UbuKristu Bokwenyaniso Buyoyisa!
“Ilizwi likaYehova lahlala likhula yaye lisoyisa ngendlela enamandla.”—IZENZO 19:20.
1. Chaza ukwanda kobuKristu ebudeni benkulungwane yokuqala.
EPHENJELELWA ngamandla omoya oyingcwele, amaKristu okuqala avakalisa ilizwi likaThixo ngenzondelelo engapheliyo. Omnye umbhali-mbali wabhala wathi: “UbuKristu basasazeka ngokukhawuleza ngendlela emangalisayo kwilizwe laseRoma. Ngonyaka we-100 mhlawumbi amaKristu ayekho phantse kwiphondo ngalinye elalikufuphi nomda weMeditera.”
2. USathana wazama njani ukulwa neendaba ezilungileyo, yaye oku kwakuxelwe njani kwangaphambili?
2 USathana uMtyholi akazange akwazi ukuwavala umlomo amaKristu okuqala. Kunoko, walwa nxamnye neendaba ezilungileyo ngokusebenzisa enye indlela—uwexuko. UYesu wakuxela kusengaphambili oku kumzekeliso wakhe wengqolowa nokhula. (Mateyu 13:24-30, 36-43) Nompostile uPetros walumkisa esithi ebandleni kwakuya kuvela abafundisi bobuxoki, bangenise amahlelo atshabalalisayo. (2 Petros 2:1-3) Ngokufanayo, umpostile uPawulos walumkisa ngokungqalileyo esithi imini kaYehova yayiya kwandulelwa luwexuko.—2 Tesalonika 2:1-3.
3. Kwenzeka ntoni emva kokufa kwabapostile?
3 Emva kokufa kwabapostile, iindaba ezilungileyo zagutyungelwa ziimfundiso zabahedeni naziintanda-bulumko. Njengoko kwakuxelwe kwangaphambili, abafundisi bobuxoki bagqwetha baza bonakalisa isigidimi esinyulu senyaniso. Ngokuthe ngcembe, ubuKristu bokwenyaniso bagutyungelwa lunqulo oluyinkwalambisa olubizwa ngokuba yiNgqobhoko. Kwavela udidi lwabefundisi olwaluzama ukuba abantu abaqhelekileyo bangayifumani iBhayibhile. Nangona inani labantu ababezibiza ngokuba ngamaKristu landa, unqulo lwabo lwalungekho nyulu. INgqobhoko yanwenwela kweminye imimandla yaza yaba yintlangano enempembelelo enamandla eNtshona, kodwa yayingenayo intsikelelo okanye umoya kaThixo.
4. Kwakutheni ukuze lingaphumeleli icebo likaSathana lokukatyisa injongo kaThixo?
4 Noko ke, icebo likaSathana lokukatyisa injongo kaYehova lawa phantsi. Kwanasebudeni belona xesha lowexuko olunamandla, babusekho ubuKristu bokwenyaniso phakathi kwabanye. Amadoda awakhuphela iBhayibhile enza imizamo yokukwenza ngokuchanileyo oko. Ngaloo ndlela, iBhayibhile ayizange yonakaliswe, nangona isigidimi sayo sasigqwethwa ngabantu abaninzi ababezibanga benegunya lokufundisa ngayo. Ukutyhubela iinkulungwane, abaphengululi abafana noJerome noTyndale baguqulela baza basasaza iLizwi likaThixo ngenkalipho. IBhayibhile yafumaneka kwizigidi zabantu yaye zamkela nohlobo oluthile lobuKristu, nangona babuyinkwalambisa.
