Uncedo Lokuqonda IBhayibhile
IBHAYIBHILE yincwadi engenakuthelekiswa nanto. Ababhali bayo bathi baphefumlelwa nguThixo, yaye oko ikuquletheyo kunikela ubungqina obuninzi bokuba oko kuyinyaniso. (2 Timoti 3:16) Phakathi kwezinye izinto, iBhayibhile ibonisa apho sivela khona, isizathu sokuba sibe lapha, nalapho siya khona. Ngokuqinisekileyo yincwadi esifanele siyiqwalasele!
Mhlawumbi ukhe wazama ukufunda iBhayibhile kodwa wafumanisa kunzima ukuyiqonda. Mhlawumbi awazi ukuba uzikhangele phi iimpendulo zemibuzo yakho. Ukuba kunjalo, akuwedwa. Imeko yakho ifana neyendoda eyayiphila kwinkulungwane yokuqala. Yayihamba ngenqwelo, isuka eYerusalem isiya kwilizwe lakowayo, eTiyopiya. Eli gosa lingumTiyopiya lalifunda ngokuvakalayo kwincwadi yeBhayibhile kaIsaya esisiprofeto, eyayibhalwe ngaphezu kweminyaka engamakhulu asixhenxe ngaphambilana.
Ngesiquphe, labuliswa yindoda eyayibaleka ecaleni kwenqwelo yokulwa. Le ndoda yayinguFilipu, umfundi kaYesu, yaye yabuza lo mTiyopiya: “Uyakwazi na okunene oku ukufundayo?” Lo mTiyopiya waphendula: “Ngokwenene, ndingakwenza njani oko, ngaphandle kokuba ndikhokelwe nguthile?” Ngoko ke wacela uFilipu ukuba akhwele kwinqwelo. UFilipu wacacisa intsingiselo yengxelo eyayiyifunda le ndoda waza waqhubeka evakalisa kuyo “iindaba ezilungileyo ezingoYesu.”—IZenzo 8:30-35.
Njengokuba kude kudala uFilipu wanceda loo mTiyopiya ukuba aliqonde iLizwi likaThixo, amaNgqina kaYehova anceda abantu ukuba baqonde iBhayibhile namhlanje. Angakuvuyela ukukunceda nawe. Ngokuqhelekileyo, eyona ndlela ifanelekileyo kukuyifundisisa ngokulandelelana iBhayibhile, uqale ngeemfundiso zeZibhalo ezisisiseko. (Hebhere 6:1) Njengoko usenza inkqubela, uya kukwazi ukufumana oko umpostile uPawulos akubiza ngokuba ‘kukutya okuqinileyo’—oko kukuthi, iinyaniso ezinzulu. (Hebhere 5:14) Nangona ufundisisa iBhayibhile, ezinye iimpapasho—uncwadi lokufundisisa iBhayibhile—zinokukunceda ukhangele uze uqonde izicatshulwa zeBhayibhile kwimibandela eyahlukahlukeneyo.
Ngokuqhelekileyo isifundo sinokuqhutywa ngexesha elikulungeleyo nakwindawo ekulungeleyo. Bambi bafundisisa nangemfonomfono. Isifundo asibanjelwa kwigumbi lokufundela; lilungiselelo langasese elilungiselelwe iimeko zakho, kuquka imvelaphi nemfundo onayo. Akuyomfuneko ukuba usihlawulele eso sifundo seBhayibhile. (Mateyu 10:8) Akubhalwa zimviwo, yaye akusoze wenziwe uzive uhlazekile. Imibuzo yakho iya kuphendulwa, yaye uya kufunda indlela yokusondela kuThixo. Ngoko ke, kutheni ufanele ufundisise iBhayibhile? Qwalasela ezinye izizathu zokuba ukufundisisa iBhayibhile kunokongeza uvuyo ebomini bakho.