Ngaba Imilinganiselo Yokuziphatha EseBhayibhileni Yeyona Ilungileyo?

“ULUNTU lufuna imilinganiselo yokuziphatha esisiseko enokunika mntu ngamnye unqabiseko nokhokelo.” Wagqabaza wenjenjalo omnye umbhali waseJamani onamava nongumsasazi kumabonwakude. Ngokuqinisekileyo oko kusengqiqweni. Ukuze ibutho labantu lizinze lize libe nenkqubela, abantu bamele babe nesiseko esiqinileyo semilinganiselo eyamkelekileyo ngokubanzi eyahlula okulungileyo nokuphosakeleyo, okuhle nokubi. Umbuzo ngulo: Yiyiphi eyona milinganiselo ilungileyo, eluntwini ngokubanzi nakubantu ngabanye?

Ukuba imilinganiselo yokuziphatha eseBhayibhileni iyamkelwa, ifanele ibancede abantu baphile ubomi obuzinzileyo nobolonwabo. Oko bekuya kubangela ukuba ibutho labantu abayithobelayo lonwabe yaye lizinze ngakumbi. Ngaba kunjalo? Makhe sihlolisise oko kuthethwa yiBhayibhile ngemibandela emibini ebalulekileyo: ukuthembeka emtshatweni nokunyaniseka kubomi bemihla ngemihla.

Namathela Kwiqabane Lakho

UMdali wethu wadala uAdam waza wamenzela iqabane elinguEva. Olo manyano lwabo lwalungumtshato wokuqala embalini yaye lwaluza kuba lulwalamano olungenasiphelo. UThixo wathi: “Indoda iya kumshiya uyise nonina, inamathele emfazini wayo.” Malunga neminyaka engama-4 000 emva koko, uYesu Kristu waphinda wawumisela lo mlinganiselo womtshato kubo bonke abalandeli bakhe. Ngokubhekele phaya, wazigweba iintlobano zesini ezingaphandle komtshato.—Genesis 1:27, 28; 2:24; Mateyu 5:27-30; 19:5.

Ngokuvisisana neBhayibhile, izinto ezimbini ezibalulekileyo kumtshato owonwabisayo kukuba omabini amaqabane athandane yaye ahlonelane. Indoda, eyintloko yendlu yayo, ifanele imthande ngokungazingci umfazi wayo ngokuthi ifune izilangazelelo zakhe. Imele ihlale naye “ngokokwazi” yaye ayifanele ‘ivuthe ngumsindo’ ngakuye. Umfazi ufanele abe “nentlonelo enzulu” ngendoda yakhe. Ukuba amaqabane omtshato ayayilandela le migaqo, inkoliso yeengxaki zomtshato inokuphetshwa okanye yoyiswe. Indoda iya kufuna ukunamathela emfazini wayo nomfazi endodeni yakhe.—1 Petros 3:1-7; Kolose 3:18, 19; Efese 5:22-33.

Ngaba umlinganiselo weBhayibhile wokunamathela ngokuthembeka kwiqabane likabani unegalelo kumtshato owonwabisayo? Khawuphawule imiphumo yohlolisiso olwenziwa eJamani. Abantu babuzwa ngoothunywashe ababalulekileyo kumtshato ophumelelayo. Eyona nto yabalaseliswayo kukuthembeka kwamaqabane omabini. Akuvumi na ukuba abantu abatshatileyo bonwaba ngakumbi xa besazi ukuba amaqabane abo athembekile?

Kuthekani Xa Kuphakama Iingxaki?

Noko ke, kuthekani ukuba indoda nomfazi baxabana ngezinto ezinzulu? Kuthekani ukuba uthando lwabo luyaphela? Ngaba akunto ifanelekileyo ukuqhawula umtshato kwiimeko ezinjalo? Okanye ngaba umlinganiselo weBhayibhile wokunamathela ngokuthembekileyo kwiqabane likabani usengosengqiqweni?

Ababhali beBhayibhile babeqonda ukuba zonke izibini ezitshatileyo ziya kuba neengxaki ngenxa yokungafezeki. (1 Korinte 7:28) Sekunjalo, izibini eziyithobelayo imilinganiselo yeBhayibhile yokuziphatha ziyazama ukuxolela zize zicombulule iingxaki kunye. Kakade ke, zikho iimeko—ezinjengokukrexeza okanye ukuxhatshazwa emzimbeni—apho umKristu anokucinga ngokufanelekileyo ngokwahlukana okanye aqhawule umtshato neqabane lakhe. (Mateyu 5:32; 19:9) Kodwa ukuqhawula umtshato ngokungxama kungekho sizathu sesenzo esinzulu okanye ngenjongo yokufumana elinye iqabane kubonisa ukungabi nankathalo ngabanye. Ngokuqinisekileyo akubangeli kuzinza okanye lonwabo kubomi bukabani. Masenze umzekelo.

