Velela Iinkedama Nabahlolokazi Embandezelweni Yabo

Akunto inzima ukuqonda ukuba siphila kwihlabathi eliphelelwe luthando. Ebhekisela kubantu ababeya kuba bekho “ngemihla yokugqibela,” umpostile uPawulos wabhala: “Kuya kufika amaxesha amanqam ekunzima ukujamelana nawo. Kuba abantu baya kuba ngabazithandayo, . . . abangenawo umsa wemvelo.” (2 Timoti 3:1-3) Anjani ukunyaniseka amazwi!

UKUZIPHATHA okukhoyo kweli xesha lethu kufak’ isandla ekubeni abaninzi bangabi naluvelwano. Abantu abayikhathalele intlalo-ntle yabanye, kwezinye iimeko naleyo yamalungu eentsapho zabo.

Oku kuchaphazela abaninzi abathi, ngenxa yeemeko ezahlukahlukeneyo, babe ngamahlwempu. Inani labahlolokazi neenkedama ngokuthe ngcembe liyanda ngenxa yeemfazwe, iintlekele zemvelo kunye neenguqu kubantu abaziimbacu. (INtshumayeli 3:19) Ingxelo esuka kwiUnited Nations Children’s Fund ithi: “[Abantwana] abangaphezu kwesigidi baye baziinkedama okanye bahlukana neentsapho zabo ngenxa yemfazwe.” Nawe uyabazi oomama abangenamaqabane, abashiyiweyo okanye abahlukeneyo nabayeni babo abajamelana nocelomngeni lokuzikhulisela abantwana babo. Le meko yenziwa nzima nakukuba amanye amazwe ajamelene nentlungu yokuwohloka kwezoqoqosho, ebangela ukuba abantu abaninzi abahlala kuwo bahlwempuzeke kakhulu.

Ngenxa yoku, ngaba likho ithemba ngabo bajamelene nembandezelo? Kunokuncitshiswa njani ukuhlupheka kwabahlolokazi neenkedama? Ngaba le ngxaki inokuze ipheliswe?

Inkathalo Nothando Ngamaxesha Okubhalwa KweBhayibhile

Ukunyamekela iimfuno zokwenyama nezokomoya zabahlolokazi neenkedama bekusoloko kuyinkalo ebalulekileyo ekunquleni uThixo. Xa evuna ukudla okuziinkozo okanye iziqhamo, amaSirayeli ayengafanele aqokelele konke okusele entsimini, ade abhikice yonke into. Okuseleyo kwakufanele kushiyelwe ‘umphambukeli, inkwenkwe engenayise nomhlolokazi.’ (Duteronomi 24:19-21) UMthetho kaMoses wawusithi: “Nize ningamxhwalekisi nabani na ongumhlolokazi okanye inkwenkwe engenayise.” (Eks. 22:22, 23) Abahlolokazi neenkedama ekuthethwa ngazo eBhayibhileni ngokufanelekileyo babemela amahlwempu, ekubeni xa kusifa indoda okanye ubawo okanye abazali bobabini, amalungu entsapho aseleyo ayesala odwa aze ahlwempuzeke. Usolusapho uYobhi wathi: “Kuba ndandimhlangula oxhwalekileyo okhalela uncedo, nenkwenkwe engenayise naye nabani na ongenamncedi.”—Yobhi 29:12.

Ngemihla yamandulo yebandla lamaKristu, ukunyamekela abo babandezelekileyo nabangamahlwempu ngenxa yokushiywa ngabazali okanye umyeni yayiluphawu olukhethekileyo lonqulo lwenyaniso. Enomdla wokwenene ngentlalo-ntle yabanjalo, umfundi uYakobi wabhala: “Unqulo oluhlambulukileyo nolungadyobhekanga ngokwembono kaThixo noBawo wethu lulo olu: ukuvelela iinkedama nabahlolokazi embandezelweni yabo, nokuzigcina ungenabala kulo ihlabathi.”—Yakobi 1:27.

Ngaphandle kokukhankanya iinkedama nabahlolokazi, uYakobi wabonisa inkxalabo enzulu ngabanye ababehleleleke kakhulu. (Yakobi 2:5, 6, 15, 16) Umpostile uPawulos wabonisa uvelwano olufanayo. Xa yena noBharnabhas banikwa isabelo sokushumayela, ‘ukukhumbula amahlwempu’ kwakuphakathi kwemiyalelo abayifumanayo. Ngesazela esikhululekileyo uPawulos wathi: “Yiloo nto kanye nam ebendizabalazela ukuyenza ngenyameko.” (Galati 2:9, 10) Ingxelo ngemisebenzi yebandla lamaKristu kungekudala emva kokuba limiselwe yabonisa ukuba: “Kwakungekho namnye owayeswele phakathi kwabo . . . Kwakusabelwa ngamnye, kanye ngokokuswela kwakhe.” (IZenzo 4:34, 35) Ewe, ilungiselelo lokunyamekela iinkedama, abahlolokazi kunye nabo bangamahlwempu elaqaliswa kwaSirayeli mandulo ladluliselwa kwibandla lamaKristu.

