esifanele sibe naso ukuba ngokwenene siyakuphulaphula oko kuthethwa ngumoya ngodidi lwekhoboka? Umpostile uPawulos uyaphendula: “Bathobeleni abo bakhokelayo phakathi kwenu nize nibalulamele.” (Hebhere 13:17) Kuyinyaniso ukuba bonke abantu ababandakanyekileyo kweli lungiselelo abafezekanga. Sekunjalo, uYehova uyakuvuyela ukusebenzisa abakhonzi bakhe abangabantu, nangona bengafezekanga, ukuze asalathise kweli xesha lesiphelo.
Ukhokelo Olusuka Kwisazela Sethu
12, 13. (a) Nguwuphi omnye umthombo wokhokelo uYehova asinike wona? (b) Yiyiphi impembelelo eyakhayo esinokuba nayo isazela kwanakubantu abangenalwazi luchanileyo ngeLizwi likaThixo?
12 UYehova usinike omnye umthombo wokhokelo—isazela sethu. Wadala umntu ukuba abe nemvo engaphakathi yokulungileyo nokuphosakeleyo. Leyo yinxalenye yobuntu bethu. Kwincwadi yakhe eyayisiya kumaRoma, umpostile uPawulos wachaza: “Xa sukuba abantu beentlanga abangenawo umthetho besenza ngemvelo izinto zomthetho, aba bantu, nangona bengenawo umthetho, bangumthetho kubo ngokwabo. Bona babonakalisa ukuba umthetho ubhalwe ezintliziyweni zabo, nesazela sabo siyakungqina oko, yaye iingcamango zabo ziyabamangalela okanye zibangxengxezele.”—Roma 2:14, 15.
13 Uninzi lwabo bangamaziyo uYehova lunokuthi, ukusa kumlinganiselo othile, lucinge yaye lwenze ngokuvisisana nemigaqo yobuthixo ephathelele oko kulungileyo nokuphosakeleyo. Kuba ngathi luva ilizwi eliphantsi lithetha ngaphakathi kwalo lilibonisa indlela echanileyo. Ukuba oko kunokwenzeka kwabo bangenalwazi luchanileyo ngeLizwi likaThixo, kubekele phi ke kumaKristu okwenyaniso! Ngokuqinisekileyo, isazela somKristu esisulungekiswe lulwazi oluchanileyo lweLizwi likaThixo nesisebenza ngokuvisisana nomoya oyingcwele kaYehova sinokunikela ukhokelo olunokuthenjwa.—Roma 9:1.
14. Isazela esiqeqeshwe yiBhayibhile sinokusinceda njani silandele ulwalathiso lomoya kaYehova?
14 Isazela esihle, esiqeqeshwe ngeBhayibhile, sinokusikhumbuza ngendlela umoya ofuna sihambe ngayo. Kusenokubakho izihlandlo apho iZibhalo neempapasho zethu ezisekelwe eBhayibhileni zingaxubushi ngokungqalileyo ngemeko ethile esinokuzifumanisa sikuyo. Sekunjalo, isazela sethu sinokusilumkisa kwikhondo elisenokuba yingozi. Kwiimeko ezinjalo, ukukutyeshela oko kuthethwa zizazela zethu kusenokuthi, ekugqibeleni, kuthethe ukukutyeshela oko kuthethwa ngumoya kaYehova. Kwelinye icala, ngokufunda ukwayama kwizazela zethu eziqeqeshiweyo zamaKristu, sinokwenza ukhetho olufanelekileyo xa kungekho lwalathiso lungqalileyo olubhaliweyo. Noko ke, kubalulekile ukukhumbula ukuba xa ungekho umgaqo, ummiselo okanye umthetho kaThixo, asifanelanga sinyanzele izinto ezisuka kwizazela zethu kwamanye amaKristu kwimibandela eyeyobuqu.—Roma 14:1-4; Galati 6:5.
15, 16. Yintoni enokubangela isazela sethu singasebenzi kakuhle, yaye sinokukuthintela njani ukuba kungenzeki oko?
15 Isazela esicocekileyo nesiqeqeshwe yiBhayibhile sisipho esivela kuThixo. (Yakobi 1:17) Kodwa ke simele sisikhusele esi sipho kwiimpembelelo ezonakalisayo ukuze sisebenze kakuhle njengesixhobo sokukhusela imilinganiselo yethu yokuziphatha. Izithethe, amasiko kunye nemikhwa yasekuhlaleni engqubana nemilinganiselo kaThixo inako, xa ilandelwa, ukubangela ukuba isazela sethu singasebenzi kakuhle yaye sisilele ukusiqhubela ngakwicala elilungileyo. Sinokungakwazi ukwenza izigqibo ezichanileyo yaye side siziqhathe ngokucinga ukuba isenzo esibi silungile.—Thelekisa uYohane 16:2.
