Ngaba Unomoya Ongafiyo?
“SONKE iSibhalo siphefumlelwe nguThixo kwaye siyingenelo ekufundiseni, ekohlwayeni, ekulungelelaniseni izinto, ekuqeqesheleni ebulungiseni,” wabhala njalo umpostile uPawulos. (2 Timoti 3:16) Ewe, iBhayibhile yincwadi yenyaniso evela kuThixo oyinyaniso, uYehova.—INdumiso 83:18.
Ekubeni uYehova enguMdali wazo zonke izinto, kuquka nabantu, ukwazi kakuhle okwenzekayo kuthi xa sisifa. (Hebhere 3:4; ISityhilelo 4:11) Yaye kwiLizwi lakhe eliphefumlelweyo, iBhayibhile, uye wanikela iimpendulo eziyinyaniso nezanelisayo kwimibuzo yoko kwenzekayo kubomi basemva kokufa.
Uyintoni Umoya?
EBhayibhileni, amagama aguqulelwe ngokuthi “umoya” ngokusisiseko athetha “impefumlo.” Kodwa oku kuthetha okungakumbi kunokuphefumla nje. Ngokomzekelo, umbhali weBhayibhile uYakobi uthi: “Umzimba ngaphandle komoya ufile.” (Yakobi 2:26) Ngaloo ndlela, ngumoya obangela ukuba umzimba uphile.
La mandla abangela ukuphila akanakuba kukuphefumla nje okanye umoya, ohamba emiphungeni. Kutheni kungenakuba njalo? Kungenxa yokuba nasemva kokuyeka ukuphefumla, iiseli zomzimba ziyaqhubeka ziphila kangangethutyana—“kangangemizuzu eliqela,” ngokutsho kweThe World Book Encyclopedia. Ngenxa yeso sizathu imigudu yokumbuyisela ebomini loo mntu inokuphumelela. Kodwa athi akuphela amandla abangela ubomi kwiiseli zomzimba, ibe lilize yonke imigudu yokubuyisela ubomi. Nokuba umoya unokuba mninzi kangakanani na, awunako ukuvuselela nkqu neseli nje enye. Ngoko ke, umoya ngamandla obomi angabonakaliyo—alondoloza ubomi, agcine iiseli ziphila nomntu ephila. Kukuphefumla okugcina la mandla obomi eqhubeka.—Yobhi 34:14, 15.
Ngaba loo moya usebenza ebantwini kuphela? IBhayibhile isinceda sifikelele kwisigqibo esichanileyo koku. UKumkani osisilumko uSolomon wayeqonda ukuba abantu nezilwanyana “zonke zinomoya omnye,” yaye wabuza wathi: “Ngubani na ke ngoko owaziyo ukuba umoya woonyana babantu unyukela phezulu; uze wona umoya wesilo wehlele ezantsi emhlabeni?” (INtshumayeli 3:19-21) Ngoko kuthiwa izilwanyana zinomoya njengabantu. Kwenzeka njani oko?
Umoya, okanye amandla obomi anokufaniswa namandla ombane asebenza kumatshini okanye kwisixhobo sombane. Umbane ongabonakaliyo unokusetyenziswa ukwenza izinto ezahlukeneyo, kuxhomekeka kweso sixhobo usebenza kuso. Ngokomzekelo, isitovu sombane sinokwenziwa shushu, ikhompyutha ivelise inkcazelo, yaye umabonwakude uvelise imifanekiso nesandi. Ukanti, umbane awubi yinxalenye yeso sixhobo usenza sisebenze. Ungamandla nje kuphela. Ngokufanayo, amandla obomi akabi nazo naziphi na iimpawu zezidalwa abangela ukuba ziphile. Amandla obomi akanazo iimpawu zomntu, engakwazi nokucinga. Abantu nezilwanyana ‘banomoya omnye.’ (INtshumayeli 3:19) Ngoko ke, xa umntu esifa, umoya wakhe awuqhubeki uphila kwenye indawo njengesidalwa somoya.
Ngoko ke, injani imeko yabafi? Yaye kwenzeka ntoni kumoya xa umntu esifa?
