Ngaba Ukuthandaza Kuyanceda?
NGAXA lithile, phantse wonk’ ubani uye afune ukuthandaza. Enyanisweni, phantse abantu bazo zonke iinkonzo bayathandaza ngokunyanisekileyo. Ngokomzekelo, umBhuda unokuphindaphinda umthandazo othi “Ndinokholo kuAmida Buddha” kangangezihlandlo ezininzi ngosuku.
Ngenxa yeengxaki ezikhoyo emhlabeni wonke, kusengqiqweni ukubuza: Yintoni abantu abalindele ukuyizuza ngokuthandaza? Ngaba iyanceda phofu loo mithandazo?
Kutheni Abantu Bethandaza?
Abantu abaninzi baseMpuma bathandaza kwizinyanya zabo nakoothixo bobuShinto okanye bobuTao. Oko bakwenza benethemba lokuphumelela iimviwo esikolweni, lokufumana isivuno esihle emasimini, okanye lokuthintela izifo. Kwimigudu yawo, amaBhuda aba nethemba lokufumana ukukhanyiselwa. AmaHindu athandaza ngokuzinikela koothixo nakoothixokazi abathandayo ukuze afumane ulwazi, ubutyebi nokhuseleko.
Amanye amaKatolika anethemba lokuba uluntu luya kungenelwa xa enikela ngobomi bawo ukuze aphile njengeemonki okanye oonongendi kwizindlu zabo ekungangeni nabani na kuzo, bethandaza ngokuqhubekayo. Izigidi zamaKatolika zicela amalizo kuMariya ngokwenza imithandazo ecengcelezwayo, mhlawumbi zisebenzisa amaso erosari. Kumazwe aseMpuma, abantu abaninzi basebenzisa amavili emithandazo. AmaProtestanti aphindaphinda amazwi oMthandazo WeNkosi, nangona ngokuzenzekelayo esenokuchaza neemvakalelo zawo kuThixo. AmaYuda amaninzi ahamba imigama emide esiya kuthandaza kuDonga OluseMpuma lwaseYerusalem, enethemba lokuba itempile yobuyiselwa kuze kubekho isizukulwana esitsha esinenkqubela nesinoxolo.
Nangona izigidi zizibhokoxa ekuthandazeni, ibutho labantu liya lithwaxwa nangakumbi ziingxaki zobuhlwempu, ukukhotyozwa, iintsapho eziqhekekayo, ulwaphulo-mthetho nemfazwe. Ngaba oku kuthetha ukuba bonke aba bantu abathandazi ngendlela elungileyo? Phofu ke, ngaba ukho umntu oyiphulaphula ngokwenene imithandazo?
Ngaba Ukho Umntu Oyiphulaphulayo Imithandazo?
Imithandazo ayinakuze incede ukuba ayiphulaphulwa. Kuyabonakala ukuba xa umntu ethandaza, ukholelwa ukuba kukho mntu uthile okummandla womoya ongabonakaliyo omvayo. Noko ke, imithandazo ayidluliselwa ngamaza omoya aqhelekileyo. Abantu abaninzi bakholelwa ukuba kukho mntu uthile onokuzazi kwaneengcamango zalowo uthandazayo. Ngaba ngubani lowo?
Into yokuba iingcamango zisuka njani kumawaka ezigidi zeeneurons eziyila icerebral cortex yengqondo yethu ayikaqondwa ngabaphandi. Noko ke, Lowo uyile ingqondo unako ukuzazi ezo ngcamango, efanele ke phofu. Akakho onokwenza oko ngaphandle koMdali wethu, uYehova uThixo. (INdumiso 83:18; ISityhilelo 4:11) Imithandazo ifanele ibhekiswe kuye. Kodwa ngaba uYehova uyayiphulaphula yonke loo mithandazo?
Ngaba Yonke Imithandazo Iyaphulaphulwa?
UKumkani uDavide kaSirayeli wamandulo wayeyindoda ethanda ukuthandaza. Njengomdumisi ophefumlelwe nguThixo, wavuma ingoma esithi: “Owu mphulaphuli wemithandazo, abantu bayo yonke inyama baya kuza kuwe.” (INdumiso 65:2) UYehova uyayiva imithandazo eyenziwa ngalo naluphi na ulwimi kumawaka eelwimi ezithethwa ngabantu. Isibakala sokuba kungekho mntu unako ukugcina inkcazelo engako asithethi kuthi uThixo akanako ukunikela ingqalelo kubo bonke abathandaza kuye ngendlela eyamkelekileyo.
Ukanti, uYesu Kristu—naye oyindoda eyayithanda ukuthandaza—watyhila ukuba eminye imithandazo ayimkholisi uThixo. Phawula oko kwathethwa nguYesu ngoqheliselo olwaluthandwa ngelo xesha lokucengceleza imithandazo. Ngokutsho kweJerusalem Bible yamaKatolika, wathi: “Xa nithandaza ningaphololozi njengokuba abahedeni besenza, kuba bacinga ukuba ngokuwenza maninzi amazwi abo baya kuviwa.” (Mateyu 6:7) Asinakulindela ukuba uYehova aphulaphule imithandazo engachazi ezona mvakalelo zethu zokwenene.
Ubonisa isizathu sokuba eminye imithandazo ingamkholisi uThixo, omnye umzekeliso weBhayibhile uthi: “Oyisusayo indlebe yakhe ekuveni umthetho—kwanomthandazo wakhe uyinto ecekisekayo.” (IMizekeliso 28:9) Omnye umzekeliso uthi: “UYehova ukude nabangendawo, kodwa umthandazo wamalungisa uyawuva.” (IMizekeliso 15:29) Xa iinkokeli zamaYuda amandulo zazinamatyala anzulu, uYehova wavakalisa oku: “Naxa nisolula izandla zenu, ndiyawafihla amehlo am kuni. Nakubeni nisenza imithandazo emininzi, andiphulaphulanga; zona kanye izandla zenu zizaliswe luphalazo-gazi.”—Isaya 1:1, 15.
Umpostile uPetros wakhankanya enye into enokwenza imithandazo ingamkeleki kuThixo. UPetros wabhala: “Nina madoda, qhubekani nihlala [nabafazi benu] ngokokwazi, nibanika imbeko njengesitya esibuthathaka ngakumbi, esobukhomokazi, ekubeni nikwaziindlalifa kunye nabo zobabalo lobomi, ukuze imithandazo yenu ingathinteleki.” (1 Petros 3:7) Imithandazo yendoda esityeshelayo eso siluleko inokuphelela kuloo ndlu ikuyo!
Kucacile ukuba kukho izinto ezithile ekufuneka kuhlangatyezanwe nazo ukuze imithandazo iviwe. Noko ke, abaninzi abathandazayo ababonakali bekuxhalabele kangako oko uThixo akufunayo kuthi. Kungoko imithandazo abayenza ngokunyaniseka ingakhange ibangele ukuba ihlabathi libe bhetele.
Ngoko, yintoni uThixo ayifunayo ukuze imithandazo yethu iviwe? Impendulo inento yokwenza nesizathu sokuba sithandaze. Kaloku, ukuba sifuna ukwazi enoba imithandazo yethu iyanceda kusini na, simele siqonde injongo yayo. Kutheni uYehova esivulele ithuba lokuthetha naye?
[Inkcazelo Ngomfanekiso okwiphepha 3]
G.P.O., Jerusalem