Yintoni Iparadesi Yokomoya?

UGUSTAVO wakhulela kwisixeko esincinane saseBrazil.a Ukususela kwasebuntwaneni wafundiswa ukuba abantu abalungileyo baya ezulwini emva kokufa. Wayengazi nowathwethwa ngenjongo kaThixo yokuba ngenye imini abantu abathembekileyo baza kunandipha ubomi obusemagqabini kwiparadesi yasemhlabeni. (ISityhilelo 21:3, 4) Yaye kwakukho nenye into eyayimsithele. Wayengaqondi ukuba kwanangoku unokuba kwiparadesi yokomoya.

Ngaba wakha weva ngaloo paradesi yokomoya? Ngaba uyayazi ukuba iyintoni yaye yintoni onokuyenza ukuze ube yinxalenye yayo? Nabani na ofuna ulonwabo lokwenene kufuneka azi ngale paradesi.

Ukufumana Iparadesi Yokomoya

Ukuthi kwanamhlanje umntu angaphila kwiparadesi kusenokubonakala kuliphupha. Eli hlabathi likude lee ekubeni lingayiparadesi. Baninzi gqitha abantu abajamelene noko ukumkani wamandulo wamaHebhere wakuchaza ngolu hlobo: “Khangela! iinyembezi zabo bacinezelweyo, kodwa bengenamthuthuzeli; yaye kwicala labacinezeli kwakukho amandla, khon’ ukuze bangabi namthuthuzeli.” (INtshumayeli 4:1) Izigidi ngezigidi zitsala nzima phantsi kokunganyaniseki kwezobupolitika, konqulo neenkqubo zezoqoqosho, yaye azifumani siqabu, akakho ‘umthuthuzeli.’ Kwabaninzi ngumgudu ukuhlawula amatyala, bakhulise abantwana babo baze benze nezinye izinto ezininzi eziyimfuneko ukuze baqhubeke bephila. Nazo mhlawumbi beziya kukuvuyela ukufumana umthuthuzeli, umntu onokuzinika isiqabu kolo xanduva okwethutyana. Kuzo zonke, ubomi bukude lee ekubeni yiparadesi.

Ngoko ke, iphi le paradesi yokomoya? Kaloku, igama lesiNgesi elithi “paradesi” linxulumene namagama esiGrike, esiPersi nawesiHebhere aqulethe ingcamango yepaki okanye yomyezo, indawo ezolileyo yokuhlaziya ingqondo. IBhayibhile ithembisa ukuba ngeny’ imini umhlaba uza kuba yiparadesi yokoqobo, umyezo olikhaya labantu abangenasono. (INdumiso 37:10, 11) Sinoko engqondweni, sinokubona ukuba iparadesi yokomoya yindawo ebukekayo yaye iyahlaziya engqondweni, inika ubani ithuba lokunandipha uxolo nabanye kwanoThixo. Namhlanje, njengoko uGustavo wafumanisayo, iparadesi enjalo ikho, yaye yamkela abantu abanda mihla le.

Eneminyaka eli-12 ubudala, uGustavo wagqiba kwelokuba ufuna ukuba ngumfundisi wecawa yamaRoma Katolika. Ngemvume yabazali bakhe waqalisa ukufunda kwisikolo sabefundisi. Kulapho wazibandakanya khona nomculo, imidlalo yeqonga nezobupolitika, zinto ezo ezaziququzelelwa yicawa ukuze itsale ulutsha. Wayesazi ukuba umfundisi wayefanele azinikele ekuncedeni abantu yaye wayefanele angatshati. Sekunjalo, abanye abefundisi nabafundi awayebazi uGustavo babebandakanyeke ekuziphatheni okubi. Kwimeko enjalo uGustavo waqalisa ukusela kakhulu. Ngokucacileyo wayengekayifumani iparadesi yokomoya.

Ngenye imini, uGustavo wafunda iphecana leBhayibhile elalithetha ngeparadesi esemhlabeni. Lamenza wacinga ngenjongo yobomi. Uthi: “Ndaqalisa ukufunda iBhayibhile rhoqo, kodwa ndandingayiqondi. Ndandingaboni nokuba uThixo wayenegama.” Wasishiya isikolo sabefundisi waza wanxibelelana namaNgqina kaYehova, efuna uncedo ukuze aqonde iBhayibhile. Emva koko, wenza inkqubela ngokukhawuleza waza engaphozisanga maseko wazahlulela kuThixo. UGustavo wayefunda ngeparadesi yokomoya.

