Nikela Ingqalelo Kwimisebenzi KaThixo Emangalisayo
“Zininzi izinto ozenzileyo, Owu Yehova Thixo wam, kwanemisebenzi yakho emangalisayo neengcamango zakho kuthi; akukho namnye onokuthelekiswa nawe.”—INDUMISO 40:5.
1, 2. Bubuphi ubungqina esinabo ngemisebenzi kaThixo emangalisayo, yaye oku kufanele kusishukumisele ekwenzeni ntoni?
XA UFUNDA iBhayibhile, unokubona ngokukhawuleza ukuba uThixo wabenzela izinto ezimangalisayo abantu bakhe bamandulo, amaSirayeli. (Yoshuwa 3:5; INdumiso 106:7, 21, 22) Kwanokuba uYehova akangeneleli ngendlela efanayo kwimicimbi yabantu namhlanje, sibona intabalala yobungqina bemisebenzi yakhe emangalisayo. Ngoko sinesizathu sokuthelela umdumisi xa esithi: “Hayi indlela emininzi ngayo imisebenzi yakho, Yehova! Yonke uyenze ngobulumko. Uzele umhlaba yimveliso yakho.”—INdumiso 104:24; 148:1-5.
2 Namhlanje abaninzi bayabutyeshela okanye bayabugatya obo bungqina bucacileyo bemisebenzi yoMdali. (Roma 1:20) Noko ke, senza kakuhle xa sicinga ngayo size senze izigqibo ezinokuthanani nokuma kwethu kunye nomsebenzi wethu phambi koMenzi wethu. UYobhi isahluko 38 ukusa kwesama-41 uluncedo kakhulu koku, kuba apho uYehova watsalel’ ingqalelo kaYobhi kwiinkalo ezithile zemisebenzi Yakhe ebalaseleyo. Khawuphawule iimbambano ezibalulekileyo ezaphakanyiswa nguThixo.
Imisebenzi Enamandla Nemangalisayo
3. Njengoko kubhalwe kuYobhi 38:22, 23, 25-29, ziziphi izinto ezabuzwa nguThixo?
3 Ngaxa lithile, uThixo wabuza uYobhi: “Ngaba ungenile koovimba bekhephu, okanye ngaba ubona kwanoovimba besichotho, endibagcinele ixesha lokubandezeleka, imini yokulwa nemfazwe?” Kwiindawo ezininzi emhlabeni, ikhephu nesichotho zizinto eziqhelekileyo. UThixo wahlabela mgama esithi: “Ngubani owahlule umjelo ukwenzela isikhukula nendlela yamafu esiphango, ukuyenza ine elizweni ekungekho mntu kulo, phezu kwentlango ekungekho mntu wasemhlabeni kuyo, ukwanelisa iindawo ezibethwe sisiphango neziphanzileyo nokubangela ingca ihlume? Ngaba imvula inaye na uyise, okanye ngubani na owazala amathontsi ombethe? Umkhenkce uphuma esiswini sikabani na, ke yona iqabaka yezulu, ngubani na eneneni oyizalayo?”—Yobhi 38:22, 23, 25-29.
4-6. Ulwazi lomntu ngekhephu aluphelelanga ngayiphi indlela?
4 Bambi abahlala kwiindawo ekuphilwa ubomi obumaxhaphetshu nabafanele babe sendleleni lonke ixesha basenokucinga ngekhephu njengomqobo. Ukanti, abantu abaninzi ikhephu balijonga njengento eyolisayo, evelisa indawo entle ebusika evulela amathuba okuzonwabisa ngeendlela ezahlukahlukeneyo. Ucinga ngalo mbuzo kaThixo, ngaba uyalazi kakuhle ikhephu, kwanendlela elikhangeleka ngayo? Ewe, siyayazi indlela elikhangeleka ngayo xa lilininzi, mhlawumbi silibona ezifotweni okanye ngenxa yokuba siye sabona ikhephu elininzi. Kodwa kuthekani ngamahlwantsi ekhephu? Ngaba uyayazi indlela akhangeleka ngayo, mhlawumbi uye wawaphonononga apho aphuma khona?