Kambe ke, uncedo olwalunikelwa lwalungeluninzi kangako yaye lwaluhambisana noko ibandla linokukwazi ukukufikelela. Imali yayingasafazwa, yaye abo babencedwa babengamahlwempu ngokwenene. Kwakungekho mKristu ufanele axhaphaze eli lungiselelo, yaye ibandla lalingafanele lithwaliswe umthwalo ongeyomfuneko. Oku kwakucacile kwimiyalelo kaPawulos ebhalwe kweyoku-1 kuTimoti 5:3-16. Apho siphawula ukuba xa izalamane zabo bahluphekayo zinako ukubancedisa, zazifanele ziyithabathele kuzo loo mbopheleleko. Abahlolokazi abahluphekayo kwakufanele babe neemfanelo ezithile abazifikelelayo ukuze bancedwe. Konke oku kubonisa indlela yobulumko uYehova ayisebenzisayo ukunyamekela abo bangamahlwempu. Sekunjalo, ikwabonisa ukuba kufanele kusetyenziswe ulungelelwano ukuze kungabikho bani uxhaphaza ububele obuboniswa ngabanye.—2 Tesalonika 3:10-12.

Ukunyamekela Iinkedama Nabahlolokazi Namhlanje

Imigaqo eyayisetyenziswa ngabakhonzi bakaThixo mandulo isasebenza kwibandla lamaNgqina kaYehova xa kusiziwa ekubonakaliseni inkathalo nasekuncedeni abo babandezelekileyo. Uthando lobuzalwana luphawu olusahlulayo, njengoko uYesu wathi: “Ngako oko bonke baya kwazi ukuba ningabafundi bam, ukuba ninothando phakathi kwenu.” (Yohane 13:35) Ukuba abanye baswele okanye bangamaxhoba eentlekele okanye imiphumo yeemfazwe zamakhaya, bonke abazalwana ehlabathini lonke banomdla wokubanceda ngeendlela ezahlukahlukeneyo ngokomoya nangezinto eziphathekayo. Makhe sibone amava ale mihla abonisa okwenziwayo ngale meko.

UPedro akakhumbuli nto ingako ngonina, owafa xa wayenonyaka onesiqingatha kuphela ubudala. Xa uPedro wayeneminyaka emihlanu, noyise wafa. Ngoko uPedro wasala nabantakwabo kuphela. AmaNgqina kaYehova ayesele etyelela uyise, ngoko uPedro nabo bonke abantakwabo abadala baqalisa isifundo seBhayibhile sekhaya.

UPedro uthi: “Kwiveki eyalandelayo, saqalisa ukuya kwiintlanganiso. Njengoko sasinxulumana nabazalwana, saluphawula uthando ababelubonisa kuthi. Ibandla lalilikhusi kum kuba abazalwana noodade babebonisa uthando novelwano kum, ngokungathi ngabazali bam.” UPedro ukhumbula ukuba omnye umdala ongumKristu wayedla ngokummema kwikhaya lakhe. UPedro wayencokola aze aphumle kunye nentsapho yalapho. UPedro owaqalisa ukushumayela ngokholo lwakhe xa wayeneminyaka eli-11 waza wabhaptizwa eneminyaka eli-15 ubudala uthi: “Ezi ziinkumbulo endizixabisileyo.” Ngoncedo lwabo basebandleni, abantakwabo abadala benza inkqubela enkulu ngokomoya.

Kwakhona khawucinge ngemeko kaDavid. Yena nodade wabo oliwele lakhe basala bengenabani emva kokwahlukana kwabazali babo. Bakhuliswa nguninakhulu noyisemkhulu kunye nomakazi wabo. Uthi: “Xa sakhula saba badala saza sayibona imeko esikuyo, saqalisa ukuziva singanqabisekanga yaye sidandathekile. Sasifuna into esinokwayama ngayo. Umakazi waba liNgqina likaYehova, nto leyo eyasinceda safunda inyaniso yeBhayibhile. Abazalwana babonisa umsa nobuhlobo kuthi. Babenomdla kuthi yaye basikhuthaza ukuba sizibekele usukelo size siqhubeke sisebenzela uYehova. Xa ndandimalunga neminyaka elishumi ubudala, isicaka solungiselelo sasindiphuthuma siye nam kwinkonzo yasentsimini. Omnye umzalwana wayehlawula iindleko zam xa ndisiya ezindibanweni. Omnye wayede andincede ukuze ndinikele kwiHolo yoBukumkani.”