“Uya Kubuyela Kwaseluthulini”
Xa umntu wokuqala, uAdam, wathi ngabom akawuthobela umthetho kaThixo, wathi kuye: “Uya kudla isonka sokubila kobuso bakho ude ubuyele emhlabeni, kuba uthatyathwe kuwo. Ngokuba uluthuli, uya kubuyela kwaseluthulini.” (Genesis 3:19) Wayephi uAdam ngaphambi kokuba uYehova amdale ngothuli? Kaloku, wayengekho! Kwakungekho kwanto inguye. Ngoko ke xa uYehova uThixo wayesithi uAdam wayeza “kubuyela kwaseluthulini,” wayethetha ukuba uAdam wayeza kufa aze abuyele emhlabeni. UAdam wayengayi kudluliselwa kummandla othile wokomoya. Xa efile wayeza kubuyela kwimeko yokungabikho. Isohlwayo sakhe yaba kukufa—ukungaphili—kungekhona ukudluliselwa komnye ummandla.—Roma 6:23.
Kuthekani ngabanye abaye bafa? Imeko yabafi ichazwa ngokucacileyo kwiNtshumayeli 9:5, 10, apho sifunda oku: “Abafileyo abazi lutho . . . Akukho kwenza, nakucinga, nakwazi nakulumka kwelabafileyo.” (IBhayibhile yesiXhosa) Ngoko ke, ukufa yimeko yokungabikho. Umdumisi wabhala wathi xa umntu esifa, “uyaphuma umoya wakhe; abuyele yena emhlabeni wakhe, ngaloo mini ziyatshabalala iingcamango zakhe.”—INdumiso 146:4.
Kucacile ukuba, abafileyo abaphili. Akukho nto bayaziyo. Abanakukubona, bakuve, okanye bathethe nawe. Abanakukunceda bengenako nokukwenzakalisa. Ngokuqinisekileyo akufanele uboyike abafileyo. Kodwa umoya ‘uphuma’ njani emntwini xa esifa?
Umoya ‘Ubuyela kuThixo Oyinyaniso’
IBhayibhile ithi xa umntu esifa, ‘umoya ubuyela kuThixo oyinyaniso owawunikayo.’ (INtshumayeli 12:7) Ngaba oku kuthetha ukuba kukho umoya onqumla ngokoqobo esibhakabhakeni uye kuThixo? Akunjalo! Indlela iBhayibhile elisebenzisa ngayo igama elithi “ubuyele” ayithethi kufuduka kokoqobo kwento isuka kwenye indawo iye kwenye. Ngokomzekelo, amaSirayeli angathembekanga axelelwa oku: “‘Buyelani kum, nam ndiza kubuyela kuni,’ utsho uYehova wemikhosi.” (Malaki 3:7) ‘Ukubuyela’ kukaSirayeli kuYehova kwakuthetha ukubuya kwikhondo eliphosakeleyo aze kwakhona enze ngokuvisisana neendlela zobulungisa zikaThixo. Yaye ‘nokubuyela’ kukaYehova kuSirayeli kwakuthetha ukubuyisela ingqalelo ngenxa yokukholiswa kwakhona ngabantu bakhe. Kuzo zombini ezo meko ‘ukubuyela’ kwakubandakanya isimo sengqondo, kungekhona ukusuka kwenye indawo kuyiwe kwenye.
Ngokufanayo ke, nasekufeni umoya ‘awubuyeli’ kuThixo ngokoqobo ufuduke emhlabeni uye kummandla wasezulwini. Akuba emkile loo mandla obomi emntwini, nguThixo kuphela onako ukuwabuyisela kuye. Ngoko ke umoya ‘ubuyela kuThixo’ ngengqiqo yokuba ithemba lobomi bekamva laloo mntu ngoku lixhomekeke kuThixo ngokupheleleyo.