5 Abanye abantu baye bachitha amashumi eminyaka befundisisa ngala mahlwantsi yaye bewafota. Ihlwantsi nje elinye lekhephu lisenokwenziwa ziikristale zomkhenkce ezilikhulu eziyilwe kakuhle ngeendlela ezahlukahlukeneyo. Incwadi ethi Atmosphere ithi: “Ukwahlukahlukana okungapheliyo kwamahlwantsi ekhephu kwaziwa ngokubanzi, yaye nangona izazinzulu zimi ngelithi akukho mthetho wendalo uthintela ukuba angafani, akuzange kufunyanwe amahlwantsi amabini afana ncam. Olunye uhlolisiso olunzulu lwenziwa. . . nguWilson A. Bentley, owachitha iminyaka engaphezu kwama-40 ehlolisisa ethabatha nemifanekiso yamahlwantsi ekhephu ngemikroskopu yaye akazange akhe awafumane amabini afana twatse.” Kwanokuba akho abonakala efana, nangona leyo iyinto enqabileyo, ngaba oko bekuya kuwuguqula ummangaliso wokwahlukahlukana kwamahlwantsi?
6 Khumbula umbuzo kaThixo othi: “Ngaba ungenile koovimba bekhephu?” Abaninzi bacinga ukuba amafu ngoovimba bekhephu. Ngaba unombono wakho usiya kwabo vimba ukuze uhlole amahlwantsi ekhephu awahlukahlukeneyo uze uhlolisise nendlela enzeka ngayo? Enye intyilalwazi yenzululwazi ithi: “Imeko nemvelaphi yamasuntswana asisiseko sekhephu, abangela ukuba amathontsi amancinane asemafini abe ngumkhenkce kwiqondo lobushushu elimalunga nama-40 ngokukaCelsius, ayikaqondwa.”—INdumiso 147:16, 17; Isaya 55:9, 10.
7. Umntu wazi kangakanani ngemvula?
7 Kuthekani ngemvula? UThixo wabuza uYobhi esithi: “Ngaba imvula inaye na uyise, okanye ngubani na owazala amathontsi ombethe?” Le ntyilalwazi yenzululwazi ithi: “Ngenxa yokuntsonkotha kwendlela ohamba ngayo umoya osesibhakabhakeni nomahluko omkhulu kumphunga namasuntswana akhoyo emoyeni, kubonakala kungenakwenzeka ukuba kunikelwe iinkcukacha ngendlela ayileka ngayo amafu kunye nomkhenkce.” Ngamafutshane, izazinzulu ziye zachaza iingcamango zazo ngokweenkcukacha, kodwa azikwazi ukuchaza imvula ngokupheleleyo. Ukanti, uyazi ukuba imvula enkcenkceshela umhlaba, ihlaziya izityalo ize ibangele ubomi bube myoli.
8. Kutheni amazwi kaPawulos abhalwe kwiZenzo 14:17 efanelekile?
8 Ngaba akuvumelani nesigqibo awafikelela kuso umpostile uPawulos? Wabongoza abanye ukuba bajonge kule misebenzi imangalisayo ubungqina baLowo uyenzayo. UPawulos wathi ngoYehova uThixo: ‘Akazange azishiye yena ngokwakhe ngaphandle kobungqina ngokuba wenza okulungileyo, eninika iimvula ezivela ezulwini namaxesha emveliso, ezizalisa iintliziyo zenu ngokutya nangokuchwayita.’—IZenzo 14:17; INdumiso 147:8.
9. Imisebenzi kaThixo emangalisayo iwabonakalisa njani amandla akhe amakhulu?
9 Alithandabuzeki elokuba uMenzi waloo misebenzi imangalisayo neyingenelo unobulumko namandla amakhulu. Ngokubhekisele kumandla akhe, cinga ngoku: Kuthiwa kukho iindudumo ezimalunga nama-45 000 suku ngalunye, ezingaphezu kwezigidi ezili-16 ngonyaka. Oku kuthetha ukuba ezikhoyo kanye ngoku zimalunga nama-2 000. Amafu esithonga esinye seendudumo akhupha amandla alingana naweebhombu zenyukliya ezilishumi okanye ngaphezulu ezasetyenziswa kwiMfazwe Yehlabathi II. Uyawabona amanye aloo mandla xa kutshawuza umbane. Ngaphandle nje kokuba kusoyikeka, ukutshawuza kombane kunceda ekuveliseni iintlobo zenitrogen ezifikelela emhlabeni zize zifunxwe zizityalo njengesichumiso semvelo. Ngoko ke umbane kukubonakaliswa kwamandla, kodwa ukwazisa neengenelo zokwenene.—INdumiso 104:14, 15.