Isizwana Segama LikaThixo

UGustavo wafunda ukuba igama likaThixo, uYehova, lalingengombandela nje wokuba umfundi lowo weBhayibhile alazi. (Eksodus 6:3) Liyinxalenye ebalulekileyo yonqulo oluyinyaniso. UYesu wafundisa abalandeli bakhe ukuba bathandaze benjenje: “Bawo wethu osemazulwini, malingcwaliswe igama lakho.” (Mateyu 6:9) Ethetha ngabantu beeNtlanga ababa ngamaKristu, umfundi uYakobi wathi: ‘UThixo wayiphethulela ingqalelo yakhe ezintlangeni ukuba kuzo athabathe isizwana segama lakhe.’ (IZenzo 15:14) Ngenkulungwane yokuqala, “isizwana segama lakhe” yayilibandla lamaKristu. Ngaba sikho isizwana segama lakhe namhlanje? Ewe sikho, yaye uGustavo waqonda ukuba amaNgqina kaYehova seso sizwana.

AmaNgqina kaYehova akho kumazwe nakwimihlaba engama-235. Ngabalungiseleli abangaphezulu kwezigidi ezithandathu, yaye ezinye izigidi ezisibhozo ezingabantu abanomdla ziyeza kwiintlanganiso zawo. Aziwa jikelele ngomsebenzi wawo wokushumayela esidlangalaleni, ezalisekisa amazwi kaYesu athi: “Ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga.” (Mateyu 24:14) Kwakutheni, ngoko aze uGustavo avakalelwe kukuba ufumene iparadesi yokomoya ngokunxulumana namaNgqina kaYehova? Uthi: “Ndathelekisa oko ndakubona ehlabathini ingakumbi kwisikolo sabefundisi noko ndakufumanayo kumaNgqina kaYehova. Owona mahluko mkhulu luthando olukhoyo phakathi kwamaNgqina.”

Nabanye bathetha okufanayo ngamaNgqina kaYehova. UMiriam, ibhinqa eliselula laseBrazil, lathi: “Ndandingalwazi ulonwabo, nditsho kwanakwintsapho yakowethu. Ndakubona okokuqala ebomini bam ukubonakaliswa kothando phakathi kwamaNgqina kaYehova.” Indoda egama linguChristian yathi: “Maxa wambi ndandikhe ndigxadazelele ekusebenzelaneni nemimoya, kodwa unqulo lwalungeyonto ibalulekileyo kum. Ndandixabise kakhulu isigxina sam ekuhlaleni nomsebenzi wam wobunjineli. Sekunjalo, xa umfazi wam waqalisa ukufunda iBhayibhile namaNgqina kaYehova, ndawubona umahluko kuye. Kwakhona ndachukunyiswa gqitha luvuyo nenzondelelo yamabhinqa angamaKristu awayemtyelela.” Kutheni abantu bethetha izinto ezinje ngamaNgqina kaYehova?

Yintoni Iparadesi Yokomoya?

Eyona nto yenza amaNgqina kaYehova abalasele luxabiso lwawo ngolwazi lweBhayibhile. Akholelwa ekubeni iBhayibhile inyanisile yaye iliLizwi likaThixo. Ngenxa yoko, akaneliseki nje kukwazi isiseko sonqulo lwawo. Anocwangciso oluqhubekayo lwesifundo sobuqu nelokufunda iBhayibhile. Okukhona ubani enxulumana namaNgqina kaYehova ixesha elide, kokukhona esiya efunda okungakumbi ngoThixo nangeenjongo Zakhe njengoko zityhilwe eBhayibhileni.

Ulwazi olunjalo luyawakhulula amaNgqina kaYehova kwizinto eziphanga ulonwabo loluntu, ezifana neenkolelo neengcamango ezenzakalisayo. UYesu wathi: “Inyaniso iya kunikhulula,” yaye amaNgqina kaYehova ayabubona ubunyaniso boku. (Yohane 8:32) UFernando owayekade esebenzelana nemimoya, uthi: “Ukufunda ngobomi obungunaphakade yayisisiqabu esingathethekiyo. Ndandisoloko ndinoloyiko lokuba mna okanye abazali bam siza kufa.” Inyaniso yamkhulula uFernando kuloyiko lwemimoya noko kubizwa ngokuba bubomi emva kokufa.

EBhayibhileni ulwazi ngoThixo lunxulunyaniswa ngokusondeleyo neparadesi. Umprofeti uIsaya wathi: “Aziyi kwenzakalisa okanye zonakalise entabeni yam yonke engcwele; ngenxa yokuba umhlaba ngokuqinisekileyo uya kuzaliswa kukwazi uYehova njengamanzi egubungele ulwandle.”—Isaya 11:9.