5. Yintoni eyaxelwa kwangaphambili ngumprofeti uDaniyeli ngokuphathelele “ulwazi lokwenyaniso”?
5 Ekugqibeleni, njengoko kwakuxelwe kwangaphambili kwincwadi kaDaniyeli, ‘ulwazi lokwenyaniso lwaba luninzi.’ Oku kuye kwenzeka ‘ngexesha lesiphelo’—ixesha esiphila kulo ngoku. (Daniyeli 12:4) Emhlabeni wonke umoya oyingcwele uye wakhokelela abathandi benyaniso kulwazi oluchanileyo ngoThixo oyinyaniso neenjongo zakhe. Kwanasemva kokuba iimfundiso zowexuko ziye zaqhubeka kangangeenkulungwane, ilizwi likaThixo liyoyisa! Namhlanje, iindaba ezilungileyo zivakaliswa kuyo yonk’ indawo, zisalathisela abantu kwithemba lehlabathi elitsha elimangalisayo. (INdumiso 37:11) Ngoku makhe siqwalasele ukukhula kwelizwi likaThixo kule mihla.
Ukukhula Kwelizwi Namhlanje
6. Ziziphi iinyaniso ezaqondwa ngaBafundi beBhayibhile ngonyaka we-1914?
6 Ngasekupheleni kwenkulungwane ye-19, inyaniso yeBhayibhile yavuselela iqela elincinane laBafundi beBhayibhile, namhlanje elaziwa ngokuba ngamaNgqina kaYehova. Ngowe-1914 iBhayibhile yangqineka kubo iyinyaniso. Baqonda iinyaniso ezimangalisayo eziphathelele injongo kaThixo. Bachukunyiswa ngokunzulu luthando lukaYehova ngokuthumela uNyana wakhe emhlabeni, ngaloo ndlela evula indlela esa kubomi obungunaphakade. Kwakhona bafikelela ekwazini nasekuqondeni igama likaThixo nobuntu bakhe. Ngokubhekele phaya, baqonda ukuba ‘amaxesha eeNtlanga’ ayesele ephelile, nto leyo eyayibonisa ukuba sele likufuphi ixesha lokuba urhulumente woBukumkani bukaThixo uzise iintsikelelo kuluntu. (Luka 21:24) Ezinjani zona ukuzuka iindaba ezilungileyo! Ezi nyaniso zibalaseleyo kwakuza kwabelwana ngazo nabo bonke abantu, kuyo yonke indawo. Ubomi babantu babusengozini!
7. Iye yoyisa njani inyaniso yeBhayibhile kumaxesha anamhlanje?
7 UYehova walisikelela elo bathwana lamaKristu athanjiswe ngomoya. Namhlanje, inani labantu abamkela ubuKristu bokwenyaniso lingaphaya kwezigidi ezithandathu. Nelizwi likaThixo liye lasasazeka emhlabeni, kuba amaNgqina kaYehova afumaneka kumazwe angama-235. Ngapha koko, inyaniso yeBhayibhile iye yanika amandla, isoyisa yonke imiqobo, eyonqulo neminye. Lo msebenzi wokushumayela emhlabeni wonke bobunye ubungqina obungenakuphikiswa bobukho bukaYesu ekumandla oBukumkani.—Mateyu 24:3, 14.
8. Baye bathini abanye ngokwanda kwamaNgqina kaYehova?
8 Kanye njengokuba ababhali-mbali bathetha ngokwanda kobuKristu okumangalisayo ngenkulungwane yokuqala, abaphengululi abaninzi baye bagqabaza ngokwanda kwabantu bakaYehova kumaxesha anamhlanje. EUnited States, abaphengululi ababini babhala besithi: “Ebudeni beminyaka engama-75 edluleyo amaNgqina kaYehova ebesanda ngomlinganiselo ophawulekayo. . . yaye ebesanda emhlabeni wonke.” Ulindixesha waseMpuma Afrika ubhekisela kumaNgqina “njengolona nqulo lukhula ngokukhawuleza noluhlonelwa ngeyona ndlela ehlabathini lonke nolwaziwa ngokunamathela ngokupheleleyo kwiimfundiso zeBhayibhile.” Ulindixesha wakudala wamaKatolika, opapashwa eYurophu, uthetha “ngolwando olumangalisayo lwamaNgqina kaYehova.” Yintoni eye yanegalelo kolu lwando?
