Kutheni Ufanele Ufundisise IBhayibhile?
UBILL wayeselula, eyinjuze yemidlalo, efundile yaye eme kakuhle ezimalini. Sekunjalo, wayenganelisekanga. Ubomi bakhe babungenanjongo, yaye oko kwakumkhathaza kakhulu. Ezama ukufumana injongo ebomini, wahlolisisa iinkonzo eziliqela, kodwa akazange akufumane oko wayekufuna. Ngowe-1991 wadibana nomnye wamaNgqina kaYehova owamshiyela incwadi eyayixubusha ngoko iBhayibhile ikuthethayo ngenjongo yobomi. Kwalungiselelwa ukuba kuqaliswe isifundo seBhayibhile ukuze uBill awuqwalasele lo mbandela kwakunye neminye.
UBill ukhumbula oku: “Saqalisa isifundo sethu, yaye ngenxa yokuba sasityhila iBhayibhile ngokufuthi, ndayazi into yokuba le yile nto bekudala ndiyifuna. Iimpendulo eziseBhayibhileni zazindichulumancisa. Emva kweso sifundo, ndaqhuba ilori ndaya ezintabeni, ndaphuma kwilori yam ndaza ndakhala kakhulu ngenxa yovuyo olungathethekiyo. Ndachulumanciswa kukuba ekugqibeleni ndazifumana iimpendulo kwimibuzo yam.”
Kakade ke, asinguye wonke ubani othi xa efumana inyaniso yeBhayibhile akhale ngokoqobo ngenxa yovuyo. Sekunjalo, ukufumana iimpendulo kwimibuzo ebalulekileyo ebomini yinto evuyisayo kubantu abaninzi. Bavakalelwa ngendlela efanayo nendoda eyayikumzekelo kaYesu eyafumana ubuncwane obufihlwe entsimini. UYesu wathi: “Ngenxa yovuyo analo uyahamba aye kuthengisa ngezinto anazo aze ayithenge loo ntsimi.”—Mateyu 13:44.
Isikhokelo Sobomi Obunenjongo
UBill wacingisisa ngombuzo osisiseko, Yintoni injongo yobomi? Izithandi zobulumko, abafundi bezakwalizwi, nezazinzulu ziye zenza umgudu zifuna impendulo yalo mbuzo kangangamawaka eminyaka. Abantu baye babhala iincwadi ezininzi bezama ukuphendula loo mbuzo. Imigudu yabo ibililize, yaye abaninzi baye bagqiba ngelithi lo mbuzo awunakuphendulwa. Sekunjalo, ikho impendulo. Impendulo inzulu, kodwa ayintsonkothanga. IBhayibhile iyayicacisa. Isikhokelo sobomi obonwabisayo nobunenjongo nasi: Simele sibe nolwalamano olufanelekileyo noYehova, uMdali noBawo wethu wasemazulwini. Sinokukwenza njani oko?
Kukho iinkalo ezimbini zokusondela kuThixo ezibonakala ziphikisana. Abo benjenjalo bayamoyika yaye bayamthanda. Makhe siqwalasele izibhalo ezibini ezixhasa la mazwi. Kude kudala, uKumkani uSolomon osisilumko waluhlolisisa ngenyameko uluntu waza wenza ingxelo ngoko wakufumana kwincwadi yeBhayibhile yeNtshumayeli. Eshwankathela oko wakufumanayo, wabhala: “Ukuqosheliswa kombandela, emva kokuba yonk’ into iviwe, naku: Yoyika uThixo oyinyaniso uze ugcine imiyalelo yakhe. Kuba oku kuyimbopheleleko yomntu.” (INtshumayeli 12:13) Kwiinkulungwane kamva, xa ebuzwa ngowona myalelo mkhulu eMthethweni owanikwa uMoses, uYesu waphendula: “Uze umthande uYehova uThixo wakho ngentliziyo yakho iphela nangomphefumlo wakho uphela nangengqondo yakho iphela.” (Mateyu 22:37) Ngaba kubonakala kuyinto engaqhelekanga ukuba sifanele simoyike yaye simthande uThixo? Makhe siqwalasele ukubaluleka kokoyika nokuthanda nendlela ezimnceda ngayo umntu ukuba abe nolwalamano olwanelisayo noThixo.
Oko Kuthethwa Kukoyika UThixo
Uloyiko lwentlonelo lubalulekile ukuze sikhonze uThixo ngendlela eyamkelekileyo. IBhayibhile ithi: “Ukoyika uYehova kukuqala kobulumko.” (INdumiso 111:10) Umpostile uPawulos wabhala: “Masiqhubeke sinobubele obungasifanelanga, esinokuthi ngabo ngokwamkelekileyo sinikele inkonzo engcwele kuThixo sinoloyiko lobuthixo nentlonelo.” (Hebhere 12:28) Ngokufanayo, ingelosi esesazulwini samazulu eyabonwa ngumpostile uYohane embonweni yaqalisa ukuvakalisa iindaba ezilungileyo ngamazwi athi: “Moyikeni uThixo nimzukise.”—ISityhilelo 14:6, 7.
