Abavakalisi BoBukumkani Bayabalisa
Waneliseka Ngokomoya
ISIPRO sisiqithi esikumntla mpuma woLwandle iMeditera. Kumaxesha okubhalwa kweBhayibhile, iSipro yayisaziwa ngokuba nobhedu namaplanga asemgangathweni. UPawulos noBharnabhas bavakalisa iindaba ezilungileyo zoBukumkani apho ebudeni bohambo lwabo lokuqala lwasemazweni. (IZenzo 13:4-12) Namhlanje, iindaba ezilungileyo zisenempembelelo entle ebomini babantu abaninzi baseSipro. Ngokuqinisekileyo kunjalo ngoLucas, indoda ekwiminyaka yayo yama-40. Uyabalisa:
“Ekhaya sasingabantwana abasixhenxe sihlala kwifama yeenkomo. Ndisengumntwana, ndandikuthanda ukufunda. Incwadi endandiyithanda kakhulu yayiluhlelo olulingene ipokotho lweZibhalo ZamaKristu ZesiGrike. Xa ndandineminyaka elishumi ubudala, mna nabanye abahlobo bam saseka iqela elincinane lesifundo seBhayibhile. Noko ke, alizange liqhubeke ixesha elide, kuba abanye abantu abadala baloo dolophana babesibiza ngokuba singabawexuki.
“Kamva, ngoxa ndandisiya esikolweni eUnited States, ndandidibana nabantu beenkonzo ezininzi. Oko kwavuselela umnqweno wam ngezinto zokomoya. Ndandichitha iintsuku ezininzi kumzi wogcino-zincwadi waseyunivesithi ndifundisisa ngeenkonzo ezininzi. Kwakhona ndatyelela iicawa eziliqela, kodwa phezu kwayo nje imigudu endandiyenza, ndandinganelisekanga ngokomoya.
“Emva kokugqiba izifundo zam, ndabuyela eSipro ndaza ndasebenza njengomalathisi kwilebhu yezonyango. Indoda esele ikhulile egama linguAntonis, omnye wamaNgqina kaYehova, yayithanda ukundityelela emsebenzini. Noko ke, iCawa yobuOthodoki yamaGrike yaphawula ukuba iyandityelela.
“Kungekudala, umfundi wezakwalizwi weza kundityelela waza wandinqanda ukuba ndingathethi namaNgqina kaYehova. Ekubeni ndafundiswa ndisengumntwana ukuba iCawa yobuOthodoki yamaGrike yayinenyaniso, ndamphulaphula ndaza ndayeka ukuthetha noAntonis ndaza ndaqalisa ukuxubusha iBhayibhile nomfundi wezakwalizwi. Kwakhona ndandityelela imizi emininzi yoonongedi eSipro. Ndada ndaya emntla weGrisi ndaza ndatyelela iNtaba iAthos, egqalwa njengeyona ntaba ingcwele ngamaKristu obuOthodoki. Sekunjalo, imibuzo yam yeBhayibhile yayingekaphendulwa.
“Ndandula ke ndathandaza kuThixo ukuba andincede ndifumane inyaniso. Kungekudala emva koko, uAntonis weza kundityelela emsebenzini kwakhona, yaye ndavakalelwa kukuba le yimpendulo yomthandazo wam. Ngoko ndayeka ukutyelela umfundi wezakwalizwi ndaza ndaqalisa ukufundisisa iBhayibhile noAntonis. Ndaqhubeka ndisenza inkqubela, yaye ngo-Oktobha 1997, ndafuzisela uzahlulelo lwam kuYehova ngokubhaptizwa emanzini.
“Umfazi wam neentombi zethu ezimbini ezindala, ezazineminyaka eli-14 neli-10 ubudala ngelo xesha, ekuqaleni babendichasa. Kodwa ngenxa yehambo yam entle, umfazi wam wagqiba kwelokuba aye kwiintlanganiso kwiHolo yoBukumkani. Wachukumiseka kakhulu bububele bamaNgqina nomdla awawubonisayo kuye. Wakholiswa ngokukhethekileyo yindlela esetyenziswa ngayo iBhayibhile. Ngenxa yoko, umfazi wam neentombi zam ezimbini ezindala zasamkela isifundo seBhayibhile samaNgqina kaYehova. Khawube nomfanekiso-ngqondweni wendlela endavuya ngayo xa bobathathu babhaptizwa kwiNdibano YeSithili ‘Yelizwi LikaThixo Lesiprofeto’ yowe1999!
“Ewe, ndaneliswa kukufuna kwam inyaniso. Ngoko intsapho yethu yonke, kuquka umfazi nabantwana bam abane, simanyene kunqulo olunyulu lukaYehova.”