Umoya Oyingcwele Uyasebenza Namhlanje
9. (a) Sisiphi esona sizathu siyintloko sokuba ilizwi likaThixo loyise namhlanje? (b) UYehova ubatsalela njani abantu kuye?
9 Esona sizathu siyintloko sokuba ilizwi likaThixo loyise namhlanje kukuba umoya kaYehova usebenza ngamandla, kanye njengoko wawusenza kwinkulungwane yokuqala. UYesu wathi: “Akukho mntu unako ukuza kum ngaphandle kokuba uBawo, owandithumayo, amtsale.” (Yohane 6:44) La mazwi abonisa ukuba uThixo ubatsala ngobubele abo banotyekelo olufanelekileyo, echukumisa iintliziyo zabo. Ngomsebenzi wokushumayela wamaNgqina akhe, uYehova utsalela enkonzweni yakhe “izinto ezinqwenelekayo zazo zonke iintlanga”—abantu bomhlaba abalulamileyo nabanjengezimvu.—Hagayi 2:6, 7.
10. Ziziphi iintlobo zabantu eziye zasabela kwilizwi likaThixo?
10 Umoya oyingcwele awukhange wanele nje kukunika abantu bakaThixo amandla okuba base ilizwi likaThixo kwezona ndawo zikude zomhlaba; uye washukumisa abantu bazo zonke iintlobo ukuba basabele kwiindaba ezilungileyo. Enyanisweni, abo baye bamkela ilizwi likaThixo bebephuma “kuzo zonke izizwe neelwimi nabantu neentlanga.” (ISityhilelo 5:9; 7:9, 10) Bafumaneka phakathi kwezityebi namahlwempu, phakathi kwezifundiswa nabangafundanga. Bambi baye balamkela ilizwi phakathi kweemfazwe nentshutshiso ekrakra, ngoxa abanye beye balamkela ngamaxesha oxolo nendyebo. Phantsi kwalo naluphi na uhlobo lukarhulumente, kuzo zonke iintlobo zabantu, kwiinkampu zoxinaniso nakumabhotwe, amadoda namabhinqa aye asabela kakuhle kwiindaba ezilungileyo.
11. Umoya oyingcwele usebenza njani kubomi babantu bakaThixo, yaye nguwuphi umahluko ocacileyo?
11 Nangona abantu bakaThixo bahluke ngeyona ndlela, bahlala kunye bemanyene. (INdumiso 133:1-3) Obu bobunye ubungqina bokuba umoya oyingcwele uyasebenza kubomi babantu abakhonza uThixo. Umoya wakhe ungamandla anceda abakhonzi bakhe ukuba babonakalise uthando, uvuyo, uxolo, ububele nezinye iimpawu ezintle. (Galati 5:22, 23) Namhlanje, sikuqonda ngokucacileyo oko kwaxelwa kwangaphambili ngumprofeti uMalaki: “Nina niya kuwubona. . . umahluko phakathi kwelungisa nongendawo, phakathi kwalowo ukhonza uThixo nalowo ungamkhonzanga.”—Malaki 3:18.
Ilizwi LikaThixo Liyoyisa Kubasebenzi Abanenzondelelo
12. Avakalelwa njani amaNgqina kaYehova ngomsebenzi wokushumayela, yaye yiyiphi intsabelo ayilindeleyo kumsebenzi wokushumayela?