Ufikelela Kwisiphi Isigqibo?
10. Ubuya kuyiphendula njani imibuzo efumaneka kuYobhi 38:33-38?
10 Masithi ubunguYobhi, ubuzwa nguThixo uSomandla. Mhlawumbi uya kuvuma ukuba inkoliso yabantu ayinikeli ngqalelo kangako kwimisebenzi kaThixo emangalisayo. UYehova usibuza le mibuzo siyifunda kuYobhi 38:33-38. “Ngaba uyayazi imimiselo yamazulu, okanye ngaba igunya lalo ungalibeka emhlabeni? Ngaba ilizwi lakho ungalinyusela elifini, ukuze amanzi amaninzi akugubungele? Ngaba ungathumela imibane ukuze iphume ize ithi kuwe, ‘Sithi aba!’? Ngubani owafaka ubulumko kwiingcamba zamafu, okanye ngubani na owanikela ukuqonda kwizinto ezenzeka emafini? Ngubani onokuwabala kanye kanye amafu ngobulumko, okanye iingqayi zamanzi amazulu—ngubani na onokuzithulula, xa uthuli lugalelwa ngokungathi kukwinto etyhidiweyo, okanye amagada omhlaba enamathela kwamanye?”
11, 12. Ziziphi ezinye zezinto ezingqina ukuba uThixo nguMenzi wemisebenzi emangalisayo?
11 Siye saqwalasela iingongoma nje ezimbalwa kwezo zaziswa engqalelweni kaYobhi nguElihu saza ke sathetha ngeminye yemibuzo uYehova awayibuza uYobhi ukuze aphendule “njengendoda eyomeleleyo.” (Yobhi 38:3) Sithi ‘eminye’ yayo kuba kwisahluko 38 nesama-39, uThixo unikel’ ingqalelo kwezinye iinkalo ezibalulekileyo zendalo. Ngokomzekelo, ukhankanya iqela leenkwenkwezi zezulu. Ngubani oyazi yonke imithetho okanye imimiselo yazo? (Yobhi 38:31-33) UYehova watsalela ingqalelo kaYobhi kwezinye zezilwanyana—ingonyama nehlungulu, ibhokhwe yasezintabeni neqwarhashe, inqu nenciniba, ihashe elinamandla nokhozi. Eneneni, uThixo wabuza uYobhi enoba uye wanika ezi zilwanyana zahlukahlukeneyo iimpawu zazo, ezibangela ziphile zize zande. Kusenokwenzeka ukuba uya kukunandipha ukufunda ezi zahluko, ngokukodwa ukuba uyawathanda amahashe okanye ezinye izilwanyana.—INdumiso 50:10, 11.
12 Usenokuqwalasela nesahluko 40 nesama-41 sikaYobhi, apho uYehova waphinda wacela uYobhi ukuba aphendule imibuzo ephathelele izidalwa ezithile ezibini. Siyaqonda ukuba uthetha ngemvubu (iBhehemote), enomzimba omkhulu nowomeleleyo, kwanengwenya eyoyikekayo yomNayile (iLeviyatan). Nganye kuzo sisidalwa esimangalisayo esifanele sinikele ingqalelo kuso. Ngoku makhe sibone izigqibo esifanele sifikelele kuzo.