UPeter waphawula ukuba kwakungasekho nto ibangela umdla emtshatweni wakhe njengoko kwakufudula kunjalo ngaphambili.a Ngenxa yoko, wamshiya umfazi wakhe waza waya kuhlalisana noMonika, naye owayeshiye indoda yakhe. Kwaba njani? Kwiinyanga nje ezimbalwa, uPeter wavuma ukuba, ukuhlala noMonika “kwakungelula njengokuba wayecinge ukuba kuya kuba njalo.” Ngoba? Iintsilelo zobuntu zazikho kolu lwalamano lwakhe lutsha njengakoludala. Eyona nto yaba mbi nangakumbi, isigqibo sakhe awasenza ngokungxama nangenxa yokuzingca samfaka kwiingxaki ezinzulu zemali. Ngaphezu koko, abantwana bakaMonika baxheleka emphefumlweni ngenxa yenguqulelo kubomi bentsapho yakowabo.

Njengoko amava ebonisa, xa umtshato ufikelela kwimozulu embi, ukushiya isikhephe akudli ngokuba sisicombululo. Kwelinye icala, xa kukho uqhwithela, ukuphila ngemilinganiselo yokuziphatha eseLizwini likaThixo, iBhayibhile, ngokufuthi kunokuwugcina umtshato umanyene kuze kuwukhokelele kumanzi azolileyo. Kwaba njalo kuThomas noDoris.

UThomas noDoris babesele beneminyaka engaphezu kwama-30 betshatile xa uThomas waqalisa ukusela kakhulu. UDoris wahlaselwa ludandatheko, yaye baxubusha ngoqhawulo-mtshato. UDoris wazityand’ igila komnye wamaNgqina kaYehova. Eli Ngqina labonisa uDoris oko iBhayibhile ikutshoyo ngomtshato, limkhuthaza ukuba angakhawulezi ahlukane nomyeni wakhe kodwa bazame ukufumana isicombululo kuqala. UDoris wakwenza oko. Kwiinyanga nje ezimbalwa, kwakungasathethwa ngoqhawulo-mtshato. UThomas noDoris babecombulula iingxaki zabo bobabini. Ukusebenzisa kwabo isiluleko seBhayibhile kwawuqinisa umtshato wabo kwaza kwabanika ixesha lokucombulula iingxaki zabo.

Ukunyaniseka Ezintweni Zonke

Ukunamathela ngokuthembeka kwiqabane likabani kufuna umntu owomeleleyo nokuthandayo ukuphila ngomgaqo. Kufuneka kwaezo mpawu ukuze umntu ahlale enyanisekile kweli hlabathi linganyanisekanga. Kuninzi okuthethwa yiBhayibhile ngokunyaniseka. Umpostile uPawulos wabhalela amaKristu enkulungwane yokuqala kwelakwaYuda esithi: “Sinqwenela ukuziphatha ngokunyaniseka kwizinto zonke.” (Hebhere 13:18) Kuthetha ukuthini oko?

Umntu onyanisekileyo unenyaniso yaye akanankohliso. Uqhubana kakuhle nabanye—ungqalile, ubekekile, akakhohlisi okanye alahlekise. Ngaphezulu, umntu onyanisekileyo unengqibelelo yaye akabaqhathi abanye. Abantu abanyanisekileyo babangela ukuba kubekho ukuthembana nentembelo, ekhokelela kwizimo zengqondo ezihle nebangela ukuba kubekho ulwalamano olomeleleyo phakathi kwabantu.

Ngaba abantu abanyanisekileyo bonwabile? Ewe, banesizathu sokuba njalo. Nangona ukunganyaniseki nokuqhatha kuxhaphakile—okanye mhlawumbi ngenxa yako—ngokuqhelekileyo abantu abanyanisekileyo bayathandwa ngabanye. Ngokutsho kolunye uhlolisiso olwenziwa phakathi kwabantu abaselula, ukunyaniseka lolona phawu lwabalaseliswayo ngabangama-70 ekhulwini kwabo babuzwayo. Ngaphezu koko, enoba sibadala kangakanani, ukunyaniseka kuyimfuneko kwabo sibagqala njengabahlobo.

UChristine wafundiswa ukuba xa wayeneminyaka eli-12 ubudala. Ukutyhubela iminyaka waba ngumkhuthuzi owaziwayo. “Kwakukho iintsuku endandigoduka nemali engama-DM 5,000 [R17-000],” uyachaza. Kodwa uChristine wabanjwa izihlandlo ezininzi, yaye wayehleli esemngciphekweni wokuvalelwa entolongweni. Xa amaNgqina kaYehova amchazela oko kuthethwa yiBhayibhile ngokunyaniseka, uChristine watsaleleka kwimilinganiselo yeBhayibhile yokuziphatha. Wafunda ukuthobela isiluleko esithi: “Lowo ubayo makangabi seba.”—Efese 4:28.

