Indlela Onokuhlangabezana Ngayo Nokudimazeka

● UAsafu wakhalaza esithi: “Ngokuqinisekileyo kulilize ukuyihlambulula kwam intliziyo yam nokuhlamba kwam izandla zam ngobumsulwa. Ndiye ndakhathazwa imini yonke, yaye ndilungiswa intsasa nganye.”—INdumiso 73:13, 14.

● UBharuki egcuma wathi: “Yeha, ke mna, kuba uYehova wongezelele intlungu kwingqaqambo yam! Ndityhafile ngenxa yokuncwina kwam, yaye andifumananga ndawo yokuphumla.”—Yeremiya 45:3.

● UNahomi wakhala ngelithi: “USomandla wenze ukuba kube krakra kakhulu kum. Ndandizele ukuhamba kwam, yaye uYehova undibuyise ndilambatha. Kutheni nandibiza ngokuthi Nahomi, ekubeni inguYehova ondithobileyo kwaye inguSomandla ondibangele intlekele?”—Rute 1:20, 21.

IBHAYIBHILE iqulethe imizekelo emininzi yabakhonzi bakaYehova abathi ngaxa lithile badimazeka. Enyanisweni njengabantu abangafezekanga sonke sikhe sibenazo iimvakalelo ezinjalo ngamanye amaxesha. Abanye bethu basenokudimazeka ngakumbi kunabanye—mhlawumbi ukusa kwinqanaba lokuba bazisizele—ngenxa yokuba baye baba namava alusizi.

Noko ke, ukuba ezi mvakalelo azilawulwa, zisenokonakalisa ulwalamano lwakho nabanye kunye noYehova uThixo. Elinye ibhinqa elingumKristu elithanda ukuzisizela liyavuma: “Ndiye andaya kwizinto ezithile ezenziwa ekuhlaleni kuba ndandivakalelwa kukuba andifanelekanga ukunxulumana nabo basebandleni.” Hayi indlela ezinokuba nomphumo owonakalisayo ngayo iimvakalelo ezinjalo kubomi bomntu! Unokwenza ntoni ukuze ulwe nazo?

Sondela KuYehova

KwiNdumiso 73, uAsafu wabhala ngokunyanisekileyo ngoko wayexakene nako. Xa wayethelekisa imeko yakhe nempumelelo yabo bangendawo, waba nomona. Wabona ukuba abantu abangahloneli Thixo babenekratshi yaye benobundlobongela, yaye babengohlwaywa. Ngoko uAsafu wakuthandabuza ukubaluleka nokusukela ikhondo elithe tye ebomini.—INdumiso 73:3-9, 13, 14.

Ngaba, njengoAsafu, uye waphawula impumelelo kwabangendawo abacel’ injezu ngobubi babo? UAsafu wakoyisa njani ukudimazeka kwakhe? Uqhubeka esithi: “Ndiye ndaqhubeka ndicinga ukuze ndikwazi oku; bekuyinkathazo emehlweni am, de ndafikelela kwingcwele ezukileyo kaThixo. Bendifuna ukuqonda ikamva labo.” (INdumiso 73:16, 17) UAsafu wathabatha amanyathelo aluncedo ngokusondela kuYehova ngomthandazo. Xa sisebenzisa amazwi awasetyenziswa ngumpostile uPawulos kamva, uAsafu wamcinezela “umntu wokwenyama” ngokuvusa “umntu wokomoya” ophakathi kuye. Ngembono yakhe entsha yokomoya, waqonda ukuba uYehova ubuthiyile ububi yaye ngexesha elifanelekileyo abangendawo baya kohlwaywa.—1 Korinte 2:14, 15.

Hayi indlela okubaluleke ngayo ukuvumela iBhayibhile ikuncede unikele ingqalelo kwizinto zokwenene ebomini! UYehova uyasikhumbuza ukuba uyakubona oko abantu abangendawo bakwenzayo. IBhayibhile isifundisa oku: “Ningalahlekiswa: UThixo akanakwenziwa intlekisa. Loo nto ayihlwayelayo umntu, uya kuvuna kwayona. . . Ngoko masingayeki ukwenza okuhle.” (Galati 6:7-9) UYehova uya kubabeka “emhlabeni omtyibilizi” abangendawo; uya kubenza ‘bawe bonakale.’ (INdumiso 73:18) Ekugqibeleni kuya kubakho okusesikweni kukaThixo.

Ukondliwa ngokuqhubekayo ngokomoya kwitafile kaYehova nonxulumano olwakhayo nabantu bakaThixo kuya kukunceda ukuba womeleze ukholo lwakho uze ukoyise ukudimazeka okanye ukudandatheka. (Hebhere 10:25) NjengoAsafu, ngokuhlala usondele kuThixo, unokufumana inkxaso yakhe enothando. UAsafu uqhubeka esithi: “Ndinawe rhoqo; usibambile isandla sam sasekunene. Uya kundikhokela ngecebo lakho, emva koko uya kundithabatha undinike uzuko.” (INdumiso 73:23, 24) Omnye umKristu owaxhatshazwayo xa wayesengumntwana wafunda ubulumko bala mazwi. Uthi: “Ukuhlala ndinxulumene ngokusondeleyo nebandla kwandibonisa ubomi obahlukileyo. Ndakubona ngokucacileyo ukuba abadala abangamaKristu babenothando, yaye babengengomapolisa kodwa babengabalusi.” Ewe, abadala abangamaKristu abanovelwano banendima enkulu ekupheliseni ukudimazeka.—Isaya 32:1, 2; 1 Tesalonika 2:7, 8.

