Ukuhlwayela Imbewu Yenyaniso YoBukumkani
“Kusasa hlwayela imbewu yakho, yaye ungasiphumzi isandla sakho.”—INTSHUMAYELI 11:6.
1. AmaKristu ayihlwayela njani imbewu namhlanje?
UKULIMA kwakunendima ephambili kumaHebhere amandulo. Kungoko uYesu, owachitha bonke ubomi bakhe njengomntu kwiLizwe Ledinga, wasebenzisa iinkalo ezithile zolimo kwimizekeliso yakhe. Ngokomzekelo, wafanisa ukushumayela iindaba ezilungileyo zoBukumkani bukaThixo nokuhlwayela imbewu. (Mateyu 13:1-9, 18-23; Luka 8:5-15) Ukuza kuthi ga kulo mhla, enoba sihlala kwindawo ekulinywa kuyo okanye akunjalo, ukuhlwayela imbewu yokomoya ngolu hlobo kungowona msebenzi ubalulekileyo kwenokwenziwa ngumKristu.
2. Ubaluleke kangakanani umsebenzi wethu wokushumayela, yaye ziziphi ezinye zezinto ezenziwayo namhlanje ukuze uphunyezwe?
2 Kulilungelo elikhulu ukuhlwayela imbewu yenyaniso yeBhayibhile kweli xesha lesiphelo. EyamaRoma 10:14, 15 iyichaza kakuhle indlela obaluleke ngayo lo msebenzi xa isithi: “Baya kuva njani na kungekho bani ushumayelayo? Baya kushumayela njani na bengathunywanga? Kunjengokuba kanye kubhaliwe kwathiwa: ‘Hayi indlela ezibukeka ngayo iinyawo zabo bavakalisa iindaba ezilungileyo zezinto ezilungileyo!’” Akuzange kubaluleke ngolu hlobo ukutyhalela phambili ngesimo sengqondo esakhayo ekuzalisekiseni olu thumo silunikwe nguThixo. Ngenxa yoko amaNgqina kaYehova azibhokoxa ngokupheleleyo ekuveliseni nasekusasazeni iiBhayibhile neencwadi zokufunda iBhayibhile ngeelwimi ezingama-340. Ukuze kulungiswe ezo ncwadi kufuneka abasebenzi bokuzithandela abangaphezu kwe-18 000 kwikomkhulu lawo nakwiiofisi zamasebe ezikumazwe ahlukahlukeneyo. Kwaye amalunga nezigidi ezithandathu amaNgqina aba nesabelo ekusasazeni olu ncwadi lweBhayibhile ehlabathini lonke.
3. Yintoni ephunyezwayo ngokuhlwayelwa kwenyaniso yoBukumkani?
3 Siyintoni isiqhamo salo msebenzi unzima kangaka? Njengakwimihla yangaphambili yobuKristu, abaninzi namhlanje bayayamkela inyaniso. (IZenzo 2:41, 46, 47) Noko ke, okubaluleke nangaphezu kwenani elikhulu labavakalisi boBukumkani abasandul’ ukubhaptizwa kukuba obu bungqina bubalaseleyo bufak’ isandla ekungcwalisweni kwegama likaYehova nasekuthethelelweni kokuphela koThixo oyinyaniso. (Mateyu 6:9) Ngaphezu koko, ulwazi lweLizwi likaThixo luphucula ubomi babaninzi kwaye lunokukhokelela ekubeni basindiswe.—IZenzo 13:47.
4. Abapostile babebaxhalabele kangakanani abantu ababebashumayeza?
4 Abapostile babekwazi kakuhle ukubaluleka kweendaba ezilungileyo ezinika ubomi, kwaye babenovelwano kakhulu kwabo babebashumayeza. Oku sinokukubona kumazwi kampostile uPawulos, xa wabhala esithi: “Ngenxa yokuba sinomsa ngani, kuye kwakholeka kuthi ukuba sininike, kungekuphela nje iindaba ezilungileyo zikaThixo, kodwa kwanemiphefumlo yethu, ngenxa yokuba naba ziintanda kuthi.” (1 Tesalonika 2:8) Xa babebonakalisa loo nkxalabo yokwenene ebantwini, uPawulos nabanye abapostile babexelisa uYesu neengelosi zasezulwini, ababandakanyeke gqitha kulo msebenzi wokusindisa ubomi. Masikhe sihlole indima ebalulekileyo eye yaphunyezwa ngaba bakhonzi bakaThixo basezulwini ekuhlwayeleni inyaniso yoBukumkani, size sibone indlela umzekelo wabo osikhuthaza ngayo ukuba siphumeze eyethu indima.
