Ucoceko—Ngokwenene Luthetha Ukuthini?

NGENXA yeemeko ezothusayo zokungacoceki eYurophu naseUnited States ebudeni benkulungwane ye-18 neye-19, abavangeli basemazweni babeshumayela oko kunokubizwa ngokuthi “yimfundiso yococeko.” Le mfundiso yayifanisa ukungcola nesono, ngoxa kwakusithiwa ucoceko lwalusenza ubani asondele ngakumbi kuThixo. Mhlawumbi koku okwenza intetho eqhelekileyo ethi “ukucoceka kusondele ebuthixweni” idume.

Le mbono yamkelwa yiSalvation Army, eyasekwa nguWilliam noCatherine Booth. Ngokutsho kwencwadi ethi Health and Medicine in the Evangelical Tradition, kwintetho yabo eqhelekileyo babenamazwi athi: “ISepha, iSuphu noSindiso.” Kamva, xa uLouis Pasteur nabanye babonisa ngokuqinisekileyo ukudibana kokugula nentsholongwane, oko kwabangela ukuba abantu bafune ukuhlala besempilweni baze bafumane isizathu esingokwenzululwazi seenkqubo zempilo zasekuhlaleni.

Amanye amanyathelo awathatyathwa kamsinya ayequka ukungabi yomfuneko kokuba ingqina lincamise iBhayibhile enkundleni nokupheliswa kokusetyenziswa kwekomityi yokusela enye ezikolweni nakwizikhululo zikaloliwe. Kwenziwa nemigudu yokuba umntu ngamnye abe nekomityi yakhe kunokusetyenziswa kwendebe enye kwiinkonzo zonqulo. Ewe, abo vulindlela babonakala bephumelela ngokuphawulekayo ekuguquleni isimo sengqondo sabantu ngococeko. Isimo sengqondo sabantu saguquka kangangokuba omnye umbhali wakubiza oku ngokuthi “kukuthandana nococeko.”

Noko ke, kuyabonakala ukuba oku “kuthandana nococeko” yayikukuhanahanisa nje. Kungekudala abarhwebi bayiguqula isepha nje eqhelekileyo yaba yinto eyenzelwa ubuhle. Izibhengezo ezichuliweyo zakhokelela ekubeni abathengi bakholelwe ukuba ukusebenzisa izinto zobuqu zococeko ezithile kuya kubangela ukuba lowo uzisebenzisayo abe semgangathweni kangangokuba abanye bawunqwenele loo mgangatho. Umabonwakude uyayibhengeza le ngcamango. Abantu abaphumelelayo ebomini nabahle kakhulu ababoniswa kwiintengiso nakwimidlalo eqhutywa ngokweziqendu ebalaselisa ubuhenyu abafane babonwe becoca indlu, betshayela iyadi, bechola inkunkuma okanye becoca ukungcola kweekati okanye kwezinja zabo.

Kwakhona kukho abo baqiqa ngelithi ukuya emsebenzini kwenza ukwazi ukuhlawulela iindleko, ngoxa umsebenzi wasekhaya okanye omnye umsebenzi wokucoca ungenaxabiso. Yaye njengoko abantu bengafumani mali, kutheni befanele banyamekele imeko-bume? Omnye umphumo woku kukuba abanye abantu namhlanje bacinga ukuba eyona nto ibalulekileyo kukucoceka emzimbeni kuphela.

Imbono KaThixo Ngococeko

Akuthandabuzeki ukuba loo migudu yangaphambili yokufundisa ucoceko yanceda ukuba iimeko abantu abaphila kuzo ziphucuke. Yaye kufanelekile oko, kuba ucoceko luphawu oluvela kuThixo ongcwele nococekileyo, uYehova. Usifundisa okuyingenelo ngokuthi sibe ngcwele yaye sicoceke kuzo zonke iindlela zethu.—Isaya 48:17; 1 Petros 1:15.

UYehova uThixo ungumzekelo kulo mba. Ucoceko, nezinye iimpawu ezingabonakaliyo, lubonakala ngokucacileyo kwindalo kaThixo ebonakalayo. (Roma 1:20) Siyabona ukuba indalo ngokwayo ayibangeli ukungcola okuhlala kuhleli. Ngokumangalisayo umhlaba nemijikelo yawo yezinto eziphilayo uzicoca ngokwawo, yaye uyilelwe ukuba kuphilwe kuwo ngendlela ecocekileyo nesempilweni. Umsebenzi onjalo ococekileyo uvela kuphela kuMyili oluthandayo ucoceko. Ngoko ke, sinokugqiba ngokuthi, abanquli bakaThixo bafanele bacoceke kuzo zonke iinkalo zobomi babo.

