Iindaba Ezilungileyo ZoBukumkani—Ziyintoni?
Kunyaka ophelileyo kumazwe angama-235 ehlabathini lonke, abantu abazizi-6 035 564, abaselula nabakhulileyo, bachitha iiyure ezili-1 171 270 425 bethetha nabanye ngazo. Ukongezelela ekuzidluliseni ngomlomo, bahambisa ebantwini uncwadi olushicilelweyo olungaphezu kwezigidi ezingama-700 ukuze bazibhengeze baze bazicacise. Kwakhona bahambisa iikhasethi neekhasethi zevidiyo ukuze bazipapashe. Zintoni “ezi”?
“EZI” ziindaba ezilungileyo zoBukumkani bukaThixo. Enyanisweni, akuzange kwenzeke ngaphambili embalini yoluntu ukuba “ezi ndaba zilungileyo zobukumkani” zishunyayelwe ngomkhamo esiwubonayo namhlanje.—Mateyu 24:14.
Bonke abo benza lo msebenzi wokushumayela nokufundisa ehlabathini lonke bangamatsha-ntliziyo. Ngokwembono engeyoyanqulo, banokubonakala bengawufanelanga lo msebenzi. Ngoko ke, yintoni ebenza babe nenkalipho baze baphumelele? Amandla eendaba ezilungileyo zoBukumkani angundoqo, kuba ziindaba ezingeentsikelelo eziya kufikela uluntu. Ezi ziintsikelelo abantu bonke abazilangazelelayo—ulonwabo, ukukhululeka kubunzima bezoqoqosho, urhulumente olungileyo, uxolo nonqabiseko, nenye into inkoliso yabantu abangenakuyicinga—ubomi obungunaphakade! Eneneni ezi ziindaba ezilungileyo kubantu abafuna intsingiselo nenjongo yobomi. Ewe, zonke ezi ntsikelelo nezingakumbi unokuzinandipha ukuba usabela kakuhle kwisigidimi seendaba ezilungileyo zoBukumkani.
Buyintoni UBukumkani?
Noko ke, buyintoni uBukumkani obuvakaliswa njengeendaba ezilungileyo? BuBukumkani izigidi eziye zafundiswa ukuba zibuthandazele ngala mazwi aqhelekileyo: “Bawo wethu osemazulwini, malingcwaliswe igama lakho. Mabufike ubukumkani bakho. Makwenzeke ukuthanda kwakho nasemhlabeni, njengasezulwini.”—Mateyu 6:9, 10.
BuBukumkani umprofeti ongumHebhere uDaniyeli awathetha ngabo kwiinkulungwane ezingama-25 ezadlulayo xa wabhala esithi: “UThixo wezulu uya kumisa ubukumkani obungenakuze bonakaliswe. Yaye obo bukumkani abuyi kudluliselwa kubo nabaphi na abanye abantu. Buya kuzityumza buziphelise zonke ezi zikumkani, buze bona bume ukusa kwixesha elingenammiselo.”—Daniyeli 2:44.
Ngaloo ndlela, iindaba ezilungileyo zithetha ngoBukumkani, okanye urhulumente kaThixo oya kususa bonke ubungendawo bandule bulawule ihlabathi lonke ngoxolo. Buya kufeza injongo yoMdali yantlandlolo ngoluntu nangomhlaba.—Genesis 1:28.
“UBukumkani Bamazulu Busondele”
Phantse iminyaka engama-2 000 eyadlulayo, iindaba ezilungileyo zoBukumkani zavakaliswa okokuqala yindoda ezahluleleyo eyayinembonakalo nobuntu obabufuna ukulungiswa. Loo ndoda yayinguYohane umBhaptizi, unyana wombingeleli ongumYuda uZekariya nomfazi wakhe uElizabhete. UYohane wayambathe isambatho soboya benkamela, nombhinqo wofele esinqeni sakhe, ngendlela efanayo nomprofeti uEliya, owayefuzisela yena. Kodwa yayisisigidimi sakhe esasitsala ingqalelo yabaninzi. Wayevakalisa esithi: “Guqukani, kuba ubukumkani bamazulu busondele.”—Mateyu 3:1-6.