UYesu—Umhlwayeli Wenyaniso YoBukumkani
5. Nguwuphi umsebenzi uYesu awazixakekisa ngokuyintloko ngawo xa wayesemhlabeni?
5 UYesu, indoda efezekileyo, wayenegunya lokulungiselela abantu ababephila ngexesha lakhe izinto ezininzi eziphathekayo. Ngokomzekelo, ngewayezilungisile iimbono ezininzi ezingachananga kwezamayeza ngomhla wakhe, okanye ngewayebakhanyisele abantu ukuze baqonde namanye amacandelo enzululwazi. Ukanti, walikhupha latsola zisuka nje kubulungiseleli bakhe elokuba wayethunywe ukuba aze kushumayela iindaba ezilungileyo. (Luka 4:17-21) Kwaye ngasekupheleni kobulungiseleli bakhe, wachaza esithi: “Ndizalelwe oku, yaye ndizele oku ehlabathini, ukuze ndiyingqinele inyaniso.” (Yohane 18:37) Ngoko wazixakekisa ngokuhlwayela imbewu yenyaniso yoBukumkani. Ukufundisa abantu awayephila nabo ngoThixo nangeenjongo Zakhe kwakubaluleke ngaphezu kwayo nayiphi na enye imfundo uYesu awayenokubanika yona.—Roma 11:33-36.
6, 7. (a) Ngawaphi amazwi okuzibophelela abalaseleyo awathethwa nguYesu ngaphambi kokuba anyukele ezulwini, kwaye uwazalisekisa njani? (b) Isimo sengqondo sikaYesu ngomsebenzi wokushumayela sikuchaphazela njani wena ngokobuqu?
6 UYesu wazichaza njengoMhlwayeli wenyaniso yoBukumkani. (Yohane 4:35-38) Wayehlwayela imbewu yeendaba ezilungileyo ngawo onke amathuba awayemvelela. Kwanaxa wayesifa kwisibonda sentuthumbo, wavakalisa iindaba ezilungileyo ngeparadesi eyayiza kubakho emhlabeni. (Luka 23:43) Ngaphezu koko, ukukuxhalabela kwakhe ukuba iindaba ezilungileyo zishunyayelwe akuzange kuphele akubulawa kwisibonda sentuthumbo. Ngaphambi kokuba anyukele ezulwini, wayalela abapostile bakhe ukuba baqhubeke betyala imbewu yenyaniso yoBukumkani baze benze abafundi. Emva koko uYesu wenza isithembiso esibalaseleyo. Wathi: “Khangelani! ndinani yonke imihla de kube sekuphelisweni kwenkqubo yezinto.”—Mateyu 28:19, 20.
7 Xa uYesu wayethetha la mazwi wayezibophelela ukuba uza kuwuxhasa, awalathise aze awukhusele umsebenzi wokushumayela iindaba ezilungileyo “yonke imihla de kube sekuphelisweni kwenkqubo yezinto.” Ukuza kuthi ga kumhla wethu, uYesu usenomdla wobuqu kumsebenzi wokuhambisa ivangeli. UyiNkokeli yethu, nguye owalathisa ukuhlwayelwa kwenyaniso yoBukumkani. (Mateyu 23:10) NjengeNtloko yebandla lamaKristu, nguye onembopheleleko kuYehova ngalo msebenzi owenziwa ehlabathini lonke.—Efese 1:22, 23; Kolose 1:18.
Iingelosi Zivakalisa Isigidimi Esichulumancisayo
8, 9. (a) Iingelosi ziye zawubonakalisa njani umdla wokwenene kwimicimbi yabantu? (b) Kunokutshiwo ngayiphi ingqiqo ukuba sifana nabantu abakwiqonga lemidlalo phambi kweengelosi?
8 Xa uYehova wadala umhlaba, iingelosi ‘zamemelela kunye ngovuyo zaza zakhwaza zincoma.’ (Yobhi 38:4-7) Ukususela ngoko, ezi zidalwa zasezulwini ziye zabonakalisa umdla onzulu kwimicimbi yabantu. UYehova uye wazisebenzisa ukuze adlulisele izigidimi zakhe kubantu. (INdumiso 103:20) Oku kunjalo ngokukodwa xa kufikwa ekusasazeni iindaba ezilungileyo kumhla wethu. Kwisityhilelo awasinikwayo, umpostile uYohane wabona “ingelosi iphaphazela esazulwini sezulu, ineendaba ezilungileyo ezingunaphakade ukuba izivakalise njengesigidimi esichulumancisayo kwabo bahleli emhlabeni, nakuzo zonke iintlanga nezizwe neelwimi nabantu, isithi ngelizwi elikhulu: ‘Moyikeni uThixo nimzukise, kuba lifikile ilixa lokugweba kwakhe.’”—ISityhilelo 14:6, 7.