Iinkalo Ezine Zococeko

IBhayibhile ichaza iinkalo ezine abanquli bakaThixo abafanele baluzabalazele kuzo ucoceko. Masiqwalasele nganye kuzo.

Ngokomoya. Olu coceko lusenokugqalwa lulolona lubalulekileyo kuba lunento yokwenza namathemba kabani obomi obungunaphakade. Noko ke, ngokufuthi olu coceko lolona lutyeshelwayo. Ngamafutshane, ukucoceka ngokomoya kuthetha ukungagqitheli ngaphaya kwemida uThixo asibekele yona phakathi konqulo lokwenyaniso nolobuxoki, kuba uThixo ulugqala njengolungacocekanga naluphi na uhlobo lonqulo lobuxoki. Umpostile uPawulos wabhala: “‘Phumani phakathi kwabo, nizahlule,’ utsho uYehova, ‘nento engahlambulukanga ningayichukumisi’; ‘yaye ndiya kunamkela.’” (2 Korinte 6:17) Nomfundi uYakobi ungqalile ngalo mbandela kuba uthi: “Unqulo oluhlambulukileyo nolungadyobhekanga ngokwembono kaThixo noBawo wethu lulo olu: . . . nokuzigcina ungenabala kulo ihlabathi.”—Yakobi 1:27.

Ngokucacileyo uThixo wabonisa ukuba akakholiswa kukumanyanisa unqulo lobuxoki nonqulo lwakhe lokwenyaniso. Ngokufuthi unqulo lobuxoki luquka izenzo zokungcola nonqulo lwezithixo olucekisekayo. (Yeremiya 32:35) Ngaloo ndlela, amaKristu okwenyaniso abongozwa ukuba akuphephe ukubandakanyeka kunqulo olungacocekanga.—1 Korinte 10:20, 21; ISityhilelo 18:4.

Ukuziphatha. Nalapha, uThixo ubonisa umahluko phakathi koko kucocekileyo noko kungacocekanga. Ngokubanzi, ihlabathi linjengoko kuchazwe kwabase-Efese 4:17-19: “Zisebumnyameni ngengqondo, yaye zahlukanisiwe nobomi bukaThixo . . . Zingasaziva konke konke ngokokuziphatha, zizinikele kwihambo evakalala ukuze zisebenze ukungahlambuluki kwalo lonke uhlobo zibawa.” Iingcinga zokuziphatha okubi ezinjalo zivela ngeendlela ezininzi, ngokuphandle nangokufihlakeleyo, ngenxa yoko amaKristu afanele alumke.

Abathandi bakaThixo bayazi ukuba ukuhenyuza, ubufanasini, ukuba neentlobano zesini ngaphambi komtshato nemifanekiso engamanyala kukwaphula imilinganiselo kaYehova yokucoceka ngokuziphatha. Noko ke, olu qheliselo luyinto yomhla nezolo kwezolonwabo nezefashoni. Ngoko ke amaKristu amele ayilumkele imikhwa enjalo. Ukunxiba iimpahla ezimfutshane, eziveza umzimba kwiintlanganiso zamaKristu okanye kwiimbutho zolonwabo kutsalela ingqalelo engeyomfuneko kumzimba kabani yaye kubonisa ukungabikho nyulu. Ngaphandle kokuzisa iingcinga zehlabathi ezingacocekanga kunxulumano lwamaKristu, ukunxiba ngolo hlobo kunokubangela iingcinga ezingacocekanga kwabanye. Le yinkalo amaKristu afanele azibhokoxe kuyo ekubonakaliseni “ubulumko obuvela phezulu.”—Yakobi 3:17.

Ngokwasengqondweni. Iingcamango zikabani azifanele zibe ziingcinga ezingacocekanga. UYesu walumkisa ngokucinga izinto ezingacocekanga xa wathi: “Wonk’ ubani oqhubeka ekhangela umfazi ngokokude amkhanuke sele emkrexezile entliziyweni yakhe.” (Mateyu 5:28; Marko 7:20-23) La mazwi asebenza ngokufanayo nokubukela imifanekiso nemiboniso engamanyala, ukufunda izinto ezithetha ngesini esigqwethekileyo, nokuphulaphula amazwi angcolileyo eengoma. Ngaloo ndlela, amaKristu amele akuphephe ukuzingcolisa ngeengcinga ezingacocekanga ezinokuphumela kwizenzo nentetho engacocekanga nengekho ngcwele.—Mateyu 12:34; 15:18.

