Imibuzo Evela Kubafundi
UIsaya isahluko sama-53 uqulethe isiprofeto esaziwayo esingoMesiya. Indinyana ye-10 ithi: “UYehova wayoliswa kukumtyumza; wamgulisa.” Kuthetha ukuthini oko?
Kulula ukubona isizathu sokuba kuphakame umbuzo ngoIsaya 53:10. AmaKristu okwenyaniso akacingi ukuba uThixo wethu onemfesane nonothando ebeya kuyoliswa kukutyumza okanye kukugulisa nabani na. IBhayibhile isinika isizathu sokuba nentembelo yokuba uThixo akakuvuyeli ukungcungcuthekisa abantu abamsulwa. (Duteronomi 32:4; Yeremiya 7:30, 31) Ukutyhubela iinkulungwane uYehova usenokuba ngamaxesha athile uye wavumela ukubandezeleka ngezizathu ezivisisana nobulumko kunye nothando lwakhe. Kodwa ke ngokuqinisekileyo akazange abangele ukuba uNyana wakhe amthandayo, uYesu, abandezeleke. Ngoko, iyintoni kanye kanye intsingiselo yale ndinyana?
Kaloku, sinokuncedwa siyiqonde ingongoma ukuba siyifunda yonke loo ndinyana, sibek’ umnwe kwizihlandlo ezibini elivela ngazo igama elithi “ukuyoliswa.” UIsaya 53:10 uthi: “UYehova wayoliswa kukumtyumza; wamgulisa. Ukuba uya kuwumisa umphefumlo wakhe ube ngumnikelo wetyala, uya kuyibona inzala yakhe, uya kuyolula imihla yakhe, kwaye esandleni sakhe kuya kuphumelela oko kuluyolo kuYehova.”
Eyona nto ithethwa yiBhayibhile kukuba ‘uyolo lukaYehova,’ olukhankanywe ekupheleni kwale ndinyana, lusekelwe ekuphumezeni injongo yakhe ngoBukumkani. Ngokwenjenje uYehova uya kuthethelela ulongamo lwakhe yaye uya kuvumela isono esizuzw’ ilifa ukuba sisuswe kubantu abathobelayo—izono zethu. (1 Kronike 29:11; INdumiso 83:18; IZenzo 4:24; Hebhere 2:14, 15; 1 Yohane 3:8) Undoqo kuyo yonke le nto kukuba uNyana kaThixo kwakufuneka abe ngumntu aze abe lidini lentlawulelo. Njengoko sisazi, uYesu waye wabandezeleka xa wayephumeza oko. IBhayibhile isixelela ukuba “wafunda ukuthobeka ngeembandezelo awazifumanayo.” Ngoko uYesu wafumana ingenelo ngoko kubandezeleka.—Hebhere 5:7-9.
UYesu wazi kwangaphambili ukuba ikhondo elihle awayeza kulithabatha laliya kubandakanya intlungu. Oko kucaca kumazwi akhe abhalwe kuYohane 12:23, 24, apho sifunda oku: “Lifikile ilixa lokuba uNyana womntu azukiswe. Inene, inene, ndithi kuni, Ngaphandle kokuba ukhozo lwengqolowa luwele emhlabeni luze lufe, luhlala lulukhozo nje olunye; kodwa ukuba luyafa, lwandula ke luthwale isiqhamo esininzi.” Ewe, uYesu wayesazi ukuba kwakuza kufuneka agcine ingqibelelo yakhe de aye kufa. Le ngxelo ihlabela mgama isithi: “‘Umphefumlo wam ukhathazekile, yaye ndiya kuthini na? Bawo, ndisindise kweli lixa. Noko ke, kungenxa yoku le nto ndifikile kweli lixa. Bawo, lizukise igama lakho.’ Ngoko ke kwaphuma ilizwi ezulwini lisithi: ‘Ndilizukisile yaye ndiza kulizukisa kwakhona.’”—Yohane 12:27, 28; Mateyu 26:38, 39.
Yile ngqiqo ke esinokumqonda ngayo uIsaya 53:10. UYehova wayesazi kakuhle ukuba enye yezinto ezaziza kwenzeka kuNyana wakhe yayikukutyunyuzwa ngangqiqo ithile. Ukanti ecinga ngokulunga okuzukileyo nokwakuya kuphumeza lukhulu okwakuza kwenzeka ngenxa yoko, uYehova wayoliswa koko kwakuza kufuneka uYesu atyhubele kuko. Kungaloo ngqiqo ke uYehova ‘awayoliswayo kukutyumza,’ okanye kukutyunyuzwa, kukaMesiya. Kwaye noYesu wayoliswa koko wayenako ukukuphumeza noko wakuphumezayo. Ngokwenene, njengoko uIsaya 53:10 equkumbela, ‘esandleni sakhe kwaphumelela oko kuluyolo kuYehova.’