13. Imibuzo kaThixo yaba nawuphi umphumo kuYobhi, yaye ifanele isichaphazele njani le mibandela?
13 UYobhi isahluko 42 usibonisa imiphumo eyaba nayo imibuzo kaThixo kuYobhi. Ngaphambili uYobhi wayenikele ingqalelo engakumbi kuye nakwabanye. Kodwa esamkela ukulungiswa nguThixo ngemibuzo awambuza yona, uYobhi wayiguqula indlela awayecinga ngayo. Wavuma wathi: “Ndiyazi [Yehova] ukuba uyakwazi ukuzenza zonke izinto, yaye akukho ngcamango ingenakufikeleleka kuwe. ‘Ngubani na lo usitha icebo engenakwazi?’ Ngoko ke ndithethile, kodwa bendingaziqondi izinto ezimangalisa gqitha kum, endingazaziyo.” (Yobhi 42:2, 3) Ewe, emva kokuba enikel’ ingqalelo kwimisebenzi emangalisayo kaThixo, uYobhi wathi ezi zinto zazimangalisa gqitha kuye. Emva kokuhlolisisa le ndalo imangalisayo, nathi sifanele sichukumiseke ngendlela efanayo ngenxa yobulumko namandla kaThixo. Ukusa kuwuphi umkhamo? Ngaba kukuze nje sichukumiseke ngamandla kaYehova amakhulu nobuchule bakhe? Okanye ngaba sifanele sishukunyiselwe kokungaphezu koko?
14. UDavide wasabela njani kwimisebenzi kaThixo emangalisayo?
14 Kaloku, kwiNdumiso 86, sifumana amabinzana anxulumene nala awathethwa nguDavide, owathetha la mazwi kwindumiso engaphambili: “Amazulu avakalisa uzuko lukaThixo; yaye isibhakabhaka sixela umsebenzi wezandla zakhe. Usuku emva kolunye usuku lubangela ukumpompoza kwentetho, yaye ubusuku emva kobunye ubusuku bubonakalisa ulwazi.” (INdumiso 19:1, 2) Kodwa uDavide wahlabela mgama. KwiNdumiso 86:10, 11 sifunda oku: “Kuba umkhulu yaye wenza izinto ezimangalisayo; unguThixo, wena wedwa. Ndiyalele, Yehova, ngendlela yakho. Ndiya kuhamba enyanisweni yakho. Yenze imanyane intliziyo yam ukuba iloyike igama lakho.” Ukoyika kukaDavide uMdali ngenxa yazo zonke izinto zakhe ezibalaseleyo kwakuquka umlinganiselo othile wentlonelo yobuthixo. Yaye unokusiqonda isizathu soko. UDavide wayengafuni ukungamkholisi Lowo unako ukwenza le misebenzi imangalisayo. Nathi asimele senjenjalo.
15. Kutheni yayifanelekile nje intlonelo kaDavide ngoThixo?
15 UDavide umele ukuba wayeqonda ukuba ekubeni uThixo enamandla angathethekiyo yaye ekwazi ukuwalawula, unokuwasebenzisa ngokuchasene naye nabani na ongayifanelanga inkoliseko yakhe. Yeha kwabanjalo. UThixo wabuza uYobhi: “Ngaba ungenile koovimba bekhephu, okanye ngaba ubona kwanoovimba besichotho, endibagcinele ixesha lokubandezeleka, imini yokulwa nemfazwe?” Ikhephu, isichotho, iziphango, umoya nombane konke oku kukwindlu yakhe yokugcina izixhobo zemfazwe. Anjani wona ukumangalisa amandla endalo ezinawo ezi zinto!—Yobhi 38:22, 23.
16, 17. Yintoni ebonisa amandla kaThixo awoyikekayo, yaye uye wawasebenzisa njani loo mandla kwixa elidluleyo?
16 Kusenokwenzeka ukuba ukhumbula ezinye zeentlekele zasekuhlaleni eziye zabangelwa yenye yezi—inkanyamba, isichotho, okanye isikhukula. Ngokomzekelo, ngasekupheleni konyaka we-1999, uthotho lwezaqhwithi lwahlasela umzantsi-ntshona Yurophu. Lothusa kwaneengcali zemozulu. Izaqhwithi zomoya zafikelela isantya seekhilomitha ezingama-200 ngeyure, zatshayela uphahla kumawaka ezindlu, zincothula iipali zombane, yaye zibhukuqa iilori. Khawube nomfanekiso-ngqondweni woku: Eso saqhwithi sancothula okanye sacanda kubini imithi emalunga nezigidi ezingama-270, engama-10 000 kumyezo waseVersailles nje kuphela, ngaphandle kweParis. Izigidi zemizi zasala zingenambane. Kwafa abantu abamalunga ne-100. Konke oko kwenzeka ngexesha nje elifutshane. Anjani wona amandla ukuba makhulu!