9 IBhayibhile ichaza iingelosi ‘njengoomoya abasebenzela uwonke-wonke, abathunyelwa ukulungiselela abo baza kuzuz’ ilifa usindiso.’ (Hebhere 1:14) Njengoko iingelosi ziziphumeza ngentumekelelo iimbopheleleko zazo, zifumana ithuba lokusihlola thina nomsebenzi wethu. Umsebenzi wethu siwenza phambi kwababukeli basezulwini ngokungathi sikwiqonga lemidlalo elisekuhleni. (1 kwabaseKorinte 4:9) Hayi indlela okusibeka ezingqondweni nokusichulumancisa ngayo ukwazi ukuba asisebenzi sodwa ekuhlwayeleni inyaniso yoBukumkani!
Siyiphumeza Ngentumekelelo Indima Yethu
10. Icebiso elisebenzisekayo elikwiNtshumayeli 11:6 linokusetyenziswa njani kumsebenzi wethu wokuhambisa ivangeli?
10 Kutheni uYesu neengelosi benomdla kangaka kumsebenzi wethu? UYesu wachaza esinye isizathu xa wathi: “Ndithi kuni, kubakho uvuyo phakathi kweengelosi zikaThixo ngenxa yomoni omnye oguqukayo.” (Luka 15:10) Nathi sinaloo mdla wokwenene kubantu. Ngenxa yoko, senza konke okusemandleni ethu ukuze sisasaze imbewu yenyaniso yoBukumkani kuyo yonke indawo. Amazwi akwiNtshumayeli 11:6 anokusetyenziswa kumsebenzi wethu. Apho iBhayibhile iyasibongoza: “Kusasa hlwayela imbewu yakho, yaye ungasiphumzi isandla sakho de kube ngokuhlwa; kuba akuyazi indawo oya kuphumelela kuyo, enoba kulapha okanye phaya, okanye enoba ziya kulunga zombini ngokufanayo.” Kuyavunywa ukuba xa umntu omnye esamkela isigidimi sethu kusenokubakho amakhulu okanye kwanamawaka abantu abasichasayo. Kodwa ke njengeengelosi, siyavuya xa ‘umoni nokuba mnye’ esamkela isigidimi sosindiso.
11. Kunokuba nempumelelo kangakanani ukusetyenziswa kweempapasho ezisekelwe eBhayibhileni?
11 Kuninzi okubandakanyekileyo ekushumayeleni iindaba ezilungileyo. Enye into enokusinceda kulo msebenzi luncwadi olusekelwe eBhayibhileni olusetyenziswa ngamaNgqina kaYehova. Ngandlel’ ithile, ezi mpapasho nazo zifana nembewu ehlwayelwa kuyo yonke indawo. Asazi ukuba ziya kulunga phi na. Maxa wambi impapasho inokusuka kulo iye kulowa ngaphambi kokuba kubekho umntu oyifundayo. UYesu neengelosi banokude balathise iziganeko kwiimeko ezithile ukuze kungenelwe abantliziyo zilungileyo. Khawuqwalasele amanye amava abonisa indlela uYehova anokwenza ngayo kubekho imiphumo engalindelekanga nemangalisayo esebenzisa uncwadi oluye lwashiywa ebantwini.