UDavid wabhaptizwa xa wayeneminyaka eli-17 ubudala, waza kamva wakhonza kwiofisi yesebe yamaNgqina kaYehova eMexico. Nangoku uyavuma: “Baninzi abadala abafak’ isandla kwimfundo yam baze bandinike amacebiso aluncedo. Ngaloo ndlela ndiyayoyisa imvakalelo yokuziva ndinganqabisekanga yaye ndililolo.”

UAbel, umdala webandla eMexico apho kukho abahlolokazi abaliqela abafuna uncedo, uthi: “Ndiqinisekile ukuba eyona nkalo abahlolokazi abafuna uncedo kuyo kukuxhaswa ngokweemvakalelo. Maxa wambi baziva bedandathekile; bengenabani. Ngoko ke, kubalulekile ukuba sibaxhase, sibaphulaphule. Sibatyelela rhoqo [abadala bebandla]. Kubalulekile ukuba siziphe ithuba lokunikela ingqalelo kwiingxaki zabo. Oku kufak’ isandla ekubeni bazive bekhathalelwe ngokomoya.” Noko ke, uncedo lwezoqoqosho nalo luyafuneka maxa wambi. UAbel ukhe wathi ngaphambili: “Kukho indlu esiyakhela udade ongumhlolokazi. NgeMigqibelo nangezinye iimvakwemini phakathi evekini sisebenza endlwini yakhe.”

Malunga namava akhe ekuncedeni iinkedama nabahlolokazi, omnye umdala webandla uthi: “Ndikholelwa ukuba iinkedama zilufuna ngakumbi uthando lwamaKristu kunabahlolokazi. Ndiphawule ukuba zithanda ukuziva zityeshelwe kunabantwana kunye nabanye abafikisayo abanabazali bobabini. Zifuna amazwi abazalwana abonisa uthando. Kuhle ukuzikhangela emva kweentlanganiso size sifumanise indlela eziphila ngayo. Kukho umzalwana otshatileyo owaba yinkedama eseyinkwenkwe encinane. Ndisoloko ndimbulisa kwiintlanganiso, yaye uyandiwola xa endibona. Oku kuqinisa amaqhina othando lobuzalwana bokwenene.”

UYehova “Uya Kumhlangula Lowo Ulihlwempu”

Ukuthembela kuYehova kubalulekile ukuze sihlangabezane nemeko yabahlolokazi neenkedama. Ngaye kuthiwa: “UYehova ulinda abaphambukeli; ukhulula inkwenkwe engenayise nomhlolokazi, kodwa indlela yabangendawo uyenza ibe gwenxa.” (INdumiso 146:9) Isicombululo esigqibeleleyo sale meko siya kuziswa kuphela buBukumkani bukaThixo phantsi kolawulo lukaYesu Kristu. Eprofeta ngolawulo lukaMesiya, umdumisi wathi: “Uya kumhlangula lowo ulihlwempu ukhalela uncedo, kwanalowo uxhwalekileyo nabani na ongenamncedi. Uya kuba nosizi ngesisweli nangehlwempu, nemiphefumlo yabangamahlwempu uya kuyisindisa.”—INdumiso 72:12, 13.

Njengoko isiphelo sale nkqubo yezinto sisondela, iingcinezelo amaKristu ajamelana nazo ngokubanzi ngokuqinisekileyo ziza kwanda. (Mateyu 24:9-13) Kukho imfuneko mihla le yokuba amaKristu abonise inkathalo ngamanye yaye abe “nothando olunzulu omnye ngomnye.” (1 Petros 4:7-10) Amadoda angamaKristu, ingakumbi abadala, afanele abonise inkxalabo nemfesane kwiinkedama. Yaye amabhinqa aqolileyo ebandleni anokunikela inkxaso enkulu kubahlolokazi aze abathuthuzele. (Tito 2:3-5) Eneneni, wonk’ ubani unokufak’ isandla ngokukhathalela abanye ababandezelekileyo.

AmaKristu okwenyaniso ‘akazivaleli iimfesane zawo xa ebona umzalwana wawo eswele.’ Afuna ngokwenene ukuthobela isiluleko sompostile uYohane esithi: “Bantwana abancinane, masingathandi ngazwi nangamlomo, kodwa ngezenzo nangenyaniso.” (1 Yohane 3:17, 18) Ngoko ke, ‘masivelele iinkedama nabahlolokazi embandezelweni yabo.’—Yakobi 1:27.

[Amagama acatshulweyo akwiphepha 11]

“Masingathandi ngazwi nangamlomo, kodwa ngezenzo nangenyaniso.”—1 Yohane 3:18

[Imifanekiso ekwiphepha 10]

AmaKristu okwenyaniso anyamekela iinkedama nabahlolokazi ngezinto eziphathekayo, ngokomoya nangokweemvakalelo