Abantu ababephulaphule uYohane yayingamaYuda, awayesithi angabakhonzi boThixo oyinyaniso, uYehova. Njengohlanga, ayefumene umnqophiso woMthetho ngoMoses kwiminyaka emalunga neli-1 500 ngaphambilana. Into eyayiseseYerusalem yayiyitempile ebalaseleyo, apho kwakunikelwa ngemibingelelo ngokuvisisana noMthetho. AmaYuda ayeqinisekile ukuba unqulo lwawo lwalulungile emehlweni kaThixo.
Noko ke, bephulaphule uYohane abanye abantu baqalisa ukuqonda ukuba unqulo lwabo lwalungelulo olo bebesoloko becinga ukuba lulo. Kwakungene impucuko nentanda-bulumko yamaGrike kwiimfundiso zonqulo lwamaYuda. Umthetho owafunyanwa kuThixo ngoMoses ngoku wawonakalisiwe, wada awabi nantsingiselo, ngeenkolelo nezithethe zabantu. (Mateyu 15:6) Ilahlekiswa ziinkokeli zayo ezingoontamo-lukhuni nezingenanceba, inkoliso yayingasanquli uThixo ngendlela eyamkelekayo. (Yakobi 1:27) Yayifanele iguquke kwizono zayo ezazinxamnye noThixo nomnqophiso woMthetho.
Ngelo xesha, amaYuda amaninzi ayelindele ukubona uMesiya othenjisiweyo, okanye uKristu, yaye abanye babezibuza ngoYohane: “Makube mhlawumbi unguKristu na?” Noko ke, uYohane wathi akanguye waza kunoko wabalathisa komnye umntu, awathi ngaye: “Omtya weembadada zakhe ndingakufanelekelanga ukuwukhulula.” (Luka 3:15, 16) Esazisa uYesu kubalandeli bakhe, uYohane wathi: “Yabonani, iMvana kaThixo esusa isono sehlabathi!”—Yohane 1:29.
Eneneni ezo yayiziindaba ezilungileyo, kuba ngenxa yoko, uYohane wayesalathisela abantu bonke kwindlela yobomi nolonwabo—uYesu, lowo ‘ususa isono sehlabathi.’ Njengenzala ka-Adam noEva, bonke abantu bazalelwa kwimbandezelo yesono nokufa. AmaRoma 5:19 acacisa esithi: “Kanye njengokuba ngokungathobeli komntu omnye [uAdam] abaninzi benziwa aboni, ngokunjalo kwanangentobelo yomntu omnye [uYesu] abaninzi baya kwenziwa amalungisa.” UYesu, njengemvana yedini, wayeza ‘kususa isono’ aze asuse imeko elusizi yoluntu. IBhayibhile ithi: “Kuba umvuzo isono esiwuhlawulayo kukufa, kodwa isipho uThixo asinikayo bubomi obungunaphakade ngoKristu Yesu iNkosi yethu.”—Roma 6:23.
Njengendoda efezekileyo—eneneni, oyena mntu ubalaseleyo wakha waphila—uYesu washumayela iindaba ezilungileyo. Ingxelo yeBhayibhile kuMarko 1:14, 15 isixelela oku: “Emva kokuba uYohane ebanjiwe uYesu waya eGalili, eshumayela iindaba ezilungileyo zikaThixo esithi: ‘Lizalisekile ixesha elimisiweyo, yaye ubukumkani bukaThixo busondele. Guqukani, nikholwe kwiindaba ezilungileyo.’”
Abo basabelayo kwisigidimi sikaYesu baza baba nokholo kwiindaba ezilungileyo basikelelwa kakhulu. UYohane 1:12 uthi: “Bonke abamamkelayo [uYesu] wabanika igunya lokuba ngabantwana bakaThixo, ngenxa yokuba babebonisa ukholo egameni lakhe.” Bengabantwana, okanye oonyana, bakaThixo, babeza kufumana umvuzo wobomi obungunaphakade.—1 Yohane 2:25.
Kodwa ilungelo lokufumana iintsikelelo zoBukumkani lalingapheleliselwanga kubantu benkulungwane yokuqala. Njengoko kukhankanywe ngaphambilana, iindaba ezilungileyo zoBukumkani bukaThixo zivakaliswa yaye kufundiswa ngazo kulo lonke elimiweyo liphela namhlanje. Ngoko ke iintsikelelo zoBukumkani zisafumaneka. Umele wenze ntoni ukuze ufumane ezo ntsikelelo? Inqaku elilandelayo liza kucacisa.