Oku koyika uThixo, okubaluleke kakhulu kubomi obunenjongo, akufani nokunkwantya. Sisenokunkwantya ukuba sisongelwa sisaphuli-mthetho esikhohlakeleyo nesinobungozi. Kodwa ukoyika uThixo kukuba noloyiko olunzulu ngoMdali. Kuquka ukuba noloyiko olufanelekileyo lokungamkholisi uThixo kuba enguMgwebi oPhakamileyo noSomandla, onamandla negunya lokohlwaya abo bangathobeliyo.
Uloyiko Nothando Ziyahambisana
Kodwa ke, uYehova akafuni ukuba abantu bamkhonze kuba nje bemoyika. UYehova ubalasele ngokuba nguThixo wothando. Umpostile uYohane washukumiselwa ukuba abhale: “UThixo uluthando.” (1 Yohane 4:8) UYehova uThixo uye waluphatha ngothando uluntu, yaye ufuna abantu basabele ngokuthi nabo bamthande. Noko ke, ngaba uthando olunjalo luyavisisana nokoyika uThixo? Eneneni, ezi zinto zimbini zisondelelene. Umdumisi wabhala: “Ukusondelelana noYehova kokwabo bamoyikayo.”—INdumiso 25:14.
Khawucinge indlela umntwana amhlonela namoyika ngayo uyise onamandla nonobulumko. Kwangaxeshanye, umntwana onjalo uya kusabela kuthando lukayise. Loo mntwana uya kumthemba uyise aze afune ukhokelo kuye, enethemba lokuba ukhokelo lwakhe luya kuzisa iingenelo. Ngokufanayo, ukuba siyamthanda yaye siyamoyika uYehova, siya kuluthobela ulwalathiso lwakhe, yaye oku kuya kuba yingenelo kuthi. Phawula oko uYehova wakuthethayo ngokuphathelele amaSirayeli: “Akwaba nje besingahlakulela le ntliziyo yokundoyika nokuyigcina imiyalelo yam yonke ngamaxesha onke, ukuze kulunge kuso noonyana baso kuse kwixesha elingenammiselo!”—Duteronomi 5:29.
Ewe, ukoyika uThixo kukhokelela kungekhona kubukhoboka kodwa kwinkululeko, kungekhona kusizi kodwa kuvuyo. UIsaya waprofeta ngoYesu: “Uya kuyoliswa kukoyika uYehova.” (Isaya 11:3) Umdumisi wabhala: “Unoyolo umntu owoyika uYehova, oyoliswa kakhulu yimiyalelo yakhe.”—INdumiso 112:1.
Licacile elokuba, asinakumoyika uThixo kwaye singenakumthanda xa singamazi. Kungenxa yoko le nto ukufundisisa iBhayibhile kubaluleke kangaka. Ufundisiso olunjalo lusinceda siqonde ubuntu bukaThixo size sibuxabise ubulumko bokulandela ulwalathiso lwakhe. Njengoko sisondela kuThixo, sifuna ukwenza ukuthanda kwakhe yaye sishukunyiselwa ukuba sigcine imithetho yakhe, sisazi ukuba siya kungenelwa kuyo.—1 Yohane 5:3.
Kuyavuyisa ukwazi ukuba ubani uhamba ngendlela efanelekileyo ebomini. Kunjalo ngoBill, okhankanywe ekuqaleni. Kutshanje uthe: “Kwiminyaka elithoba edlulileyo emva kokuqalisa kwam ukufundisisa iBhayibhile, ulwalamano lwam noYehova luye lwakhula. Uvuyo endandinalo ekuqaleni luye lwakhula lwaba bubomi obuvuyisayo. Ndihlala ndinesimo sengqondo esingqalileyo ngobomi. Ngazo zonke iintsuku ndenza umsebenzi onenjongo, kungekhona ukufuna uyolo ngokungenanjongo. UYehova uye waba ngumntu wokwenene kum, yaye ndiyazi ukuba unomdla wokwenene kum.”
Kwinqaku elilandelayo, siya kuqwalasela ngokubhekele phaya indlela ukwazi uYehova okuzisa ngayo uvuyo neengenelo kwabo bakusebenzisayo ebomini babo.
[Amagama acatshulweyo akwiphepha 5]
Ukusondela kuThixo kuthetha ukuba simthande yaye simoyike
[Umfanekiso okwiphepha 6]
UYesu wayevuyiswa kukoyika uYehova