12 Namhlanje amaNgqina kaYehova akangobantu nje abahamba icawa. Akhuthele kumsebenzi wokushumayela. NjengamaKristu okuqala, ngokuzithandela ayazinikela ekwenzeni ukuthanda kukaThixo, efuna ukunceda abanye bafunde ngezithembiso zoBukumkani bukaYehova. Angabasebenzi abangamadlelane noThixo yaye, ngokuvisisana nomoya oyingcwele, ahlanganisela abanye enkonzweni kaYehova. Ngokwenjenjalo, abonisa inceba nothando lukaYehova kubantu abangakholwayo. Yaye enjenjalo nangona ehlangabezana nenkcaso, ukugculelwa nentshutshiso. UYesu wabaxhobisa abalandeli bakhe kwiindlela ezahlukahlukeneyo ababeza kusabela ngazo abantu kwiindaba ezilungileyo. Wathi: “Ikhoboka alikho likhulu kunenkosi yalo. Ukuba banditshutshisile mna, baya kunitshutshisa nani; ukuba baligcinile ilizwi lam, baya kuligcina nelenu.”—Yohane 15:20.
13. Ziziphi iimpawu ezingekhoyo kwiNgqobhoko kodwa ezininzi gqitha phakathi kwamaNgqina kaYehova?
13 Siyachukumiseka kukubona ukufana okukhoyo phakathi kwamaNgqina kaYehova namhlanje nabo bamkela ubuKristu ngenkulungwane yokuqala. Enye into ephawulekayo ngumahluko okhoyo namhlanje phakathi kwamaNgqina kaYehova neNgqobhoko. Emva kokubhala ngokushumayela ngenzondelelo kwamaKristu okuqala, omnye umphengululi ukhalaza ngelithi: “Asisayi kuze senze nkqubela, ngaphandle kokuba kubekho utshintsho kwinkqubo esetyenziswa ecaweni ukuze umsebenzi wokushumayela uphinde ugqalwe njengemfanelo kuwo onke amaKristu abhaptiziweyo, yaye ugqalwe njengalowo ugqwesa nawuphi na umsebenzi onokwenziwa ngabantu abangakholwayo.” Kanye ezi mpawu zingekhoyo kwiNgqobhoko zininzi gqitha phakathi kwamaNgqina kaYehova! Ukholo lwawo luyaphila yaye lolokwenene, yaye lukholo olusekelwe kwinyaniso yeBhayibhile leyo aziva enyanzelekile ukuba abelane ngayo nabo bonke abantu abaya kuphulaphula.—1 Timoti 2:3, 4.
14. UYesu wayebugqala njani ubulungiseleli bakhe, yaye sisiphi isimo sengqondo esibonakaliswa ngabafundi bakhe namhlanje?
14 UYesu wayebujonga ngokunzulu ubulungiseleli bakhe, yaye babuyeyona nto wayeyixhalabele. Wathi kuPilato: “Ndizalelwe oku, yaye ndizele oku ehlabathini, ukuze ndiyingqinele inyaniso.” (Yohane 18:37) Abantu bakaThixo bavakalelwa ngendlela uYesu awayevakalelwa ngayo. Ekubeni inyaniso yeBhayibhile isezintliziyweni zabo, bazabalazela ukufumana iindlela zokwabelana ngayo nabantu abaninzi kangangoko kunokwenzeka. Ezinye zezi ndlela zibonisa ubuchule obumangalisayo.
15. Abanye baye babubonakalisa njani ubuchule ekushumayeleni iindaba ezilungileyo?
15 Kwelinye ilizwe elikuMzantsi Merika, amaNgqina ayenqumla kumlanjana ongenela kuMlambo iAmazon ukuze adlulisele inyaniso ebantwini. Noko ke, xa kwaqhambuka imfazwe yamakhaya ngowe-1995, abemi balapho babengavunyelwa ukuba bahambe kuloo mlambo. Ezimisele ukuqhubeka edlulisela kubantu abanomdla iimpapasho zeBhayibhile, amaNgqina agqiba kwelokuba athumele isigidimi ngomsinga. Ayebhala iileta aze azifake kwiibhotile zeplastiki nemibhalo yamaphephancwadi IMboniselo noVukani! Emva koko ayephosa ezo bhotile emlanjeni. Aqhubeka esenza oku kangangeminyaka emine enesiqingatha de abantu bavunyelwa ukuhamba kuloo mlambo kwakhona. Kuyo yonke indawo ecaleni kwaloo mlambo, abantu babebulela amaNgqina ngoncwadi lwawo. Elinye inenekazi elalifundisisa iBhayibhile lwawanga lintywizisa iinyembezi laza lathi: “Bendicinga ukuba andisayi kuze ndiphinde ndinibone kwakhona. Noko ke, ndathi ndakuqalisa ukufumana uncwadi olusezibhotileni, ndaqonda ukuba anindilibalanga!” Abanye ababehlala kufuphi nomlambo bathi bawafunde bawaphindaphinda loo maphephancwadi. Kwiindawo ezininzi kwakukho “iposi”—umsinga ezaziye ziqokelelane kuwo izinto ezidadayo okwexeshana. Abantu abanomdla babesiya rhoqo apho ukuya kukhangela “iposi” evela ngasentla.