Samkele Isiluleko SikaYehova

UBharuki, unobhala kamprofeti uYeremiya, wancwina ngenxa yokuxinezeleka kwisabelo sakhe. Noko ke, ngobubele uYehova watsalela ingqalelo kaBharuki kwinto yokwenene. “‘Wena ke, uyaqhubeka uzifunela izinto ezinkulu. Musa ukuqhubeka uzifuna. Kuba yabona, ndiyizisela intlekele inyama yonke,’ utsho uYehova, ‘yaye ndiza kukunika umphefumlo wakho ube lixhoba kuzo zonke iindawo osenokuya kuzo.’”—Yeremiya 45:2-5.

Ngokuphandle uYehova wachazela uBharuki ukuba usukelo lwakhe lokuzingca lulo olwalumbangela ukuba anxunguphale. UBharuki wayengenakusivuyela isabelo sakhe asinikwe nguThixo ngoxa kwangaxeshanye ezifunela izinto ezinkulu. Nawe unokufumanisa ukuba elona nyathelo luluncedo ekoyiseni ukudimazeka kukuphepha iziphazamiso uze ube noxolo lwengqondo olubakho ngolwaneliseko lobuthixo.—Filipi 4:6, 7.

UNahomi owayengumhlolokazi akazange avumele ukukhathazeka kumshenxise kuMowabhi xa umyeni noonyana bakhe ababini bafayo. Noko ke, kukho into esibonisa ukuba kangangethuba wayebuhlungu ngenxa yakhe noomolokazana bakhe ababini. Ebandulula, uNahomi wathi: “Kukrakra kakhulu kum ngenxa yenu, kuba isandla sikaYehova siphume nxamnye nam.” Kwakhona, xa wafika eBhetelehem, wazingisa esithi: “Musani ukundibiza ngokuba ndinguNahomi [“Luyolo Lwam”]. Ndibizeni ngokuba ndinguMara [“Ubukrakra”], kuba uSomandla wenze ukuba kube krakra kakhulu kum.”—Rute 1:13, 20.

Noko ke, uNahomi akazange abe yinkom’ edla yodwa aze ahlale elusizi—ekude lee kuYehova nabantu bakhe. KwaMowabhi weva ukuba “uYehova wayephethulele ingqalelo yakhe ebantwini bakhe ngokubanika isonka.” (Rute 1:6) Waqonda ukuba eyona ndawo ifanelekileyo kuye yayikubantu bakaYehova. Kunye nomolokazana wakhe uRute, emva koko uNahomi wabuyela kwaYuda yaye ngobuchule walathisa uRute ngendlela afanele aziphathe ngayo phambi komzala wakhe uBhowazi, umhlawuleli wakhe.

Ngokufanayo namhlanje, abanyanisekileyo abaye bafelwa ngamaqabane abo bahlangabezana ngokuphumelelayo noxinezeleko ngokuzigcina bexakekile kwibandla lamaKristu. NjengoNahomi, baqhubeka bezibhokoxa kwizinto zokomoya, befunda iLizwi likaThixo imihla ngemihla.

Iingenelo Zokusebenzisa Ubulumko Bobuthixo

Ezi ngxelo zeBhayibhile zisenza siqonde indlela ubani anokuhlangabezana ngayo nemiphumo yokudimazeka. UAsafu wafuna uncedo kwingcwele kaYehova yaye ngomonde walindela kuYehova. UBharuki wasamkela isiluleko waza waziphepha iziphazamiso zezinto eziphathekayo. UNahomi wahlala ekhuthele phakathi kwabantu bakaYehova, elungiselela ibhinqa eliselula uRute amalungelo kunqulo lukaThixo oyinyaniso.—1 Korinte 4:7; Galati 5:26; 6:4.

Unako ukukoyisa ukudimazeka nokudandatheka ngokucinga ngamandla obuthixo uYehova awanika abantu bakhe, kubantu ngabanye nanjengeqela. Ukuze wenze oko, cinga ngesenzo sikaYehova esikhulu sothando ngokukulungiselela intlawulelo. Luxabise uthando lokwenene lobuzalwana bamaKristu. Yiba nomfanekiso ngqondweni ukwihlabathi elitsha likaThixo elisemnyango. Yaye kwanga ungasabela njengoAsafu: “Ke mna, ukusondela kuThixo kulungile kum. Ndisabela kwiNkosi enguMongami uYehova, ukuze ndivakalise yonke imisebenzi yakho.”—INdumiso 73:28.