Imibuzo Evela Kubafundi

Inyoka eyayikumyezo wase-Eden yayidlulisela njani ingcamango yokwaphula umthetho kaThixo kuEva ngokuphathelele umthi wokwazi okulungileyo nokubi?

IGenesis 3:1 ithi: “Ke kaloku inyoka yaba yeyona ilumkileyo kunawo onke amarhamncwa asendle awayewenzile uYehova uThixo. Ngoko yathi kumfazi: ‘Utshilo ngokwenene na uThixo ukuba nize ningadli kuyo yonke imithi yomyezo?’” Kuye kwakho iingcamango ezahlukahlukeneyo ngendlela inyoka ekusenokwenzeka ukuba yathetha ngayo noEva. Enye ingcamango ikukuba yakwenza oko ngezimbo zomzimba. Ngokomzekelo, umfundisi oliNgesi uJoseph Benson wagqabaza esithi: “Kubonakala kusenokwenzeka ukuba yayiyimiqondiso yohlobo oluthile. Eneneni, bambi bacinga ukuba ingqiqo nentetho yayizizinto iinyoka ezazikwazi ukuzenza ngelo xesha, . . . kodwa akukho bungqina boku.”

Noko ke, ngokusebenzisa izimbo zomzimba kuphela, inyoka yayinokuthetha njani noEva ngengcamango yokuba ngokuthabatha isiqhamo esalelweyo wayeza kufana noThixo, akwazi ukugqiba ngoko kulungileyo noko kubi? Ukongezelela, uEva waba nenxaxheba kule ncoko, ephendula umbuzo obuzwe yinyoka. (Genesis 3:2-5) Imbono yokuba inyoka yathetha kuphela ngezimbo zomzimba inokukhokelela kwisigqibo sokuba uEva waphendula ngokusebenzisa izimbo zomzimba, ngoxa iBhayibhile isithi wathetha.

Ebhekisela kwesi siganeko, umpostile uPawulos walumkisa amaKristu akholwa nawo esithi: “Ndiyoyika ukuba ngandlel’ ithile, njengoko inyoka yamlukuhlayo uEva ngobuqhokolo bayo, iingqondo zenu zisenokonakaliswa.” Ingozi uPawulos awayethetha ngayo yayivela ‘kubapostile bobuxoki, abasebenzi benkohliso.’ Isisongelo esenziwa ‘ngabapostile abaziincamisa’ sasingaphelelanga kwizimbo zomzimba. Sasiquka intetho yabo—amazwi abo anobuqili, athethwa ukuze kulahlekiswe abanye.—2 Korinte 11:3-5, 13.

Nangona intetho yasetyenziswa ekulahlekiseni uEva kumyezo wase-Eden, akukho nto ebonisa ukuba inyoka yokoqobo yayinemiphimbo. Eneneni kwakungeyomfuneko ukuba ibe nayo. Xa ingelosi kaThixo yathetha noBhalam isebenzisa imazi yedonki, esi silwanyana sasingafuni ingqula entsonkothileyo efanayo neyabantu. (Numeri 22:26-31) Kucacile ukuba, xa eli ‘qegu lingakwaziyo ukuthetha lathetha ngelizwi lomntu,’ amandla esi senzo ayevela kummandla womoya.—2 Petros 2:16.

Isidalwa sokomoya esasisemva kwenyoka eyathetha noEva sichazwa eBhayibhileni ‘njengenyoka yantlandlolo, leyo ibizwa ngokuba nguMtyholi, noSathana.’ (ISityhilelo 12:9) Amazwi avakalayo uEva awawevayo waza waphendula ayevela kuSathana, ‘ozimilisa okwengelosi yokukhanya.’—2 Korinte 11:14.

[Umfanekiso okwiphepha 27]

“Nibe njengoThixo, nazi okulungileyo nokubi”