Ngokomzekelo, qwalasela oko iZibhalo zikutshoyo ngokufa kukaYesu Kristu. Umbhali weVangeli uLuka usichazela oku: “UYesu wabiza ngelizwi elikhulu wathi: ‘Bawo, ndiwuyekela ezandleni zakho umoya wam.’ Akuba etshilo, wabhubha.” (Luka 23:46) Njengoko umoya kaYesu wawuphuma kuye, wayengekho kwindlela eya ezulwini. UYesu akazange avuswe ekufeni de kwalusuku lwesithathu, yaye wanyukela ezulwini emva kweentsuku ezingama-40. (IZenzo 1:3, 9) Noko ke, ngexesha lokufa kwakhe, eqinisekile uYesu wanikela umoya wakhe ezandleni zikaYise, ethembele ngokupheleleyo kumandla kaYehova okumbuyisela ebomini kwakhona.
Ewe, nguThixo kuphela onokubuyisela umntu ebomini. (INdumiso 104:30) Elinjani ukumangalisa ithemba!
Ithemba Eliqinisekileyo
IBhayibhile ithi: “Liyeza ilixa ekuya kuthi ngalo bonke abo bakumangcwaba enkumbulo balive ilizwi [likaYesu] baze baphume.” (Yohane 5:28, 29) Ewe, uYesu Kristu wathembisa ukuba bonke abo bakwinkumbulo kaYehova baya kuvuswa, okanye babuyiselwe ebomini. Eneneni phakathi kwabo kuya kubakho abo baye basukela ikhondo lobulungisa njengabakhonzi bakaYehova. Kodwa izigidi zabanye abantu ziye zafa ngaphandle kokubonisa enoba ziya kulandela imilinganiselo kaThixo yobulungisa kusini na. Mhlawumbi zazingazi ngoko uYehova akufunayo okanye azifumananga thuba laneleyo lokwenza iinguqu ezifunekayo. Nabantu abalolu hlobo bakwinkumbulo kaThixo yaye baya kuvuswa, kuba iBhayibhile ithi: “Kuza kubakho uvuko lwamalungisa nabangengomalungisa.”—IZenzo 24:15.
Namhlanje, umhlaba uzaliswe zizixholoxholo, luphalazo-gazi, lungcoliso nezifo. Ukuba abafi bebeza kubuyela kumhlaba onjalo, ngokuqinisekileyo bebeya konwaba nje okomzuzwana. Kodwa uMdali uthembisa ukuba kungekudala uza kutshabalalisa abantu beli hlabathi abalawulwa nguSathana uMtyholi. (IMizekeliso 2:21, 22; Daniyeli 2:44; 1 Yohane 5:19) Kuya kwandula ke kubekho ibutho labantu abangamalungisa—“umhlaba omtsha.”—2 Petros 3:13.
Ngelo xesha “akakho ummi wakhona oya kuthi: ‘Ndiyagula.’” (Isaya 33:24) Kwanosizi oluziswa kukufa luya kube lungasekho, kuba uThixo “uya kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona. Izinto zangaphambili zidlule.” (ISityhilelo 21:4) Elinjani lona ithemba kwabo “bakumangcwaba enkumbulo”!
Xa uYehova ephelisa ubungendawo emhlabeni, akayi kutshabalalisa amalungisa nabangendawo. (INdumiso 37:10, 11; 145:20) Enyanisweni, “isihlwele esikhulu” sabantu ‘esiphuma kuzo zonke iintlanga nezizwe nezizwana neelwimi,’ siya kusinda “embandezelweni enkulu,” eya kutshabalalisa ihlabathi langoku elingendawo. (ISityhilelo 7:9-14) Ngenxa yoko, kuya kubakho isihlwele esikhulu esiza kwamkela abafileyo.
Ngaba uyakunqwenela ukubona abathandekayo bakho kwakhona? Ngaba uyafuna ukuphila ngonaphakade kwiParadesi esemhlabeni? Ngoko umele ungenise ulwazi oluchanileyo ngokuthanda kukaThixo neenjongo zakhe. (Yohane 17:3) Kukuthanda kukaYehova ukuba “zonke iintlobo zabantu zisindiswe zize zifikelele elwazini oluchanileyo lwenyaniso.”—1 Timoti 2:3, 4.
[Umfanekiso okwiphepha 4]
“Ngokuba uluthuli, uya kubuyela kwaseluthulini”
[Umfanekiso okwiphepha 5]
Umoya unokufaniswa nombane
[Umfanekiso okwiphepha 7]
Uvuko luya kuzisa uvuyo oluhlala luhleli