Ngexesha lokubhaptizwa kwakhe njengomnye wamaNgqina kaYehova, uChristine wayengaselilo isela. Wayezabalazela ukunyaniseka kwizinto zonke, ekubeni amaNgqina ebethelela ukunyaniseka nezinye iimpawu zobuKristu. Iphephandaba elibizwa ngokuba yiLausitzer Rundschau linikela le ngxelo: “Amabinzana athetha ngemilinganiselo yokuziphatha afana nelithi ukunyaniseka, ubungcathu nothando lommelwane abaluleke gqitha kukholo lwamaNgqina.” Uvakalelwa njani uChristine ngenguqulelo ayenzileyo ebomini bakhe? “Ndonwabe ngakumbi ngoku ekubeni ndiyekile ukuba. Ndiziva ndililungu elibekekileyo eluntwini.”

Lonke Ibutho Labantu Liyangenelwa

Abantu abathembekileyo kumaqabane abo nabo banyanisekileyo abaneli nje kukuba ngabonwabileyo kodwa oko kuba yingenelo nakwibutho labantu ngokubanzi. Abaqeshi bakhetha abasebenzi abangenabuqhetseba. Sonke sithanda ukuba nabamelwane abathembekileyo, yaye sithanda ukuthenga kwiivenkile zoosomashishini abanyanisekileyo. Ngaba asibahloneli abezobupolitika, amapolisa nabagwebi abaziphephayo izenzo zokunganyaniseki? Ibutho labantu liyangenelwa kakhulu xa amalungu alo ephila ngomgaqo wokunyaniseka, kungekuphela nje xa kuyingenelo kubo.

Ngaphezu koko, amaqabane omtshato athembekileyo asisiseko seentsapho ezizinzileyo. Yaye inkoliso yabantu ibiya kuvumelana nelungu lezobupolitika laseYurophu elathi: “Kude kube ngoku intsapho [eqhelekileyo] iselelona khusi lomntu linqabisekileyo nelibhadlileyo.” Intsapho enoxolo yileyo abantu abadala nabantwana banokufumana ithuba lokuziva benqabisekile kuyo. Ngaloo ndlela, abo bathembekileyo emtshatweni baluncedo ekwakheni ibutho labantu elizinzileyo.

Khawucinge ngendlela wonk’ ubani ebeya kungenelwa ngayo ukuba bekungekho maqabane ashiyiweyo, kungekho zinkundla zoqhawulo-mtshato okanye amatyala elungelo lokukhulisa umntwana. Yaye kuthekani ukuba bebengekho abakhuthuzi, amasela, abeba imali, amagosa anganyanisekanga okanye izazinzulu ezinenkohliso? Ngaba oko kuvakala njengephupha nje? Akunjalo kwabo banomdla onzulu eBhayibhileni nakoko ikutshoyo ngekamva. ILizwi likaThixo lithembisa ukuba kungekudala uBukumkani bukaYehova obungoMesiya buya kuthabath’ iintambo kulo lonke ibutho labantu emhlabeni. Bonke abalawulwa abaphantsi kobo Bukumkani baya kufundiswa ukuphila ngokuvisisana nemilinganiselo yokuziphatha eseBhayibhileni. Ngelo xesha, “amalungisa aya kuwudla ilifa umhlaba, ahlale kuwo ngonaphakade.”—INdumiso 37:29.

Imilinganiselo Yokuziphatha EseBhayibhileni Yeyona Ilungileyo

Izigidi zabantu eziye zazihlolisisa iZibhalo Ezingcwele ziye zaqonda ukuba isiluleko seBhayibhile sisekelwe kubulumko bukaThixo, obuzigqwesa lee iingcinga zomntu. Abo banjalo bagqala iBhayibhile njengenokuthenjwa nenentsingiselo kubomi banamhlanje. Bayazi ukuba ukuthobela isiluleko esikwiLizwi likaThixo kuyingenelo kubo.

Ngenxa yoko, abo bantu bathobela isiluleko seBhayibhile esithi: “Kholosa ngoYehova ngayo yonke intliziyo yakho, ungayami ngokwakho ukuqonda. Uze umgqale yena ezindleleni zakho zonke, kwaye uya kuwenza uthi tye umendo wakho.” (IMizekeliso 3:5, 6) Ngokwenjenjalo, baphucula ubomi babo ngeyona ndlela ingummangaliso yaye kungenelwa nabo babangqongileyo. Yaye bahlakulela intembelo engagungqiyo ‘kubomi obuzayo,’ xa imilinganiselo yokuziphatha eseBhayibhileni iya kube ithotyelwa lulo lonke uluntu.—1 Timoti 4:8.

[Umbhalo osemazantsi]

[Amagama acatshulweyo akwiphepha 5]

Xa kukho uqhwithela, ukuphila ngemilinganiselo yeBhayibhile ngokufuthi kunokuwugcina umtshato umanyene kuze kuwukhokelele kumanzi azolileyo

[Amagama acatshulweyo akwiphepha 6]

Nangona ukunganyaniseki kuxhaphakile—okanye mhlawumbi ngenxa yako—ngokuqhelekileyo abantu abanyanisekileyo bayathandwa ngabanye