17 Omnye umntu usenokuthi izaqhwithi ziziganeko nje ezimangalisayo, ezingajoliswanga kubani nezingalawulekiyo. Noko ke, yintoni enokwenzeka ukuba Lowo unamandla onke, owenza imisebenzi emangalisayo, usebenzisa amandla anjalo ngendlela elawulekayo kwaye ewajolise kubantu abathile? Wenza into efanayo emva phayaa ngemihla ka-Abraham, owaqonda ukuba uMgwebi wawo wonke umhlaba wabuhlola ubungendawo bezixeko ezibini, iSodom neGomora. Zazonakele kangangokuba isikhalo ngenxa yazo sanyukela kuThixo owanceda bonke abangamalungisa ukuba basabe kwezo zixeko zazigwetyiwe. Imbali ithi: “UYehova wanisa isalfure nomlilo ovela kuYehova, emazulwini,” phezu kwezo zixeko. Lowo yayingumsebenzi omangalisayo, ukulondoloza abalungileyo aze atshabalalise ooncanyelweni abangendawo.—Genesis 19:24.
18. Ziziphi izinto ezimangalisayo ekuthethwa ngazo kuIsaya isahluko 25?
18 Kamva, uThixo wawisa isigwebo nxamnye nesixeko samandulo saseBhabhiloni, ekusenokuba kubhekiselwa kuso kuIsaya isahluko 25. UThixo waxela kwangaphambili ukuba esi sixeko sasiza kuba ngamanxuwa: “Isixeko usenze saba yimfumba yamatye, idolophu enqatyisiweyo yaba linxuwa eliwohlokayo, inqaba yokuhlala yabasemzini ayabi sosixeko, esingayi kubuya sakhiwe ukusa kwixesha elingenammiselo.” (Isaya 25:2) Abo bandwendwela kuloo manxuwa eBhabhiloni yamandulo namhlanje, banokuvuma ukuba oko kwaba njalo. Ngaba ukutshatyalaliswa kweBhabhiloni kwaba yimpazamo? Akunjalo. Kunoko, sinokuyamkela imbono kaIsaya xa esithi: “Owu Yehova, unguThixo wam. Ndiyakuphakamisa, ndiyalibonga igama lakho, kuba wenze izinto ezimangalisayo, amacebo ukususela kumaxesha angaphambili, ukuthembeka, ukukholoseka.”—Isaya 25:1.
Imisebenzi Emangalisayo Kwixa Elizayo
19, 20. Sinokulindela yiphi inzaliseko ngoIsaya 25:6-8?
19 UThixo wasizalisekisa esi siprofeto singasentla kwixa elingaphambili, yaye uya kwenza into emangalisayo kwixesha elizayo. Kulo mongo, apho uIsaya akhankanya “izinto ezimangalisayo” ezenziwa nguThixo, sifumana isiprofeto esinokuthenjwa esisaza kuzalisekiswa, kanye njengokuba wazalisekayo umgwebo weBhabhiloni. Yiyiphi loo ‘nto imangalisayo’ ithenjisiweyo? UIsaya 25:6 uthi: “Yaye ngokuqinisekileyo uYehova wemikhosi uya kwenzela zonke izizwana, kule ntaba, isidlo sokutya okuneoli eninzi, isidlo sewayini egcinwe ngeentsipho, sokutya okuneoli eninzi okuzaliswe ngumongo, sewayini egcinwe ngeentsipho, yahluzwa.”
20 Ngokuqinisekileyo eso siprofeto siya kuzalisekiswa kwihlabathi elitsha elithenjiswe nguThixo elisemnyango. Ngelo xesha, uluntu luya kube lukhululwe kwiingxaki ezicinezela abaninzi ngoku. Enyanisweni, isiprofeto esikuIsaya 25:7, 8 siqinisekisa ukuba uThixo uya kusebenzisa amandla akhe endalo ukwenza omnye weyona misebenzi imangalisayo yakha yenzeka: “Uya kuginya ukufa ngonaphakade, yaye iNkosi enguMongami uYehova ngokuqinisekileyo iya kosula iinyembezi ebusweni bonke. Nongcikivo lwabantu bakhe uya kulususa emhlabeni wonke, kuba uYehova uthethile.” Umpostile uPawulos kamva wacaphula kuloo ngxelo waza wabonisa ukuba ibhekisela ekubuyiseleni kukaThixo abafi ebomini, evusa abafileyo. Hayi indlela oya kumangalisa ngayo loo msebenzi!—1 Korinte 15:51-54.