Kambe ke, ayilolwazi kuphela olufunekayo ukuze kubekho uxolo athetha ngalo uIsaya. Umntu ufanele enze into ngoko akufundayo. UFernando wagqabaza wenjenje: “Xa umntu ehlakulela iziqhamo zomoya, ufak’ isandla kule paradesi yokomoya.” UFernando wayebhekisela kumazwi ompostile uPawulos, owabiza iimpawu ezintle umKristu afanele azihlakulele ngokuthi “isiqhamo somoya.” Wazidwelisa ngolu hlobo: “Uthando, uvuyo, uxolo, ukuzeka kade umsindo, ububele, ukulunga, ukholo, ubulali, ukuzeyisa.”—Galati 5:22, 23.

Ngaba unokusibona isizathu sokuba ukunxulumana nabantu abazama ukuhlakulela ezi mpawu ngenene kunokufana nokuba separadesi? Iparadesi yokomoya eyaxelwa kwangaphambili nguZefaniya yayiza kubakho phakathi kwabantu abanjalo. Wathi: “Abayi kwenza ntswela-bulungisa, bengayi kuthetha buxoki, kungayi kufunyanwa lulwimi lwenkohliso emilonyeni yabo, kuba baya kudla baze babuthe, kwaye akuyi kubakho bani ubangcangcazelisayo.”—Zefaniya 3:13.

Indima Ebalulekileyo Yothando

Usenokuba uphawule ukuba isiqhamo somoya sokuqala uPawulos asikhankanyayo luthando. Olu luphawu ethetha kakhulu ngalo iBhayibhile. UYesu wathi: “Ngako oko baya kwazi ukuba ningabafundi bam, ukuba ninothando phakathi kwenu.” (Yohane 13:35) Liyinyaniso elokuba, amaNgqina kaYehova akafezekanga. Maxa wambi abanazo iingxaki phakathi kwawo njengoko kwakunjalo nakubapostile bakaYesu. Kodwa athandana ngokwenene, yaye athandazela inkxaso yomoya oyingcwele njengoko ehlakulela olu phawu.

Ngenxa yoko, ubudlelane bawo bukhethekile. Akukho lucalu-calulo lobuzwe nolobuhlanga phakathi kwawo nto ezo ezahlukanisayo. Enyanisweni amaNgqina amaninzi azifumana sele entyumpa-ntyumpeka kwiimfazwe zokutshayelwa kohlanga ngasekupheleni lwenkulungwane yama-20 ayekhuselana, nokuba oko kwakubeka ubomi babo esichengeni. Nangona ‘ephuma kuzo zonke iintlanga nezizwe nezizwana neelwimi,’ anandipha umanyano ongenakuze uluqonde de ube ukhe walungcamla.—ISityhilelo 7:9.

Iparadesi Kwabo Benza Ukuthanda KukaThixo

Abamkelekanga abantu abanyolukileyo, abaziphethe kakubi kwanabazingcayo kwiparadesi yokomoya. AmaKristu axelelwa oku: “Musani ukumilisa okwale nkqubo yezinto, kodwa guqukani ngokutshintsha ingqondo yenu, ukuze nikungqine ngokwenu ukulunga nokwamkeleka nokugqibelela kokuthanda kukaThixo.” (Roma 12:2) Xa siphila ubomi obucocekileyo nobokuziphatha okuhle, yaye sisenza ukuthanda kukaThixo nangezinye iindlela, sakube sincedisa ekwakheni iparadesi yokomoya yaye sizizisela ulonwabo. UCarla wakufumanisa kuyinyaniso oku. Uthi: “Utata wandifundisa ukusebenza nzima ukuze ndikwazi ukuziphilisa. Nangona ndandiziva ndikhuselekile ngenxa yezifundo endazenza eyunivesithi, ndandilukhumbula umanyano lwentsapho noxolo lwengqondo oluziswa kuphela lulwazi ngeLizwi likaThixo.”

Kakade ke, ukunandipha iparadesi yokomoya akuzisusi iingxaki ezingokwasemzimbeni zobu bomi. AmaKristu nawo ayagula. Ilizwe ahlala kulo linokubandakanyeka kwimfazwe yamakhaya. Abaninzi bathwaxwa bubuhlwempu. Sekunjalo, ukuba nobuhlobo obusondeleyo noYehova uThixo—eyona nto ibalulekileyo kwiparadesi yokomoya—kuthetha ukuba singabhenela kuye xa sifuna inkxaso. Eneneni, uyasimema ukuba ‘siwulahlele kuye umthwalo wethu,’ yaye abaninzi banokukungqina oku kwindlela aye wabaxhasa ngayo phantsi kweemeko ezinzima. (INdumiso 55:22; 86:16, 17) UThixo uthembisa ukuba uya kuba nabo abakhonzi bakhe nokuba ‘bakwintlambo yethunzi elimnyama.’ (INdumiso 23:4) Ukuthembela kwinkxaso kaThixo ehlala ikho kuyasinceda sigcine “uxolo lukaThixo olungaphaya kokuqonda,” olungundoqo kwiparadesi yokomoya.—Filipi 4:7.