16. Ukuzenza sifumaneke maxa wambi kusivulela njani ithuba lokwenza abafundi?
16 Umsebenzi wokushumayela iindaba ezilungileyo walathiswa uze uxhaswe nguYehova uThixo neengelosi zakhe ezinamandla. (ISityhilelo 14:6) Xa nje sizenza sifumaneke, maxa wambi kuye kuvele amathuba okwenza abafundi ngendlela engalindelekanga. ENairobi, eKenya, amabhinqa amabini angamaKristu awayekwinkonzo yasentsimini ayesele egqibile ukusebenza izindlu awayabelwe zona. Ngesiquphe kweza ibhinqa eliselula kuwo laza ngemincili lathi: “Bendithandazela ukudibana nomntu ofana nani.” Lawabongoza la maNgqina ukuba eze ekhayeni lalo ngokukhawuleza ukuze axubushe nalo, yaye kwaqaliswa isifundo seBhayibhile kanye ngaloo mini. Kwakutheni ukuze eli bhinqa lize kula maKristu ngokungxama okungaka? Phantse kwiiveki ezimbini ngaphambilana, lalifelwe lusana lwalo. Ngoko lathi lakubona umntwana ephethe iphecana elithi “Liyintoni Ithemba Ngabafileyo Obathandayo?” lalifuna ngamandla laza lacela le nkwenkwana ukuba ilinike. Le nkwenkwana ayizange ivume, kodwa yalalathisa amaNgqina abeyinike elo phecana. Kungekudala elo bhinqa lenza inkqubela entle ngokomoya yaye lakwazi ukuhlangabezana nentlungu yokulahlekelwa ngumntwana walo.
Uthando LukaThixo Lumele Loyise
17-19. Luluphi uthando oluye lwabonakaliswa nguYehova ebantwini ngentlawulelo?
17 Ukukhula kwelizwi likaThixo kuwo wonke umhlaba kunxulumene ngokusondeleyo nedini lentlawulelo likaKristu Yesu. Njengentlawulelo, umsebenzi wokushumayela yimbonakaliso yothando lukaYehova ngabantu abakuzo zonke iindawo. Umpostile uYohane waphefumlelwa ukuba abhale: “UThixo walithanda kakhulu ihlabathi [loluntu] kangangokuba wanikela ngoNyana wakhe okuphela kwamzeleyo, ukuze wonk’ ubani obonisa ukholo kuye angatshabalali kodwa abe nobomi obungunaphakade.”—Yohane 3:16.
18 Khawucinge ngothando olwabonakaliswa nguYehova ngokulungiselela intlawulelo. Kangangexesha elingenamlinganiselo, uThixo wayenandipha ulwalamano olusenyongweni noNyana wakhe amthandayo nokuphela kwamzeleyo, “isiqalo sendalo kaThixo.” (ISityhilelo 3:14) UYesu umthanda ngokunzulu uYise, yaye uYehova wamthanda uNyana wakhe “phambi kokusekwa kwehlabathi.” (Yohane 14:31; 17:24) UYehova wavumela ukuba uNyana wakhe afe ukuze abantu bafumane ubomi obungunaphakade. Olunjani ukubalasela uthando ngabantu!