21. Yiyiphi imisebenzi emangalisayo uThixo aya kuyenzela abafileyo?
21 Esinye isizathu sokuba iinyembezi ezibangelwa ziintlungu ziya kuphela kukuba abantu baya kube bekhululekile kwizigulo zomzimba. Xa uYesu wayesemhlabeni, waphilisa abaninzi—wenza iimfama zabona, izithulu zeva, wabuyisela amandla kwabaneziphene. UYohane 5:5-9 ubonisa ukuba waphilisa indoda eyayingumlwelwe iminyaka engama-38. Abo babebukele babecinga ukuba oku kwakungummangaliso. Yaye babechanile! Noko ke, uYesu wabaxelela ukuba eyona nto iya kumangalisa gqitha iya kuba kukuvusa kwakhe abafileyo, wathi: “Musani ukumangaliswa koku, kuba liyeza ilixa ekuya kuthi ngalo bonke abo bakumangcwaba enkumbulo balive ilizwi lakhe baze baphume, abo benze izinto ezilungileyo beze kuvuko lobomi.”—Yohane 5:28, 29.
22. Kutheni le nto amahlwempu nabaxhwalekileyo bekhangele phambili ngethemba?
22 Oko kuya kwenzeka ngokuqinisekileyo kuba nguYehova okuthembisileyo. Qiniseka ukuba xa esebenzisa aze alathise amandla akhe amakhulu nahlaziyayo, umphumo uya kuba ngomangalisayo. INdumiso 72 yalatha koko aya kukwenza ngoNyana wakhe onguKumkani. Liya kwandula ke ilungisa lichwayite. Uxolo luya kuba luninzi. UThixo uya kuhlangula amahlwempu nabaxhwalekileyo. Uyathembisa: “Kuya kubakho ukudla okuziinkozo okuninzi emhlabeni; encotsheni yeentaba kuya kubakho ukuphuphuma. Isiqhamo sakhe siya kuba njengaseLebhanon [yamandulo], nabo baphuma esixekweni baya kutyatyamba njengotyani bomhlaba.”—INdumiso 72:16.
23. Imisebenzi kaThixo emangalisayo ifanele isishukumisele ukwenza ntoni?
23 Ngokucacileyo, sinesizathu sokunikela ingqalelo kwimisebenzi emangalisayo kaYehova—oko akwenzileyo kwixesha elidluleyo, oko akwenzayo namhlanje noko athembisa ukukwenza kwixa elizayo elingekude. “Makabongwe uYehova uThixo, uThixo kaSirayeli, nguye yedwa owenza imisebenzi emangalisayo. Malibongwe igama lakhe elizukileyo kuse kwixesha elingenammiselo, nozuko lwakhe luzalise umhlaba wonke. Amen Amen.” (INdumiso 72:18, 19) Leyo imele ibe yinto esiyincokola rhoqo ngehlombe nezalamane zethu kunye nabanye. Ewe, ‘masivakalise uzuko lwakhe phakathi kweentlanga phakathi kwezizwana zonke imisebenzi yakhe emangalisayo.’—INdumiso 78:3, 4; 96:3, 4.
Ubuya Kuphendula Uthini?
• Imibuzo eyabuzwa uYobhi isigxininisa njani isibakala sokuba ulwazi lomntu lulinganiselwe?
• Yiyiphi imizekelo yemisebenzi kaThixo emangalisayo ebalaseliswe kuYobhi isahluko 37-41 eye yakuchukumisa?
• Sifanele sisabele njani emva kokuqwalasela eminye yemisebenzi kaThixo emangalisayo?
[Imifanekiso ekwiphepha 10]
Sisiphi isigqibo ofikelela kuso ngeentlobo-ntlobo ezininzi ezimangalisayo zamahlwantsi ekhephu nangamandla amangalisayo ombane?
[Inkcazelo]
snowcrystals.net
[Imifanekiso ekwiphepha 13]
Ncokola ngemisebenzi kaThixo emangalisayo ngokuthe rhoqo