Umsebenzi KaThixo Wenyaniso
12. Iphephancwadi elidala layinceda njani enye intsapho ukuba yazi uYehova?
12 Ngowe-1953, uRobert, uLila nabantwana babo bafuduka besuka kwisixeko esikhulu baya kuhlala kwindlu endala esefama kumaphandle ePennsylvania, eUnited States. Kamsinya emva kokuba befudukile, uRobert wagqiba kwelokuba akhe igumbi lokuhlambela ngaphantsi kwezinyuko ezingaphakathi endlwini. Emva kokususa iibhodi eziliqela, wafumanisa ukuba ngemva kolo donga, iimpuku zazifumbe iziqwenga zamaphepha, amaqokobhe eenqoba nenye imfungumfungu. Phakathi kwezo zinto kwakukho umbhalo wephephancwadi iThe Golden Age. URobert wayenomdla ngokukhethekileyo kwinqaku elithetha ngokukhulisa abantwana. Wachukumiseka gqitha lulwalathiso olucacileyo nolusekelwe eBhayibhileni olwalunikelwa lelo phephancwadi kangangokuba waxelela uLila ukuba babeza kungena “kula nkonzo yeGolden Age.” Kwisithuba seeveki ezimbalwa nje, amaNgqina kaYehova afika ekhayeni labo, kodwa uRobert wawaxelela ukuba intsapho yayinomdla “kula nkonzo yeGolden Age” kuphela. AmaNgqina achaza ukuba iThe Golden Age ngoku yayitshintshe igama yaba nguVukani! URobert noLila baqalisa ukufundisisa iBhayibhile rhoqo namaNgqina, baza ekugqibeleni babhaptizwa. Nabo ngokufanayo bahlwayela imbewu yenyaniso kubantwana babo baza bavuna intabalala. Namhlanje, angaphezu kwama-20 amalungu ale ntsapho, aquka bosixhenxe abantwana bakaRobert noLila, angabakhonzi ababhaptiziweyo bakaYehova uThixo.
13. Yintoni eyashukumisela isibini sasePuerto Rico ukuba sihlakulele umdla eBhayibhileni?
13 Kwiminyaka emalunga nama-40 eyadlulayo, uWilliam noAda, isibini esitshatileyo sasePuerto Rico, sasingenamdla ekufundisiseni iBhayibhile. Xa amaNgqina kaYehova enkqonkqoza ekhayeni laso, esi sibini sasisenza ngathi asikho ekhaya. Ngenye imini uWilliam waya kwindawo ekugcinwa kuyo izinto ezindala ezingenaxabiso eyokuthenga into eyayiza kufuneka ekhaya xa elungisa nto ithile. Njengoko wayephuma apho, wabona incwadi eluhlaza eqaqambileyo ikumgqomo wenkunkuma. Yayiyincwadi ethi Religion, eyayipapashwe ngamaNgqina kaYehova emva phaya ngowe-1940. UWilliam wagoduka nayo le ncwadi wachulumanciswa kukufunda ngomahluko ophakathi konqulo lobuxoki nolwenyaniso. Xa amaNgqina kaYehova etyelela kwakhona, uWilliam noAda basiphulaphula isigidimi sawo baza baqalisa ukufundisisa iBhayibhile kunye nawo. Kwiinyanga ezithile kamva babhaptizwa kwiNdibano Yezizwe Ngezizwe Yokuthanda KukaThixo yowe-1958. Ukususela ngoko, baye banceda abantu abangaphezu kwama-50 ukuba babe yinxalenye enkulu yobuzalwana bethu bamaKristu.
14. Njengoko kuboniswa ngamava, yiyiphi imiphumo enokubangelwa luncwadi lwethu olusekelwe eBhayibhileni?
14 UKarl wayeneminyaka eli-11 ubudala kwaye enentlonti. Kuye kwakubonakala ngathi wayesoloko ezifaka engxakini. Uyise, umshumayeli weWesile yamaJamani, wayemfundise ukuba abantu abangalunganga baza kutsha esihogweni bakufa. Ngoko uKarl wayesoyika gqitha isihogo. Ngenye imini ngowe-1917, uKarl wabona iphepha elibhaliweyo esitratweni waza walichola. Njengoko wayelifunda, amehlo akhe akhawuleza anamathela kumbuzo othi: “Yintoni isihogo?” Eli phepha lalisisimemo sentetho yesidlangalala eyayiza kuxubusha ngesihogo, eyayiza kuxhaswa ngaBafundi BeBhayibhile, namhlanje abaziwa ngokuba ngamaNgqina kaYehova. Kwisithuba esingangonyaka kamva, emva kokuba efundisise iBhayibhile kangangezihlandlo eziliqela, uKarl wabhaptizwa, waza waba ngomnye waBafundi BeBhayibhile. Ngowe-1925 wamenywa ukuba aye kusebenza kwikomkhulu lehlabathi lamaNgqina kaYehova—apho asakhonza khona nangoku. Ikhondo lobuKristu eliye lathabatha iminyaka engaphezu kwama-80 laqalisa ngephetshana elalisesitratweni.