Ukufak’ isandla Kwiparadesi Yokomoya

Abantu abaninzi bayakuvuyela ukutyelela ipaki okanye umyezo. Bathanda ukuzula-zula kuyo okanye bahlale esitulweni baze babuke izinto ezibangqongileyo. Ngokufanayo, abaninzi bayakuvuyela ukunxulumana namaNgqina kaYehova. Bafumanisa obo budlelane buhlaziya, bunika uxolo lwengqondo yaye busakha. Noko ke, ipaki entle ifuna ukunyanyekelwa ukuze ihlale ibukeka okweparadesi. Ngokufanayo, iparadesi yokomoya ikho kweli hlabathi likude lee ekubeni yiparadesi kuphela ngenxa yokuba amaNgqina kaYehova ayayihlakulela, yaye uThixo uyayisikelela imizamo yawo. Ngoko ke, unokufak’ isandla njani ngendlela ebonakalayo kule paradesi?

Okokuqala, ufanele unxulumane nebandla lamaNgqina kaYehova, ufundisise iBhayibhile nawo, uze ufumane ulwazi lweBhayibhile olusisiseko separadesi yokomoya. UCarla uthi: “Ayinakubakho iparadesi yokomoya kungekho ukutya kokomoya.” Oku kuquka ukufunda iLizwi likaThixo rhoqo uze ucinge ngoko ukufundayo. Ulwazi olufumeneyo luya kukusondeza kuYehova uThixo, yaye uya kumthanda. Uya kufunda ukuthetha naye ngomthandazo uze ucele ulwalathiso nenkxaso yomoya wakhe njengoko usenza ukuthanda kwakhe. UYesu wasixelela ukuba sizingise emthandazweni. (Luka 11:9-13) Umpostile uPawulos wathi: “Thandazani ngokungapheziyo.” (1 Tesalonika 5:17) Ilungelo lokuthetha noThixo ngomthandazo uqinisekile ukuba uyakuva yinxalenye ebalulekileyo yeparadesi yokomoya.

Njengoko ixesha lihamba, ubomi bakho buya kuphuculwa koko ukufundayo, yaye ekugqibeleni uya kufuna ukuthetha nabanye ngako. Uya kwandula ke ukwazi ukuthobela umyalelo kaYesu othi: “Malukhanye ngokunjalo ukhanyiselo lwenu phambi kwabantu, ukuze babone imisebenzi yenu emihle baze bazukise uYihlo osemazulwini.” (Mateyu 5:16) Ukwabelana nabanye ngolwazi ngoYehova uThixo nangoYesu Kristu nokubalaselisa uthando aba abalubonise kuluntu kuzisa ulonwabo.

Liyeza ixesha lokuba umhlaba wonke ube yiparadesi yokoqobo—umyezo ongenalungcoliso nekhaya elifanelekileyo labantu abathembekileyo. Ubukho beparadesi yokomoya ‘kula maxesha amanqam ekunzima ukujamelana nawo’ bubungqina bamandla kaThixo nembonakaliso yoko anokukwenza naza kukuphumeza kwixesha elizayo.—2 Timoti 3:1.

Kwanangoku, abo banandipha iparadesi yokomoya bafumana inzaliseko yokomoya kaIsaya 49:10 othi: “Abayi kulamba, bengayi kunxanwa, nolophu okanye ilanga aliyi kubabetha. Kuba Lowo unosizi ngabo uya kubakhokela, kwaye uya kubakhaphela emithonjeni yamanzi.” UJosé uyabungqina ubunyaniso boku. Wayenephupha lokuba yimvumi eyaziwayo, kodwa wafumana ulwaneliseko olungakumbi ngokukhonza uThixo nebandla lamaKristu. Uthi: “Ngoku ndinandipha ubomi obunentsingiselo. Ndiziva ndinqabisekile xa ndiphakathi kwabazalwana abangamaKristu, yaye ndiyazi ukuba uYehova nguBawo onothando esinokumthemba.” Ulonwabo lukaJosé—nolwezigidi zabanye abafana naye—luchazwa ngokucacileyo kwiNdumiso 64:10 ethi: “Amalungisa aya kuba nemihlali kuYehova aze ngokwenene asabele kuye.” Enjani ukuba ntle ingcaciso yeparadesi yokomoya!

[Umbhalo osemazantsi]

[Umfanekiso okwiphepha 10]

Ngoxa sinandipha iparadesi yokomoya, sifanele sincedise ekuyandiseni!