19 UYohane 3:17 uthi: “UThixo wamthumela uNyana wakhe ehlabathini, kungekhona ukuba aligwebe ihlabathi, kodwa ukuze ihlabathi lisindiswe ngaye.” Ngaloo ndlela, uYehova wathumela uNyana wakhe ukuba enze umsebenzi wokusindisa ngothando, kungekhona owokugweba. Oku kuyavisisana namazwi kaPetros athi: “[UYehova] akanqweneli ukuba kutshabalale nabani na kodwa unqwenela ukuba bonke bafikelele enguqukweni.”—2 Petros 3:9.
20. Usindiso lunxibelelene njani nokushunyayelwa kweendaba ezilungileyo?
20 Ekubeni eye walungiselela isiseko esisemthethweni sokusindisa abantu ngokuncama umntu oxabiseke gqitha, uYehova ufuna abantu abaninzi kangangoko kunokwenzeka bazuze kuso. Umpostile uPawulos wabhala: “‘Wonk’ ubani obiza egameni likaYehova uya kusindiswa.’ Noko ke, baya kubiza njani na kulowo bangakholwanga kuye? Baya kukholwa njani na kulowo bangevanga ngaye? Baya kuva njani na kungekho bani ushumayelayo?”—Roma 10:13, 14.
21. Sifanele sivakalelwe njani ngethuba esinalo lokuba nesabelo kumsebenzi wokushumayela?
21 Elinjani lona ilungelo esinalo lokuba nesabelo kulo msebenzi wokushumayela nokufundisa owenziwa emhlabeni wonke! Asingomsebenzi ulula, ukanti hayi indlela avuya ngayo uYehova xa ebukele abantu bakhe bephila ngendlela yenyaniso ngokuthembeka yaye besabelana nabanye ngeendaba ezilungileyo! Ngoko kungakhathaliseki nokuba zinjani iimeko zakho, vumela umoya kaThixo nothando olusentliziyweni yakho zikushukumisele ukuba ube nesabelo kulo msebenzi. Yaye khumbula ukuba oko sikubona kuphunyezwa ehlabathini lonke kusinika ubungqina obeyisayo bokuba kungekudala uYehova uThixo uya kuzalisekisa isithembiso sakhe sokuzisa “amazulu amatsha nomhlaba omtsha” ozukileyo apho “kumi ubulungisa.”—2 Petros 3:13.
Uyakhumbula Na?
• Kutheni uwexuko lungazange lukwazi ukubavala umlomo abavakalisi beendaba ezilungileyo?
• Ilizwi likaThixo liye loyisa njani kumhla wethu?
• Umoya kaThixo usebenza njani namhlanje?
• Intlawulelo inxulumene njani nokushunyayelwa kweendaba ezilungileyo?
[Igrafu/Umfanekiso okwiphepha 16]
(Ukuba ufuna inkcazelo ehlahlelwe kakuhle, yiya kwimpapasho)
Ukwanda kwenani labavakalisi boBukumkani kwinkulungwane yama-20
Umlinganiselo Wabavakalisi (ngezigidi)
6.0
5.5
5.0
4.5
4.0
3.5
3.0
2.5
2.0
1.5
1.0
0.5
1900 1910 1920 1930 1940 1950 1960 1970 1980 1990 2000
[Imifanekiso ekwiphepha 15]
UJEROME
UTYNDALE
UGUTENBERG
UHUS
[Inkcazelo]
Gutenberg and Hus: From the book The Story of Liberty, 1878
[Umfanekiso okwiphepha 15]
ABafundi beBhayibhile bavakalisa iindaba ezilungileyo kwiminyaka yee-1920
[Imifanekiso ekwiphepha 16, 17]
Ehlabathini lonke abantu bayasabela kwiindaba ezilungileyo
[Umfanekiso okwiphepha 18]
Njengedini lentlawulelo likaYesu Kristu, umsebenzi wokushumayela ubalaselisa uthando lukaThixo