15. Yintoni enokwenziwa nguYehova xa ebona kufanelekile?
15 Kuyinyaniso ukuba thina bantu asinakukwazi ukutsho enoba iingelosi zazibandakanyeke ngokungqalileyo kwezi ziganeko nokuba zazibandakanyeke ukusa kuwuphi umlinganiselo. Sekunjalo, asifanele sithandabuze ukuba uYesu neengelosi zakhe banendima ephambili kumsebenzi wokushumayela nokuba uYehova unako ukwalathisa izinto xa ebona kufanelekile. La mava kunye namanye afana nawo abonisa ukuba uncwadi lwethu lunako ukwenza izinto zamehlo sakuba siluhambisile.
Siphathiswe Ubuncwane
16. Yintoni esinokuyifunda kumazwi eyesi-2 kwabaseKorinte 4:7?
16 Umpostile uPawulos wathetha ‘ngobuncwane obukwizitya zodongwe.’ Obo buncwane luthumo esilunikwe nguThixo lokushumayela, kwaye izitya zodongwe ngabantu uYehova abaphathise obu buncwane. Ekubeni abo bantu bengafezekanga kwaye belinganiselwe, uPawulos uyaqhubeka echaza ukuba umphumo oya kubangelwa kukunikwa kwabo olo thumo kukuba ‘amandla angaphaya koko kuqhelekileyo aya kuba ngakaThixo, angabi ngawethu.’ (2 Korinte 4:7) Ewe, sinokuba nentembelo yokuba uYehova uya kusinika amandla aya kusenza sikwazi ukuwuphumeza umsebenzi esijongene nawo.
17. Yintoni esiya kudibana nayo xa sihlwayela imbewu yenyaniso yoBukumkani, kwaye kutheni sifanele siqhubeke sinesimo sengqondo esakhayo kwanaxa kunjalo?
17 Ngokufuthi kuye kufuneke sizincame. Kusenokuba nzima ukusebenza kwezinye iindawo. Kukho iindawo apho inkoliso yabantu bachasa ngokugqithiseleyo, abanye bade babe nentiyo. Kwiindawo ezinjalo kusenokwenziwa umgudu ongakumbi kodwa kungabikho nto ibonakalayo. Kodwa ke loo mgudu siwenzayo ufanelekile xa sicinga ngoko kubandakanyekileyo. Khumbula, imbewu oyihlwayelayo inokwenza abantu bonwabe ngoku ize ibanike ubomi obungunaphakade kwixesha elizayo. Amazwi eNdumiso 126:6 aye angqineka eyinyaniso kangangezihlandlo eziliqela: “Nalowo uthi nakanjani na aphume, elila, ethwele ingxowa ezele yimbewu, nakanjani na uya kufika enentswahla yovuyo, ethwele izithungu zakhe.”
18. Sinokubulumkela njani ubulungiseleli bethu, yaye kutheni sifanele sibulumkele?
18 Masiwaxhakamfule onke amathuba okuhlwayela imbewu yenyaniso yoBukumkani ngesisa. Ngamana singangaze siyilibale into yokuba, nangona isithi abatyala baze bankcenkceshele imbewu, nguYehova okhulisayo. (1 Korinte 3:6, 7) Ukanti, kanye njengokuba uYesu neengelosi beyiphumeza inxalenye yomsebenzi wabo, uYehova ulindele ukuba sibuzalisekise ngokupheleleyo ubulungiseleli bethu. (2 Timoti 4:5) Ngamana singayilumkela imfundiso, isimo sengqondo nentumekelelo yethu kubulungiseleli. Ngoba? UPawulos uyaphendula: “Ngokwenza oko uya kuzisindisa wena nabo bakuphulaphulayo.”—1 Timoti 4:16.
Sifunde Ntoni?
• Kungayiphi indlela umsebenzi wethu wokuhlwayela ovelisa ngayo iziphumo ezihle?
• UYesu Kristu neengelosi babandakanyeke njani kumsebenzi wokuhambisa ivangeli namhlanje?
• Kutheni sifanele sibe nesisa njengabahlwayeli benyaniso yoBukumkani?
• Yintoni efanele isishukumisele ukuba sizingise xa sijamelene nenkcaso okanye intiyo kubulungiseleli?
[Umfanekiso okwiphepha 15]
Njengabalimi kwaSirayeli wamandulo, namhlanje amaKristu asasaza imbewu yenyaniso yoBukumkani ngesisa
[Umfanekiso okwiphepha 16, 17]
AmaNgqina kaYehova avelisa aze asasaze iindidi ezininzi zeempapasho ezisekelwe eBhayibhileni ngeelwimi ezingama-340