16 Ukuba siyaqhubeka sizityeshela izilumkiso ezivela kwisazela sethu, sisenokuya sisiba buthathaka de singabi namvakalelo okanye iintliziyo zethu zibe lukhuni. Umdumisi wathetha ngabantu abanjalo xa wathi: “Intliziyo yabo ayinamvakalelo kanye njengamanqatha.” (INdumiso 119:70) Abanye abakutyeshelayo oko kuthethwa zizazela zabo bayaphulukana namandla abo okucinga kakuhle. Abasakhokelwa yimigaqo yobuthixo yaye abakwazi ukwenza izigqibo ezifanelekileyo. Ukuze siphephe imeko enjalo, sifanele siluve msinya ulwalathiso oluvela kwisazela sethu samaKristu kwanaxa umbandela oxakileyo ubonakala umncinane.—Luka 16:10.
Banoyolo Abo Baphulaphulayo Baze Bathobele
17. Siya kusikelelwa njani xa siphulaphula ‘ilizwi elisemva kwethu’ yaye sithobela isazela sethu esiqeqeshwe yiBhayibhile?
17 Njengoko sizenzela umkhwa wokuphulaphula ‘ilizwi elisemva kwethu’—eliza ngeZibhalo nangekhoboka elithembekileyo neliyingqondi—yaye njengoko sithobela izikhumbuzo ezivela kwisazela sethu esiqeqeshwe yiBhayibhile, uYehova uya kusisikelela ngomoya wakhe. Umoya oyingcwele uya kuthi, nawo, uphuhlise amandla ethu okukwamkela nokukuqonda oko uYehova asixelela kona.
18, 19. Sinokungenelwa njani kukhokelo lukaYehova kubulungiseleli bethu nakwizinto zobuqu?
18 Umoya kaYehova uya kusomeleza ukuze sibe nobulumko yaye sikhaliphe xa sijamelene neemeko ezinzima. Njengakwimeko yabapostile, umoya kaThixo uya kuvuselela amandla eengqondo zethu uze usincede sisoloko sisenza yaye sithetha ngokuvisisana nemigaqo yeBhayibhile. (Mateyu 10:18-20; Yohane 14:26; IZenzo 4:5-8, 13, 31; 15:28) Umoya kaYehova kunye nemigudu yobuqu esiyenzayo iya kusenza siphumelele xa sisenza izigqibo ezibalulekileyo ebomini, zisenze sikhaliphe ukuze sizilandele ezo zigqibo. Ngokomzekelo, usenokuba ucinga ngokulungisa indlela ophila ngayo ukuze uziphe ixesha elingakumbi lezinto zokomoya. Okanye mhlawumbi kufuneka wenze ukhetho olubalulekileyo nolutshintsha indlela ophila ngayo, olunjengokukhetha iqabane, ukucingisisa ngomsebenzi owunikwayo okanye ukuthenga indlu. Kunokuba sivumele iimvakalelo zethu ukuba ibe zizo zodwa ezibandakanyekayo kwizigqibo zethu, sifanele siphulaphule oko umoya kaThixo ukutshoyo size senze ngokuvisisana nokhokelo lwawo.
19 Ngokwenene siyazixabisa izikhumbuzo zobubele nesiluleko esisifumana kwamanye amaKristu, kuquka abadala. Noko ke, akuyomfuneko ukuba sisoloko silindele abanye ukuba basixelele ngezinto. Ukuba siyalazi ikhondo lobulumko esifanele sihambe ngalo kunye neenguqu ekufuneka sizenze ukuze isimo sengqondo kunye nehambo yethu ikholise uThixo, masingene kulo. UYesu wathi: “Ukuba niyazazi ezi zinto, ninoyolo ukuba nithi nizenze.”—Yohane 13:17.
20. Yiyiphi intsikelelo efunyanwa ngabo baphulaphula ‘ilizwi elisemva kwabo’?
20 Kucacile ukuba ukuze amaKristu azi indlela yokukholisa uThixo, akuyomfuneko ukuba eve ilizwi lokoqobo elisuka ezulwini, kungeyomfuneko kananjalo nokuba atyelelwe ziingelosi. Asikelelwe kuba aneLizwi likaThixo elibhaliweyo kunye nokhokelo lothando olunikelwa ngodidi lwabathanjiswa abasemhlabeni. Xa elithobela ngenyameko ‘ilizwi elisemva kwawo’ yaye elandela ukhokelo lwesazela sawo esiqeqeshwe yiBhayibhile, aya kuphumelela ekwenzeni ukuthanda kukaThixo. Aya kwandula ke abone inzaliseko yedinga likampostile uYohane elithi: “Lowo wenza ukuthanda kukaThixo uhleli ngonaphakade.”—1 Yohane 2:17.
Impinda Emfutshane
• Kutheni uYehova enxibelelana nezidalwa zakhe ezingabantu?
• Sinokungenelwa njani kucwangciso oluthe rhoqo lokufundisisa iBhayibhile?
• Sifanele sisabele njani kulwalathiso oluvela kudidi lwekhoboka?
• Kutheni sifanele singakutyesheli oko kuthethwa sisazela esiqeqeshwe yiBhayibhile?
[Umfanekiso okwiphepha 13]
Akuyomfuneko ukuba umntu abe nezixhobo ezintsonkothileyo ukuze afumane izigidimi ezivela kuThixo
[Inkcazelo]
Courtesy Arecibo Observatory/David Parker/Science Photo Library
[Umfanekiso okwiphepha 15]
UYehova uthetha nathi esebenzisa iBhayibhile ‘nekhoboka elithembekileyo neliyingqondi’