Ngokwasemzimbeni. Ubungcwele nococeko ngokwasemzimbeni zinxulunyaniswa ngokusondeleyo eBhayibhileni. Ngokomzekelo, uPawulos wabhala: “Zintanda, masizihlambulule kuko konke ukudyobheka kwenyama nokomoya, sigqibelelisa ubungcwele sisoyika uThixo.” (2 Korinte 7:1) Ngoko ke, amaKristu okwenyaniso alwela ukugcina imizimba, amakhaya neendawo zawo zicocekile, ngokweemeko zawo. Nalapho amanzi okuhlamba anqongophele khona, amaKristu afanele azame ukwenza okusemandleni awo ukuzigcina ecocekile yaye ebukeka.

Ucoceko ngokwasemzimbeni lunokuquka ukuphepha ukusebenzisa naluphi na uhlobo lwecuba, ukuzinkcinkca ngotywala, naluphi na uhlobo lokusebenzisa kakubi iziyobisi, oludyobha nolonakalisa umzimba. Umalusi ochazwe kwiNgoma yazo iiNgoma wayesinandipha isiqholo esimnandi seempahla zentombi yomShulami. (INgoma yazo iiNgoma 4:11) Ukunyamekela ukucoceka kwethu kusisenzo sothando, njengoko sifuna ukuphepha ukubanukisela kakubi abo basingqongileyo. Iziqholo zisenokuba mnandi, kodwa azithabathi indawo yokuhlamba rhoqo nokunxiba iimpahla ezicocekileyo.

Ukugcina Imbono Elungeleleneyo

Ngokuphathelele ucoceko ngokwasemzimbeni, abantu banokugabadela. Kwelinye icala, ukuba nenzondelelo yempambano ngokucoceka kunokwenza ungakuvuyeli ukuphila. Kunokuchitha ixesha elixabiseke kakhulu. Kwelinye icala, amakhaya angcolileyo nangacocekanga anokuba ziindleko ezinkulu ukuwalungisa. Phakathi kwezi meko zimbini ezigabadeleyo kukho indlela esebenzayo nelungeleleneyo ekugcineni ikhaya lethu licocekileyo yaye libukeka.

Ligcine lingaxinananga. Kunzima ukucoca amakhaya namagumbi axineneyo, yaye ukungcola kusenokungabonwa lula kwiindawo ezixinene ngolo hlobo. Kuthabatha ixesha elifutshane ukucoca amakhaya angenazinto zininzi. Indlela yokuphila elula iyanconyelwa eBhayibhileni: “Ukuba sinesixhaso nesambatho, masaneliswe zezo zinto.”—1 Timoti 6:8.

Ligcine licocekile. Yimbopheleleko yakhe wonke umntu ohlala ekhaya ukuligcina licocekile. Ngokufuthi amakhaya angacocekanga aqala ngokuba namagumbi angacocekanga. Ukucoceka kuthetha ukuba yonke into isendaweni yayo. Ngokomzekelo, iimpahla ezingcolileyo azifanele zilahlwe phantsi. Yaye into ebaluleke kakhulu, izinto zokudlala nezixhobo ezishiywe zithe saa zisenokuba yingozi. Iingozi ezininzi ekhayeni zibangelwa yimikhwa yokungacoceki.

Kucacile ukuba, ucoceko nendlela yokuphila yobuKristu ngumtya nethunga. Ngokuphathelele indlela yokuphila yobuthixo, umprofeti uIsaya uthetha ‘ngeNdlela Yobungcwele.’ Yaye wongezelela ingcamango esengqiqweni ngokuthi ‘lowo ungahlambulukanga akayi kudlula kuyo.’ (Isaya 35:8) Ewe, ukuhlakulela imikhwa yococeko ngoku kunikela ubungqina bokholo lwethu kwisithembiso sikaThixo sokuba kungekudala uya kumisa umhlaba oyiparadesi ococekileyo. Kwandule ke, kuzo zonke iindawo zesi sijikelezi-langa sihle, bonke abantu baya kuzukisa uYehova uThixo ngokuvisisana ngokupheleleyo nemilinganiselo yakhe efezekileyo yococeko.—ISityhilelo 7:9.

[Umfanekiso okwiphepha 6]

Ikhaya elicocekileyo liyimbopheleleko yakhe wonke ubani ohlala kulo

[Umfanekiso okwiphepha 7]

Ngokumangalisayo umhlaba uzicoca ngokwawo